Bible Okpụhọde Mme Owo

NSO ikanam owo Rasta afat anyan idet esie onyụn̄ etre ndisari mbakara? Nso ikonyụn̄ inam owo afai emi ekesikpakde isọn ọnọ mme anyam n̄kpọsọn̄ ibọk okpụhọde usụn̄ uwem esie? Kop se mme owo emi ẹtịn̄de.

‘Mma n̄kam ntre asari.’—HAFENI NGHAMA

ISUA EMANA: 34

IDỤT EMI NTODE: ZAMBIA

UTỌ OWO EMI N̄KEDIDE: OWO RASTA

NTE N̄KESIDUDE UWEM: N̄kamana ke itienna itọkekọn̄ ke Zambia. Eka mi ekefehe ọkpọn̄ Namibia ke ini ekọn̄ onyụn̄ odụk N̄ka Mbon Edem Usụk ye Edem Usiahautịn Africa (SWAPO). N̄ka emi akan̄wana ye ukara South Africa oro akakarade Namibia ini oro.

Mma ndụn̄ ke ediwak itienna itọkekọn̄ ntisịm isua 15. Ẹkenọ nditọwọn̄ oro ẹkedude ke mme itienna SWAPO ukpep man ẹnam mme owo ẹfiọk n̄ka oro. Ẹma ẹkpep nnyịn mme mbubehe ukara ẹnyụn̄ ẹkpep nnyịn ndisua mbakara.

Ke ini n̄kedide isua 11, mma ndọhọ ẹsịn mi enyịn̄ nte Christian ke ufọkabasi—emi mbon Catholic, Lutheran, Anglican, ye mbon eken ẹkedianade kiet ẹnam—oro okodude ke itienna oro. Pastọ oro n̄kasiande n̄kpọ emi ama ọdọhọ mi nsion̄o idem mfep. N̄kenịmke aba ke Abasi do toto ke ini oro. Edi ke ini n̄kedide isua 15, ima oro n̄kamade ikwọ rege ye udọn̄ oro n̄kenyenede nditre ndusụk utụk oro ẹketụkde mbubịt owo Africa ama anam ndụk n̄ka Rasta. Mma ntan̄ nnyan idet, n̄n̄wọn̄ ikọn̄ekpo, ntre ndita unam, nnyụn̄ nsidọhọ ke mbubịt owo ẹnyene ndibọhọ ufụn. Edi n̄ketreke oburobụt ido, n̄konyụn̄ ntreke ndise senima afai. Mma nnyụn̄ n̄ka iso ntịn̄ ndek ndek ikọ.

NTE BIBLE OKOKPỤHỌREDE UWEM MI: Ke 1995, ke ini n̄kedide n̄kpọ nte isua 20, mma ntọn̄ọ ndinen̄ede n̄kere se n̄kpadade uwem mi nnam. Mma n̄kpep kpukpru n̄wed mbon Rasta oro n̄kokụtde. Ndusụk n̄wed oro ẹma ẹkot n̄kpọ ẹto Bible, edi nte mmọ ẹtatde mme itie oro mmọ ẹkotde ẹto ikọwọrọke n̄kpọ ndomokiet inọ mi. Ntre mma ndọhọ ke nyokot Bible ke idemmi.

Ekem, owo Rasta kiet ama ọnọ mi n̄wed ukpep Bible oro Mme Ntiense Jehovah ẹsiode. Mma n̄kpep n̄wed emi ye Bible ke idemmi. Nte ini akakade, mma nsobo ye Mme Ntiense Jehovah nnyụn̄ n̄ka iso n̄kpep Bible ye mmọ.

Mma nnen̄ede nsịn ukeme tutu ntre ikọn̄ekpo ye ọkpọsọn̄ un̄wọn̄ mmịn. (2 Corinth  7:1) Mma ntọn̄ọ ndikama idem nte eyenowo, mfat anyan idet mi, ntre ndise ndise idan̄ ye senima afai, nnyụn̄ ntre ndisitịn̄ ndek ndek ikọ. (Ephesus 5:3, 4) Ke akpatre, mma n̄kam ntre ndisari mbakara. (Utom 10:34, 35) Man nnam ukpụhọde emi, ama oyom nduọn̄ọ ikwọ oro ẹsịnde udọn̄ ẹnọ edisari mme owo nnyụn̄ ntre ndụk ye n̄kani ufan mi, emi ẹkpenamde mi mfiak n̄ka akani usụn̄ uwem mi.

