Ti Piipel tuut leepe ënere

WAROM hot eene man, woo teel fon te rastafari relichyoon waar, sayn lang hoer kexnit un noo kelos ti wayse layt hase? Un was hot een wyolënte yunge man, woo trooke ferkhaaft hot, keholef sayn leepe ënere? Kuk mool was tiise 2 mëner saan.

“Yets hon ich khee prekonseyt mee keeche wayse layt.” — HAFENI NGHAMA

ELTER: 34

MUTER LANT: SAMPYA

FOER KEXICHT: RASTAFARI

WII WAAR MAYN LEEPE FRIIER KEWEES: Ich sin in een auslënter khamp in Sampya uf te welt khom. Mayn mama is fon Namipya torich te kriich aus keris. Tii is teel fon een orkanisatsyoon kep woo keeche ti siit afrikanix rechiirung, woo iwer Namipya in tëne tsayt kexikt hot, kekhëmpft hot.

Torich ti eyerste 15 yoore fon mayn leepe, hon ich in unerxiitliche auslënter khëmp keleept. Ti yunge in tiise khëmp waare keiipt fer fiirer fon tiise orkanisatsyoon sin, woo mer ketenkt hon teet uns fray mache. Meyer hon aach kelërnt ti wayse layt hase.

Wii ich 11 yoore alt waar, wolt ich een krist sin un aach een mitkliit fon te khërich woo im khamp waar. Ich hon mit een farer too triwer fertseelt awer tee hot mich uf kemuut tas net mache. Tes weeche, hon ich noo kelos aan Kot klaape. Wii ich 15 yoore alt waar, hon ich ti reggae musik keliipt un ich wolt fermache ti unkerechtichkheete woo ti xwartse afrikanixe layt mit kemacht hon. Soo, sin ich een rastafari kep. Ich hon mayn hoer lang kelos, soo wii ti rastafari layt sayns. Ich hon aach makonya keraucht, noo kelos flayx ese un aan kefang ti frayheet fon te xwartse layt xitse. Awer ich hon net mayn imoraalix leepe uf sayt kelos orer noo kelos wyolënte filme kuke. Un ich hon wayter trekiche wërter penutst.

WII HOT TI PIIPEL MAYN LEEPE KEËNERT: In 1995, wii ich unkefeer 20 yoore alt waar, hon ich aan kefang ërnst tenke iwer was ich mit mayn leepe mache wolt. Ich hon xtutiirt ti kanse rastafari piicher woo ich fine khont. Etliche fon tëne hon iwer ti Piipel kexproch awer ich hon kaar niks ferxtan. Tes weeche, hon ich ëntxlist ti Piipel aleen leese.

Xpeeter, hot een rastafari fraaynt mich een puuch kep fer ti Piipel xtutiire. Tas puuch is fon Yeehoowa sayn Tsayer puplitsiirt kep. Ich hon tiise puplikatsyoon mit te Piipel aleen xtutiirt. Noo heyer, hon ich Yeehoowa sayn Tsayer ketrof un wayter ti Piipel mit tëne xtutiirt.

Es hot mich fiil aanxtrengung kekhost, awer ich hon noo kelos rauche un tsu fiil trinke. (2 Korinter 7:1) Ich hon keënert ti aat wii ich aus kesiin hon, hon mayn lang hoer kexnit, hon noo kelos pornokrafii un wyolënte filme kuke un aach trekiche wërter penutse. (Ëfeser 5:3, 4) Un yets hon ich khee prekonseyt mee keeche wayse layt. (Aphostele sayn Kexicht 10:34, 35) Fer tiise ënerunge mache, must ich noo lose musike heere woo mich uf kemuut hon wayse layt hase un aach noo lose keselxaft hon mit mayn friirixe fraaynte, woo fersuucht hon mich influentsiire tsurik tsu mayn xlechte kewoonheete keen.

Noo tiise ënerunge mache, hon ich een Raych Saal fon Yeehoowa sayn Tsayer kesuucht un kesaat tas ich wolt eene fon tëne sin. Wii ich ëntxlist hon mich taafe lose, is mayn familye net froo kep. Mayn mama hot mich kesaat: ‘Suuch kwalkee aner kristlich relichyoon raus, ploos Yeehoowa sayn Tsayer net.’ Eene fon mayn unkele, woo een wichtich xtel in te rechiirung hat, hot mayn ëntxlus fer Yeehoowa sayn Tsayer wëre, imer kritikiirt.

Awer ich hon kelërnt iwer wii Yeesus ti anere pehantelt hot un ich hon fersuucht tëm noo mache. Tas hot mich keholef mit te opositsyoon un xpoteray um keen. Wii ich ferklaycht hon was Yeehoowa sayn Tsayer in lërne mit was ti Piipel saat, sin ich mich sicher kep tas ich ti woer relichyoon kefun hat. Tsum payxpiil, tii heere ti piiplixe kepoot aan tas mer sole fer ti anere preetiche. (Matheus 28:19, 20; Aphostele sayn Kexicht 15:14) Un tii tuun sich net in te politik rin mexe. (Psalm 146:3, 4; Yoohan 15:17, 18)

WAS FER NUTSE HON ICH KRIIT: Ti Piipel hot mich in fiile aate keholef. Tsum payxpiil, ich hon noo kelos makonya rauche un, soo, khont ich fiil kelt yeete moonat xpaare. Ich xpiire net mee ti xlechte resultaate woo khome wën ma trooke in nëmt. Un mayn mentaal un fiisix kesuntheet is peser kep.

