Chʼexpaj kyanqʼibʼil tuʼn Tyol Dios

¿TIʼ BʼANT tuʼn jun xjal te okslabʼil rastafari tbʼi tuʼn tkyaj ttzaqpiʼn nya bʼaʼn tanqʼibʼil ex tuʼn tchʼexpaj t-ximbʼetz kyiʼj saq xjal? ¿Ex tiʼ onin tiʼj jun kuʼxun in naqʼunantoq kye xjal kʼayil droga tuʼn tchʼexpaj tanqʼibʼil? Qqʼonx ambʼil kye tuʼn ttzaj kyqʼamaʼn qe.

«Ya mintiʼ i el wikʼune qe xjal» HAFENI NGHAMA

TABʼQʼI: 34

TNAM: ZAMBIA

JUNJUNTL TQANIL: OK TE JUN RASTAFARI

AJU IKʼ TOJ WANQʼIBʼILE: Tej ttzaj qʼoj, xi oq ntxuʼye toj tnam Namibia ex ok tmojbʼan tibʼ tukʼil Organización del Pueblo de África del Suroeste, aju ojtzqiʼn kyukʼil letra lu toj yol inglés SWAPO. In qʼojintoq kʼloj xjal lu tiʼj aj kawil te tnam Sudáfrica, aju in kawintoq tibʼaj tnam Namibia toj ambʼil aju. Yajxitl, pon ntxuʼye toj jun lugar jatumel in pon kyklon kyibʼ xjal toj tnam Zambia ex atz in nul itzʼje.

In nanqʼine 15 abʼqʼi toj junxichaq lugar jatumel in che pon xjal klol kyibʼ. E bʼaj xnaqʼtzaʼn qe kuʼxun ateʼtoq toj kycampamento kʼloj xjal SWAPO tuʼn kykolin kyiʼj kytnam ex tuʼn tel kyikʼun qe saq xjal.

Wajtoqe tuʼn woke te okslal tej qʼiʼntoq 11 abʼqʼi wuʼne, tuʼntzunju in xiʼye tukʼil pastor attoq toj campamento jatumel in cheʼxtoq qe católico, luteranos ex qe anglicanos. Noqtzun tuʼnj, tzaj tqʼamaʼn qa mlay chin oke te okslal. Tzaj bʼaj nkʼuʼje tuʼn jlu ex ya mintiʼ ok qeʼ nkʼuʼje tiʼj qa at Dios. Tuʼntzun jlu, tej qʼiʼntoq 15 abʼqʼi wuʼne ok nmojbʼan wibʼe kyukʼil xjal rastafari kyokslabʼil ex kyajtoq tuʼn kyok meltzʼaj kyiʼj aj kawil. Bʼant jlu wuʼne tuʼnju ngantoqe bʼitz reggae ex tuʼn ya miʼn kyel ikʼun qʼeq xjal te África. Kyaj nqʼoʼne tuʼn tchʼiy ttzmal nwiʼye ik tzeʼn kye xjal rastafari, xi tzyet tuʼn sichʼine marihuana, in nok tene waʼl itzaj ex in koline kyiʼj xjal qʼeq. Maske ikju, kukx kubʼ nbʼinchaʼne aju ngane, kukx in keʼyine kyiʼj película in netz yekʼin qʼoj kyoj ex kukx in yoline kyiʼj nya bʼaʼn yol.

CHʼEXPAJ WANQʼIBʼILE TUʼN TYOL DIOS: Toj 1995 tej qʼiʼntoq junlo 20 abʼqʼi wuʼne, kubʼ nximane tiʼtoq kbʼantel wuʼne tukʼil wanqʼibʼile. Otoq tzikʼ jun ambʼil in chin uʼjine kyiʼj uʼj rastafari, maske attoq junjun uʼj tkuʼx junjun taqikʼ Tyol Dios kyoj, mintiʼ ok qeʼ nkʼuʼje tiʼjju in tzaj kyqʼamaʼn. Tuʼn jlu, kubʼ nximane tuʼn nxnaqʼtzane tiʼj Tyol Dios njunalxe.

Yajxitl, tzaj tqʼoʼn jun wamiwe rastafari jun uʼj weye aju bʼinchaʼn kyuʼn testigos de Jehová. Jun rat naj xi tzyet tuʼn nxnaqʼtzane tiʼj uʼj lu tukʼil Biblia. Tej tikʼ ambʼil, xi tzyet tuʼn nyoline kyukʼil testigos de Jehová ex mas el nnikʼe tiʼj. Pero bʼant nim chʼixpubʼil wuʼne tej naʼmxtoq txi tzyet tuʼn nxnaqʼtzane tiʼj Tyol Dios kyukʼil.

