E Mafai e le Tusi Paia Ona Suia Olaga

O LE Ā na uunaʻia ai se tagata Rasta e ʻoti ana fili ma manumalo i lona ʻinoʻino i tagata papaʻe? Ae o le ā na mafai ai ona suia le olaga o se tauleʻaleʻa sauā, o lē sa ia aoina tupe mai i tagata na aitalafu i le ʻau faatau fualaau faasāina? Seʻi iloilo faamatalaga a nei tagata.

“Sa ou manumalo i loʻu ʻinoʻino.”—HAFENI NGHAMA

TAUSAGA: 34

ATUNUU: ZAMBIA

TALAAGA: RASTAFARIAN

O LOʻU OLAGA SA IAI:Na ou fanau i se nofoaga o sulufaʻiga i Zambia. Na sola ese loʻu tinā mai i Namibia i le taimi o le taua, ma na auai i se Faalapotopotoga o Tagata Aferika i Saute i Sisifo. Sa tau lenei faalapotopotoga ma le malo o Aferika i Saute, lea na pulea Namibia i lenā taimi.

Sa ou nofo i nisi o nofoaga o sulufaʻiga i uluaʻi tausaga e 15 o loʻu olaga. Na aʻoaʻoina talavou i lea nofoaga ia tausolomua i le faaauilumaina o lenei faalapotopotoga mo le saʻolotoga. Sa aʻoaʻoina i matou i mataupu fai a le malo ma ia ʻinoʻino i tagata papaʻe.

Ina ua 11 oʻu tausaga, na ou manaʻo e avea ma sui o se lotu na iai i lea nofoaga, o se lotu tuufaatasi o le Katoliko Roma, lotu Porotesano ma isi lotu. Na taʻu mai e le faifeʻau na ou talanoa i ai, e aua ou te faia lea tulaga. Mai i lenā taimi, na ou lē toe talitonu ai, e iai se Atua. Ae i le 15 o oʻu tausaga, ona o loʻu fiafia i musika faa-Iamaika e taʻu o le reggae, ma loʻu naunau e toe faasaʻo nisi o faiga lē tonu na aafia ai tagata uli o Aferika, na ou auai ai loa i le vaega o le ʻau Rasta. Na faauumi aʻu fili, ulaula mariuana, lē toe ʻai i aano o manu fasi, ma ou lagolagoina le saʻolotoga o tagata uli. Peitaʻi, e leʻi suia loʻu olaga o le ola i se olaga lē mamā, pe taofia le matamata i ata sauā. Ma na faaauau ona ou tautala i upu masoā.

LE AUALA NA SUIA AI E LE TUSI PAIA LOʻU OLAGA:I le 1995, pe tusa o le 20 o oʻu tausaga, na amata ai ona ou manatunatu po o le ā le mea e tatau ona ou faia i loʻu olaga. Sa ou suʻesuʻe i tusi uma a le ʻau Rasta na ou maua. O nisi o na tusi sa faasino atu i le Tusi Paia, ae ou te leʻi malamalama i na faamatalaga. Ona ou filifili lea e faitau le Tusi Paia.

Mulimuli ane, na tuuina mai e saʻu uō Rasta se tusi e aʻoaʻo ai le Tusi Paia, lea na lomia e Molimau a Ieova. Sa ou suʻesuʻeina lava e aʻu lenei tusi, faatasi ma le Tusi Paia. Na ou feiloaʻi ma Molimau a Ieova mulimuli ane, ma faaauau ona suʻesuʻe le Tusi Paia ma i latou.

 E ui ina matuā faigatā tele ona tuu le ulaula, ma le inu tele i le ʻava malosi, ae na mafai lava ona tuu. (2 Korinito 7:1) Na fai faalelei oʻu lāʻei ma foliga, ʻoti aʻu fili, lē toe matamata i ata matagā tau feusuaʻiga ma ata sauā, ma lē toe tautala i upu masoā. (Efeso 5:3, 4) Na oo foʻi ina ou manumalo i loʻu ʻinoʻino i tagata papaʻe. (Galuega 10:34, 35) O nei suiga na aofia ai le lafoaʻia o musika na uunaʻia ai le faailogalanu, ma taofia lo matou auaufaatasi ma aʻu uō sa iai muamua, o ē e ono taaʻina ai aʻu e toe foʻi i loʻu olaga tuai.