Yets hon ich een nutslich un froo leepe — etwas woo ich fon yung aan wolt. Un tas haupste: yets, ich xpiire mich ticht pay Kot. (Tyako 4:8)

“Ich hon kelërnt mayn wuut kontroliire.” — MARTINO PEDRETTI

ELTER: 43

MUTER LANT: AUSTRAALYA

FOER KEXICHT: TROOKE FERKHAAFT

WII WAAR MAYN LEEPE FRIIER KEWEES: Wii ich am wakse waar, hot mayn familye sich ofts kewanert. Ich hon kewoont in kleene xtete, in een kroos xtat un, fer een tsayt, in een wayt wech teel fon Austraalya, mit te natiiwe layt fom plats. Ich hon kuute erinerunge fon tiise tsayt, mit mayn primos un unkele; meyer hon kefixt, keyacht, feramente kepaut un anere tinge aus kepikt.

Mayn papa hot boxe kekhëmpft, un fon kleen aan hon ich tas mit tëm kelërnt. Ich sin een wyolënt persoon kep. Wii ich yung waar, waar ich imer am trinke in te putëke. Ich un mayn fraaynte hon imer fersuucht xtrayte mit te layt aan fange. Meyer hon meser un peyspal knipel penutst fer 20 orer mee layt atakiire.

Fer kelt mache, hon ich trooke un tinge woo anere kextool hon, ferkhaaft. Ich hon aach ti xulte kopriirt woo ti layt mit te trooke ferkhaafer hate. Tas se mich tas kelt kepe teete, hon ich se pang kemacht mit wafe. Mayn tsiil waar ti anere um pringe. Ich hon imer kesaat: “Pring ti anere um eep se tich um pringe.”

WII HOT TI PIIPEL MAYN LEEPE KEËNERT: Wii ich am wakse waar, hon ich iwer Yeehoowa sayn Tsayer keheert. Wii ich unkefeer 20 yoore alt waar, hon ich fer mayn mama kefroot ep se wust woo een Yeehoowa sayn Tsayer keleept hot. Tswaay taache xpeeter, hot een Yeehoowa sayn Tsayer, woo Dixon keheest hot, aan mayn teer keklopt. Noo tas mer een pisye fertseelt hon, hot eyer mich tsu een fersamlung in kelaat. Ich sin tsu tiise fersamlung kang; un pis hayt, mee wii 20 yoore xpeeter, tuun ich tas noch mache. Yeehoowa sayn Tsayer hon ti Piipel penutst fer al mayn frooche antworte.

Ich hon kërn kelërnt tas Yeehoowa sich mit te layt khimere tuut, soo kaar tii woo xlecht sin. (2 Pheeter 3:9) Ich hon raus kefun tas eyer een liipliche Fater is, woo mich uf phase teet, soo kaar wën al mich im xtich lose teete. Ich sin aach froo kep wii ich kelërnt hon tas wën ich mayn leepe ënere teet, teet eyer mayn sinte fertsaye. Ti wërter in Ëfeser 4:22-24 hon mich tiif aan kekrif. Tiise wersikele hon mich uf kemuut ti “alt personaliteet neewe lose” un ti “nay personaliteet aan tsiie, woo tëm noo Kot sayn wile kemacht kep is”.

Es waar net laycht fer mich ënerunge mache. Torich ti woch, hon ich khee trooke in kenom. Awer in te wochën, wii ich mit mayn fraaynte waar, hon ich tas kemacht. Ich hon kemërkt tas wën ich welt mayn leepe ënere, mist ich noo lose mit mayn fraaynte plaype. Tes weeche, hon ich ëntxlist mich tsu een aner teel fon Austraalya wanere. Etliche fraaynte hon sich aan kepoot fer mit mich in te rees keen, un ich hon tas aan kenom. Torich ti rees, hon se aan kefang makonya rauche un tii hon mich tas aan kepoot. Ich hon se kesaat tas ich ëntxlist hat noo lose tas mache; too sin mer aus naner kang, un ich hon te rest fon te rees aleen kemacht. Xpeeter, hon ich tsum wise kriit tas klaych tëm noo, hon se een waf penutst fer een pank xteele.

WAS FER NUTSE HON ICH KRIIT: Noo tas ich tiise fraaynte kelos hon, waar es laychter fer mich ti neetiche ënerunge in mayn leepe mache. In 1989, hon ich mich wii Yeehoowa sayn Tsayer taafe kelos. Noo mich taafe lose, hon mayn xwester, mayn mama un mayn papa aan kefang Yeehoowa mit mich tiine.

Yets, sin ich xon mee wii 17 yoore ferhayrat un ich hon 3 xeene khiner. Ich hon kelërnt mayn wuut kontroliire, soo kaar wën ti anere fersuuche mich pees lose. Un ich hon kelërnt ti layt fon ale “xteme, foleke un xprooche” liipe. (Apokalipsis 7:9) Ich tenke tas Yeesus sayn wërter hon sich in mich erfiilt: “Wën teyer in mayn wort playpt, sayt teyer wërklich mayn tisipele. Teyer tuut ti woerheet khëne; un ti woerheet tuut aych fray mache.” (Yoohan 8:31, 32)

[Hooch phunkt]

Fer tiise ënerunge mache, must ich noo lose musike heere woo mich uf kemuut hon wayse layt hase

[Hooch phunkt]

Ich un mayn fraaynte hon imer fersuucht xtrayte mit te layt aan fange. Meyer hon meser un peyspal knipel penutst fer 20 orer mee layt atakiire