Uumanen na Biblia so Bilay

ANTO so amakiwas ed sakey ya datin Rastafarian ya ipakatli so dreadlocks to tan nalabanan so pambusol tod saray amputi?

“Adaeg Ko ni Ingen so Diskriminasyon.”—HAFENI NGHAMA

TAON: 34

BANSA: ZAMBIA

APALABAS: RASTAFARIAN

ISTORYAY BILAY KO: Inyanak ak ed refugee camp diad Zambia. Nen walay agawan guerra diad Namibia, inmalis si nanay ko tan akisali ed South West Africa People’s Organization (SWAPO). Sayan organisasyon et kontra ed gobierno na South Africa ya manuuley ed Namibia diad saman ya panaon.

Nanayam ak ed nanduruman refugee camp anggad nen 15 so taon ko. Saray kabataan ed kampo na SWAPO et ipapasal pian magmaliw ya lider ed organisasyon, ya satan so iisipen dan mangiter ed sikami na kalayaan. Binangatan da kami tungkol ed politika tan busolen iray amputi.

Nen 11 so taon ko, labay koy magmaliw ya Kristiano diad sakey ya simbaan ed kampo, ya ditan et manuulop iray Romano Katoliko, Lutheran, Anglican, tan arum ni. Nen akitongtong ak ed samay pastor, imbaga ton mas maong la kunon agko la ituloy itan ya labay ko. Manlapud saman, nagmaliw ak lan ateista. Nen 15 so taon ko, akila ak ed kilusan na Rastafarian lapud hilig kod reggae music tan labay kon naekal so diskriminasyon ya naeeksperiensya na saray black African. Nampa-dreadlocks ak, nanusar ak na marijuana, agak la mamangan na karne, tan ipapaseseg ko so kalayaan na saray andeket. Pero, agko inuman so imoral ya kabibilay ko tan agko intunday pambabantay ko na saray bayolentin pelikula. Tan siansia nin aliwliway panagsalitak.

NO PANON YA INUMAN NA BIBLIA SO BILAY KO: Nen 1995, antis ak ya manedad na 20, apaisip ak no anton talagay labay ko ya nagawad bilay ko. Kanian binasak so amin ya naanap kon publikasyon na Rastafarian. Wala ray nabasa ditan ya imbase ed Biblia, pero agko balet natatalosan. Kanian nandesisyon ak ya basaen ko lan mismo so Biblia.

Walay kaarok ya Rastafarian. Tan inikdan to ak na libro ya based Biblia, ya im-publish na Saray Tasi nen Jehova. Inaral ko man ya libro, tan inusar ko met so Bibliak. Ag-abayag, wala ray akabat kon Tasi nen Jehova tan inyaralan da ak na Biblia.

Ginawak so anggaay nayarian ko ya itunda so pansisigarilyok tan say alabas ya kakainum ko. (2 Corinto 7:1) Inayos koy itsurak, nampakatli ak, intundak so pambabantay koy pornograpiya tan saray bayolentin pelikula, tan inuman ko met so panagsalitak. (Efeso 5:3, 4) Asabi panaon, adaeg ko ni ingen so diskriminasyon ya naliliknak ed saray amputi. (Gawa 10:34, 35) Kaibad saray kailangan kon itunda et say idengel ed musika ya mangipapaseseg ed nasyonalismo. Kailangan ko met ya itunda so pipiulop ed saray datin kakaarok ya mauges so impluensya da, ta ompan napawil koy mauges ya kabibilay ko.

Nen nauman ko lay kabibilay ko, nananap ak na Kingdom Hall na Saray Tasi nen Jehova. Tan imbagak ya labay koy magmaliw ya Tasi. Kanian inyaralan da ak na Biblia. Nen nandesisyon ak ya manpabautismo bilang Tasi nen Jehova, ag-aliketan iray kapamilyak. Kuanen nanay ko, manpili ak la kuno na anggan anto ya “Kristiano” ya relihyon, basta aleg labat kunoy Tasi. Lanang ak met ya babalawen na uncle ko, ya atagey so posisyon tod gobierno, lapud nandesisyon ak ya magmaliw ya Tasi.

Pero naanosan ko so pambabalaw tan ikokontra dad siak ta inalig ko so alimbawa nen Jesus ed dugan pantrato ed totoo tan inyaplikak iray bilin to. Inkomparak iray ibabangat na saray Tasi ed no anto so ibabaga na Biblia. Tan akombinse ak ya nalmok lay tuan relihyon. Singa bilang, tutumboken da so ganggan na Biblia ya pulongan so arum. (Mateo 28:19, 20; Gawa 15:14) Tan agmet ira mibabali ed politika.—Salmo 146:3, 4; Juan 15:17, 18.

MARAKEP IRAN RESULTA: Nen uunoren ko la iray estandarte na Biblia, baleg so nitulong tod bilay ko. Singa bilang, makakatipid ak na nilasus a dolyar kada bulan ta nitundak la so panuusar koy marijuana. Agak met la manha-hallucinate, tan balibali met lay panagnonot tan kondisyon na laman ko.

Wala la natan so direksion na bilay ko, ya abayag ko lan papangarapen nen ugaw ak ni. Pero say sankaimportantian ed amin, awalaan ak na maapit ya relasyon ed Dios.—Santiago 4:8.