Ke mma n̄kanam mme ukpụhọde emi, mma nyom Ufọkmbono Obio Ubọn̄ Mme Ntiense Jehovah n̄kụt nnyụn̄ ndọhọ ke nyom ndidụk ido ukpono oro. Ẹma ẹtọn̄ọ ukpepn̄kpọ Bible ye ami. Ubon nnyịn ikenemke esịt ke ini n̄koyomde ndina baptism nte kiet ke otu Mme Ntiense Jehovah. Eka mi ama ọdọhọ mmek inua-okot ido ukpono Christian en̄wen, edi okûdi Mme Ntiense Jehovah. Iman eka mi kiet emi ekedide akwa owo ukara, ama esisua ọnọ mi kpukpru ini ke ntak emi nyomde ndibuana ye Mme Ntiense.

Edi ndikpep nte Jesus ekesinamde n̄kpọ ye mme owo, ndien ekem nda item esie nsịn ke edinam, ama an̄wam mi nyọ ubiọn̄ọ ye nsahi. Mma n̄kụt ke ido ukpono Mme Ntiense edi ido ukpono akpanikọ ke ini n̄kemende se mmọ ẹkpepde ndomo ye se Bible etịn̄de. Ke uwụtn̄kpọ, mmọ ẹnam ewụhọ Bible oro ọdọhọde ẹkwọrọ ikọ ẹnọ mbon en̄wen. (Matthew 28:19, 20; Utom 15:14) Mmọ isinyụn̄ isịnke idem ke mbubehe ukara.—Psalm 146:3, 4; John 15:17, 18.

UFỌN ORO MBỌDE: Mmọbọ ediwak ufọn ke ntak emi n̄kpepde ndida mme edumbet Bible nsịn ke edinam. Ke uwụtn̄kpọ, nditre ikọn̄ekpo amanam mi ntre ndibiat ata ediwak okụk kpukpru ọfiọn̄. Nsinyeneke aba ndap ndap ekikere, ndien idem mi enen̄ede ọsọn̄ idahaemi.

Idahaemi uwem mi enyene se ọwọrọde onyụn̄ enyene uduak, kpa n̄kpọ emi ọkọdọn̄de mi toto ke uyen. Edi se idide akpan n̄kpọ ikan edi ke mmọfiọk ke mmasan̄a n̄kpere Abasi.—James 4:8.

“Mmekpep ndisụhọde esịt.”—MARTINO PEDRETTI

ISUA EMANA: 43

IDỤT EMI NTODE: AUSTRALIA

UTỌ OWO EMI N̄KEDIDE: ANYAM N̄KPỌSỌN̄ IBỌK

NTE N̄KESIDUDE UWEM: Ubon nnyịn ẹma ẹsiwọrọ idụn̄ ndien ndien ke ini n̄kedide eyenọwọn̄. Ima idụn̄ ke n̄kpri obio, ke akwa obio, ye ke ufọkabasi Protestant mme amanaisọn̄ Australia ke obio-in̄wan̄. Uwem ama enem mi etieti ye nditọ nditọeka eka mi ye mme ete mmọ—ima isikọ iyak, ika utop, inyụn̄ ida eto isọi n̄kpọ.

Ete mi ekedi otopita onyụn̄ ekpep mi ndin̄wana en̄wan  toto ke ini n̄kedide ata ekpri. Mma nsin̄wana en̄wan kpukpru ini. Ke ini n̄kodude ke iduọk isua 13 esịm 19, mma nsibiat ekese ini n̄n̄wọn̄ n̄kpọ ke itie un̄wọn̄ mmịn. Ami ye ufan mi ikesisasan̄a iyom en̄wan. Ima isida ikwa ye eto in̄wana ye otuowo emi ẹwakde ẹsịm owo 20 m̀mê akande oro.

N̄kesin̄wana okụk ke ndinyam n̄kpọsọn̄ ibọk ye n̄kpọ oro mme anamutom ke itie mbehe nsụn̄ikan̄ ẹyịpde. Mma nsikpak isọn n̄ko nnọ mme anyam n̄kpọsọn̄ ibọk nnyụn̄ nda ikan̄ ndịghe mme akama-isọn, uwem. N̄koyom ndikabade ndi owotowo emi ẹkpede-kpe. Ufiet mi ekedi, Mûwotke owo, owo oyowot fi.