Ina ua uma ona fai na suiga, ona ou alu lea i se Maota mo Sauniga a Molimau a Ieova, ma talosaga atu ou te fia auai i la latou lotu. Sa fai ai loa laʻu suʻesuʻega faale-Tusi Paia. Ina ua ou filifili e papatiso o se Molimau a Ieova, sa lē fiafia loʻu aiga. Na fai mai loʻu tinā ou te alu i so o se lotu “Kerisiano,” ae aua neʻi oʻu alu i le Molimau a Ieova. O se tasi o tamāloa o le aiga o loʻu tinā, o se tagata maualuga i le malo, sa ia faitioina soo aʻu ona o loʻu filifili e auai ma Molimau a Ieova.

Peitaʻi, o le aʻoaʻoina o le auala na feagai ai Iesu ma tagata ma le faatatauina o lana fautuaga, na fesoasoani iā te aʻu e onosaia ai teteega ma tauemuga. Ina ua ou faatusatusa aʻoaʻoga a Molimau a Ieova ma mea o fai mai ai le Tusi Paia, na faatalitonuina ai aʻu ua ou maua le lotu moni. O se faaaʻoaʻoga, e latou te usitaʻia le faatonuga a le Tusi Paia ia talaʻi atu i isi. (Mataio 28:19, 20; Galuega 15:14) E latou te lē auai foʻi i mea faapolotiki.—Salamo 146:3, 4; Ioane 15:17, 18.

LE AUALA NA AOGĀ AI IĀ TE AʻU:O le iloa ola e tusa ai ma tapulaa a le Tusi Paia, ua fesoasoani iā te aʻu i le tele o auala e aogā. O se faaaʻoaʻoga, o le tuua o le mariuana, ua ou faasaoina ai le faitau selau o tālā i masina taʻitasi. Ua lē toe lutia aʻu i fāsaga sesē o le mafaufau, ma ua faaleleia loʻu soifua mālōlōina i le tino ma le mafaufau.

Ua iai nei se taʻitaʻiga ma se fuafuaga o loʻu olaga, lea na ou moomoo i ai a o oʻu talavou. Ae sili ai, ua ou lagona nei ua mafai ona ou mafuta vavalalata atu i le Atua.—Iakopo 4:8.

“Ua ou iloa pulea loʻu ita.”—MARTINO PEDRETTI

TAUSAGA: 43

ATUNUU: AUSETALIA

TALAAGA: SĒ E FAATAUINA ATU FUALAAU FAASĀINA

O LOʻU OLAGA SA IAI:Sa fesifiaʻi solo lo matou aiga a o oʻu tuputupu aʻe. Sa ou nofo i ni tamaʻi nuu, se aai telē, ma o se isi taimi i se nofoaga maotua mo tagata Apoliki na pulea e se lotu. O loo oʻu manatua nisi o mea mananaia o lenā vaitaimi, sa matou faia faatasi ma oʻu tauusoga ma tuagane o loʻu tinā—fagogota, tutuli, faia o meataulima, ma le vaneina o isi mea.

O loʻu tamā o se tagata sa  fusu, ma na aʻoaʻoina aʻu e fusu a o oʻu laʻitiiti lava. Sa avea aʻu o se tagata e sauā tele. A o oʻu talavou, o le tele o taimi ou te inu ai i falepia. Sa matou fia fufusu solo ma aʻu uō. E matou te faaaogā naifi ma pate pesipolo, e osofaʻi ai ni tagata e toʻa 20 pe sili atu foʻi.

Na maua aʻu tupe e ala i le faatauina atu o fualaau faasāina, ma mea na gaoi mai e tagata e faigaluega i le uafu. Na ou aoina foʻi tupe mai i tagata na aitalafu i le ʻau faatau fualaau faasāina, ma faafefe na tagata i le faaaogāina o ni fana eseese. O loʻu sini ia avea ma sē e tagatavaleina isi. O laʻu matua tauave, Ia fasioti isi, po o lo latou fasiotia o oe.

