Ebaibol Na O Re Nwene Uzuazọ Ohwo

EME o ru omọvo utu egagọ nọ a re se rastafaria bru eto-edada riẹ, jẹ whaha omagbẹre nọ o wo kẹ ahwo Oyibo? Kọ eme o ru uzoge jọ nọ ọ jẹ hae ruẹ ozighi ghọghọ, nọ ọ jẹ hai lele ahwo nọ e jẹ thueki imu-egaga ye-esa nwene uzuazọ riẹ? Muẹrohọ ẹme nọ ahwo nana a ta.

“Mẹ tubẹ sae whaha ẹzi omagbẹre nọ me wo.”—HAFENI NGHAMA

KPE RIẸ: 34

ORẸWHO RIẸ: ZAMBIA

IKU RIẸ: OMỌVO UTU RASTAFARIA

UZUAZỌ MẸ EVAỌ OKE NỌ U KPEMU: Zambia a jọ yẹ omẹ, evaọ evuẹ ahwo nọ ẹmo o le no ẹkwotọ rai ze. Ẹmo o le oni mẹ no Namibia ze, o te kuomagbe ukoko nọ a re se South West Africa People’s Organization (SWAPO). Ahwo ukoko nana a jẹ wọso egọmeti South Africa nọ u je su Namibia oke yena.

No emaha ze bẹsenọ me ro te ikpe 15, mẹ rria ivuẹ sa-sa. A jẹ hai wuhrẹ emaha nọ e jọ ivuẹ ukoko SWAPO na epanọ a sae rọ karo evaọ ohọre nọ a be rọ gwọlọ ufuoma na. A kọ iroro esuo ohrowo họ omai udu, a te je wuhrẹ omai inọ ma mukpahe ahwo Oyibo.

Nọ mẹ jọ ikpe 11, mẹ tẹ gwọlọ nọ me re fi odẹ hotọ wọhọ Oleleikristi evaọ ichọche evuẹ na jọ nọ ahwo Kathọlik, erọ Protẹstant, erọ Anglican gbe efa a be jọ kuomagbe gọ. Epastọ nọ mẹ nya bru ọ ta kẹ omẹ nọ mẹ jowọ yena vievie he. No oke yena vrẹ, ẹrọwọ mẹ kpahe Ọghẹnẹ o te whu no. Rekọ nọ me te ikpe 15 no, isiuru mẹ kẹ ile-irege gbe isiuru nọ mẹ rẹ rọ kioja nọ a gbe kẹ ahwo obiebi Africa no u te ru omẹ kuomagbe utu Rastafaria. Mẹ tẹ kẹ eto mẹ uvẹ di zihe ruọ edada, mu ige-egaga họ evovo, mu arao họ ẹghọ, je mu ufuoma ahwo obiebi họ ẹhọre kẹ. Yọ mẹ ruabọhọ ọfariẹ-ogbe gbe ighe ozighi iriwo. Mẹ ruabọhọ eme etọtọ eta.

EPANỌ EBAIBOL NA O RO NWENE UZUAZỌ MẸ: Evaọ 1995, nọ mẹ jọ ikpe 20, me te mu uzuazọ mẹ họ eroro kpahe. Mẹ rọ oma totọ se ebe Rastafaria kpobi nọ mẹ ruẹ. A jọ ejọ rai dhunu te Ebaibol na, rekọ oghẹrẹ nọ a jọ ebe na fotọ eme na u vẹ omẹ ẹro ho. Fikiere, mẹ tẹ ta nọ me re se Ebaibol na kẹ oma mẹ.

Kẹsena, ogbẹnyusu mẹ jọ nọ ma gbẹ jọ utu Rastafaria ọ tẹ kẹ omẹ obe jọ nọ a re ro wuhrẹ Ebaibol na, onọ Isẹri Jihova a kere. Mẹ ọvo me te mu obe nana avọ Ebaibol na họ ese. Uwhremu na nọ mẹ ruẹ Isẹri Jihova, a te mu uwuhrẹ Ebaibol họ kugbe omẹ.

Udugaga, mẹ tẹ te siọ ivovavovo gbe idieda vrẹta ba. (2 Ahwo Kọrint 7:1) Me te ti mu ẹro họ erote oma mẹ, bru eto edada mẹ, siọ ifoto  ẹbẹba gbe ighe ozighi ba eriwo, jẹ siọ eme etọtọ ba ẹta. (Ahwo Ẹfẹsọs 5:3, 4) Uwhremu na, mẹ tẹ te whaha omagbẹre nọ me wo kẹ ahwo Oyibo. (Iruẹru Ikọ Na 10:34, 35) Re mẹ sai ru inwene nana, o gwọlọ eware buobu mi omẹ, mẹ raha ile nọ e rẹ ta udu họ omagbẹre kẹ ahwo ovioma ofa nọ me wo, je bru usu no egbẹnyusu ọsosuọ mẹ, enọ e hae te gwọlọ ru omẹ zihe kpohọ uruemu anwae mẹ.

