Biiblã toeemda neba

RASTAMAN n sak n wõrs a zoobdo, la a bas nasaar dãmbã kisgri. Bi-bɩɩg a ye me sẽn da nong zaba tɩ dorg koaasdb ra tʋmd-a t’a gilgd n deesd b ligd n sak n toeeme. Bõe n sõng nin-kãensã tɩ b toeeme? D kelg-ba.

“Mam pʋd n tõog n basa neb kisgri.”—A HAFENI NGHAMA

M YƲƲMA: 34

M YITA: ZÃMBI

PĨNDÃ: M DA YAA RASTAMAN

M KIBARÃ: B roga maam Zãmbi kãnderefizie pʋgẽ. Yɩɩ zabr sasa la mam ma wã zoe n yi Namibi, n tɩ naag politik siglg ning b sẽn boond tɩ SWAPO wã neba. Sul-kãng ra zabda ne Afirikdisiid tẽngã taoor dãmb sẽn da so Namibi wakat kãngã.

Mam zĩnda Kãnderefizie rãmb wʋsg pʋgẽ hal n tãag m sẽn wa n tar yʋʋm 15. B ra zãmsda SWAPO wã kom-bɩɩsã tɩ b zabd sullã na kẽng taoor yĩnga. Tõnd taoor dãmbã ra pidsda tõnd yamã ne tags-wẽnse, la b wilgd tõnd tɩ d segd n kisga nasaar dãmbã.

Kã wã pʋgẽ tũudum toɛy-toɛy n da be be. Katolik rãmba, luteriẽ rãmba, ãngilikã rãmb la tũudum a taab neb n da be be. Mam sẽn wa n tar yʋʋm 11, m bao n na n lebga tũudum kãensã a ye neda. La pastɛɛr ning mam sẽn tɩ yã wã maaname tɩ mam toeem yam. Rẽ tɛka, m da pa le tẽed Wẽnd ye. Mam sẽn wa n tar yʋʋm 15, m sẽn da nong rastaman dãmbã mizikã yĩnga, n paas m sẽn da rat tɩ b bas Afirik nin-sablsã wẽgbã kɩtame tɩ m lebg rastaman. M basa m zoobdã tɩ bɩre, n sɩng dorgã yũubu, n bas nemd wãbre, la m me wilgdẽ tɩ m datame tɩ b bas nin-sablsã wẽgbo. La baasgo, m da ket n tara zʋg-wẽns toor-toore, la m ket n get filim dãmb sẽn wilgd nen-kɛglem tʋʋmã. Sẽn paase, m da ket n gomda gom-yoodo.

BIIBLÃ SẼN TOEEM MAAM TO-TO: Yʋʋmd 1995 soabã pʋgẽ, mam sɩnga m vɩɩmã yell tagsgo. Rẽ tɩ m yʋʋmã ra zemsa 20. M da karemda rastaman dãmbã sɛb nins fãa m sẽn da paamde. Seb-kãens kẽer da gomda Biiblã yelle, la mam da getame tɩ b goamã pa tũud taab ye. Woto kɩtame tɩ m yãk yam n na n karem Biiblã m toore.

Rẽ poore, mam zoa sẽn yaa rastaman n kõ maam sebr a Zeova Kaset rãmbã sẽn tar n zãmsd nebã Biiblã. Mam talla seb-kãng n zãms Biiblã m toore. Kaoos zugẽ, m wa n yã a Zeova Kaset rãmbã, tɩ b sõng-m tɩ m kell n kẽng taoor ne Biiblã zãmsgo.

 Dorgã la rãamã yũub basg yɩɩ toogo, la m wa n tõogame. (2 Korẽnt dãmba 7:1) Mam wõrsa m zoobdã, n manegd m mengã sõma masã, n bas filim nins sẽn wilgd yoobã la nen-kɛglem tʋʋmã gesgo, la m bas gom-yoodã me. (Efɛɛz rãmba 5:3, 4) M wa n basa nasaar dãmbã kisgr menga. (Tʋʋma 10:34, 35) Yɩl n tõog n maan woto, yɩɩ tɩlae tɩ m bas yɩɩl nins sẽn wat ne nasaar dãmbã kisgrã kelgre, la m lak m meng ne m pĩnd zo-rãmbã, bala b ra na n kɩtame tɩ m pa tõog n toeem ye.

