Bibele ya Cincanga Bupilo Bwa Batu

KI SIKAMAÑI se ne si susuelize Rasta ku kuta milili ya hae ni ku tula saluluti sa na na ni sona kwa makuwa? Mi ki sikamañi se ne si konisize mucaha ya na amuhelanga masheleñi a balekisi ba milyani ye kola ku cinca bupilo bwa hae? Ha lu nyakisiseñi ze ba bulela batu bao.

“Mane ne ni tulile saluluti se ne ni na ni.”—BO HAFENI NGHAMA

LILIMO ZA KU PEPWA: 34

NAHA KO BA SIMULUHA: ZAMBIA

LITABA ZE EZAHEZI: NE BA BANGA RASTA

BUPILO BWA KA BWA KWAMULAHO: Ne ni pepezwi mwa nkambe ya babalehi mwa Zambia. Bo ma ne ba balehile kwa Namibia ka nako ya ndwa mi ne ba swalisana ni kopano ya South West Africa People’s Organization (SWAPO). Kopano ye, ne i lwanisa puso ya South Africa ye ne busa Namibia ka nako yeo.

Ku zwa fo ni pepelwa ku to fita ha ne ni li wa lilimo ze 15, ne ni pilile mwa li nkambe za babalehi li sikai. Ba banca be ne ba li mwa linkambe za babalehi ze ne etelelwa ki kopano ya SWAPO ne ba beilwe kwapili mwa ku eza lika ze ne ka tahisa kuli ba fumane tukuluho. Ne lu lutilwe litaba za naha mi ne lu lutilwe ni ku toya makuwa.

Ha ne ni li wa lilimo ze 11, ne ni bata ku zibahazwa sina Mukreste mwa keleke ya mwa nkambe ye ne tomilwe ka ku kopanya likeleke za Katolika, Lutheran, Anglican, ni likeleke ze ñwi. Pasita ye ne ni ambozi ni yena na ni zwafisize ku nga muhato wo. Ku zwelela hona fo feela, se ni kala ku lumela kuli Mulimu ha yo. Nihakulicwalo, ha ne ni li wa lilimo ze 15, lilato le ne ni na ni kwa lipina za reggae ni takazo ya ka ya ku feza saluluti se ne ba boniswa batu ba bansu ba mwa Africa ne li ni tahiselize ku swalisana ni sikwata sa ma-Rasta. Ne ni uta milili ye mitelele, ne ni zuba matokwani, ne ni tuhezi ku ca nama mi ne ni yemela hahulu tukuluho ya batu ba bansu. Nihakulicwalo, ne ni si ka cinca mupilelo wa ka o maswe kamba ku tuhela ku buhanga mafilimu a mifilifili. Mi na zwelapili ku itusisa lipulelo za kashwau.

MO NE I CINCELIZE BUPILO BWA KA BIBELE: Ka 1995, ha ne ni li wa lilimo ze batoo ba 20, na kalisa ku nahanisisa ze ne ni tokwa ku eza mwa bupilo bwa ka. Ne ni balanga lihatiso kaufela za ma-Rasta ze ne ni fumananga. Ze ñwi za libuka zeo ne li amanga kwa Bibele, kono ne ni sa utwisisi ze ne taluswa. Kacwalo na kalisa ku bala Bibele ni nosi.

Hamulaho, mulikanaa ka wa mu-Rasta na ni file buka ya Lipaki za Jehova ya ku ituta Bibele ka yona. Ne ni itutanga buka yeo hamohocwalo ni Bibele ni nosi. Hamulaho, na fumana Lipaki za  Jehova mi na zwelapili ku ituta ni bona tuto ya ka ya Bibele.

Ka ku eza buikatazo bo butuna, na tuhela ku zuba ni ku nwa hahulu bucwala. (2 Makorinte 7:1) Na lukisa ponahalo ya ka, na kuta milili ya ka, na tuhela ku buhanga maswaniso a mapunu, ni mafilimu a mifilifili, mi na tokolomoha ku itusisanga lipulelo za kashwau. (Maefese 5:3, 4) Nako ha inze i ya, na tula saluluti se ne ni bonisa kwa makuwa. (Likezo 10:34, 35) Ku eza licinceho zeo ne ku tokwa kuli ni tuhele ku teelezanga lipina ze ne susueza saluluti ni ku tuhela ku swalisana ni balikani ba ka ba kale, ili ba ne ba ni hapelezanga ku kutela mupilelo wa ka wa kale.

