Saloy Ay Mala Sohoo?

SALUWAAPPE yiidi saluwaabaa yootida uri baynna gishshau, saluwaabaa eranau danddayettenna giidi daro asay qoppees. Eti Yesuusi: ‘Taani saluwaappe yaas’ giidoogaa dogidaba milatees. (Yohaannisa 6:38) Haymaanootiyaa kaalettiya issotu issotuyookka, i: “Intte garssa asa; taani bolla asa” yaagiis. (Yohaannisa 8:23) Yesuusi saluwaa xeelliyaagan woygidee?

Saloy Yihooway deˈiyoosa gidiyoogaa Yesuusi yootiis. I Xoossaa, ‘saluwan deˈiya ta Aawaa’ yaagidi xeegiis. (Maatiyoosa 12:50) SHin Yesuusi “saluwaa” giya qaalaa daro ogiyan goˈettiis. Leemisuwau, “Eelaasa wodiyan heezzu laittanne usuppun agina gakkanaashin, saloi [gorddettiis]” giido wode, i salo gufanttuwaa “saluwaa” giidi yootiis. (Luqaasa 4:25) Gidikkokka, Yihooway deˈiyoy salo gufanttuwaappe xoqqasaana. Geeshsha Maxaafay: “I biittaa irzzuwaappe bolla baggan ba araatan uttees” yaagees.—Isiyaasa 40:22.

‘Saluwan deˈiya Aaway’ deˈiyoy xoolintteti deˈiyosaanee? Xoolintteti deˈiyosaykka Geeshsha Maxaafan “saluwaa” geetetti xeegettiis. Leemisuwau, issi mazamuraawee: “Neeni ne biradhdhetun medhdhido ne salota, sohuwan sohuwan neeni wottido aginaanne xoolintteta taani be7⁠iyo wode, neeni asabaa qoppanau asi aibee?” yaagidi xaafiis.—Mazamure 8:3, 4.

Issi anaaxee ba medhido saaxiniyan deˈennaagaadan, Xoossaa Yihoowaykka beettiya saluwan deˈana bessenna. Kawuwaa Solomoni Yerusalaamen Yihoowayyo beeta maqidasiyaa anjjissiyo wode, “Xoossai tumu sa7an de7aneeyye? Be7a, saloti, ubbaappe xoqqan de7⁠iya saloikka neeyyo gidanau danddayenna. Yaatin, ha taani keexxido Beeta Maqidasee neeyyo ai keenaa guuxxanddeeshsha!” yaagidoy hegaassa. (1 Kawotu 8:27) Yihooway beettiya saluwan deˈennaba gidikko, i deˈiyo saloy awugee?

Asay wolqqaama teleskkoppiyaa goˈettidi beettiya saluwaa pilggidabanne amaridaageeti shaaraappe kanttidi biidaba gidikkonne, Geeshsha Maxaafay: “Xoossaa be7⁠ida asi mulekka baawa” giyoogee tuma. (Yohaannisa 1:18) Yesuusi: “Xoossai ayyaana” giido wode hegaa gaasuwaa qonccissiis.—Yohaannisa 4:24.

Ayyaana deˈoy asaagaappe keehi xoqqa gidida deˈo. Ayyaana bollay asaagaadan ashoynne suuttay deˈiyo, asi beˈana danddayiyo bolla gidenna. Hegaa gishshau, Yesuusi “saluwan” ba Aawaara deˈidoogaa yootido wode, ay meretaagaappekka keehi boncho gidida deˈuwaa deˈidoogaa qonccissanau koyiis. (Yohaannisa 17:5; Piliphphisiyuusa 3:20, 21) Yesuusi ayyaana mereta gididi ba Aawaara deˈidoy, Geeshsha Maxaafay “saluwaa” giyo sohuwaana. Hegee ay mala sohoo? Yan oosettiyaabay aybee?

