Veisautaka na Bula na iVolatabu

NA CAVA e kotiva kina na uluna balavu e dua e lewena tu na isoqosoqo na Rastafarian, qai oti vakadua na nona dau vakaduiduitaki ira na yago vulavula? Na cava e uqeta e dua na cauravou e dau tauri ilavo vei ira na dauvolitaki wainimategaga me veisautaka na nona bula? Meda wilika mada na kedrau italanoa.

“Au sa Sega ni Qai Veivakaduiduitaki.”​—HAFENI NGHAMA

YABAKI: 34

VANUA: ZAMBIA

KA E KILAI KINA: RASTAFARIAN

NOQU BULA E LIU: Au a sucu ena keba ni isenivalu e Zambia. A dro o Na mai Namibia ena gauna ni valu, qai lai lewena e dua na isoqosoqo na South West Africa People’s Organization (SWAPO) e valataka na nodra dodonu na kai Namibia.

E 15 na yabaki na noqu bula tu ena vica na keba ni isenivalu. Keimami vakavulici na itabagone ena isoqosoqo qori me keimami valataka na tu galala. Keimami vesumonataki ena veika vakapolitiki qai vakavulici me keimami cati ira na yago vulavula.

Niu yabaki 11, au vinakata meu kilai niu dua na lotu vaKarisito ena keba ni lotu era tu kina na lotu Katolika, Lutherans, lotu Jaji kei na so tale. Au lai tukuna sara qori vua e dua na italatala ni lotu, e qai kaya meu kua ni cakava. Tekivu mai na gauna ya, au sa sega ni vakabauta na Kalou. Niu yabaki 15, au sa lai lewena na isoqosoqo na Rastafarian niu dau taleitaka na ivakatagi na reggae, kei na noqu vinakata meu vakaotia na veika tawadodonu era sotava na kai Aferika yago loaloa. Au vakatubura na uluqu, au kana mariwana, au sega ni kana lewenimanumanu, au dau qai valataka na nodra dodonu na yago loaloa. Ia au se sega ni veisautaka noqu itovo vakasisila, se cegu na sarava na iyaloyalo voravora. Au se vosavosa ca tiko ga.

VEISAUTAKI AU NA IVOLATABU: Ena 1995, niu sa yabaki 20, au vakasamataka vakabibi se cava meu na cakava ena noqu bula. Au vulica kece na nodra ivola na Rastafarian. E tiko ena ivola qori eso na ivakamacala e dusimaki keda ena iVolatabu, ia e sega sara ni matata. Au mani nanuma meu wilika na iVolatabu.

Dua na gauna e qai solia vei au e dua noqu itokani e lewe ni Rastafarian e dua na ivola vakaivolatabu, era tabaka na iVakadinadina i Jiova. Au vulica vakataki au na ivola qori niu vakayagataka na iVolatabu. Oti au sa qai sotavi ira na iVakadinadina i Jiova, au mani vulica vata kei ira na iVolatabu.

Dua na ka ni sasaga meu biuta na vakatavako  kei na gunu vakasivia. (2 Korinica 7:1) Sa savasava na kequ irairai, au sa kotiva na uluqu balavu, sa sega niu sarava na iyaloyalo vakasisila kei na iyaloyalo voravora, sa oti tale ga na noqu vosavosa ca. (Efeso 5:3, 4) Toso na gauna, sa qai oti na noqu dau vakaduiduitaki ira na yago vulavula. (Cakacaka 10:34, 35) Meu cakava na veiveisau qori, ena vinakati meu na biuta tani na ivakatagi e uqeta na veicati vakamatatamata, meu kua tale ga ni vakailala kei ira noqu itokani makawa. Qori ena vakavuna meu lesu tale ena noqu itovo makawa.

Niu cakava oti na veiveisau qori, au vaqara na nodra Vale ni Soqoni na iVakadinadina i Jiova, au qai kerea meu lewe ni lotu vata kei ira. Sa qai dua e vakavulici au ena iVolatabu. Ratou sega ni marautaka na noqu lewe ni vuvale niu sa vakatulewataka meu papitaiso meu dua na iVakadinadina i Jiova. E tukuna o Na meu digia tale e dua na lotu vaKarisito, meu kua ga ni iVakadinadina i Jiova. E dau vakalewai au e dua na wekaqu e vakaitutu ena matanitu niu via dua na iVakadinadina i Jiova.

Ia na noqu vulica na veika e cakava o Jisu vei ira na lewenivanua, kei na noqu muria na nona ivakavuvuli e vukei au meu vosota na veivakacacani kei na veivakalialiai. Niu vakatauvatana na ka era vakavulica na iVakadinadina i Jiova kei na ka e tukuna na iVolatabu, au vakadeitaka niu sa kunea na lotu dina. Kena ivakaraitaki, era muria na ivakaro ena iVolatabu mera vunau. (Maciu 28:19, 20; Cakacaka 15:14) Era sega tale ga ni vakaitavi ena politiki.—Same 146:3, 4; Joni 15:17, 18.

