Refo Fyadwer Kankenem

ROSAI ḇedif son Rastafaria oso fa kyawuk pik ḇepusmar ḇyena ma dayin snonggaku ḇekif pyoper sya wer ḇa? Ma, imbude rosai ḇefrur roma babo ḇerarmomen ḇembran ḇeyor pipi fa fyadwer kenem ḇyedi? Mgomam kankarem suḇena.

”Yayin Snonggaku Ḇese Wer Ḇa.”​—HAFENI NGHAMA

ḆYEUMUR: 34

SUP RYAMA YA: ZAMBIA

FARFYAR ḆYEJA: ANGGOTA RASTAFARIA

KENEM AYEDI RO RANDAKYA: Yaḇeaḇen ro kamp pengungsi ḇero Zambia. Awin yedi ifrar iḇur Namibia ro fafisu mamamun na ma iryur kuker Organisasi Rakyat Afrika Barat Daya (SWAPO). Organisasi ine myamunmun kuker rezim Afrika Selatan ḇepoik Namibia ro fafisu anya.

Yaḇarek ro kamp pengungsi ḇeḇeso isof yaḇeumur taun ri 15. Romawa babo ḇero kamp SWAPO ansi sfarkor si fa sisaramper kaku raryur ḇesewar ḇaḇemkei. Sfarkorninyan nggo ma sfarkor insama nggayin snonggaku ḇekif pyoper sya.

Fafisu yaḇeumur 11, yamarisen yakḇe Kristen ro gereja ḇeroyo kamp ani isoine raryur ro Katolik Roma, Lutheran, Anglikan, ma eḇesena. Pastor yasrow ya ifrur fa yaḇesanekar, rawo yamewer yafrur roi yamarisen ro ḇepondi na. Fafisu ya mura yakḇe ateis. Boi, rofyor yaḇeumur 15, marasrisen yedi faro musik reggae na ma kako marisen fa yafrur mnai ḇaḇefrurpyum ḇa snonggaku Afrika sya sismai na, nadif kaku aya fa yakso ro raryur Rastafaria. Yafrur pusmar pik yena, yasyor ganja, yanan mamfnai ḇa, ma yaḇriwarek ḇaḇemkei faro snonggaku ḇekif paisem sya. Ḇape, yafadwer kenem ḇeḇye ḇa yena ḇa ma kako yamam ker felem ḇesero mamamun na. Aya kako yawos fanfadak ker.

RARISO REFOYA FYADWER KENEM YEDI: Ro fafisu taun 1995, fyor yaḇeumur taun ri 20, insape yakara pyum kaku rosai imbe yasewar ro kenem yedine. Yafarkor syap Rastafaria yasmai nakam. Ḇeḇeso ro syap ani naser mnuk ro Refo, mboi roi sfas ḇero dori na nsun ro swaruser ḇa. Inja, yun snemuk fa yawasya Refo ya.

Ḇarpur mura, bati Rastafaria yedi oso byuk ḇe aya syap fa byukifarkor Refo ḇeḇefrur ya iso Saksi-Saksi Yahwe. Yafarkor syap ine ma Refo ro manggundaya. Ḇarpur ya mura yasrow kuker Saksi Yahwe sya ma yafarkor Refo kuker si pdef.

Yaḇensewar marmar kaku fa yamnai ro aninem swan ma sasyor tabaku. (2 Korintus 7:1) Yafarwe moḇ yasnai raya, yakawuk pik ḇepusmar yena, yamam pornografi ḇa ḇaido felem ḇefasnai mamamun, ma kako yamnai yawos fanfadak. (Efesus 5:3, 4) Ḇarpur mura, yayin snonggaku ḇekif pyoper sya wer ḇa. (Kisah 10:34, 35) Fararwe yafrur nane kako iso yarower wer ḇa musik ḇedif ko fa kayin keret ḇese ma yamewer yaḇeḇati kuker ḇati ḇepon ayesi wer, ḇesewar kaku insama yakenem imnis nyan kenem yedi ro ḇepondi na.

Fyor yafrur fararwe anna kwar, yasewar Ḇalai Kerajaan Saksi-Saksi Yahwe ma yor insama yaksun ro agama ani. Sbuk farkarkor Refo ḇe aya. Fyor yun snemuk fa yaḇebaptis ḇe Saksi Yahwe, kina ayesya simarisen ḇa. Awin yedi iwan fa yakinfir agama ”Kristen” ḇeḇese boi Saksi Saksi Yahwe awer. Imem yedi oso, nya nasan ḇe pejabat pamarenta, imsor ker aya snar yun snemuk fa yakḇe Saksi Yahwe.

Snar, yafarkor kwar rariso Yesus ifrur pyum snonggaku sya rai ma yaso farkarkor ḇyena, nane nafnoḇek kaku aya fafisu sidwarek ma skoryae aya. Fafisu yamamkara rosai Saksi sya sfarkor na kuker rosai Refo ikofen na ido, yakyar kaku snar, yasrow agama ḇekaku ya kwar. Raris, siso pyum parenta ro Refo isoine sḇaryas abar ḇepyum faro snonggaku ḇesesya. (Matius 28:19, 20; Kisah 15:14) Ma kako sisowarpu ro polotik ya ḇa.​—Mazmur 146:3, 4; Yohanes 15:17, 18.

BARAKAS YASMAINA: Snar yakenem imnis farkankin ro Refo, inja yasmai payamyum ro kenem yena. Imnis ra, yasyor ganja wer ḇa, yafnak kumpan dolar riutin swaf paik oser wer ḇa. Kakara yena nawayan farma wer ḇa, ma swaruser yena namnis ma ḇaken yena naprei syadi wer.

