Bijbel e kenki sma libi

SAN ben meki wan Rastaman koti den loksu fu en, èn san meki a no denki takru moro fu wetiman? Boiti dati, san meki wan yonkuman di ben teki moni gi sma di e seri drugs, kenki en libi? Luku san den sma disi abi fu taki.

„Mi no ben denki takru moro fu wetiman.”—HAFENI NGHAMA

YARI: 34

KONDRE: SAMBIA

A BEN DE WAN RASTAMAN

A LIBI FU MI FOSI: Mi gebore na ini wan loweman kampu na ini Sambia. Mi mama lowe komoto na ini Namibia na a ten fu na orloku èn a ben de fu na organisâsi di nen South West Africa People’s Organization (SWAPO). Na organisâsi disi ben e feti teige a tirimakti fu Zuid-Afrika di ben e tiri Namibia na a ten dati.

Mi ben libi na ini difrenti loweman kampu, teleki mi ben abi 15 yari. Yonguwan na ini den SWAPO kampu ben kisi leri fu teki fesi na ini na organisâsi di ben o meki sma kon fri. Wi leri sortu sei wi musu teki na ini politiek èn taki wi musu tegu gi wetiman.

Di mi ben abi 11 yari, mi ben wani tron wan Kresten fu a kerki di ben de na a kampu, pe sma fu difrenti bribi ben kon, soleki Lomsusma, Luthersma, sma fu na Anglikan Kerki èn fu tra kerki. Di mi ben taki nanga a domri fu a tori disi, dan a no ben wani mi du dati. Sensi a ten dati mi no ben bribi taki wan Gado de. Ma di mi abi 15 yari, mi go na ini a Rasta bribi, fu di mi ben lobi reggae poku èn fu di mi ben wani tyari wan kaba kon na a kruktudu di den blakaman fu Afrika ben e ondrofeni. Mi kweki loksu, mi ben e smoko marwana, mi no ben e nyan meti moro, èn mi ben horibaka gi sma di wani fri den blakaman. Ma mi no ben kenki a yayolibi fu mi èn mi no ben tapu fu luku felem di abi ogridu na ini. Boiti dati, mi tan taki dotitaki.

A FASI FA BIJBEL KENKI MI LIBI: Na ini 1995, di mi ben abi sowan 20 yari, mi bigin denki seryusu san mi ben wani du nanga mi libi. Mi ben studeri ala den buku fu den Rastaman di mi ben man feni. Sonwan fu den buku ben taki fu Bijbel, ma mi no ben man frustan den sani di ben skrifi na ini den buku. Sobun mi ben bosroiti fu leisi Bijbel misrefi.

Bakaten, wan mati fu mi di ben de wan Rastaman gi mi wan Bijbelstudie buku di Yehovah Kotoigi tyari kon na doro. Mi studeri a buku disi mi wawan nanga yepi fu Bijbel. Bakaten, mi miti Yehovah Kotoigi èn den studeri go doro nanga mi.

 Nanga furu muiti mi tapu nanga smoko èn nanga a dringi di mi ben e dringi sopi pasa marki (2 Korentesma 7:1). Mi bigin weri krosi di fiti, mi koti den loksu fu mi, mi no luku felem moro di abi ogridu nanga morsu seks tori na ini, èn mi no ben taki dotitaki moro (Efeisesma 5:3, 4). Te fu kaba, mi no ben denki takru moro fu wetiman (Tori fu den Apostel 10:34, 35). Fu man tyari den kenki disi kon, mi ben musu tapu fu arki poku di e gi sma deki-ati fu abi bita-ati gi sma fu wan tra ras. Boiti dati, mi no ben musu abi demakandra moro nanga sma di ben de mi mati fosi, fu di den ben o pruberi fu meki mi fadon go baka na ini a fasi fa mi ben libi fosi.

Baka di mi tyari den kenki disi kon, mi suku wan Kownukondre zaal fu Yehovah Kotoigi èn mi aksi den efu mi kan tron wan memre fu a bribi fu den. Di mi bosroiti fu teki dopu leki wan fu den Kotoigi fu Yehovah, den famiriman fu mi no ben lobi a sani dati. Mi mama taigi mi fu teki wan tra Kresten bribi, na presi fu tron wan Yehovah Kotoigi. Wan fu den omu fu mi, di ben abi wan hei posisi na lanti, ben e krutu mi doronomo fu di mi teki a bosroiti fu de makandra nanga den Kotoigi.

Ma mi leri fa Yesus ben handri nanga sma èn mi fiti a rai fu en. Disi yepi mi fu horidoro te mi ben kisi fu du nanga gens èn te sma ben e spotu mi. Te mi ben agersi den sani di Kotoigi leri nanga san Bijbel leri, dan mi kisi na overtoigi taki mi feni a tru bribi. Fu eksempre, den e gi yesi na a Bijbel komando fu preiki gi trawan (Mateyus 28:19, 20; Tori fu den Apostel 15:14). Boiti dati den no abi noti fu du nanga politiek.—Psalm 146:3, 4; Yohanes 15:17, 18.

DEN WINI DI MI KISI: Fu di mi leri fu hori misrefi na den markitiki fu Bijbel, meki disi yepi mi na difrenti fasi. Fu eksempre, fu di mi no e smoko marwana moro, meki mi no e lasi hondrohondro dala moro ibri mun. Mi no e si sani moro fu di mi ben hei, èn mi gosontu kon moro bun.