Kwest ela toj nwitze tuʼn ya miʼn nsichʼine ex tuʼn ya miʼn txi nkʼaʼne qʼeʼn (2 Corintios 7:1). Ax ik el nmatzoʼne ttzmal nwiʼye, kyaj ntzaqpiʼne tuʼn tok nkeʼyine qe película in netz yekʼin qʼoj kyoj ex yaẍbʼil, ex ya mintiʼ e ajbʼen nya bʼaʼn yol wuʼne (Efesios 5:3, 4). Axpe ikx, ya mintiʼ i el wikʼune qe saq xjal (Hechos 10:34, 35). Noqtzun tuʼnj, tuʼn kybʼant chʼixpubʼil lu wuʼne, ya mintiʼ in bʼine kyiʼj bʼitz in che yolin tiʼj ikʼbʼil ex ya mintiʼ ok nmojbʼan wibʼe kyukʼil nya bʼaʼn wamiwe.

Tej tkyaj ntzaqpiʼne tkyaqil nya bʼaʼn, kubʼ nximane tuʼn nxiʼye toj jun Ja te Chmabʼil kye testigos de Jehová. Toj ambʼil aju, xi tzyet tuʼn nxnaqʼtzane tiʼj Biblia ex kubʼ nximane tuʼn nbautisarine. Nya bʼaʼn ela jlu toj kywitz toj njaye. Axpe ikx tqʼama ntxuʼye qa jaku chinxe toj alkyexku juntl okslabʼil, pero nya kyukʼil testigos de Jehová. Ax ikx, ok ten jun xjal at t-xilen tukʼil ntxuʼye yolil nya bʼaʼn wiʼje, aju attoq toklen toj kawbʼil.

In nel ikʼune kyuʼn toj njaye ex e xmayin wiʼje, pero mintiʼ in kubʼ numje tuʼnju ok tilil wuʼne tuʼn tel nkanoʼne tiʼj Jesús ex tuʼn tkubʼ wanqʼiʼne qe t-xnaqʼtzbʼil. Ax ikx, ok qeʼ nkʼuʼje tiʼj qa aʼye testigos de Jehová axix tok okslabʼil tuʼnju atz in jatz qe kyxnaqʼtzbʼil toj Tyol Dios. Jun techel, in che pakbʼan kye xjal in tzeʼn in tzaj tqʼamaʼn Biblia (Mateo 28:19, 20; Hechos 15:14). Ex mintiʼ in nokx kyqʼon kyibʼ kyxol aj kawil (Salmo 146:3, 4; Juan 15:17, 18).

QE KʼIWLABʼIL O CHE TZAJ NKʼAMOʼNE: Nim o che onin qe consej toj Tyol Dios wiʼje. Toj ambʼil jaʼlo, ya mintiʼ in chin sichʼine tiʼj marihuana ex ya mintiʼ in xi nnajsaʼne nim pwaq tiʼj. Tuʼn jlu, ya mintiʼ in chin witzkʼane ex mas tbʼanel taʼ wanqʼibʼile jaʼlo.

Atxix tej tal kʼwal qine, wajtoqe tuʼn tten ttxolil wanqʼibʼile ex o kanet wuʼne. Pero aju mas nim toklen, mas nqayin atine ttxlaj Dios (Santiago 4:8).

«Ya mintiʼ in tzaj nqʼoje» MARTINO PEDRETTI

TABʼQʼI: 43

Tnam: AUSTRALIA

JUNJUNTL TQANIL: OK TE BʼYOL XJAL EX KʼAYIN TIJ DROGA

AJU IKʼ TOJ WANQʼIBʼILE: Tej kʼwal qine, in cheʼxtoq toj njaye anqʼil kyoj junxichaq lugar, ik tzeʼn kyoj tal tnam, kyoj nimaq tnam ex toj jun ambʼil o anqʼine kyxol xjal indígena. Kukx naʼn qe tbʼanel ambʼil wuʼne tej ntene kyukʼil ntiyoye ex qe nprime. In qo tzyune kyiʼj pescad, kyiʼj txkup ex in bʼajtoq qbʼinchaʼne qe arma bumeranes kybʼi ex junjuntl tiʼchaq.

Ok nmane te boxeador ex tzaj t-xnaqʼtzaʼn weye tuʼn nbʼiyene tej kʼwalx qine, tuʼntzunju, ngantoqe tuʼn nbʼiyene. Tej woke te kuʼxun, xi tzyet tuʼn nkʼane qʼeʼn kyoj qe bar. Qgantoqe tuʼn qqʼojine kyukʼil wamiwe tukʼil navaja ex bates de béisbol, ex in qo qʼojine kyukʼil 20 xjal moqa mas.

Tuʼn tkambʼet npwaqe, in kʼayine tiʼj droga ex kyiʼj tiʼchaq in che tzaj kyelqʼaʼn aqʼunal jatumel in che weʼ bark. Ax ikx in naqʼunane kyukʼil xjal in che kʼayin tiʼj droga, in chinxtoqe cobraril kykʼas xjal ex in najbʼentoq jun arma wuʼne tuʼn kyok nxobʼtzaʼne. Wajtoqe tuʼn woke te bʼyol xjel, tuʼntzunju xi nqʼamaʼne kye qa aʼye che kyimel moqa aʼyine.