Yaa mam sẽn wa n tõog n maan toeem-kãensã fãa wã poore, la m sẽn gẽes a Zeova Kaset rãmbã Rĩung roog zĩig n tɩ kos n na n lebg b nedã. Wakat kãng la b nin-yend zãms maam Biiblã. Mam sẽn wa n yãk yam n na n deeg lisg n lebg a Zeova Kaset soabã, mam roagdbã sũur sãamame. Mam ma wã yeel-m lame tɩ tũudum nins sẽn yet tɩ b yaa Kirist tũudmã sʋka, m tõe n yãka m sẽn dat a soaba, la m pa segd n yɩ a Zeova Kaset soab ye. Mam yasb a ye sẽn da yaa goosneema wã nin-kãseng ra yaanda maam wakat fãa, m sẽn lebg a Zeova Kaset soabã yĩngã.

Mam sẽn da zãmsd Biiblã n bãngd a Zezi sẽn tall manesem ning ne nebã, la m tũud a saglsã sõng-m lame tɩ m tõog kɩɩsgã la yaalgã. M sẽn mak a Zeova Kaset rãmbã sẽn zãmsd nebã bũmb ninsã ne Biiblã sẽn yetã, m bãngame tɩ m yãa tũudum hakɩkã. Wala makre, b tũuda Biiblã noor ning sẽn yet tɩ b moond koɛɛgã. (Matɩe 28:19, 20; Tʋʋma 15:14) Sẽn paase, b pa kẽesd b mens politikã pʋgẽ ye.—Yɩɩl Sõamyã 146:3, 4; Zã 15:17, 18.

BIIBLÃ ZÃMSG SẼN NAF MAAM TO-TO: Mam sẽn sɩng Biiblã noy tũubã sõnga maam wʋsgo. Wala makre, dorgã yũub ra kɩtame tɩ m sãamd ligd wʋsg kiuug fãa. Sẽn paase, m yamã vẽename tɩ m tõe n tags sõma masã, la m tara laafɩ n yɩɩd pĩndã.

Mam vɩɩmã lebga wa m sẽn da sɩng n dat t’a yɩ to-to hal m yãadmẽ wã. Sẽn tar yõod n yɩɩda, m miime tɩ masã, m tara zood sõma ne Wẽnnaam.—Zak 4:8.

“M tõog n basa sũ-yikri.”—A MARTINO PEDRETTI

M YƲƲMA: 43

M YITA: OSTRALI

PĨNDÃ: M DA KOOSDA DORGE

M KIBARÃ: Mam yãadmẽ, tõnd zakã rãmb zĩnda tẽn-bõones toɛy-toɛy pʋsẽ, la tẽn-bedr a ye pʋgẽ me. D zĩnda weoogẽ wã wakat bilf meng ne aborizɛn dãmb sull a ye, portɛstã rãmbã sẽn da sõngde. Mam ket n tẽra yɛl kẽer d sẽn da maan wakat kãnga. Wala makre, m tẽra maam ne m yasbã n paas a kambã sẽn da mi n yõgd zĩm, n tãoosdẽ, la d peesd raad n maand teed toɛy-toɛyã.

 Mam ba wã ra wẽeda bõgse, la a sɩnga maam bõgsã zãmsg hal tɩ m nan paoodẽ. Woto kɩtame tɩ mam da nong zab wʋsgo. Mam yʋʋm 13 tɛk n tar n debda, m da wae n sõsda baar dãmbẽ. Maam ne m zo-rãmbã ra gilgd n baooda zaba. Tõnd mi n talla sʋʋs la rasab n zab ne neb sõor sẽn ta 20 bɩ sẽn yɩɩd rẽ.

Sẽn na yɩl n paam ligdi, m da koosda dorge, la m koosd teed neb nins sẽn sikd batayo wã teedã sẽn zuudi. Dorg koaasdbã me ra tʋmda maam tɩ m gilgd n bugsd b sam-dãmbã ne bug-raado, n deesd b ligd n kõt-ba. Mam sẽn da rat meng yaa m wa lebg ned b sẽn yaood t’a kʋʋd neba. Sẽn da be mam yamẽ wakat fãa la woto: “M sã n pa kʋ, maam la b na n kʋ.”