Hamulaho wa ku eza licinceho zeo, na tembauka Ndu ya Mubuso ya Lipaki za Jehova mi na ikupela kuli ni swalisane ni bona. Ha ne ni bata ku kolobezwa sina yo muñwi wa Lipaki za Jehova, lubasi lwa ka ne lu si ka tabela. Bo ma ne ba ni bulelezi ku keta bulapeli bu sili bwa “Sikreste” kono isiñi bwa Lipaki za Jehova. Bo malume ba bañwi ba ne ba zibahala hahulu mwa muuso, ne ba ni lwanisanga nako kaufela kabakala keto ye ne ni ezize ya ku swalisana ni Lipaki.

Kono ku ituta ka mo Jesu na pilisanezi ni batu ni ku sebelisa kelezo ya hae ne ku ni tusize ku talimana ni twaniso ni sheununo. Ha ne ni bapanyize ze ba luta Lipaki ni ze i bulela Bibele, ne ni kozwi kuli ne ni fumani bulapeli bwa niti. Ka mutala, ba latelela taelo ya Bibele ya ku kutaza ku ba bañwi. (Mateu 28:19, 20; Likezo 15:14) Mi ha ba abani mwa litaba za naha.—Samu 146:3, 4; Joani 15:17, 18.

MO NI TUSELIZWE: Ku ituta ku pila ka likuka za Bibele ku ni tusize mwa linzila ze ñata. Ka mutala, ku tuhela ku zuba matokwani ku ni tusize ku sa sinya masheleñi a mañata hahulu kweli ni kweli. Ki kale ni tuhela ku bonanga lika ze sa bonahali, mi munahano ni mubili wa ka se li li mwa buikangulo bo bunde.

Se ni na ni za ku eza mwa bupilo ili ze ne ni nyolelwanga ha ne ni sa li mutangana. Mi sa butokwa ni ku fita, ni ikutwa kuli ni sutelezi ku Mulimu.—Jakobo 4:8.

“Ni itutile ku iswala ha ni nyemile.”—BO MARTINO PEDRETTI

LILIMO ZA KU PEPWA: 43

NAHA KO BA SIMULUHA: AUSTRALIA

LITABA ZE EZAHEZI: MULEKISI WA MILYANI YE KOLA

BUPILO BWA KA BWA KWAMULAHO: Lubasi lwa ka hañata ne lu tuta-tutanga ha ne ni sa hula. Ne ni pilile mwa litolopo-nyana, mwa muleneñi o mutuna, mi ka nakonyana ne ni pilile mwa sibaka sa matakanyani sa ma-aborigine se ne si zamaiswa ki Maprotestanti mwa naha ya Australia. Ni hupula hande nako yeo na ni likaizeli za bo ma hamohocwalo ni bana ba bona ha ne lu yambanga, ha ne lu zumanga, ni ku beta lika ze ñwi.

 Bo ndate ne li babapali ba liñindi mi ne ba kalile ku ni luta ku lwana ha ne ni sa li mwanana hahulu. Ne ni li mutu wa mifilifili nako kaufela. Ha ne ni sa nonoboka, ne ni tandanga nako ye ñata ku nwa bucwala kwa mikotokoto. Na ni balikani ba ka ne lu lwanisanga ba bañwi. Ne lu itusisanga litipa ni milamu ku lwanisa batu ba 20 kamba ku fitelela.

Ne ni fumananga masheleñi ka ku lekisa milyani ye kola ni lika ze ne ba uzwanga babeleki ba kwa mafuwekelo a lisepe. Hape ne ni amuhelanga masheleñi a balekisi ba milyani ye kola ni ku bemba batu ka ku itusisa litobolo. Ne ni lela kuli ni be sibulai. Ne ni lumela kuli, Bulaya hakusicwalo u ka bulaiwa.

