Кʹьтеба Пироз Жийина Мәрьва Дьгӧһезә

МӘРЬВӘКИ растафари * ча карьбу пʹорʹе хԝәйи дред бьбьрʹә у мәрьвед бь чʹәрме сьпи ида нәфрʹәт нәкә? Мәрьвәки щаһьл у зӧльм, йе кӧ наркотика дьфьрот у дьда хәбате, у дәсте зоре пʹәра жь хәлԛе дьстанд, чь ԝи һелан кьр ԝәки әʹмьре хԝә бьгӧһезә? Ԝәрә әм шеԝьр кьн һәла әԝ мәрьв дәрһәԛа хԝә чь гьли дькьн.

«Әз Һин бум Фьрԛи Нәкьмә Нава Мәрьва». ҺАФЕНИ НГАМА

САЛ: 34

ԜӘЛАТ: ЗАМБИЙА

БӘРЕ: РАСТАФАРИ

ЖИЙИНА МЬНӘ БӘРЕ: Әз һатьбум буйине кампа рʹәвийа Замбийайеда. Ԝәʹде шәрʹ дийа мьн жь Намибйайе рʹәвийа у кʹәтә Тʹәшкиләта Мьләти йа Африкайа Рʹоһлата Башуре (South West Africa People’s Organization). Әв тʹәшкиләт тʹәви режима Африкайа Башуре шәрʹ дькьр, кʹижан кӧ ԝи чахи Намибйайеда сәрԝерти дькьр.

Һʹәта 15 салийа хԝәда әз щурʹә-щурʹә кампед рʹәвийада дьжитьм. Ԝан кампада йед щаһьл һин дькьрьн, ԝәки әԝана бона азайе шәрʹ бькьн. Мә дькьрьнә нава шьхӧлед политике у мә һин дькьрьн мәрьвед бь чʹәрме сьпи нәфрʹәт бькьн.

Чахе әз 11 сали бум, мьн дьхԝәст бьбьм Мәсиһи у дәрһәԛа ве йәке мьн кʹәшишәкирʹа гот. Кампа мәда һәбу дер, кʹидәре мәрьвед жь щурʹә-щурʹә религийа дьчун, мәсәлә Католикед Рʹомайи, Лутерити у йед дьн. Ле паши хәбәрдана тʹәви ԝи кʹәшиши, әз бумә атеист. Чахе әз 15 сали бум, һʹьзкьрьна мьн һьндава мусика реги у хԝәстьна мьн кӧ щьмәʹта Африкайе жь чәрчьрандьне хьлаз кьм, мьн һелан кьр бькʹәвьмә религийа растафари. Мьн пʹорʹе хԝә дьреж кьр, дәстпекьр марихуанайе бькʹьшиньм, мьн ида гошт нәдьхԝар у дәстпекьр бона азайа мәрьвед бь чʹәрме рʹәш шәрʹ бькьм. Ле диса жи әз бь жийина бенамуси дьжитьм, мьн филмед бь зордарийе тʹьжә дьдит у чʹерʹа дькьр.

ЧАԜА КʹЬТЕБА ПИРОЗ ЖИЙИНА МЬН ГӦҺАСТ: Сала 1995-да чахе әз 20 сали бум, мьн дәстпекьр дәрһәԛа нета жийине бьфькьрьм. Мьн һʹәму әʹдәбйәтед религийа растафари леколин кьр. Һьнә ԝан әʹдәбйәтада Кʹьтеба Пироз дьһатә шьровәкьрьне, ле әԝ шьровәкьрьн бона мьн фәʹмдари нибу. Ләма жи мьн сафи кьр Кʹьтеба Пироз хԝәха бьхуньм у леколин кьм.

Щарәке һәваләки мьн, йе кӧ мина мьн растафари бу, әʹдәбйәтәк да мьн, кʹижан кӧ Шәʹдед Йаһоԝа дәрхьстьбун. Мьн дәстпекьр хԝәха әԝ леколин бькьм у бәрамбәри тʹәви Кʹьтеба Пироз бькьм. Паше әз рʹасти Шәʹдед Йаһоԝа һатьм у ԝана тʹәви мьн һинбуна Кʹьтеба Пироз дәстпекьр.

Рʹаст ә мьнрʹа гәләк чәтьн бу, ле йәкә мьн карьбу тʹәрка ичʹке у щьхаре бьдьм (2 Корьнтʹи 7:1). Мьн щурʹе кʹьнщхԝәкьрьна хԝә гӧһаст, пʹорʹе хԝә бьрʹи, ида чʹерʹа нәдькьр, тʹәрка ньһерʹандьна порнографийайе да у филмед бь зордарийе тʹьжә (Әфәси 5:3, 4). Ԝәʹдә шунда мьн ида дәстпекьр мәрьвед бь чʹәрме сьпи һʹьз бькьм (Кʹаред Шандийа 10:34, 35). Сәва кӧ ԝан гӧһастьна бькьм, мьн ида нәдьбьһист кʹьламед ӧса, кʹижан кӧ нәфрʹәтийа һьндава мьләта пешда дьанин. Мьн ида һәвалти нәдькьр тʹәви һәвалед хԝә, чьмки ԝана дьхԝәст кӧ әз мина бәре бьм.

