Bible achangé fini ti azo

NYEN la apusu mbeni Rastaman * ti fâ kuä ti li ti lo so lo bata ni ayo na ti zia lege ti sioni bê so lo yeke na ni na mbage ti amunzu? Nga nyen la amû maboko na mbeni maseka-koli so aye aye ti ngangu mingi na so ayeke sara kusala teti azo ti kango mbangi ti changé? Diko ye so ala tene.

“Mbi zia même lege ti sioni bê.”​—HAFENI NGHAMA

NGU TI LO: 34

KODORO SO A DÜ LO DÄ: ZAMBIE

MBAÏ TI LO: RASTAMAN

GIGI TI MBI ÂNDÖ: A dü mbi na yâ ti mbeni kando ti aréfugié na Zambie. Mama ti mbi akpe kodoro ti Namibie na ngoi ti mbeni bira na lo lï na yâ ti mbeni bungbi so nduru iri ni na yanga ti Anglais ayeke SWAPO (South West Africa People’s Organization). Bungbi so ayeke tiri lani na ngorogbia ti Afrika ti Mbongo so akomande na ndo ti Namibie na ngoi ni so.

Ngbene ye so a dü mbi juska mbi wara ngu 15, mbi yeke gi na yâ ti akando ti aréfugié. A fa na amaseka so ayeke na yâ ti akando ti SWAPO ti tiri ti wara liberté. A yôro atënë ti poroso na yâ ti li ti e na a fa nga na e ti ke amunzu.

Tongana mbi wara ngu 11, mbi ye ti ga mbeni membre ti eglize ti yâ ti kando ni so abungbi aCatholique, aLuthérien, a-Anglicane nga na ambeni nde. Mbi sara tënë ni na mbeni pasteur me lo wa mbi ti sara ni pëpe. A to nda ni na lango ni so, mbi tene na bê ti mbi so Nzapa ayeke dä pëpe. Ye oko, na ngu 15, mbi sara nzara ti mozoko ti reggae nga mbi ye ti kaï pasi so azo vuko ayeke bâ lani; aye so ague na mbi ti lï na yâ ti bungbi ti aRastaman. Mbi zia kuä ti li ti mbi ayo, mbi nyon mbangi, mbi ke ti te nyama nga mbi yeke tiri lani ti tene azo vuko awara liberté. Ye oko, mbi changé lani pëpe asioni sarango ye ti mbi na mbi ngbâ ti bâ alimon so sarango ye ti ngangu na zo ayeke na yâ ni. Nga mbi ngbâ ti tene sioni yanga.

LEGE SO BIBLE ACHANGÉ FINI TI MBI: Na ngu 1995, tongana mbi yeke na ngu 20, mbi to nda ti gbu li ti mbi nzoni na ndo ti ye so mbi ye ti sara na yâ ti gigi ti mbi. Ambeti ti bungbi ti aRastaman so mbi wara ni mbi diko ni kue. A fa aversê ti Bible na yâ ti ambeni mbeti ni, me mbi mä yâ ti fango nda ti atënë ni pëpe. Tongaso, mbi mû desizion ti diko Bible mbi wani.

Ngoi kete na pekoni, mbeni kamarade ti mbi so ayeke nga Rastaman amû na mbi mbeni buku ti aTémoin ti Jéhovah so ala yeke manda na Bible na azo. Mbi wani, mbi manda buku ni na Bible na tere ni. Na pekoni, mbi tingbi na aTémoin  ti Jéhovah na e na ala e ngbâ ti manda Bible.

Mbi sara kue ti zia lege ti nyongo manga na nyongo sämba ahon ndo ni (2 aCorinthien 7:1). Mbi leke tere ti mbi pendere, mbi fâ kuä ti li ti mbi so ayo, mbi ke ti bâ alimon ti porno nga na ati so a yeke fa sarango ngangu na zo na yâ ni nga mbi zia lege ti sioni yanga (aÉphésien 5:3, 4). Na pekoni, mbi zia même lege ti sioni bê so mbi yeke na ni na mbage ti amunzu (Kusala 10:34, 35). Ti gbian aye so kue, a lingbi mbi ke amozoko so ayeke pusu azo na tënë ti mara nga a lingbi mbi fâ yâ ti songo ti kamarade na angbene kamarade ti mbi so ayeke pusu mbi ti kiri na yâ ti angbene sarango ye ti mbi.

