Библия чуртасты алыстырча

РАСТАФАРИ a полған кізіні дредтерін кизібізерге паза ах кізілерні хырт кӧрбеске ниме кӧӧктірген? Хайди рэкетир полған паза наркотиктер сатхан кізі чуртазын саңай алыстырыбысхан. Пу кізілер ниме чоохтапчатханнарын хығырып алыңар.

«Ах кізілерні хырт кӧргенімні тобырып алғам» (ХАФЕНИ НГАМА).

34 ЧАС

ТӦРЕЕН ХАЗНА: ЗАМБИЯ

ХАҶАН-ДА: РАСТАФАРИ

АВТОБИОГРАФИЯ. Мин беженецтернің лагерьінде, Замбияда, тӧреем. Чаа тузында іҷем Намибиядаң Замбиязар тизібіскен паза Юго-Западнай Африканың чонның организациязына кірібіскен (СВАПО). Ол организация, Намибияны Южнай Африканың ӱлгӱзінең осхырып алар ӱчӱн, кӱрескен.

Чуртазымның пастағы 15 чылы беженецтернің лагерьінде ирткен. СВАПО-ның лагерьлерінде чииттерні Намибияны осхырарында махачы аралазарға ӱгретчеңнер. Піске политическай кӧрістерні сиирте ӱгретчеңнер паза ах кізілерні хырт кӧрерге кӧӧктірҷеңнер.

11 час полғанда, мин христианин поларға сағыныбысхам паза аннаңар пасторнаң чоохтасхам. Пістің лагерьде тигіриб полған. Андар католиктер, лютеранецтер, англиканецтер паза пасха даа кізілер чӧрҷеңнер. Че пасторнаң чоохтазып алған соонда, мин атеист пол парғам. 15 частығда мин реггиге хыныбысхам паза Африкадағы чонны иреелердең осхырып алар ӱчӱн, растафарилерге хозылып алғам. Мин дредтер ӧскіріп алғам, марихуана тарт сыххам, ит чібин сыххам паза хара кізілернің пос чуртастарының ӱчӱн кӱрескем. Че мин сайбах чуртазымны, чабал фильмнерні паза хырызынғанымны тастабаам.

ХАЙДИ БИБЛИЯ ЧУРТАЗЫМНЫ АЛЫСТЫРЫБЫСХАН. 1995 чылда, мағаа 20 час полғанда, мин ноға піс чуртапчабыс тіп сағын сыххам. Растафари публикацияларын нинҷе таап алғам, оларны прай хығыр салғам. Анда пірееде Библияа ссылкалар полҷаң. Че анда Библияның стихтарын чарыда чоохтааны сидік паза пілдістіг нимес полған. Аннаңар мин Библияны хығырыбызарға паза прай нимені позым піліп аларға сағынып алғам.

Пірсінде минің нанҷым, растафари, Иегованың киречілері сығарған Библия істесчең публикация пирген. Мин анда пазылған нимелерні Библиянаң тиңнестіріп істес сыххам. Соонаң мин Иегованың киречілерінең танызып алғам. Олар миннең Библия ӱгрен сыхханнар.

Тамкы тартарын паза араға ізерін чадап ла тастап алғам (2 Коринфтегілерге 7:1). Тастындағы кӧрімімні алыстырыбысхам, дредтерімні хырығыбысхам, хырызынмин сыххам, порнография паза чабал фильмнер кӧрбин сыххам (Ефестегілерге 5:3, 4). Пола-пола мин ах кізілерні хырт кӧрбинібіскем (Илҷілернің 10:34, 35). Пу алызығлар идерге мағаа расовай хыртысха кӧӧктірчеткен сарыннарны испинібіскенім паза мині алыспазын тіп хынчатхан «нанҷыларнаң» нанҷыласпин сыхханым полыс пирген.

Мин Иегованың киречізі поларға хынғам паза оларның Залын таап алғам. Че кіреске тӱзерге идібіскемде, минің сӧбірем тоғырлан сыххан. Іҷем Иегованың киречілерінең пасха хайдағ даа «христианскай» религияа кірерге чаратхан. Тайым хазнада пӧзік орында одырған паза Иегованың киречізі поларға хынчатханыма тоғырланған.

Иисустың кӧзідімі паза чӧптері мағаа тоғырланысха паза кізілер кӱлчеткеніне орта хайарға полыс пиргеннер. Иегованың киречілері нимее ӱгретчеткенін паза Библияда ниме пазылчатханын тиңнестіргемде, сынны таап алғанымда ікінҷілебин сыххам. Кӧзідімге, Иегованың киречілері чахсы хабарны тарадарға устағ хоостыра тудынчалар паза политикада араласпинчалар (Матфей 28:19, 20; Илҷілернің 15:14; Псалом 146:3, 4; Иоанн 15:17, 18).

ЧУРТАЗЫМА ХАЙДАҒ ТУЗА АҒЫЛҒАН. Библиядағы чӧптерҷе тудынып, олар туза ағылчатханын кӧр салғам. Мин марихуана тартпин сыххам, аннаңар ай сай чӱзер доллар экономить пол сыххам. Галлюцинациялар полбин сыхханнар. Физическай паза эмоциональнай саринаң хазығым чахсы пол парған.