Ufayssiya Oosoy Oosettiyo Sohuwaa

Saloy daro oosoy oosettiyo soho gidiyoogaanne yan miilooniyan qoodettiya ammanettida ayyaana meretati deˈiyoogaa Geeshsha Maxaafay yootees. (Daaneela 7:9, 10) Ha ayyaana meretatu ubbaa eeshshay dumma  dumma. Nuuni hegaa waati erana danddayiyoo? Ayfiyan beettiya meretatu giddon ubbaban issi mala gidida naaˈˈu meretati deˈennaagaadan, saluwan deˈiyaageetu giddonkka daro dummatettay deˈiyoogaa ammanettana danddayoos. Saluwan deˈiya ha ubba meretati issippetettan issippe oottoosona; darotoo issippetettan issippe oottenna, ha wodiyan saˈan deˈiya asaagaappe hegee keehi dumma.

Saluwan deˈiya oosuwaa xeelliyaagan Geeshsha Maxaafay yootiyoobaa akeeka. “Inttenoo, a kiitanchchatoo, a azazuwaa poliya wolqqaamatoo, i giyoobaa ezggiyaageetoo, GODAA galatite! Inttenoo saluwan de7⁠iya minotoo, a sheniyaa oottiya ashkkaratoo, GODAA galatite!” (Mazamure 103:20, 21) Yaatiyo gishshau, saluwan daro oosoy oosettees. Hegee ufayssiya ooso gidiyoogaa ammanettana danddayoos.

Kiitanchati saˈay merettanaappe kase doommidi, daro wodiyau ufayssiya oosuwaa oottiiddi takkidosona. Yihooway saˈaa medhido wode, kiitanchati “issippe yexxidoogaanne” qassi “ubbai ufaissau ililidoogaa” Geeshsha Maxaafay yootees. (Iyyooba 38:4, 7) Saluwan deˈiya Xoossaa naatuppe issoy, Xoossay ubbabaa medhiyo wode aara issippe oottiyo maataa demmiis. (Qolasiyaasa 1:15-17) Saluwan oosettiya ufayssiya oosuwaa xeelliyaagan ha loˈˈo qofay, saluwaanne asaa naata xeelliyaagan neeni issi issi oyshata denttanaadan oottana danddayees.

Asay Saluwaa Baanaadan Halchettidee?

Saˈay merettanaappe kase kiitanchati saluwan Xoossaayyo oottiyo gishshau, koyro bitaneenne maccaasiyaa corattidi, saluwaa kumanaadan merettibeennaagee qoncce. Hegaappe dumma ogiyan, Xoossay koyro bitaniyaanne maccaasiyo: “Yelettite; corattite; ha sa7aa [kumite]” yaagiis. (Doomettaabaa 1:28; Oosuwaa 17:26) Addaamee Xoossaa eranaunne ayyo ammanettidi oottanau danddayiya, saˈan koyro mereta gidiis. I saˈan deˈana asa zariyau aawa gidana. “Bolla xoqqa saloi Xoossaabaa; shin sa7aa i asaassi immiis.”—Mazamure 115:16.

Asay hayqqanau koyenna; qassi merettidoykka hayqqanaassa gidenna. Xoossay Addaameyyo hayquwaabaa yootidoy, azazettennaba gidikko, qaxxayettiyoogaa yootido wode. Addaamee azazettidaba gidiyaakko, mule hayqqenna shin.—Doomettaabaa 2:17; Roome 5:12.

Hegaa gishshau, Addaamee saluwaa baanaagaa Xoossay aynne yootibeennaagee garamissenna. Yaatiyo gishshau, saˈay asay saluwaa baanau gidaa kunttanau paacettiyo soho gidanaadan merettibeenna. Asay saˈan merinau deˈanaadan merettiis; Xoossaa halchoy hagee polettiichibeenna. Geeshsha Maxaafay, “Xilloti biittaa laattananne yan merinau de7ana” giidi yootees. (Mazamure 37:29) Asaa naati saluwaa baanaadan halchettidi merettibeennaagee qoncce. Yaatin, Yesuusi ba kiittidoogeeti saluwan deˈanaagaa etassi qaalaa gelidoy aybissee? Yesuusi loˈˈo asa ubbay saluwaa baanaagaa yootidee?