Na pekoni so mbi gbian aye so, mbi gi ti wara Da ti Royaume ti aTémoin ti Jéhovah na mbi hunda ti lï na yâ ti bungbi ti ala. Na ngoi so mbi mû desizion ti wara batême ti ga Témoin ti Jéhovah, a nzere na azo ti sewa ti mbi pëpe. Mama ti mbi atene na mbi ti soro mbeni eglize nde, me ti aTémoin ti Jéhovah pëpe. Mbeni fami ti mama ti mbi, so ayeke mbeni kota zo na yâ ti ngorogbia ti kodoro ni, ayeke kasa mbi lakue ndali ti so mbi ga Témoin ti Jéhovah.

Me, mandango ye na ndo ti lege so Jésus asara ye na mbage ti azo nga sarango ye alingbi na wango ti lo amû maboko na mbi ti luti na gbele kangango lege nga na hengo ndo. Tongana mbi haka lani ye so aTémoin ti Jéhovah ayeke fa na ye so Bible atene, mbi bâ biani so mbi wara tâ bungbi ti vorongo Nzapa. Na tapande, ala sara ye alingbi na commandement ti Bible so ahunda ti fa tënë na azo (Matthieu 28:19, 20; Kusala 15:14). Nga ala yôro tere ti ala pëpe na yâ ti aye ti poroso.​—Psaume 146:3, 4; Jean 15:17, 18.

LEGE SO MBI BÂ NZONI DÄ: Ti sara ye alingbi na ye so Bible afa amû maboko na mbi na yâ ti aye mingi. Na tapande, ziango mbangi amû lege na mbi ti bata gbâ ti nginza so mbi yeke buba ândö nze na nze ndali ni. Fadeso mbi yeke bâ aye kirikiri na yâ ti lê ti mbi mbeni pëpe nga seni ti mbi akiri aga nzoni.

Fadeso gigi ti mbi ayeke nzoni na mbi hinga ye so mbi yeke sara na fini ti mbi. A yeke aye so mbi yeke gi ni ngbene ye so mbi de kete. Me kota ye ni so ahon tanga ni kue ayeke so mbi lingbi ti ga nduru na Nzapa.​—Jacques 4:8.

“Mbi sara ngangu ti hon ndo ti ngonzo.”​—MARTINO PEDRETTI

NGU TI LO: 43

KODORO SO A DÜ LO DÄ: AUSTRALIE

MBAÏ TI LO: ZO TI KANGO MBANGI

GIGI TI MBI ÂNDÖ: Na ngoi so mbi yeke kono, mbi na azo ti sewa ti mbi e gue na ando nde nde. Mbi lango na yâ ti akete gbata, na pekoni na yâ ti mbeni kota gbata nga na mbeni ngoi mbi lango na ndo so eglize ti aprotestant ti kodoro ni ayeke bâ lege ti a-aborigène dä na yâ ti mbeni kete kodoro. Mbi girisa pëpe apendere ye so ândö mbi na akoya ti mbi na amolenge ti ala e yeke sara. Aye tongana gingo susu, gingo nyama nga na ambeni ye so a-aborigène ayeke sara ka.

 Babâ ti mbi ayeke lani zo ti kpongo gobo nga lo to nda ti fa na mbi lege ti tiri na ngoi so mbi de kete mingi. Azo ahinga mbi na sarango ye ti ngangu na zo. Na ngoi so mbi yeke na ngu 13 ti si na ngu 19, mbi buba lani ngoi ti mbi mingi ti nyon sämba na yâ ti abar. Mbi na akamarade ti mbi e yeke gi ka tënë mingi. E yeke mû akete zembe na anduru keke so ane ti tiri na gbâ ti azo so wungo ti ala alingbi ti si 20 wala ahon so.

Ti wara nginza, mbi yeke kä mbangi nga na akungba so azo so ayeke sara kua na place so abateau ayeke luti dä anzi ni. Nga mbi yeke ro ka nginza ti mbangi ti gue na ni na awani. Ti zia mbeto na yâ ti azo ni si ala mû na mbi nginza ni, mbi yeke mû ngombe. Mbi ye lani ti ga gi zo ti fango zo. Ndia ti mbi ayeke: Fâ mbi wala mbi fâ mo.