Мьн дьхԝәст бьбуйа Шәʹде Йаһоԝа у ләма жи мьн дәстпекьр Ода Щьвате бьгәрʹьм. Ле мәрьвед мьн мьԛабьли ве йәке бун кӧ әз бемә ньхӧмандьне. Дийа мьн гот кӧ һе баш ә бьбьм «Мәсиһийе» религийәкә дьн, нә кӧ Шәʹде Йаһоԝа. Апе мьн, йе кӧ дәԝләтеда ԛӧльха бьльнд дьгьрт, тʹьме мьԛабьли ве йәке бу кӧ әз бьбьм Шәʹде Йаһоԝа.

Мәсәла Иса у ширәтед ԝи али мьн кьрьн, ԝәки сәр пәйкʹәтьна у ԛәрфа рʹаст бьньһерʹьм. Чахе мьн һинкьрьнед Шәʹдед Йаһоԝа бәрамбәри ве йәке кьр чь кӧ Кʹьтеба Пирозда ньвисар ә, әз избат бум кӧ мьн рʹасти дит. Мәсәлә, Шәʹдед Йаһоԝа тʹәмийа Кʹьтеба Пироз тиньн сери кӧ мьзгине бәла дькьн (Мәтта 28:19, 20; Кʹаред Шандийа 15:14). Хенщи ве йәке, әԝана накʹәвьнә нава шьхӧлед политикайе (Зәбур 146:3, 4; Йуһʹәнна 15:17, 18).

ЧЬ КʹАР МЬН СТАНД: Чахе мьн дәстпекьр ширәтед Кʹьтеба Пироз бьдьмә хәбате, мьн дит кӧ чьԛас әԝана кʹаре тиньн. Мьн тʹәрка марихуанайе да, у жь бо ве йәке мьн ида һәр мәһ бь сәда долара хәрщ нәдькьр. Һалусинасйонед мьн ида тʹӧнә нә, у сьһʹәт-ԛәԝата мьн жи баш буйә, һьн физики һьн жи емосийалида.

Ньһа әз заньм нета жийина мьн чь йә. Ле йа лапә фәрз әԝ ә, ԝәки әз ньһа тʹәхмин дькьм кӧ әз һе незики Хԝәде бумә (Аԛуб 4:8).

«Әз Һин бум Һерса Хԝә Контрол Кьм». МАРТИНО ПЕДРЕТИ

САЛ: 43

ԜӘЛАТ: АВСТРАЛЙА

БӘРЕ: НАРКОТИКА ДЬФРОТ У ДЬДА ХӘБАТЕ

ЖИЙИНА МЬНӘ БӘРЕ: Бәре малбәта мьн гәләк щар щьһе дьбу. Әм һьм шәһәред бьчʹукда һьм жи шәһәред мәзьнда дьжитьн. У щарәке мә һәла һе жи тʹәви аборигена дьжит. Әз бь шабуне тиньм бира хԝә әԝ ԝәʹдә, гава әм тʹәви мәрьвед хԝә дьчунә ԝәки мәʹсийа бьгьрьн, мә нечʹирвани дькьр у бумеранга чедькьр.

Чахе әз һе бьчʹук бум, баве мьн әз һин дькьрьм ԝәки гӧлаше бьгьрьм, чьмки әԝ хԝәха боксор бу. Әз бумә йәки гәләк берʹәʹм. Щаһьлтийеда мьн дәстпекьр ичʹке вәхԝьм. Әз тʹәви һәвалед хԝә гәләк шәрʹуд бум. Мә пе кʹерʹа у даред бейсболе һʹьщуми сәр 20 у һе зедә мәрьва дькьрьн.

Мьн әʹбура хԝә дькьр пе ве йәке кӧ наркотика дьфьрот у тьштед дьзи. Ӧса жи мьн пе чʹәка зоре мәрьва дькьр, ԝәки пʹәрә бьдьнә мьн, сәва паше әз ԝан пʹәра бьдьмә ԝан, йед кӧ наркотика дьфьротьн. Мьн дьхԝәст бьбума меркӧж у әз пе ве принсипе дьжитьм: «Бькӧжә йан на ԝе тә бькӧжьн».