CHʼEXPAJ WANQʼIBʼILE TUʼN TYOL DIOS: Naʼnx wuʼne qa ok nbʼiʼne junjun tqanil kyiʼj testigos de Jehová tej kʼwalx qine. Tej qʼiʼntoq mas te 20 abʼqʼi wuʼne, xi nqanine te ntxuʼye kyiʼj testigos de Jehová. Ex tej tikʼ kabʼe qʼij, pon jun testigo de Jehová njaye aju Dixon tbʼi. In yoline jun rat tukʼil ex tzaj tqʼoʼn txokbʼil wiʼje tuʼn nxiʼye toj kychmabʼil. Atzun tnejel maj tej in xiʼye toj chmabʼil ex ma tzikʼ 20 abʼqʼi in chin bʼete kyoj. Tzaj kyqʼoʼn tzaqʼwebʼil tiʼj nxjele tukʼil Tyol Dios, tbʼanel ela toj nwitze.

Tzaj xnaqʼtzaʼn weye qa nim kyoklen xjal toj twitz Dios, axpe qeju mintiʼ in che nimen te (2 Pedro 3:9). Ax ikx el nnikʼe tiʼj qa at nim tkʼujlabʼil ex qa kukx kxqʼuqil wiʼje aj in kyaj koline kyuʼn txqantl. Ex chewix wanmiye tej tel nnikʼe tiʼj qa jaku kubʼ tnajsaʼn wile qa ma kubʼ nchʼexpuʼne nmode. Onin taqikʼ Tyol Dios te Efesios 4:22 a 24 wiʼje, jatumel in tzaj tqʼamaʼn jlu: «Kykotpiʼmele kyiʼje aju ojtxi kytene [...] ex kyqʼoʼnke kyiʼje aju akʼaj kytene, porke o che bʼinchanjtze tuʼn kyoke ik tzaʼn tilbʼilal Dios».

Ax tok, xi tiʼn ambʼil tuʼn tkubʼ nchʼexpuʼne wanqʼibʼile. Jakutoq tzikʼ nim qʼij mintiʼ in xi nprobarine droga, pero aj tok njunin wibʼe kyukʼil wamiwe toj fin de semana, in chin kubʼ tzaqʼe toj vicio juntl maj. Tuʼn jlu, el nnikʼe tiʼj qa mlay bʼant tuʼn tkyaj ntzaqpiʼne vicio qa kukx ma tzʼok njunin wibʼe kyukʼil, tuʼntzunju el npan wibʼe kyiʼj ex in xiʼye anqʼil toj juntl lugar. Tzaj kyqʼamaʼn junjun wamiwe tuʼn kyxiʼ wabʼil weye, pero tzaj kysuqin marihuana weye toj bʼe. Xi nqʼamaʼne kye qa wajtoqe tuʼn tkyaj ntzaqpiʼne vicio ex tej chʼixtoq qpone toj juntl tnam, el npan wibʼe kyiʼj. Yajxitl, ok nbʼiʼne qa otoq che okx elqʼal toj jun banco tukʼil jun escopeta.

QE KʼIWLABʼIL O CHE TZAJ NKʼAMOʼNE: Tuʼnju el npan wibʼe kyiʼj nya bʼaʼn wamiwe, nya kwest ela te weye tuʼn kybʼant chʼixpubʼil wuʼne. Ex in bautisarine toj 1989. Yajxitl, ax ikx te wanabʼe ex qe nmane e ok te testigo de Jehová.

Ya o tzikʼ 17 abʼqʼi nkubʼlen mojeʼye, o chin tzalaje toj ambʼil lu ex o at oxe nkʼwale. Jaku txi nqʼamaʼne qa ya mintiʼ in tzaj nqʼoje, axpe ikx qa ma tzʼoktz kyjyoʼn wukʼile. Ax ikx, o che ok nkʼujlaʼne kykyaqil xjal noq alkyexku kyyol moqa kyyajil (Apocalipsis 7:9). Kukx in tzaj nnaʼne qe tyol Jesús lu ex o che japun wiʼje: «Qa kukx ma txi kybʼiʼne nyole, axix tok che okele te nxnaqʼtzbʼene;  kʼelel kynikʼe tiʼj ju yol axix tok, ex che tzoqpetele tuʼnju yol axix tok» (Juan 8:31, 32).

[Yol]

Ya mintiʼ in bʼine kyiʼj bʼitz in che yolin tiʼj ikʼbʼil tuʼntzun tbʼant chʼixpubʼil wuʼne.

[Yol]

Qgantoqe tuʼn qqʼojine kyukʼil wamiwe tukʼil navaja ex bates de béisbol, ex in qo qʼojine kyukʼil 20 xjal moqa mas.