LEGE SO BIBLE ACHANGÉ FINI TI MBI: Mbi mä tënë ti aTémoin ti Jéhovah na ngoi so mbi yeke kono. Tongana mbi wara ngu 20 na ndo ni, mbi dabe ti mbi so mbi hunda lani mama ti mbi ti hinga ndo so ala yeke dä. Lango use na pekoni, mbeni Témoin so iri ti lo ayeke Dixon asi na yanga-da ti mbi. Na pekoni so e sara lisoro aninga, lo tisa mbi ti gue na bungbi ti aTémoin ti Jéhovah. Mbi gue lani na bungbi ni so na fadeso a sara angu 20 na ndo ni awe si mbi ngbâ ti gue na abungbi ni. Na lege ti Bible, aTémoin ti Jéhovah akiri tënë lani na ahundango ndo ti mbi kue.

A nzere na mbi mingi ti hinga so Jéhovah ayeke bi bê ti lo na azo kue, même ala so aye tënë ti Nzapa pëpe (2 Pierre 3:9). Mbi ga ti bâ so Jéhovah ayeke mbeni Babâ so ayeke na ndoye nga lo yeke bâ ndo na ndo ti mbi, même tongana mbeni zo asara ni pëpe. Bê ti mbi adë nga lani ti hinga so lo yeke pardonné asiokpari ti mbi tongana mbi changé lege ti mbi. Versê ti aÉphésien 4:22-24 andu bê ti mbi lani mingi. Versê so awa mbi ti “zi ngbene zo” na ti “yü fini zo so a sara lo alingbi na ye so bê ti Nzapa aye”.

Ti gbian aye na yâ ti fini ti mbi ahunda lani ngoi mingi. Na yâ ti yenga mbi yeke ndu mbangi pëpe, me na anda-yenga tongana mbi wara tere na akamarade ti mbi, mbi yeke nyon ni. Mbi bâ so a lingbi mbi fâ yâ ti kamarade na ala tongana mbi ye ti zia lege ti aye ti sioni. Tongaso, mbi mû desizion ti gue na mbeni gbata nde. Ambeni kamarade ti mbi ni ahunda ti gue ti zia mbi, na mbi yeda. Na ngoi ti voyage ni, ala komanse ti nyon mbangi na ala mû mbeni na mbi. Mbi tene na ala so mbi zia lege ti aye ni so awe, na ala zia mbi na katikati ti gbata ni na ti so mbi ye ti gue dä, na mbi sara tanga ti voyage ni mbi oko. Kete na pekoni, mbi mä so ala gue na ngombe na yâ ti mbeni banque na ala nzi nginza.

LEGE SO MBI BÂ NZONI DÄ: Na pekoni so mbi fâ yâ ti kamarade na angbene kamarade so awe, mbi bâ so a yeke ngangu pëpe ti gbian aye so a lingbi mbi gbian na yâ ti fini ti mbi. Na ngu 1989, mbi wara batême tongana mbeni Témoin ti Jéhovah. Na peko ti batême ti mbi, ita ti mbi ti wali, mama ti mbi nga na babâ ti mbi, ala kue aga awakua ti Jéhovah.

Mbi sara mariage asara ngu 17 fadeso awe nga mbi yeke na amolenge ota so mbi ye ala mingi. Mbi sara ngangu ti hon ndo ti ngonzo, même na ngoi so mbeni zo agi yanga ti mbi. Nga mbi manda ti ndoye azo kue atâa ayeke munzu wala zo vuko, ‘azo ti akete mara kue na ti ayanga ti kodoro kue’. (Apocalypse 7:9). Mbi bâ so atënë ti Jésus so aga tâ tënë na ndo ti mbi. Lo tene: “Tongana ala ngbâ na yâ ti tënë ti mbi, ala yeke biani adisciple ti mbi, na ala yeke hinga ande tâ tënë, na tâ tënë ayeke zi ala.”​—Jean 8:31, 32.

[Kete tënë na gbe ni]

[Kete tënë na lembeti 9]

Ti gbian aye so kue, a lingbi mbi ke amozoko so ayeke pusu azo na tënë ti mara

[Kete tënë na lembeti 10]

Mbi na akamarade ti mbi e yeke gi ka tënë mingi. E yeke mû akete zembe na anduru keke so ane ti tiri na gbâ ti azo so wungo ti ala alingbi ti si 20 wala ahon so