Ам мин ноға чуртапчатханымны пілчем. Паза Иеговаа чағын полып алғам (Иаковтың 4:8).

«Мині тарындырчатсалар даа, позымны холда тударға ӱгреніп алғам» (МАРТИНО ПЕДРЕТТИ).

43 ЧАС

ТӦРЕЕН ХАЗНА: АВСТРАЛИЯ

ХАҶАН-ДА: НАРКОДЕЛЕЦ

АВТОБИОГРАФИЯ. Мының алнында пістің сӧбіре удаа кӧс чӧрҷең. Піс кічиҷек городтарда, улуғ мегаполистерде чуртағлаабыс. Пір хати, тізең, аборигеннер чуртапчатхан аалда чуртаабыс. Піс туғаннарыбыснаң хада палыхтирға, аңнирға чӧрҷеңміс паза бумерангтар итчеңміс. Ол тустарны сағысха кирзем, чӱрееме уғаа чылығ пол парча.

Минің пабам боксер полған, аннаңар ол мині кічігдеңӧк тудызарға ӱгретчең. Мин уғаа чабал кізі пол парғам. Саарбах тузындох араға іс сыххам. Піс нанҷыларымнаң хада сыбыра тудызарға чӧрҷең полғабыс. Пычахтар паза бейсбольнай биталар алғлап алып, 20 азыра кізее тудызарға сегірҷең полғабыс.

Ідӧк мин пистолетнең алай мылтыхнаң кізілерні хорыхтырып, наркотиктер сатчатханнарға ахча чыырға полысчаң полғам. Мин кізі ӧдірҷең кізі пол парарға хынғам. Паза «ӧдірібіс алай сині ӧдірібізерлер» тіп принцип хоостыра чуртаам.

ХАЙДИ БИБЛИЯ ЧУРТАЗЫМНЫ АЛЫСТЫРЫБЫСХАН. Иегованың киречілерінеңер мин саарбах тустох искем. Пір дее ундутпинчам, пірсінде мин іҷемнең оларны хайда таап аларға тіп сурғам. Андада мағаа 20-ҷе час полған. Ікі кӱн пазынаң Иегованың киречізі, Диксон, пістің ізікті тохлатхан. Ол мині Иегованың киречілерінің чыылиина пар килерге хығырған. Мин парғам. Ол тустаң сығара 20 чыл азыра андар чӧрчем. Прай минің сурығларыма Иегованың киречілері Библия хоостыра нандырғаннар.

Иегова полған на кізінің, хара сағыстығ даа кізінің чуртазын, аарлыға санапчатханын піліп алғамда, хайди тың ӧрінгем (2 Петрның 3:9). Мин хыныстығ пабаны таап алғам. Прайзы даа миннең хыйа айланыбысса, ол мині артыспас. Чазыхтарымда пыросынзам, Худай минің пыромны тастир. Ол сағыс мині часхарған. Ефестегілерге 4:22—24-гі сӧстер мині «иргі чуртас кибірлерін хыйа тастап... Худайның омазы хоостыра чайалған наа кізее» айлан парарға кӧӧктірген.

Мағаа алызарға оой полбаан. Неделя наркотиктер чох чуртап ползам даа, тынанҷаң кӱннерде нанҷыларымнаң тоғас парзам, наркотиктернең хатап айғас сыхчаң полғам. Мин пілгем, наркотиктер тастап, чуртазымны нааҷылап алар ӱчӱн, мағаа нанҷыларымны артыс саларға кирек полған. Аннаңар пасха штатсар парыбызарға пӧгін алғам. Нинҷе-де нанҷы мині ӱдезерге килген. Чолда парчатханда, олар марихуана тарт сыхханнар паза мағаа пиргеннер. Мин, тізең, наркотиктерні саңай тастабызарға пӧгін алғам, аннаңар отказ полыбысхам. Соонаң минің «нанҷыларым», мылтыхтар алып-алып, банкты тонабысханнарын ис салғам.

ЧУРТАЗЫМА ХАЙДАҒ ТУЗА АҒЫЛҒАН. Нанҷыларымны алыстырыбысхан соонда, мағаа алызарға хай-хай ниик пол парған. 1989 чылда, мин кіреске тӱзіп алып, Иегованың киречізі пол парғам. Ӱр ниместең минің іҷем, пиҷем паза пабам ідӧк Иегованың киречілері полып алғаннар.

Піс ипчімнең 17 чыл хада чуртап парибыс. Пістің ӱс уғаа чахсы пала. Мині тарындырчатсалар даа, позымны холда тударға ӱгреніп алғам. Мин «ноо даа сӧӧктең, чоннаң паза тілнең» чоннарына хынарға ӱгреніп алғам (Азых чоох 7:9). Иисус теен: «Сірер, сӧзімні толдырзаңар, Минің сын ӱгренҷілерім поларзар. Сынны піліп алзаңар, сын киртініс сірерні пос чуртастығ кізілер ит салар» (Иоанн 8:31, 32). Анзын мин позымның чуртазымда кӧргем.

[Вставка]

«Расовай хыртысха кӧӧктірчеткен сарыннарны испинібіскем»

[Вставка]

«Пычахтар паза бейсбольнай биталар алғлап алып, 20 азыра кізее тудызарға сегірҷең полғабыс»

[Сноска]