NTE BIBLE OKOKPỤHỌREDE UWEM MI: Mma n̄kop mban̄a Mme Ntiense Jehovah ke ini n̄kedide eyenọwọn̄. Mmeti nte n̄kobụpde eka mi ke ini n̄kodude ke ntọn̄ọ ntọn̄ọ iduọk isua 20 m̀mê enye ọfiọk ebiet emi owo mmọ ekededi odude. Ke usen iba ẹma ẹkebe, Ntiense emi ekerede Dixon ama edi ufọk mi. Ke ima ikenyene nneme ibịghi esisịt, enye ama okot mi mbono esop Mme Ntiense Jehovah. Mma n̄ka mbono esop oro ndien mmodụk mme mbono esop oro mbe isua 20 idahaemi. Mme Ntiense ẹma ẹda Bible ẹbọrọ kpukpru mbụme oro n̄kobụpde.

Ama enem mi ndifiọk ke Jehovah ama mme owo, idem mbon oro mîten̄eke Abasi. (2 Peter 3:9) Mma ndi ndifiọk ke enye edi edima Ete emi edisede aban̄a mi, idem ke ini owo en̄wen mîsehe iban̄a mi. Ama enen̄ede enem mi ndifiọk n̄ko ke enye ayadahado ọnọ mi edieke n̄kabarede esịt. Ephesus 4:22-24 ama enen̄ede otụk mi. Itien̄wed oro ama esịn udọn̄ ọnọ mi ete ‘nsio akani owo nduọk’ nnyụn̄ ‘mmen obufa owo nsịne emi ẹkebotde nte ekemde ye uduak Abasi.’

Ama ada ini mbemiso n̄kokpụhọde uwem mi. Mmekeme nditie ofụri urua ndaha n̄kpọsọn̄ ibọk, edi mma ndu ye mme ufan mi ke utịturua, nyetiene nda sia mmọ ẹdade. Mma ndifiọk ke n̄kenyene ndiwọrọ n̄kpọn̄ mme nsan̄a mi edieke anade nnam ukpụhọde, ntre mma n̄wọrọ n̄ka stet en̄wen. Ndusụk ufan mi ẹma ẹdọhọ ke iyasan̄a ye ami, mma nnyụn̄ nnyịme mmọ ẹtiene ẹdi. Mmọ ẹma ẹn̄wọn̄ ikọn̄ekpo ke usụn̄ ẹnyụn̄ ẹtiene ẹnọ mi. Mma ndọhọ mmọ ke nyomke ndinam mme n̄kpọ oro aba, ntre nnyịn ima idian̄ade nsan̄a ke adan̄a stet oro. Nte ini akakade, mma n̄kop ke mme ufan mi ẹma ẹyọk anyan ikan̄ ẹsịbe ẹda ẹkewo ban̄k.

UFỌN ORO MBỌDE: Ama emem mi utom ndinam ukpụhọde ke ini n̄kadian̄ade nsan̄a ye mme nsan̄a mi oro. Mma nna baptism nte Ntiense ke 1989. Eyeneka mi, eka mi, ye ete mi ẹma ẹtiene mi ẹnam n̄kpọ Jehovah ke mma n̄kana baptism.

Mmọdọ ndọ isua 17 idahaemi nnyụn̄ nnyene ndiye nditọ ita. Mmekpep ndisụhọde esịt, idem ke ini ẹnamde se iyatde mi. Mmonyụn̄ n̄kpep ndima mme owo emi ẹtode kpukpru ‘ekpụk, orụk, ye usem.’ (Ediyarade 7:9) Nda ke ikọ Jesus osu mi ke idem. Enye ọkọdọhọ ete: “Edieke ikọ mi odude ye mbufo, mbufo ẹnen̄ede ẹdi mbet mi, ndien mbufo ẹyefiọk akpanikọ, akpanikọ oyonyụn̄ anam mbufo ẹwọrọ ufụn.”—John 8:31, 32.

[Se ẹwetde ke ikpọ abisi ke page 19]

Man nnam ukpụhọde, ama oyom nduọn̄ọ ikwọ oro ẹsịnde udọn̄ ẹnọ edisari mme owo

[Se ẹwetde ke ikpọ abisi ke page 20]

Ami ye ufan mi ikesisasan̄a iyom en̄wan. Ima isida ikwa ye eto in̄wana ye otuowo emi ẹwakde ẹsịm owo 20 m̀mê akande oro