Biblu Nọ Diọ Gbẹzan Mẹtọn

ETẸWẸ whàn dawe rasta de nado pà oda gblẹlẹ etọn bo duto nuvẹun he e tindo na yovo lẹ ji? Podọ etẹwẹ gọalọna jọja danuwatọ de he nọ ṣinyan akuẹ na amasin adínọ sàtọ lẹ to ahọ́tọnọ yetọn lẹ si nado diọ gbẹzan etọn? Gbọ mí ni gbadopọnna nuhe omẹ ehelẹ jlo na dọ.

“N’tlẹ duto nuvẹun ṣie ji.”—HAFENI NGHAMA

OWHE: 34

OTÒ HE MẸ N’WÁ SỌN: ZAMBIE

OTÀN ṢIE: RASTA

NUHE N’YIN DAI: N’yin jiji to osla fibẹtado tọn de mẹ to Zambie. Onọ̀ ṣie họ̀n sọn Namibie to awhàn de whenu bo wá kọnawudopọ hẹ Titobasinanu Mẹhe Wá sọn Hùwaji-Whèyihọ-Aflika tọn lẹ tọn (SWAPO). Titobasinanu ehe to avùnho sọta gandudu Afrique du Sud tọn he to anadena Namibie to ojlẹ lọ mẹ.

Osla fibẹtado tọn susu mẹ wẹ n’nọ to owhe 15 tintan gbẹzan ṣie tọn lẹ mẹ. Jọja he tin to osla SWAPO tọn mẹ lẹ yin pinplọn nado nọgodona titobasinanu he na hẹn yé jẹ mẹdekannu lọ. Yé yí nuplọnmẹ tonudidọ tọn lẹ do klọ apọ̀nmẹ na mí podọ yé plọn mí nado gbẹwanna yovo lẹ.

To whenue n’tindo owhe 11, e jlo mi nado lẹzun Klistiani de to ṣọṣi osla lọ tọn de mẹ, ehe bẹ sinsẹ̀n susu hẹn taidi sinsẹ̀n Katoliki Lomu tọn, Luther tọn, Anglicane tọn po devo lẹ po. Sinsẹ̀ngán he n’dọho hẹ lọ gbẹ́ na mi ma nado ze afọdide ehe. Sọn whenẹnu gbọ́n, n’ma tindo yise to Jiwheyẹwhe mẹ ba. Ṣigba to whenue n’tindo owhe 15, owanyi he n’tindo na húnhiho reggae po ojlo ṣie nado yiahọsu oyà he yovo lẹ do na mẹyuu lẹ to Aflika po tọn hẹn mi nado kọnawudopọ hẹ Rasta a lẹ. N’hlá oda bọ e dite gblẹlẹ, n’nọ nù marijuana bo masọ nọ dù olàn ba, podọ n’hoavùn na mẹyuu lẹ nido jẹ yedekannu. Etomọṣo, n’ma diọ gbẹzan fẹnnuwiwa tọn ṣie kavi doalọtena sinima danuwiwa tọn lẹ pinpọn gba. Podọ n’gbẹ́ nọ yí hogbe agbàagba lẹ zan.

LEHE BIBLU DIỌ GBẸZAN ṢIE DO: To whenue n’tindo nudi owhe 20 to 1995, n’jẹ nulẹnpọn ji sinsinyẹn gando nuhe n’na yí gbẹzan ṣie do wà go. N’plọn owe Rasta tọn he alọ ṣie sọgan plá lẹpo. Delẹ to yé mẹ dlẹnalọdo Biblu, ṣigba n’ma mọnukunnujẹ zẹẹmẹ yetọn lẹ mẹ. Enẹwutu, n’de nado hia Biblu na dee.

To godo mẹ, họntọn ṣie Rasta de na mi owe sinai do Biblu ji Kunnudetọ Jehovah tọn lẹ tọn de. N’plọn owe ehe na dee to pọmẹ hẹ Biblu. To  nukọn mẹ, n’dukosọ hẹ Kunnudetọ Jehovah tọn lẹ bo zindonukọn to oplọn ṣie mẹ hẹ yé.

Po vivẹnudido vẹkuvẹku po, n’jo azọ̀-nùnù po ahànnunu zẹjlẹgo po do. (2 Kọlintinu lẹ 7:1) N’jla awusọhia ṣie do bo pà oda gblẹlẹ ṣie lẹ bosọ doalọtena yẹdide fẹnnuwiwa tọn po sinima danuwiwa tọn lẹ po pinpọn gọna hogbe agbàagba lẹ yiyizan. (Efesunu lẹ 5:3, 4) N’tlẹ duto nuvẹun ṣie sọta yovo lẹ ji to godo mẹ. (Owalọ lẹ 10:34, 35) Diọdo ehelẹ bibasi biọ dọ ma jo húnhiho he nọ nọgodona akọ̀ ṣinṣinyan do bo doalọtena gbẹdido hẹ họntọn ṣie dai tọn he sọgan yinuwado ji e nado gọ̀ jẹ gbẹzan ṣie hoho lọ ji lẹ.