Mi kon abi wan marki na ini mi libi now, di mi ben wani abi sensi di mi ben de pikin. A sani di de moro prenspari, na taki now mi si taki mi kon moro krosibei na Gado.—Yakobus 4:8.

„Mi leri fu hori misrefi fu no atibron.”—MARTINO PEDRETTI

YARI: 43

KONDRE: AUSTRALIA

A BEN DE WAN SMA DI BEN E SERI DRUGS

A LIBI FU MI FOSI: Mi famiri froisi furu di mi ben e gro kon bigi. Mi ben tan na ini pikin foto, na ini wan bigi foto, èn fu wan pisi ten mi ben tan farawe na ini wan Kresten dorpu pe Aboriginsma ben e libi. Mi man memre den prisiri sani ete di mi ben e du nanga den famiri fu mi mama. Wi ben go uku, wi ben go onti, èn wi ben meki sani di sma fu a dorpu gwenti meki.

Mi papa ben e boks èn a ben  leri mi fu feti di mi ben yongu ete. Mi ben lobi fu feti nanga sma. Di mi ben de wan tini, dan mi ben lobi fu go na ini bar fu dringi sopi. Mi nanga den mati fu mi, ben e suku okasi fu feti nanga sma. Wi ben gebroiki nefi nanga kodya fu feti nanga wan grupu fu 20 sma noso moro leki dati.

Mi meki moni fu di mi ben e seri drugs èn mi ben e seri sani di den wrokoman fu lanpe ben fufuru. Mi ben e yepi sma tu di ben e seri drugs fu piki a moni di trawan ben musu pai den, èn mi ben e gebroiki gon fu dwengi den sma fu du dati. Mi ben wani tron wan sma di trawan ben o yuru fu kiri sma gi den. Mi ben lobi fu taki: ’Kiri sma, noso sma o kiri yu.’

A FASI FA BIJBEL KENKI MI LIBI: Mi yere fu Yehovah Kotoigi di mi ben e gro kon bigi. Mi e memre ete taki di mi ben abi sowan 20 yari, mi ben aksi mi mama efu a sabi pe den Kotoigi de. Tu dei baka dati, wan Kotoigi di nen Dixon naki na tapu mi doro. Baka di wi ben taki fu wan pisi ten, a gi mi wan kari fu kon na wan konmakandra fu Yehovah Kotoigi. Mi go na a konmakandra dati, èn mi e du dati moro leki 20 yari kaba. Den Kotoigi ben man gi piki tapu ibri aksi di mi ben abi èn den ben du dati nanga yepi fu Bijbel.

Mi ben breiti fu leri taki Yehovah e broko en ede nanga ibri sma, srefi sma di no e dini en (2 Petrus 3:9). Mi kon si taki a de wan lobi Papa di o sorgu gi mi, srefi te nowan tra sma ben o du dati. A ben de wan frulekti gi mi tu fu kon sabi taki a o gi mi pardon fu den sondu fu mi efu mi ben o kenki mi libi. Den Bijbeltekst fu Efeisesma 4:22-24 ben abi furu krakti tapu mi. Den tekst dati gi mi deki-ati fu ’kenki a fasi fa mi ben de fosi’ èn fu „tron wan nyun sma di de soleki fa Gado wani”.

A ben teki furu ten fu kenki a fasi fa mi ben e libi. A heri wiki mi no ben e gebroiki drugs, ma tapu satra nanga sonde, te mi ben de nanga mi mati, mi no ben man hori misrefi fu no gebroiki drugs. Mi kon si taki efu mi wani kenki mi libi, mi ben musu froisi gowe fu den mati fu mi, sobun mi bosroiti fu go na wan tra pisi fu a kondre. Sonwan fu den mati ben wani tyari mi go drape, èn mi meki den kon nanga mi. Di wi ben de na pasi, den bigin smoko marwana èn den aksi mi efu mi wani smoko tu. Mi taigi den taki mi tapu nanga den gwenti dati, èn mi go doro mi wanwan na a presi pe mi ben wani go. Bakaten mi kon yere taki den mati fu mi go fufuru na wan bangi nanga syatu mofo gon.

DEN WINI DI MI KISI: Baka di mi tapu fu abi demakandra nanga den mati dati, a ben moro makriki gi mi fu tyari kenki kon na ini mi libi. Na ini 1989, mi teki dopu leki wan Kotoigi. Baka di mi dopu, mi sisa, mi papa nanga mi mama, kon dini Yehovah tu.

Mi trow 17 yari now èn mi abi dri moi pikin. Mi leri fu hori misrefi fu no atibron, srefi te sma e du sani fu meki mi atibron. Boiti dati, mi leri fu lobi sma di komoto fu ala ’lo, pipel, nanga tongo’ (Openbaring 7:9). Mi feni taki den wortu fu Yesus de spesrutu gi mi. A ben taki: „Efu unu tan du den sani di mi taki, dan unu na mi disipel trutru; unu o sabi a waarheid èn a waarheid o meki unu kon fri.”—Yohanes 8:31, 32.

[Prenspari pisi na tapu bladzijde 20]

Fu man tyari kenki kon, mi ben musu tapu fu arki poku di e gi sma deki-ati fu abi bita-ati gi sma fu wan tra ras

[Prenspari pisi na tapu bladzijde 21]

Mi nanga den mati fu mi, ben e suku okasi fu feti nanga sma. Wi ben gebroiki nefi nanga kodya fu feti nanga wan grupu fu 20 sma noso moro leki dati