Mang e Tharmiy?

BOCH e girdi’ e yad ma lemnag ni dabiyog ni ngar nanged fan e tharmiy, ya dariy be’ ni ke yib u tharmiy ni nge weliy murung’agen ngodad. Sana kar paged talin e n’en ni  yog Jesus ni gaar: “Ku gub u tharmiy nga but’.” (John 6:38) Ki yog Jesus ngak boch e pi tayugang’ ko teliw ni gaar: “Gimed e mbad u roy u but’, machane gag e gub u lang.” (John 8:23) Mang e weliy Jesus u murung’agen e tharmiy?

Ke tamilangnag Jesus ni tharmiy e aram e gin ni ma par Jehovah riy. I yog Jesus ni gaar: ‘Chitamag ni ga bay u tharmiy.’ (Matthew 12:50) Machane ke fanay Jesus fare bugithin ni “tharmiy” ni nge yip’ fan boch ban’en. Maku be weliy murung’agen e “tharmiy” ni nge yip’ fan lan e lang u nap’an ni gaar: “A mu guyed e arche’ ni yad be chachangeg [u lan e lang].” (Matthew 6:26) Machane ma par Jehovah ni kab tolang nga lan e lang. Ya be gaar e Bible: “Ke sunumiy e en ni ba’ ni ke par nga tagil’ u puluwon e fayleng nga lang ko gin nth’abi tolang.”​—Isaiah 40:22.

Ma par e “En Chitamangiy nu tharmiy” u fithik’ e pi t’uf? Ku be yog e Bible e “tharmiy” ko pi n’en ni bay u lan e lang. Bod ni yoloy reb e psalmist ni gaar: “Faan gu ra yaliy lan e lang ni gur e kam sunumiy, nge pul nge pi t’uf nu lan e lang, ni gur e mu ta’rad nga tagil’rad, me lungug u wun’ug, girdi’ e mang ni ngam lemnag?”​—Psalm 8:3, 4.

Danga’, dar ma par Jehovah u lan e lang ko gin ni bay e pi’ t’uf riy ni ke sunmiy, ni bod reb e daykusang ni dar ma par u lan reb e srangk ni ir e ke ngongliy. Nap’an ni ognag Solomon ni Pilung fare tempel nu Jerusalem ngak Jehovah, me yog ni gaar: “Gur rayog ni nge par Got u fayleng? Tharmiy ni ga’ngin e dab mu taw nga lan, ere dabiyog ni ngam taw nga lan e re tempel ney ni kug toy.” (1 Kings 8:27) Faanra dar ma par Jehovah u lan e lang u fithik’ e pi t’uf, ere mang fare tharmiy ni ma par riy?

Yugu aram rogon ni ke fanay boch e girdi’ e telescope ni ngar filed murung’agen boch ban’en u lan e lang, ma boch i yad e ke yan ka taw ko pul, machane kab riyul’ e n’en ni yog e Bible ni gaar: “Dariy be’ ni kaa guy owchen Got.” (John 1:18) Ma ke weliy Jesus ko mang fan u nap’an ni yog ni gaar: “Yi Got e Kan.”​—John 4:24.

Kan e kab tolang ko girdi’. Ma dabiyog ni ngad guyed yad, ya dariy e ufin nge racha’ rorad ni bod e girdi’. Ere nap’an ni yog Jesus ni immoy u tooben e En ni Chitamangin u “tharmiy,” ma be yip’ fan ni nap’an ni immoy u tharmiy mab fel’ rogon e yafas rok nga rogon ni immoy u fayleng. (John 17:5; Filippi 3:20, 21) Gin ni ma par Jesus riy u tooben e En ni Chitamangin u m’on ni yib nga fayleng e ku be yog e Bible ni aram e “tharmiy.” Uw rogon e gi n’em ni yow ma par riy? Ma mang e yima rin’ u rom?

