Baibol Na O Wene Akpenyerẹn

ME YỌ ha userhumu rẹn ọhworhare owu rọ ha ẹga i Rastafari da ẹton iseseri ro vwori, ji fiẹ utuoma ro vwo kpahen itu iyibo kparobọ? Me yọ ha userhumu rẹn idama owu ro rhiẹ ologbozighi wene akpenyerẹn yen, dedevwo o lele era rhẹ imwu egbogbanhon vwiẹ osa aye bi? Dabu djokarhọ oborẹ ọ ha userhumu rẹn ihworho enana.

“Mi tobọ fi uruemru re ni awọrọ ruẹ fọkiẹ ekete aye i nurhe kparobọ.”—HAFENI NGHAMA

ẸGBUKPE RỌ HAVWỌ: 34

ẸKWOTỌRE RO NURHE: ZAMBIA

IKUEGBE YI: ONYẸ RASTAFARI

AKPENYERẸN MẸ BI: E vwiẹre mẹ uvuẹn Zambia, uvuẹn ọko owu ra zẹ nya uvweri ọrhọ homaphia. Izu mẹ ọ zẹ nẹ Namibia uvwrọke owu rẹ uvweri ọ homaphia, nọ homaba ukoko owu re se South West Africa People’s Organization (SWAPO). Ukoko ọnana ọ kparahasuẹ igọmẹti South Africa ro suẹn Namibia ọke ọrana.

Mi rhirhiẹ ọko sansan nẹ ọke re vwiẹ mẹ te ọke mia ha ẹgbukpe 15. Uvuẹn ọko erana, ukoko i SWAPO no yono emọvwerhe nẹ aye i vwo oruru rẹ aye ina wọnrọn hasuẹ igọmẹti ro sehiẹn aye ọke ọrana. Oborẹ ukoko na ọ guọlọre ọvo yẹ aye e yono ame, aye i ji yono ame nẹ ame i vwo utuoma kpahen itu iyibo.

Ọke mia ha ẹgbukpe 11, mi guọlọ rhiẹ Olele Kristi ji homaba ishọshi rẹ otu i Roman Catholic, Lutheran, Anglican ọrhẹ erọrọ i ha mwu. Ipastọ mi lele tẹmro nọ ta mẹ taghene mi vwa kpare udjoghwẹ ọnana-a. Nẹ ọke ọrana rhe, mie rhe vwo imwẹro kpahen Osolobrugwẹ-ẹ. Ọke mie te ẹgbukpe 15, ẹguọlọ mi vwo kpahen ikpekporo i reggae ọrhẹ ojemẹ mi na dobọ osehiẹn itu ibiebi ji, no mwurun mẹ homaba ẹga i Rastafari. Mi nyajẹ ẹton mẹ vwo nẹ aye i seri omamọ, mie phopho igbo, mi vwa riẹ aranmo-o, mie ji jirie nẹ ihworho ibiebi i wọnrọn nẹ aye i sabu vwo ugbomọphẹ. Ọrẹn, mie ji nyerẹn akpọ ọfanrhiẹn ji nughe ri vuọnren rhẹ ozighi. Mia ji ta erharhere ẹmro.

OBORẸ I BAIBOL NA O WENE AKPENYERẸN MẸ LELE: Uvuẹn ẹgbukpe 1995, ọke mia ha emrẹ ẹgbukpe 20, ni mie roro kpahen oborẹ mi ne nyerẹn akpọ mẹ lele. Ni mie yono ọsoso ẹbe i Rastafari ri mi mẹrẹnren. Ezẹko usuẹn aye i rionbọrhọ i Baibol na, ọrẹn idjedje ri ha uvuẹn ẹbe na ọ vwọ vuọn mẹ evwa-an. Omarana, ni mi brorhiẹn taghene mẹmẹ ọvo ine se i Baibol na.

Ọke oru, ugbehian mẹ owu ro ji rhiẹ onyẹ i Rastafari nọ yẹre mẹ ọbe owu ra ha yono i Baibol na, rẹ Iseri Jehova i fomu phia. Mẹmẹ ọvo ni yono ọbe ọnana, ji se ekete i Baibol ri ha uvuien. Ọke oru, ni mi mẹrẹn Iseri Jehova, ji lele aye tuẹn uyono i Baibol rhọ.