BIIBLÃ SẼN TOEEM MAAM TO-TO: Mam wʋma a Zeova Kaset rãmbã kibar tɩ m ket n yaa bi-bɩɩga. M tẽrame tɩ m sẽn wa n zems yʋʋm 20 woto, m soka m ma daar a ye n na n bãng a sã n mi baa yaa b nin-yɛng zĩiga. Rasem a yiib poore, a Zeova Kaset soab a ye yʋʋr sẽn boond t’a Dixon n wa tõnd zakẽ wã n na n sõs ne tõndo. A sõsa ne maam bilfu, la a bool-m tɩ m wa b tigisga. Mam kẽnga tigis-kãngã, la hal sẽn yɩɩd yʋʋm 20 rũndã, m ket n kẽnda tigissã. Sogsg nins fãa mam sẽn sok a Zeova Kaset rãmbã, b tõog n talla Biiblã n leok maam.

Mam sẽn wa n bãng t’a Zeova rata ãdem-biisã ned kam fãa neere, la baa neb nins sẽn pa tẽed-a wã, m sũur yɩɩ noogo. (2 Pɩɛɛr 3:9) Mam bãngame t’a Zeova yaa m ba sẽn nong-ma, n na n ges m yelle, baa nebã fãa sã n bas-ma. M sẽn bãng me tɩ m sã n sak n teke, a na n kõ-m-la m yel-wẽnã sugrã, yols-m-la hal wʋsgo. Efɛɛz rãmb 4:22-24 sẽn yet bũmb ningã me sõnga maam wʋsgo. Kɩtame tɩ m bãng tɩ m segd n basa m pĩnd zʋgã sẽn yaa “nin-kʋdgã” rẽndã, la m lebg “nin-paalg Wẽnnaam sẽn naan wa bãmb wẽnego.”

Kaoosame tɩ m yaool n na n tõog n toeeme. M da tõe n maana rasem wʋsg n pa sɩɩs dorg ye. La m sã n wa be ne m zo-rãmbã wɩkɛndã, m wat n baas n ye reegame. Mam wa n bãngame tɩ m sã n sɩd rat n toeeme, yaa tɩlae tɩ m lak m meng ne-ba. Woto kɩtame tɩ m yãk yam n na n toeem tẽnga. La m zo-rãmb kẽer n yeel tɩ b na n yãaga maam, tɩ m sake. So-taokã sasa, b wa n sɩnga dorgã yũubu, la b kãab maam. Mam yeel-b lame tɩ m maoodame n dat n bas minim-kãensã. Tõnd sẽn ta toadgẽ wã, d welga taaba. M wa n wʋmame tɩ rẽ poore, b tɩ kẽe bãnkẽ ne bug-raado, n bugs nebã n zu ligdi.

BIIBLÃ ZÃMSG SẼN NAF MAAM TO-TO: Maam ne m zo-rãmbã sẽn welg taabã poore, m mikame tɩ lebga nana ne-m tɩ m toeeme. Yʋʋmd 1989 wã pʋgẽ, m deega lisg n lebg a Zeova Kaset soaba. Dẽ poore, mam yao bi-puglã, m ma wã la m ba wã me wa n lebga a Zeova Kaset rãmba.

Yʋʋm 17 masã la woto mam sẽn kẽ kãadem. M tara kamb a tãab hal tɩ m sũur noom ne-ba. Bilf-bilfu, m wa n tõog n basa m sũ-yikrã, hal baa ned sã n bao m noor menga. Masã, m nonga buud toor-toorã neba. (Wilgri 7:9) A Zezi sẽn yeel bũmb ningã sɩd pidsa mam vɩɩmã pʋgẽ. A yeela woto: “Yãmb sã n tall mam goamã, yãmb yaa mam karen-biis hakɩɩka. Yãmb na bãng sɩdã, la sɩdã na kõ yãmb lohorem.”—Zã 8:31, 32.

[Goam sẽn tar pãnga, seb-neng a 9]

Yɩl n tõog n toeeme, yɩɩ tɩlae tɩ m bas yɩɩl nins sẽn wat ne nasaar dãmbã kisgrã kelgre

[Goam sẽn tar pãnga, seb-neng 10]

Maam ne m zo-rãmbã ra gilgd n baooda zaba. Tõnd mi n talla sʋʋs la rasab n zab ne neb sõor sẽn ta 20 bɩ sẽn yɩɩd rẽ