 Bang ni Boor Ban’en nib Fel’ ni Yibe Rin’ Riy

Be yog e Bible ni boor ban’en ni yibe rin’ u tharmiy. Bokum milyon e pi engel ni yad ba yul’yul’ ni yad ma par u rom. (Daniel 7:9, 10) Ba thilthil rarogorad. Mang e ke rin’ ma kad nanged ni aram rogon? Ya bochan dariy l’agruw ban’en ni ke sunmiy Jehovah u roy u fayleng ni ri taareb rogon, ere ku aram rogon u tharmiy. Machane yad urngin ni yad ma maruwel u taabang ni yad ba taareb, ni de taareb rogon ko girdi’ nu roy u fayleng ni de taareban’rad.

A mu lemnag ko mang e be yog e Bible u murung’agen e n’en ni yibe rin’ u tharmiy ni gaar: “Gimed e pi engel ni bay gelngimed nib gel, ni gimed be fol ko tin ni ke yog ni nguun rin’, ma gimed ma rung’ag e tin ni ma yog, mpininged e sorok ngak Somol! Gimed gubin e pi tapigpig nu tharmiy ni ba’ gelngimed nib gel, ni gimed e pi tapigpig ni gimed be rin’ e tin nib m’agan’ ngay, mpininged e sorok ngak Somol.” (Psalm 103:20, 21) Ere boor ban’en ni yibe rin’ u tharmiy. Mab mudugil ni ireray e bin th’abi fel’ e maruwel ni yibe rin’.

Kab kakrom u m’on ni dawor ni sunumeg e fayleng nge mada’ ko chiney ma kan nang rogon e pigpig nib fel’ ni ma tay e pi engel. Rogon ni be yog e Bible e nap’an ni i sunumeg Jehovah e fayleng ma “pi fak Got e ur tolulgad u fithik’ e felfelan’.” (Job 38:4, 7) Bay bagayad e pi engel nem ni ur maruwelgow Jehovah u taabang u nap’an ni ke sunmiy urngin ban’en. (Kolose 1:15-17) Bochan e re n’ey ma ke sum boch e deer u murung’agen e tharmiy nge fayleng.

Kan Sunmiy e Girdi’ ni nge Yan nga Tharmiy, fa?

Pi engel e ur pigpiggad ngak Got u tharmiy u m’on ni kan sunmiy e fayleng, ere ba tamilang ni de sunmiy Got Adam nga Efa ni fan e nge yoor e girdi’ u tharmiy. I yog Got ngorow ni gaar: “Mu diyengow nge yoor pi fakmew, nge wer e piin ni owchemew nga gubin yang u fayleng.” (Genesis 1:28; Acts 17:26) Adam e en som’on ni kan sunmiy nga fayleng, ni bay rogon ni nge nang murung’agen Got me yog ni ngan pigpig ngak u fithik’ e yul’yul’. Kan sunmiy ni nge mang chitamangin e girdi’ ngar tafnayed e fayleng. “Tharmiy e ke mus ni Somol e mmil suwon ngak, ma fayleng e ke pi’ ngak e girdi’.”​—Psalm 115:16.

Ba ga’ ni dabun e girdi’ ni nge yim’, ere fini th’ab Adam e motochiyel rok Got ma aram me yog Got ngak ni ra yim’. Faan gomanga fol Adam ma dabi yim’.​—Genesis 2:17; Roma 5:12.

Ere dab ni gin ngay ni de yog Got ngak Adam ni ra yan nga tharmiy. Ma fayleng e gathi aram e gin yibe skengnag e girdi’ riy, ngan guy ko rayog ni nga ranod nga tharmiy fa dabiyog. Kan sunmiy e girdi’ ni ngar pared u roy u fayleng ni dariy n’umngin nap’an, ma ra lebug e re n’ey boch nga m’on. Bible e be micheg ni “piin ni yad mmat’aw e bay ra pired u daken e binaw u fithik’ e gapas, me par ni taferad ni dariy n’umngin nap’an.” (Psalm 37:29) Ere ba tamilang ni da ni sunmiy e girdi’ ni nge yan nga tharmiy. Ere mang fan ni micheg Jesus ngak e pi apostal rok ni nga ranod nga tharmiy? Gur, re n’ey e be yip’ fan ni urngin e girdi’ nib fel’ e yad ra yan nga tharmiy?