Dedevwo ọ lọhọ-ọ, ọrẹn ni mi dobọ inyo ẹda ji ọrhẹ isigẹti ephopho. (2 Corinthians 7:1) Ni mi ruẹ omamẹ fon, da ẹton mẹ, dobọ ifoto ọrhẹ ughe ihworho ri banfirhọ e ni ji, omaran ji te ughe ri vuọnren rhẹ ozighi, ni mi ji tobọ erharhere ẹmro ẹta ji. (Ephesians 5:3, 4) Ọke oru, ni mi fi utuoma mi vwori kpahen itu iyibo kparobọ. (Acts 10:34, 35) Mi rha guọlọ ruẹ ewene, mi rha kerhọ ikpekporo re jiri uruemru re vwo utuoma kpahen awọrọ fọkiẹ ekete aye i nurhe-e, mi na ji kẹnoma rẹn igbehian mẹ bi ri na sabu riẹrie mẹ nyerẹn aruẹ akpọ mie nyerẹn bi.

Ọke mie ruẹ ewene enana hin, ni mi guọlọ Aghwẹlẹ Uvie ọrẹ Iseri Jehova ji ta rẹn aye taghene mi guọlọ homaba ẹga aye. Ne leliri mẹ yono i Baibol na. Ọke mie brorhiẹn taghene mi ne bromarhame rhiẹ owuọwan usuẹn Iseri Jehova, oma ọ merhen ekrun mẹ-ẹ. Izu mẹ nọ tare taghene mi djẹ ẹga “Ilele Kristi” ọrọrọ ro vwo rhiẹ ọrẹ Iseri Jehova. Omizu izu mẹ owu ro rhiẹ ọhworhare ro titiri omamọ uvuẹn usun oseghe, nọ ha mẹ djechẹẹ nime mi brorhiẹn taghene mi ne rhiẹ Oseri Jehova.

Ọrẹn, nime mi nyalele urhebro i Jesu, ji yono kpahen oborẹ o lele ihworho nyerẹn lele, ọnana nọ ha userhumu mẹ nyerẹnghele ẹkparehaso ọrhẹ echẹdjẹ na. Ọke mia ha oborẹ Iseri Jehova e yono vwanvwọn oborẹ i Baibol na ọ tare, no mwurun mẹ ẹro taghene mi mẹrẹn ẹga urhomẹmro na ne. Jerẹ udje, aye a nyalele urhi Baibol rọ tare taghene e ghwoghwo rẹn ihworho. (Matthew 28:19, 20; Acts 15:14) Aye i vwe ji vwobọrhọ usun oseghe-e.—Psalm 146:3, 4; John 15:17, 18.

ERERE MI MẸRẸN NE: Nime mia damoma nyalele iruemru-urhi Baibol, ọnana ọ ha userhumu mẹ omamọ ne. Jerẹ udje, mi vwa rha kpara ghwọghọ igho kibiamo kibiamo dẹ igbo-o. Imwu egbogbanhon i vwa rha hobọte iroro mẹ ghwomara-an, oma mẹ ọ ji kpokpọ omamọ ne.

Vwana, mie nyerẹn aruẹ akpọ ri mi guọlọ nyerẹn avwọke mia kamu. Ọrọ mai ghanren yẹ ọrẹ mie rhe taghene mi sabu tikẹrẹ Osolobrugwẹ ne.—James 4:8.

“Mia sabu suẹn ekwẹre mẹ ne.”—MARTINO PEDRETTI

ẸGBUKPE RỌ HAVWỌ: 43

ẸKWOTỌRE RO NURHE: AUSTRALIA

IKUEGBE YI: Ọ RHẸ IMWU EGBOGBANHON

AKPENYERẸN MẸ BI: Ọke mia kamu, ekrun mẹ a kpara kwa. Ọkezẹko ame a kwa riẹ emwa ekokamu ọrhẹ eduado, ọke owu ame i tobọ kwa riẹ ekete owu uvuẹn Australia ro vwo ji rhie. Mi riamerhen ọke mi ghwọghọ kugbe rhẹ ihworho ekrun mẹ, ame i kpe irhenrin, riẹ ibefi, jeghwai ruẹ ekwakwa sansan kugbe.

Owian ọsẹ mẹ yẹ ọrẹ ono lele ihworho fi ọchẹn, omarana no yonirin mẹ oborẹ a wọnrọn ọke mia kamu. Ni mie gbozighi omamọ. Ọke mia ha uphuphẹn, mia ghwọghọ ọke da inyo uvuẹn ekete ra rhẹ inyo. Ọke ephian yẹ omẹmẹ ọrhẹ igbehian mẹ a guọlọ erẹ ame ine lele wọnrọn. Ame na ha aphia ọrhẹ erhan gidi ihworho ri bun te 20 yanghene ghwomaran.

Mia mẹrẹn igho nyoma mia rhẹ imwu egbogbanhon ọrhẹ ekwakwa re sori. Mie ji lele era rhẹ imwu egbogbanhon vwiẹ osa aye, ji ha okpọghọ djofẹn mwu aye. Mi bru ẹkẹ te oma mi ne rhiẹ ọro kpe ihworho. Isẹ owu mie brẹ yẹ, Kpe mẹ hwu, orhiomara-an, mẹmẹ yi ne Kpo hwu.