MO NE I CINCELIZE BUPILO BWA KA BIBELE: Ne ni utwile za Lipaki za Jehova ha ne ni hula. Ha ne ni li mwa lilimo za makalelo a ma-20, ni hupula kuli ne ni kile na buza bo ma ka za haiba ne ba ziba ko ne ba fumaneha Lipaki za Jehova. Hamulaho wa mazazi a mabeli, Paki ya bizwa Dixon na tiloo ngongota fa munyako wa ndu ya ka. Hamulaho wa ku ambolisana ni yena ka nakonyana, a ni mema kuli ni yo fumaneha kwa mikopano ya Lipaki za Jehova. Ne ni ile kwa mikopano yeo mi ni zwezipili ku fumanehanga kwateñi ka lilimo ze fitelela 20. Lipaki ne ba konile ku alaba lipuzo za ka kaufela ka ku itusisa Bibele.

Ne ni tabile ku ziba kuli Jehova u tabela batu kaufela, nihaiba ba ba sa mu lapeli. (2 Pitrosi 3:9) Ne ni lemuhile kuli ki ndate ya lilato ya na ka ni babalela, niha ne ku si ke kwa ba ni mutu ya na ka ni babalela. Hape ne ni tabile ku ziba kuli Jehova na ka swalela libi za ka ha ne ni ka cinca mizamao ya ka. Litimana za Bibele za Maefese 4:22-24 ne li ni tusize hahulu. Litimana ze, ne li ni susuelize “ku tubula . . . mutu wa kale” ni ku “apala mutu yo munca ya bupwa ka siswaniso sa Mulimu mwa ku luka.”

Ne ku ni ngezi nako kuli ni cince mupilelo wa ka. Ne ni fezanga sunda ni sa itusisi milyani ye kola, kono la mukibelo ni la sunda ha ne ni banga ni balikani ba ka ne ni itusisanga yona. Ne ni lemuhile kuli ne ni swanela ku tokolomoha balikani ba ka haiba ne ni bata ku eza licinceho mwa bupilo, mi se ni ikatulela ku tutela kwa sibaka si sili. Balikani ba ka ba bañwi ba itakaleza ku ni sindeketa, mi na lumela. Mwahalaa musipili, ba kalisa ku zuba matokwani mi ba ni fa kwateñi. Se ni ba bulelela kuli ni sweli ku tuhela mikwa ye maswe ye cwale ka ku zuba, mi se ni zwelapili mwa musipili wa ka ni nosi ku zwa fa museto wa naha. Hamulaho na utwa kuli nakonyana ku zwa fo, balikani ba ka ne ba izo uzwa masheleñi mwa panga ka ku itusisa tobolo.

MO NI TUSELIZWE: Hamulaho a ku tuhela ku swalisana ni balikani ba ka, kwa ni bela hahulu bunolo ku eza licinceho mwa bupilo. Ka 1989, na ba Paki ya kolobelizwe. Hamulaho wa ku kolobezwa, munyanaa ka wa musizani, bo ma ni bo ndate ba swalisana ni na ku sebeleza Jehova.

Se ku fitile lilimo ze 17 ku zwa fo ni nyalela mi ni na ni bana ba balalu ba ba nde. Ni itutile ku sa nyema-nyema niha ni foselizwe. Mi ni itutile ku lata batu ba ‘mishobo kaufela, ba masika kaufela, ni ba lipuo kaufela.’ (Sinulo 7:9) Ni ikutwa kuli manzwi a Jesu a bile a niti. Na bulezi kuli: “Ha mu tiiseza mwa linzwi la ka, mu ka ba balutiwa ba ka ba niti; mi mu ka ziba niti, mi niti i ka mi lukulula.”—Joani 8:31, 32.

[Manzwi a fa likepe 15]

Ku eza licinceho ne ku tokwa kuli ni tuhele ku teelezanga lipina ze ne susueza saluluti

[Manzwi a fa likepe 16]

Na ni balikani ba ka ne lu lwanisanga ba bañwi. Ne lu itusisanga litipa ni milamu ku lwanisa batu ba 20 kamba ku fitelela