LE AUALA NA SUIA AI E LE TUSI PAIA LOʻU OLAGA:Na ou faalogo e faatatau i Molimau a Ieova a o oʻu tuputupu aʻe. Ina ua sili laʻitiiti i le 20 oʻu tausaga, ou te manatua na ou fesili i loʻu tinā pe na te iloa se mea e iai se isi o i latou. I aso e lua mulimuli ane, na asiasi mai ai i loʻu fale se Molimau e igoa iā Dixon. Ina ua uma ona ma talanoa mo sina taimi, ona ia valaaulia lea o aʻu i se sauniga a Molimau a Ieova. Na ou alu i lenā sauniga, ma ua silia nei i le 20 tausaga o oʻu auai pea i na sauniga. O so o saʻu fesili sa iai, sa mafai ona taliina e Molimau a Ieova mai i le Tusi Paia.

Sa ou olioli i le iloaina, e fiafia Ieova i tagata taʻitoʻatasi e oo lava i tagata faalēmataʻu. (2 Peteru 3:9) Na ou iloaina o ia o se Tamā alofa e tausia lelei aʻu, e tusa lava pe e lē o tausia aʻu e isi. Sa faamāfanafanaina foʻi aʻu ina ua ou iloa, o le a ia faamagalo aʻu agasala pe a suia loʻu olaga. Sa telē se aafiaga iā te aʻu o manatu o loo i le Efeso 4:22-24. O na fuaiupu na faalaeiau ai aʻu e “tuu ese le tagata tuai,” ae ia ‘ofu i le tagata fou na foafoaina e tusa ma le finagalo o le Atua.’

Na umi se taimi o taumafai e suia loʻu olaga. E uma atu lava se vaiaso ou te leʻi faaaogāina fualaau faasāina, ae i le faaiʻuga o le vaiaso, pe a faatasitasi ma aʻu uō, ona ou toe tagofia foʻi lea o fualaau. Sa ou manatu e tatau ona ou alu ese mai i aʻu aumea pe afai ou te manaʻo e suia loʻu olaga, ma o lea na ou filifili ai e siitia atu i se isi setete. Na mananaʻo nisi aʻu uō e matou te malaga faatasi, ona matou ō loa lea. A o alu le malaga, na amata ona ula a latou mariuana ma tuu mai iā te aʻu nisi mariuana. Sa ou taʻu atu iā i latou ou te lē o toe faia na mea, ma ina ua oo i le tuaoi o le setete, ona matou valavala loa lea. Na mulimuli ane oʻu iloaina, e leʻi umi ona ō ese atu aʻu uō, ae latou faaaogāina loa se fana e gaoia ai se faletupe.

LE AUALA NA AOGĀ AI IĀ TE AʻU:O le taimi lava na ou lē toe faatasitasi ai ma aʻu aumea, sa faigofie loa ona fai suiga i loʻu olaga. I le 1989, na ou papatiso ai o se Molimau a Ieova. Ina ua uma ona ou papatiso, na aufaatasi mai loʻu tuafafine, loʻu tinā ma loʻu tamā e matou te auauna faatasi iā Ieova.

Ua 17 nei tausaga talu ona ou faaipoipo, ma e toʻatolu si aʻu fanau. Ua ou iloa pulea loʻu ita, e tusa lava pe faaita aʻu e nisi. Ma ua ou iloa alofa i tagata mai i ituaiga uma, lanu ma gagana. (Faaaliga 7:9) Ua ou lagona le moni iā te aʻu o fetalaiga a Iesu. Na ia fetalai: “O outou o oʻu soo moni pe a outou tumau i aʻu upu, ma e iloa e outou le upu moni, e tuusaʻoloto foʻi outou e le upu moni.”—Ioane 8:31, 32.

[Faamatalaga faaopoopo i le itulau 19]

O le faia o suiga na aofia ai le lafoaʻia o musika na uunaʻia ai le faailogalanu

[Faamatalaga faaopoopo i le itulau 20]

Sa matou fia fufusu solo ma aʻu uō. E matou te faaaogā naifi ma pate pesipolo, e osofaʻi ai ni tagata e toʻa 20 pe sili atu foʻi