Nọ me ru inwene yena no, mẹ tẹ te gwọlọ Ọgwa Uvie Isẹri Jihova, jẹ vuẹ ae nọ mẹ gwọlọ kuomagbe egagọ na. A te mu uwuhrẹ Ebaibol họ kugbe omẹ. Nọ mẹ jiroro nọ mẹ rẹ họ-ame wọhọ omọvo Isẹri Jihova, eva e were ahwo uviuwou mẹ hẹ. Oni mẹ ọ ta kẹ omẹ nọ mẹ sai kpohọ ichọche “Ileleikristi” efa kpobi u te no orọ Isẹri Jihova no. Omoni oni mẹ jọ nọ ọ jọ ọkwa ologbo egọmeti ọ jẹ hae fọrọ omẹ ẹsikpobi fikinọ me bi kuomagbe Isẹri Jihova.

Rekọ ewuhrẹ kpahe oghẹrẹ nọ Jesu ọ jẹ hai yeri kugbe ahwo gbe efihiruo ohrẹ riẹ u fi obọ họ kẹ omẹ thihakọ ọwọsuọ gbe ẹkoko. Nọ mẹ rehọ eware nọ Isẹri Jihova a bi wuhrẹ rọ wawo oware nọ o rrọ Ebaibol na, u mu omẹ ẹro nọ me duku egagọ uzẹme no. Wọhọ oriruo, a bi lele uzi Ebaibol nọ o ta nọ ma ta usiuwoma na. (Matiu 28:19, 20; Iruẹru Ikọ Na 15:14) Yọ a re duomahọ isuẹsu akpọ na ha.—Olezi 146:3, 4; Jọn 15:17, 18.

IRERE NỌ ME WO NO: Ehri-izi Ebaibol nọ me bi ro yeri uzuazọ enẹna o kẹ omẹ irere buobu no. Wọhọ oriruo, ige ivovo nọ me si obọ no o thọ omẹ no igho buobu nọ mẹ jẹ hae raha kufiẹ kamara kamara. Me te vovo no vẹre, mẹ jẹ hai mu eware ruẹ, rekọ enẹna o gbẹ rrọ ere he. Iroro mẹ e gba ziezi enẹna, ugboma mẹ u te je woma vi epanọ o jọ anwẹdẹ.

Enẹna uzuazọ mẹ u wo aro gbe uvi ẹjiroro no, oware nọ mẹ gwọlọ anwẹnọ mẹ rọ jọ uzoge. Maero na, me wo ududhomẹno nọ mẹ rọ riẹ inọ me si kẹle Ọghẹnẹ no.—Jemis 4:8.

“Mẹ be sae kpọ ofu mẹ enẹna.”—MARTINO PEDRETTI

IKPE RIẸ: 43

ORẸWHO RIẸ: AUSTRALIA

IKU RIẸ: Ọ JẸ THUEKI IMU-EGAGA

UZUAZỌ MẸ EVAỌ OKE NỌ U KPEMU: Nọ mẹ jọ ọmaha, ahwo uviuwou mẹ a jẹ kwa no oria ruọ oria. Mẹ rria ewho esese, okpẹwho, yọ evaọ omoke jọ, mẹ rria okegbe nọ a jẹ jọ ru iruẹru egagọ evaọ iwhre jọ. Mẹ gbẹ be kareghẹhọ eware nọ te omẹ te emọ inievo oni mẹ gbe ekpako mai efa jọ ma jẹ hai ru kugbe avọ omawere—iyei-ikpe, erao-ikpe, ewẹ-ire nọ ma jẹ hae  kare fi rọ zaharo, gbe eware efa nọ ma jẹ hae rọ ire kare.

Ọsẹ mẹ ọ jẹ hae tehe-ego, o te je wuhrẹ omẹ epanọ a rẹ họre evaọ okenọ mẹ jọ ọmaha. Ozighi oruo o te zihe ruọ ẹkẹ uzuazọ mẹ. Nọ mẹ jọ ikpe ikpegbọ, mẹ jẹ hai no oria idieda ha. Mẹ avọ egbẹnyusu mẹ ma jẹ hae gwọlọ ohọre. Ma jẹ hae rọ emeghae gbe ibrire nọ a rẹ rọ fa ebọro esese họre ogbotu ahwo nọ a te 20 hayo tube vi ere dede.

Okọ mẹ o jọ ẹzẹ imu-egaga gbe eware nọ otu nọ o bi ru iruo evaọ eria nọ ekọ e rẹ kpahe a tho ze. Mẹ jẹ hai ye-esa kẹ otu nọ ọ rẹ thueki imu-egaga, ẹkwoma ọwhunu nọ me re ro guegue eriesa na. Utee mẹ o jọ epanọ mẹ rẹ rọ jọ ohwo nọ a rẹ tho amọfa kẹ kpe. Odẹme mẹ họ, Kpe hayo a ve kpe owhẹ.