Kirine yafawi rosai imḇe yafrur ro kenem yena, roi yamarisen kaku ro fafisu yababo kaker anya. Ma ḇefandun syadi iso, kirine yaḇaḇir yafanam faro Allah.​—Yakoḇus 4:8.

”Yafarkor Kwar fa Yafarmku Masasor Yena.”​—MARTINO PEDRETTI

ḆYEUMUR: 43

SUP RYAMA YA: AUSTRALIA

FARFYAR ḆYEJA: ḆYOḆ NARKOBA

KENEM AYEDI RO RANDAKYA: Kina yesi sra ḇe moḇ ḇeḇese rarya ker isof yaba muryas kwar. Yaḇarek kwar ro mnu kasun, mnu ḇeba na ma kako ro kompleks zending Aborigin ḇero supyado. Yana fawar ḇepyum kaku fafisu aya isya kuker napirman ma imem yesya—nggora swan, nggosamsam ro sup yado, nggofur bumerang, ma nggopaikir kareren ḇeḇeso na.

Kamam yedima petinju diri, inja fyarkor aya farfnak tinju rofyor yaḇaḇa kaker. Rarmomen ima nyan kenem yediri. Rofafisu yaḇe romawa babo kaker, oras yena naḇro monda fa yafarandinem ro ḇar. Aya ma ḇati yesya nggomarisen nggofnai rakrok na ker. Fyorno nggobuk ker pemukul bisbol ḇaido inoi na fa nggomun snonggaku ri 20 ḇaido nasyadi.

Yasewar pipi kuker yaḇoḇ roieḇor ḇefararur ro pelabuhan sya skaraw na roḇaido yaḇoḇ narkoba. Aya kako yamḇran yor pipi ro ḇeḇoḇ narkoba ḇesesya ma yafrur makak si kuker pistol roḇaido romamun yabukimun aiwan sya. Yamarisen kaku fa yakḇe snonmamum sbak fa smun snonggaku sya. Yakara monda: Yamun si ḇa ido na smun aya.

RARISO REFOYA FYADWER KENEM YEDI: Yafawi Saksi Yahwe ro fafisu yabaḇa kaker. Fafisu yaḇeumur taun ri 20 kwar, yaswarepen yafuken ḇe Awini isya fyawi moḇ sisya roya ke. Ras ri suru mura, Saksi oso snoriso Dixon, nyuk kedwa ya. Fyor nufafyar ro swaf ḇeḇeso kwar, dor aya fa yakraḇe fananjur ari ro Saksi-Saksi Yahwe. Yaraḇe fananjur ani ma kirine indokada nasyadi ro taun ri 20 kwar yara ḇe fananjur. Fafisu yaḇuk fakfuken oso, nari Saksi sya skarem roro Refo ya.

Yamarisen snar yafawi Yahwe imarisen faro snonggaku oser-oser, ma faro snonggaku ḇesouser ḇa sya kako. (2 Petrus 3:9) Fafisu ono sisya simewer smamwarek aya no, yakyar kaku Kma ḇesawarwar isya myamwarek aya. Aya kako yasmai sneprei snar yafawi yafadwer kaku kenem yedi ido nari Ipyos sasar yafrur na. Efesus 4:22-24 nafnoḇek kaku aya. Mnuk-mnuk anna nḇuk swarapepen ḇe aya fa ’yasawen kenem ḇekwar yena’ ma ’yakenem babo imnis Allah marisen Ḇyena’.

Yafandun swaf fa yafarwe kenem yena. Minggu oser ido bisa yamḇran na kuker yasyor narkoba ḇa, boi ro minggu ḇepur na, fyor yakainus bati yesya, yasusu bo yakif ganja wer. Yafawi fandun fa yabur bati yesine insama yakenem mnis kaḇer, inja yun snemuk fa yara ḇe sup ḇesena. Ḇeḇeso ro bati yedi sor insa sun pyan aya, inja yamarisen. Ro marandan ya sisyor ganja ma imbe sbuk fa yasyor kako. Yakofen ḇe si snar yasawen kenem ḇeraryana kwar mura nggoḇesisye ro perbatasan. Swaf ya kawan ḇa, yarower bati yesya ansi suf pistol ḇo sfasyar bank oso.

BARAKAS YASMAINA: Fafisu yamnai yaḇeḇati kuker bati yesya ansya napyan ḇe aya fa yafrur fararwe fandun fa yafrur na. Ro taun 1989, yakḇe baptis ḇe Saksi oso. Fyor yaḇebaptis kwar, srar kasun yedi, awin ma kamam yedi, sikame sikayam kuker aya fa nggofarmyan ḇe Yahwe I.

Yafarḇuk swaf taun ri 17 kwar ma yana romawa ḇefurpyum sya sekyor. Yafarkor kaku kwar fyor sawos roi ḇefrur fa yamsor yano, nari yafarmku masasor yena. Ma yafarkor kwar insama yaswar snonggaku ḇerama ro ’er, keret, ma wos sarirya monda’. (Wahyu 7:9) Yaḇaḇir ro manggundaya Yesus wos ḇyena. Ikofen, ”Kaku ḇeri rofyor mkokin nako wos ayena, rarirya mkoḇe manfamyan kaku ḇe aya ma nari mkofawi napnapesya ma napnapesya nari ḇyuk ḇaḇemkei faro mko.”​—Yohanes 8:31, 32.

[Ḇeḇeyap]

Fararwe yafrur nane kako iso yarower wer ḇa musik ḇedif ko fa kayin keret ḇese

[Ḇeḇeyap]

Aya ma ḇati yesya nggomarisen nggofnai rakrok na ker. Fyorno nggobuk ker pemukul bisbol ḇaido inoi na fa nggomun snonggaku ri 20 ḇaido nasyadi