Bible Walamunanga Būmi bwa Bantu

LELO i bika byatonwene Rasta umo atende bibande bya nywene yandi milampe ne kunekenya mfwatakani yaadi ufwatakenya bazungu? Kadi le i bika byakweshe nsongwalume umo kipolapola wamwene lupeto mu dyamba alamune būmi bwandi? Teja bisa kunena bano bantu.

“Nanekenye mfwatakani yami.”—HAFENI NGHAMA

MYAKA: 34

NTANDA YABO: ZAMBIA

PA KALA: RASTA

BYONADI: Nabutwidilwe mu nkambi ya balefije mu Zambia. Mama wanyemene mu Namibi mu kitatyi kya divita ne watwelele mu Kitango kya Bantu ba mu Afrika wa Kupona (SWAPO). Kino kitango kyadi kilwa na buludiki bwa Afrika wa Kunshi bwadi bwendeja Namibi mu kine kitatyi’kya.

Kashā mbutulwa nashikete mu mankambi palapala mu bula bwa myaka 15. Bankasampe ba mu mankambi a kitango kya SWAPO badi banenwe kutwela mu katangotango ka bunyongolodi. Twadi tufundijibwa politike ne kushikwa bazungu.

Ponadi na myaka 11, nasakile kwikala bu Mwine Kidishitu mu kipwilo kyadi mu nkambi kyadi kityange’mo bantu ba Katolika Loma, ba kipwilo kya Luthérienne, ba Mishoni, ne bakwabokwabo. Pashitele onalombwele wankankeje kutwela’mo. Tamba papo, nashilula kutuna kwikala’ko kwa Leza. Ino ponabwenye myaka 15, kuswa konadi nsenswe minjiki ya rege ne kwabila kupwija masusu asuswilwe bantu bafita ba mu Afrika kwankunkile ntwele mu ba Rasta. Nalepeje bibande bya nywene, kutoma dyamba, naleka kudya mwita wa ntanda, nashilula kulwila bwanapabo bwa bafita. Inoko, nkyalekelepo būmi bwa bya bulongelonge nansha kutala mafilime a bupolapola. Kadi naendelele kwikala na mutonko.

MWAALAMWININE BIBLE BŪMI BWAMI: Mu 1995, ponakidi na myaka 20, nashilwile kulangulukila bininge pa mufwaninwe kwikadila būmi bwami. Nefundile bitabo byonso bya ba Rasta byonadi ntana. Bimo byadi binyemena ku Bible, ino nkyadipo ngivwanija byadi bishintululwa’mo. Penepa natyiba butyibi bwa kutanga Bible ami mwine.

Kupwa, mukwetu umo Rasta wampa kitabo kimo kilupwilwe na Batumoni ba Yehova kya kwifunda nakyo Bible. Nefunda’kyo ami mwine pamo ne Bible. Ebiya, netana na Batumoni ba Yehova keñendelela kwifunda nabo Bible.

 Ami pa kwielela’ko, naleka’byo kutoma dyamba ne butondwe. (2 Kodinda 7:1) Nedyangula, natenda bibande bilampe bya nywene yami, naleka kutala mafilime a bantu badi mutaka ne a bupolapola, ne kwijiba ku ludimi lwa mutonko. (Efisesa 5:3, 4) Bityebitye, nanekenya ne kunekenya mfwatakani imbi pa bazungu. (Bilongwa 10:34, 35) Kushinta uno muswelo kwadi kulomba ne kufundwila kulampe minjiki ikankamika kwisañuna kwa nkoba ne kutyiba kipwano na balunda bonadi nabo, badi bakokeja kunjokejeja monka mu būmi bwa kala.

Ami pa kupwa kwalamuka namino, nakimbile kudi Njibo ya Bulopwe ya Batumoni ba Yehova ne kwibalomba ntwele mu kyabo kipwilo. Twashilula kwifunda Bible. Ponatyibile butyibi bwa kubatyijibwa ne kwikala Kamoni wa Yehova, kisaka kyami kekyasangelepo. Mama wanombwele amba kimba kipwilo kikwabo kya “Bwine Kidishitu” kupita’ko kya Batumoni ba Yehova. Muyomba umo, wadi mutumbe mu leta, wantopekele pa kutonga konatongele kwilunga na Batumoni.

Inoko, kwifunda muswelo wadi wikele Yesu na bantu ne kulonda madingi andi kwankweshe ndwe na lwana ne mifutululo. Ponadingakenye bifundija Batumoni na binena Bible, naitabije amba natana kipwilo kya bine. Kimfwa, balondanga musoñanya wa Bible wa kusapwila bakwabo. (Mateo 28:19, 20; Bilongwa 15:14) Kadi kebekujangapo mu politike.—Mitōto 146:3, 4; Yoano 15:17, 18.

KAMWENO KONAMWENINE’MO: Kwifunda kulonda misoñanya ya mu Bible i kunkwashe mu būmi. Kimfwa, kuleka kutoma dyamba kwankūdile ku kusupakanya madolala tutwa na tutwa kweji ne kweji. Nkyadipo kadi mona bya kumonakanya, ñeni ne ngitu yami byalumbulukile.