OBORẸ I BAIBOL NA O WENE AKPENYERẸN MẸ LELE: Ọke mia ghwanran, mi rhon kpahen Iseri Jehova bi ne. Mi karorhọ taghene ọke mia uvwre ẹgbukpe 20, mi nọ izu mẹ sẹ o rhe ekete mi na sabu mẹrẹn Iseri Jehova. Ẹdọke eva a vrẹn, Oseri Jehova owu re se Dixon nọ ha obọ fomu ighwe mẹ. Ọke mie lelie tẹmro ibiesuọn, nọ ha use mẹ ne mi rhiẹ uyono Iseri Jehova. Ni mi rhiabọ dede use na, avwọke ọrana rhe rọ vrẹn ẹgbukpe 20 ne, uyono owu ọ ji vrẹn mẹ-ẹ. Iseri Jehova i sabu ha i Baibol na kpahenrhọ enọ mẹ ephian.

Oma ọ merhenren mẹ ọke mie yono taghene Jehova o vwo ọdamẹ kpahen ọwan owuowu, tobọ te ere ruẹ oborẹ obiomurun. (2 Peter 3:9) Ni mi mẹrẹnvwrurhe taghene ọye Ọsẹ ẹguọlọ, rọ nọ hẹrote mẹ orhianẹ awọrọ i tobọ sẹrerhumuji mẹ. Oma ọ ji merhen mẹ ọke mie yono taghene ọnọ harhomu edandan mẹ orhianẹ mi ghwẹriẹre. Oborẹ ọ ha uvuẹn Ephesians 4:22-24 ọ hobọte mẹ omamọ. Ekete i Baibol ọrana ọ ha urhebro mẹ ne mi “ku uruemru ahwanren na nu” jeghwai “ku uruemru ọkpokpọ na rhọ ra maren lele ọhọre Osolobrugwẹ.”

Ọ ha ibiọke mi ki sabu wene akpenyerẹn mẹ. Mia sabu kẹnoma rẹn imwu egbogbanhon uvwre ọkprughwre na, ọrẹn mi rhe ye lele igbehian mẹ riakpọ uvuẹn ehion ọkprughwre na, ni mia ha imwu egbogbanhon. Ni mi mẹrẹnvwrurhe taghene mi rha guọlọ ruẹ akpenyerẹn mẹ fon, mi na kwa jẹ igbehian mẹ vwo, omarana, ni mi kwa riẹ amwa ọrọrọ. Igbehian mẹ ezẹko ni tare taghene aye ine sun me riẹ onya na, ni mi kweri. Ọke ame a ha izede, aye ni tuẹn igbo ephopho rhọ ji ta mẹ taghene mi phopho ibiesuọn. Ni mi ta rẹn aye taghene mia kwa jẹ iruemru erana vwo ne, ọke ame e te ughere amwa na aye ni ghwẹrioma. O jiri-i, ni mi rhonrin taghene igbehian mẹ i kpare okpọghọ ye suhi uvuẹn ibanki.

ERERE MI MẸRẸN NE: Ọke mia fan igbehian mẹ rhẹ aye, nọ phẹrẹre mie ruẹ ewene mi guọlọre uvuẹn akpenyerẹn mẹ. Uvuẹn ẹgbukpe 1989 ni mi bromarhame rhiẹ Oseri Jehova. Ọke mie bromarhame hin, omizu mẹ ọgbọtọ, izu mẹ, ọrhẹ ọsẹ mẹ ni homaba mẹ uvuẹn ogame i Jehova.

O te ẹgbukpe 17 mi rọnmọ ne, mi ji vwo emọ awansa ne. Arha tobọ ru mẹ biomu, mia sabu suẹn ekwẹre mẹ ne. Mi ji vwo ẹguọlọ kpahen ihworho ri nẹ ‘ivwiẹ, egbamwa ọrhẹ edjadjẹ’ sansan rhe. (Revelation 7:9) Ẹmro i Jesu o ghini rugba uvuẹn omamẹ ne. Nọ tare: “Are i rha nyalele ẹmro mẹ, are ghini idibo mẹ, are ine rhe urhomẹmro na, urhomẹmro na no no ru are rhiẹ emuvwiẹ.”—John 8:31, 32.

[Ẹmro Ikpokpoto]

Mi rha guọlọ ruẹ ewene, mi rha kerhọ ikpekporo re jiri uruemru re vwo utuoma kpahen awọrọ fọkiẹ ekete aye i nurhe-e

[Ẹmro Ikpokpoto]

Mẹmẹ ọrhẹ igbehian mẹ a guọlọ erẹ ame ine lele wọnrọn. Ame na ha aphia ọrhẹ erhan gidi ihworho ri bun te 20 yanghene ghwomaran