To diọdo enẹlẹ bibasi godo, n’dín Plitẹnhọ Ahọluduta tọn Kunnudetọ Jehovah tọn lẹ tọn de mọ bo biọ to yé si nado kọnawudopọ hẹ yé. To whenue n’de nado yí baptẹm taidi dopo to Kunnudetọ Jehovah tọn lẹ mẹ, homẹ whẹndo ṣie tọn ma hùn. Onọ̀ ṣie dọna mi dọ n’sọgan de sinsẹ̀n “Klistiani” tọn devo depope, ṣigba ni ma yin Kunnudetọ Jehovah tọn lẹ blo. Dopo to ylọnẹn ṣie lẹ mẹ, he yin omẹ nukundeji de to tonudọtọ lẹ mẹ, nọ to homọdọdo go e whẹwhẹ na n’de nado kọnawudopọ hẹ Kunnudetọ lẹ wutu.

Ṣigba, nupinplọn gando lehe Jesu yinuwa hẹ gbẹtọ lẹ do go podọ to enẹgodo, ayinamẹ etọn yíyí-do-yizan mẹ gọalọna mi nado pehẹ nukundiọsọmẹ po mẹṣanko po. To whenue n’yí nuhe Kunnudetọ lẹ plọnmẹ jlẹdo nuhe Biblu dọ go, n’kudeji dọ n’ko mọ sinsẹ̀n nugbo lọ. Di apajlẹ, yé nọ setonuna gbedide Biblu tọn nado dọyẹwheho na mẹdevo lẹ. (Matiu 28:19, 20; Owalọ lẹ 15:14) Podọ yé ma nọ doalọ to tonudidọ mẹ.—Psalm 146:3, 4; Johanu 15:17, 18.

ALE HE N’MỌYI LẸ: Gbẹninọ sọgbe hẹ nujinọtedo Biblu tọn lẹ gọalọna mi to aliho susu mẹ. Di apajlẹ, alọdidotena marijuana nùnù ko gọalọna mi ma nado nọ hẹn dọla Amelika tọn susu gú to sunmẹsunmẹ ba. N’masọ nọ kudlọ klewhète tọn lẹ ba podọ ninọmẹ ṣie pọnte dogọ to apọ̀nmẹ podọ to agbasa-liho.

Todin, gbẹzan ṣie pànta fidopo bosọ tindo lẹndai he n’ko to dindin vẹkuvẹku sọn jọja whenu ṣie gbọ́n. Podọ hú popolẹpo, n’wá mọ todin dọ n’sọgan dọnsẹpọ Jiwheyẹwhe.—Jakọbu 4:8.

“N’ko plọn nado nọ dava homẹgble ṣie.”—MARTINO PEDRETTI

OWHE: 43

OTÒ HE MẸ N’WÁ SỌN: AUSTRALIE

OTÀN ṢIE: AMASIN ADÍNỌ SÀTỌ

NUHE N’YIN DAI: Whẹndo ṣie nọ saba sẹtẹn dile n’to whinwhẹ́n. N’nọ tòpẹvi lẹ mẹ, tòdaho de mẹ, podọ opá sinsẹ̀n aborigène lẹ tọn de mẹ to fie dẹn taun to otò lọ mẹ na ojlẹ kleun de. N’gbẹ́ nọ flin nususu gando lehe yẹn po ylọnẹn-vi ṣie lẹ po gọna ylọnẹn ṣie lẹ nọ to whèvi wle bo nọ to gbéyàn bosọ nọ to onú aborigène (kavi mẹhe nọ nọ̀ lẹdo lọ mẹ) lẹ tọn delẹ basi do to whenẹnu.

 Akotokún-yìntọ de wẹ otọ́ ṣie yin podọ e jẹ avùnhiho plọn mi ji to whenue n’gbẹ́ pò to ovu taun. Danuwiwa lẹzun apadewhe gbẹzan ṣie tọn. To owhe aflanmẹ tọn ṣie lẹ mẹ, n’nọ yí whenu susu zan to ahànnutẹn lẹ. Avùn nọ to sisọ́ yẹn po họntọn ṣie lẹ po. Mí nọ yí ohí po opò po zan nado gbleawuna omẹ 20 kavi humọ.

Amasin adínọ po ajọnu he mẹhe nọ wazọ́n to bato-glintẹn lẹ fìn lẹ po wẹ n’nọ sà nado mọ akuẹ. N’sọ nọ ṣinyan akuẹ na amasin adínọ sàtọ lẹ, podọ n’dona yí osò do dobuna ahọ́tọnọ yetọn delẹ nado yí akuẹ sọn yé si. Yanwle ṣie wẹ nado lẹzun hlọnhutọ de. Aṣagbe ṣie wẹ, To mẹhù, kavi dọ yé ni hù we.