EPANỌ EBAIBOL NA O RO NWENE UZUAZỌ MẸ: Me yo kpahe Isẹri Jihova nọ mẹ jẹ whẹro ze. Mẹ kareghẹhọ nọ mẹ jọ ikpe udhegbọ, mẹ nọ oni mẹ ẹdẹjọ sọ ọ riẹ oria omọvo Isẹri Jihova jọ. Edẹ ivẹ nọ i lele i rie, omọvo Isẹri Jihova jọ nọ a re se Dixon ọ tẹ ziọ uwou mẹ. Nọ ma ta ẹme omojọ no, o te zizie omẹ kpohọ ewuhrẹ rai. Me kpohọ ewuhrẹ na, yọ anwọ ikpe 20 na mẹ be hai kpohọ iwuhrẹ na. Isẹri na a za enọ mẹ kpobi no Ebaibol na ze.

O kẹ omẹ evawere nọ mẹ rọ riẹ inọ Jihova o wo isiuru kpahe ahwo kpobi, makọ enọ e be gọe he. (2 Pita 3:9) Me te ti vuhumu inọ Jihova yọ Ọsẹ oyoyou nọ ọ rẹ sae rẹrote omẹ, o tẹ make rọnọ amọfa a daezọ mẹ hẹ. U te je ru udu te omẹ otọ nọ me wuhrẹ inọ ọ te rọ izieraha mẹ vrẹ omẹ nọ me te si obọ no ai. Eme nọ e rrọ Ahwo Ẹfẹsọs 4:22-24 i duobọte omẹ udu. Oria yena ọ kẹ omẹ uduotahawọ si “ohwo anwae na” no oma je fi “ohwo ọkpokpọ na họ oma, ọnọ a ma tho Ọghẹnẹ eva uvi ẹrẹreokie.”

Obọ usino uruemu anwae mẹ o jọ oware aso-hẹrioke he. No emuhọ ẹkpoka ze, mẹ rẹ sae gba oma mẹ whaha imu-egaga erehọ, rekọ evaọ urere-oka nọ mẹ tẹ rrọ kugbe egbẹnyusu mẹ, mẹ vẹ wariẹ duomahọ eware iyoma nana. Mẹ tẹ te ruẹ nọ me re si oma no egbẹnyusu nana mẹ tẹ ginẹ gwọlọ nwene uruemu mẹ, fikiere mẹ tẹ jiroro nọ mẹ rẹ kwa kpohọ ubrotọ ofa. Egbẹnyusu mẹ jọ a ta nọ a gwọlọ lele omẹ te obonọ mẹ be kwa nya na, mẹ tẹ rọwo kẹ ae. Nọ ma jọ edhere, a te mu ige-egaga họ evovo, jẹ kẹ omẹ nọ me vovo. Mẹ tẹ vuẹ ae nọ mẹ gwọlọ siọ eware yena ba, mẹ tẹ jọ ughere ubrotọ na fa usu no ae. Me yo uwhremu na inọ mẹ nyasiọ ae ba no, u kri hi egbẹnyusu mẹ na a nyai tho ebanke jọ avọ ọwhunu nọ a wha lele oma.

IRERE NỌ ME WO NO: Nọ mẹ fa usu no egbẹnyusu yena no, o gbẹ bẹ hẹ re me ru inwene nọ o gwọlọ evaọ uzuazọ mẹ. Mẹ tẹ họ-ame wọhọ omọvo Isẹri Jihova evaọ 1989. Nọ mẹ họ-ame no, oniọvo-ọmọtẹ mẹ, oni mẹ gbe ọsẹ mẹ a te kuomagbe omẹ evaọ egagọ Jihova.

Mẹ rọo anwọ ikpe 17 nọ i kpemu je yẹ emọ esa no. Enẹna mẹ be sae kpọ ofu mẹ nọ a tẹ maki ru omẹ eva dha. Yọ enẹna me wo uyoyou kẹ ahwo uyẹ, ovioma, gbe evẹrẹ kpobi. (Eviavia 7:9) Mẹ ruẹ nọ ẹme Jesu nana o gine rugba evaọ oma mẹ. Ọ ta nọ: “Wha tẹ ria evaọ eme mẹ, yọ whai ghinọ ilele mẹ, wha rẹ te riẹ uzẹme na, uzẹme na u re ti ru owhai emuyẹ.”—Jọn 8:31, 32.

[Ẹme nọ a fi ẹgba họ nọ ọ rrọ ẹwẹ-obe avọ 27]

Re mẹ sai ru inwene, o gwọlọ eware buobu mi omẹ, mẹ raha ile nọ e rẹ ta udu họ omagbẹre kẹ ahwo ovioma ofa nọ me wo

[Ẹme nọ a fi ẹgba họ nọ ọ rrọ ẹwẹ-obe avọ 28]

Mẹ avọ egbẹnyusu mẹ ma jẹ hae gwọlọ ohọre. Ma jẹ hae rọ emeghae gbe ibrire nọ a rẹ rọ fa ebọro esese họre ogbotu ahwo nọ a te 20 hayo tube vi ere dede