ЧАԜА КʹЬТЕБА ПИРОЗ ЖИЙИНА МЬН ГӦҺАСТ: Дәрһәԛа Шәʹдед Йаһоԝа мьн һе щаһьлтийеда бьһистьбу. Һʹәта иро рʹьнд те бира мьн, чахе щарәке мьн жь дийа хԝә пьрси, ԝәки әз кʹидәре дькарьм ԝана бьвиньм. Һьнге әз 20 сали бум. Чәнд рʹож шунда Шәʹдәки Йаһоԝа бь наве Диксон дәри мала мә хьст. Әԝи әз тʹәглифи сәр щьвата Шәʹдед Йаһоԝа кьрьм. Әз ԛайил бум у ида 20 сал зедәтьр ә әз темә сәр щьвата. Шәʹдед Йаһоԝа щаба пьрсед мьн сәр һʹиме Кʹьтеба Пироз дьдан.

Әз гәләк ша бум гава әз пеһʹәсийам, ԝәки бона Йаһоԝа әʹмьре һәр кәси ԛимәт ә, һәла һе әʹмьре мәрьве хьраб жи (2 Пәтрус 3:9). Әз дәрһәԛа Бавәки һʹьзкьри пеһʹәсийам, йе кӧ ԝе бона мьн хәм бькә, һәла һе һьнге жи һәрге гьшк пьшта хԝә бьдьнә мьн. Әԝ йәк дьлбиникә мәзьн да мьн гава әз пеһʹәсийам, ԝәки һәгәр әз тʹобә бькьм Хԝәде ԝе гӧнед мьн бьбахшинә. Гьлийед жь Әфәси 4:22-24 мьн һелан кьрьн, ԝәки «мәрьве кәвьн» сәр хԝә бехьм, у «мәрьве ну» ль хԝә кьм, кʹижан кӧ ль гора ԛьрара Хԝәде хӧльԛанди йә.

Һәмьки мьнрʹа һеса нибу перʹа-перʹа бемә гӧһастьне. Мьн дькарьбу һʹәфтеки наркотика нәда хәбате, ле Шәми у Ләʹда гава әз рʹасти һәвалед хԝә дьһатьм, мьн нькарьбу хԝә бьгьрта у мьн диса наркотик дьда хәбате. Мьн фәʹм дькьр кӧ һәгәр әз дьхԝазьм тʹәрка наркотика бьдьм у әʹмьре хԝә бьгӧһезьм, әз гәрәке жь ԝан һәвалед хԝә дур бьм. Ләма жи мьн сафи кьр дәрбази шәһәрәки дьн бьм. Йәк жь һәвалед мьн мьнрʹа гот, ԝәки әԝ дьхԝазә мьн вәрʹе кә у әз ԛайил бум. Рʹева һәвалед мьн дәстпекьрьн марихуанайе бькʹьшиньн, у мьнрʹа жи готьн ԝәки әз бькʹьшиньм. Ле әз ԛайил нәбум, чьмки мьн хԝәрʹа сафи кьр ԝәки тʹәрка ви хәйсәте хьраб бьдьм. Һьнге әм жь һәв ԛәтийан у ахьрийеда әз пеһʹәсийам, ԝәки әԝ «һәвалед» мьн бь чʹәка банка мәзьн тʹалан кьрьн.

ЧЬ КʹАР МЬН СТАНД: Һәма ча әз жь һәвалед хԝә дур кʹәтьм, мьнрʹа дьһа һеса бу тʹәрка хәйсәтед хьраб бьдьм. Сала 1989-да әз һатьмә ньхӧмандьне. Ԝәʹдә шунда хушка мьн у де-баве мьн жи бунә Шәʹдед Йаһоԝа.

Әз ида 17 сал зәԝьщи мә у се зарʹед мә һәнә. Әз һин бум хԝә бьгьрьм һәла һе гава һерса мьн жи тиньн. Әз ӧса жи һин бум мәрьва һʹьз бькьм, жь һʹәму ‹бәрәка, мьләта у зьмана› (Әʹйанти 7:9). Мьн хԝәха сәр хԝә тʹәхмин кьр, ԝәки гьлийед Иса чьԛас рʹаст ьн. Әԝи гот: «Һәгәр һун сәр һинкьрьна мьн бьминьн, һуне рʹаст шагьртед мьн бьн. Һуне рʹастийе нас кьн у рʹастийе ԝә аза кә» (Йуһʹәнна 8:31, 32).

 [Ньвисар]

Сәва кӧ гӧһастьна бькьм, мьн ида нәдьбьһист кʹьламед ӧса, кʹижан кӧ нәфрʹәтийа һьндава мьләта пешда дьанин

 [Ньвисар]

Әз тʹәви һәвалед хԝә гәләк шәрʹуд бум. Мә пе кʹерʹа у даред бейсболе һʹьщуми сәр 20 у һе зедә мәрьва дькьрьн