LEHE BIBLU DIỌ GBẸZAN ṢIE DO: Dile n’to whinwhẹ́n, n’sèhó gando Kunnudetọ Jehovah tọn lẹ go. To whenue n’tindo owhe 20 linlán, n’flindọ n’kanse onọ̀ ṣie eyin e yọ́n fihe depope yetọn nọ nọ̀. To azán awe godo, Kunnudetọ de he nọ yin Dixon húhúhọ̀n na mi. To whenue mí dọho na ojlẹ de godo, e basi oylọna mi wá opli Kunnudetọ Jehovah tọn lẹ tọn de tẹnmẹ. N’yì opli enẹ bo gbẹ́ pò to mọwà sọn owhe 20 linlán die gbọ́n. Kanbiọ depope he n’kanse, Kunnudetọ lẹ penugo nado na mi gblọndo etọn sọn Biblu mẹ.

Homẹ ṣie hùn nado plọn dọ Jehovah nọ tindo ojlo to mẹdopodopo mẹ, etlẹ yin to mẹylankan lẹ lọsu mẹ. (2 Pita 3:9) N’wá mọdọ ewọ yin Otọ́ owanyinọ de he na penukundo go e, eyin mẹlẹpo tlẹ gbẹ́ mi dai. Homẹmiọnnamẹnu de wẹ e sọ yin nado plọn dọ e na jo ylando ṣie lẹ na mi eyin n’diọ gbẹzan ṣie. Hogbe Efesunu lẹ 4:22-24 tọn lẹ yinuwado ji e taun. Wefọ ehelẹ dotuhomẹna mi nado “klọ́n gbẹtọ-yinyin hoho lọ dai” bo “ze gbẹtọ-yinyin yọyọ lọ dó, ehe yin didá sọgbe hẹ ojlo Jiwheyẹwhe tọn.”

E biọ whenu susu to asi e nado diọ gbẹzan ṣie. N’sọgan nọ amasin adínọ ma nù to osẹ lọ gblamẹ, ṣigba to sẹfifo, whenue n’topọ hẹ họntọn ṣie lẹ, n’nọ jogbe. N’wá mọdọ n’dona dẹn do ogbẹ́ ṣie lẹ eyin n’jlo na diọ gbẹzan ṣie, enẹwutu n’basi dide nado sẹtẹn yì awà devo ji. Họntọn delẹ biọ nado plan mi jẹ dọ́n bọ n’yigbe. To gbejizọnlin lọ whenu, yé jẹ marijuana nù ji bosọ whlé mi. N’dọna yé dọ n’ko to aṣa enẹlẹ jodo, podọ mí klan to dogbó ji. N’wá sè to ojlẹ vude godo dọ họntọn ṣie lẹ yì gbà akuẹsẹdotẹn de po osò po.

ALE HE N’MỌYI LẸ: Tlolo he n’sánkanna hagbẹ enẹlẹ, e bọawuna mi nado basi diọdo he jẹ lẹ to gbẹzan ṣie mẹ. To 1989, n’yí baptẹm bo lẹzun dopo to Kunnudetọ Jehovah tọn lẹ mẹ. To baptẹm ṣie godo, nọviyọnnu ṣie, onọ̀ ṣie po otọ́ ṣie po kọnawudopọ hẹ mi nado sẹ̀n Jehovah.

E ko yì owhe 17 todin he n’wlealọ, podọ n’tindo ovi dagbe atọ̀n. N’ko plọn nado nọ dava homẹgble ṣie, eyin mẹde tlẹ hẹn mi gblehomẹ. N’ko sọ plọn nado yiwanna mẹhe wá “sọn akọta lẹpo mẹ, sọn whẹndo lẹpo mẹ, . . . podọ sọn ogbè lẹpo mẹ.” (Osọhia 7:9) N’mọdọ hogbe Jesu tọn lẹ mọ hẹndi do go e. E dọmọ: “Eyin mì gbọṣi ohó ṣie mẹ, be devi ṣie wẹ mì yin nugbonugbo, mìwlẹ nasọ yọ́n nugbo lọ, nugbo lọ nasọ hẹn mì jẹ mẹdekannu.”—Johanu 8:31, 32.

[Nudọnamẹ odò tọn]

[Blurb to weda 27]

Diọdo lẹ bibasi biọ dọ ma jo húnhiho he nọ nọgodona akọ̀ ṣinṣinyan do

[Blurb to weda 28]

Avùn nọ to sisọ́ yẹn po họntọn ṣie lẹ po. Mí nọ yí ohí po opò po zan nado gbleawuna omẹ 20 kavi humọ