Pano būmi bwami ke budi mu dishinda kadi na kitungo kyonadi ngabilanga tamba pa bwanuke. Kadi kya mvubu kutabuka, pano neimvwananga amba mbwanya kufwena kudi Leza.—Yakoba 4:8.

“Nefundile kutalaja bulobo bwami.”—MARTINO PEDRETTI

MYAKA: 43

NTANDA YABO: OSTRALI

PA KALA: NSUNGA WA DYAMBA

BYONADI: Ponatamine, kisaka kyetu kyadi kivilukaviluka. Twashikete mu bibundi bityetye ne mu bikatampe, kadi kyaba kimo twakashikete bityetye kunja. Nekivulukile kitatyi kyotwadi na ba muyomba ne babo bana—twenda mu buluwe bwa lui ne bwa ntanda, tupunga bintu bikwabokwabo bya kunja.

Tata wadi ukaya makayo a bokse washilwile kumfundija mwa kwikupidila ponakidi  nkasampe. Bupolapola bwaikala ke mwikadilo wami. Ponadi na myaka mipite pa dikumi, nadi ntomanga kitatyi kilampe ku bala. Ami ne balunda nami twadi tusaka luma. Twadi twenda ne bipete ne tupini, tutamba kibumbo kya bantu 20 ne kupita.

Nadi mona lupeto mu kupotoloja dyamba ne bintu bibwa na bengidi ba ku byabu. Nadi nkeba lupeto lwa bansunga ba dyamba ne kuzakaja bantu na mata. Kyonadi nsaka i kwikala ntapañani. Kyami’tu i kufwa nansha kwipayañana.

MWAALAMWININE BIBLE BŪMI BWAMI: Po nadi ntama naivwene batela Batumoni ba Yehova. Ami pa kufikija myaka 20 ne kupita, navuluka kwipangula mama shi uyukile kudi Kamoni nansha umo. Mafuku abidi pa kupita’po, Kamoni witwa dya bu Dixon wakokola ku yetu njibo. Twesamba nandi kipindi, waungita kukapwila na Batumoni ba Yehova. Nakapwila nabo kadi ne pano ke myaka 20 yompwila nabo. Kipangujo kyonso kyonadi ngipangula, Batumoni badi banondolola na Bible.

Nasangele pa kwifunda amba Yehova utele muntu ne muntu mutyima, nansha bampikwa bwine Leza bene. (2 Petelo 3:9) Nayukile amba Leza i Tata wa buswe untele mutyima, nansha shi kekudipo untala. Kadi natūkijibwe mutyima pa kuyuka amba ukalekelanga bubi bwami shi nashinta. Mukanda wa mu Bible wa Efisesa 4:22-24 wantengele bininge ku mutyima. Kino kisonekwa kyankankamikile kupanga “bobwa bu-muntu bwa kala” ne kuvwala “muntu mupya wakupangibwa umboloke, ne bu-ujila bwa binebine, mwikadile Leza.”

Byanombele mafuku pa kushinta būmi bwami. Nadi mpwa yenga pakubulwa kutenga dyamba, ino shi ke ku mfulo kwa yenga tubetana na balunda, kadi nakoka’ko. Namwene amba mfwaninwe kupaluka balunda shi nsaka kulumbulula būmi bwami, o mwanda natongele kuvilukila kukwabo. Balunda bamo basakile kunshidikila, nami naitabija. Mwishinda, bashilula kutoma dyamba ne kuntambika’ko nami. Nebalombola’mba nkendi muleke’dyo, twaenda nabo kufika ne ku mukalo wa ntanda. Kupwa nayuka’mba balunda nami bakebile ku banki na mata.

KAMWENO KONAMWENINE’MO: Ami’tu mpwa kutyiba kipwano na bano balunda, byampēlela kushinta būmi bwami. Mu 1989, naikala Kamoni mubatyijibwe. Pa kupwa kubatyijibwa, nkasami mwana-mukaji, mama, ne tata belunga nami pamo mu kwingidila Yehova.

Pano ne musonge ke padi myaka 17 kadi ndi na bana basatu bayampe. Nefundile kutalaja bulobo bwami, nansha shi i bankolomone. Kadi nefundile kusanswa bantu ba ‘bisaka, nkoba, ne ndimi’ yonso. (Kusokwelwa 7:9) Mona’mba binenwa bya Yesu i bya bine kondi. Wānene amba: “Wivwane mūminine mu mwanda wami, nankyo binebine mwi bāna-bami-babwanga, ne kuyūka kwine mukayūkidijanga bya bu-binebine, nabyo bikemukūlanga ke mudi bāna-pabo.”—Yoano 8:31, 32.

[Bushintuludi pa paje 9]

Kushinta kwadi kulomba ne kufundwila kulampe minjiki ikankamika kwisañuna

[Bushintuludi pa paje 10]

Ami ne balunda nami twadi tusaka luma. Twadi twenda ne bipete ne tupini, tutamba kibumbo kya bantu 20 ne kupita