KENA YAGA: E yaga vakalevu vei au niu muria na ivakatagedegede vakaivolatabu. Kena ivakaraitaki, au vakabula e vicavata na drau na dola e veivula niu sa sega ni kana mariwana. Au sa sega ni dau wanono balavu, sa vinaka na noqu ivakarau ni vakasama, e vinaka tale ga na ivakarau ni noqu bula.

Sa vinaka sara na ivakarau ni noqu bula ena gauna qo, na ka au diva tu niu se itabagone. Koya e bibi duadua, au vakila niu sa volekati koya na Kalou.—Jemesa 4:8.

“Au Vulica Meu Daulewa Vinaka Noqu Cudru.”​—MARTINO PEDRETTI

YABAKI: 43

VANUA: OSITERELIA

KA E KILAI KINA: DAUVOLITAKI WAINIMATEGAGA

NOQU BULA E LIU: Niu se gone, keitou dau veitokiyaki vakalevu. Au bula ena taoni lalai, taoni lelevu, ena dua na gauna balavu au lai tu kei ira na itaukei kei Ositerelia. Au taleitaka vakalevu ena gauna ya kei ratou na wekaqu me keimami dau lai siwa, vakasasa, caka boomerang, kei na ceuceu se na cakacaka ni liga.

E dau veivacu o Ta, qai vakavulici au ena veivacu niu se gone. E dau voravora tu ga na  noqu bula. Niu se itabagone, au dau lai gunu ena kena vale. O yau kei ira noqu itokani keimami dau vaqara veivacu. Keimami dau vakayagataka na isele, kei na kau ni baseball mera vakamavoataki kina e dua na ilala levu era tiko kina e 20 se sivia.

Au rawa ilavo niu volitaki wainimate gaga kei na ka era butakoca mai na cakacaka ena wavu. Au na kumuna tale ga na nodra ilavo na dau volitaki wainimategaga, niu vakarerei ira ena dakai. Au vinakata meu dauveivakamatei. Na ka ga au dau vakasamataka mai, meu veivakamatei se meu mate.

VEISAUTAKI AU NA IVOLATABU: Niu se gone au sa dau rogoci ira na iVakadinadina i Jiova. Niu yabaki 20, au nanuma noqu tarogi Na ke kila na vanua era tiko kina. Oti ga e rua na siga, sa tukituki mai ena katuba e dua na iVakadinadina i Jiova o Dixon. Ni oti neirau veitalanoa, e sureti au sara ena nodra soqoni na iVakadinadina i Jiova. Sa sivia e 20 na yabaki qo na noqu sega ni calata na soqoni. Era sauma vakaivolatabu na iVakadinadina i Jiova na noqu taro kece.

Au taleitaka noqu mai vulica ni o Jiova e kauaitaki keda yadua, o ira mada ga na sega ni qarava na Kalou. (2 Pita 3:9) Au sa qai kila ni Tama dauloloma, e kauaitaki au tale ga ke sega mada ga ni dua e cakava qori. Au marau niu vulica ni na vosota na noqu ivalavala ca keu veisau. E yaga vakalevu vei au na Efeso 4:22-24, e uqeti au meu “biuta tani na tamata makawa,” ia meu “tokara na tamata vou e buli me vaka na loma ni Kalou.”

E taura na gauna meu veisautaka noqu ivakarau ni bula. Ena lomanimacawa au na sega ni vakayagataka na wainimategaga. Ia e dau dredre qori ena muanimacawa niu tiko vata kei ira noqu itokani. Meu cakava na veiveisau ena vinakati meu yawaki ira noqu itokani, au mani toki tale ena dua na vanua. Eso na noqu itokani era via lako vata kei au, au mani vakadonuya. Ena ilakolako qori, era kana mariwana era qai via solia vei au eso. Au mani tukuna vei ira niu sa veisautaka na noqu ivakarau ni bula, keitou mani veitalatala e kea. Au sa qai kila e muri, ni ratou lai butako ena dua na baqe ni vakayagataki na dakai.

KENA YAGA: Niu sa biuti ira na noqu ilala qori, e rawarawa sara niu veisautaka na noqu bula. Ena 1989, au papitaiso meu dua na iVakadinadina i Jiova. Ni oti qori, ratou tomani au ena noqu qaravi Jiova o ganequ, o tinaqu, kei tamaqu.

Sa oti qo e 17 na yabaki noqu vakawati. Ratou le tolu na luvei keirau. Au vulica meu lewa vinaka na noqu cudru, ke dua mada ga e vakacudrui au. Au vulica meu lomani ira na tamata mai na ‘veiyavusa, veimatatamata, kei na duivosavosa.’ (Vakatakila 7:9) Au vakadinadinataka sara ga na vosa i Jisu ni kaya: “Oni noqu tisaipeli dina ke oni muria tiko ga na noqu vosa, oni na kila na ka dina, na ka dina ena qai sereki kemuni.”—Joni 8:31, 32.

[Tikina bibi ena tabana e 19]

Meu cakava na veiveisau, ena vinakati meu na biuta tani na ivakatagi e uqeta na veicati vakamatatamata

[Tikina bibi ena tabana e 20]

O yau kei ira noqu itokani keimami dau vaqara veivacu. Keimami dau vakayagataka na isele, kei na kau ni baseball mera vakamavoataki kina e dua na ilala levu era tiko kina e 20 se sivia