E ‵Fuli Ne Te Tusi Tapu A Olaga O Tino

SE A te mea ne fakamalosi atu ki se tagata telā ne aofia i se potukau fakalotu ko te Rastafarian ke ‵kati ana laulu kae ke manumalo i ana lagonaga fakailoga tino ki tino ‵kena? Kae se a te mea ne fai ne se tamataene uiga fakasaua kae ‵tae ne ia a tupe mō tino aveave ‵funa a vailakau tapu ke ‵fuli ei tena olaga? Mafaufau ki pati ne fai mai ne lāua konei.

“Ne manumalo au i toku uiga fakailoga tino.”—HAFENI NGHAMA

TAUSAGA: 34

TENA FENUA: ZAMBIA

TENA TALA FAKASOLOPITO: SE TAGATA LOTU RASTAFARIAN

TOKU OLAGA MUA: Ne fanau au i se koga e ‵nofo i ei a tino fakaa‵lofa i Zambia. Ne tele atu toku mātua ki Namibia i te taimi o te taua kae ne kau atu ki te fakapotopotoga ko te South West Africa People’s Organization (SWAPO). A te fakapotopotoga tenei ne taua atu mō Tino Afelika ki Saute kolā ne pule atu i Namibia i te taimi tenā.

Ne nofo au i nai koga ‵nofo mō tino fakaa‵lofa i tausaga muamua e 15 o toku olaga. A talavou i koga ‵nofo mō tino fakaa‵lofa a te SWAPO ne akoako kae fakamasani faka‵lei ke taua malosi atu ke maua te saolotoga. Ne akoakogina matou ki mea fakapolitiki kae ke takalia‵lia foki ki tino ‵kena.

I te taimi ko 11 ei oku tausaga, ne manako au ke fai pelā me se Kelisiano i lotu ‵kau fakatasi i te koga ‵nofo o tino fakaa‵lofa telā e aofia i ei a te Lotu Katolika Loma, Lotu Lutelu, Lotu Pelepeleane, mo nisi lotu aka foki. A te faifeau ne faipati au ki ei, ne faka‵tuka ne ia au mai te taumafai ki ei. Mai te taimi tenā, ne fai ei au e pelā me se tino e se fia talitonu ki te Atua. I te taimi ko 15 oku tausaga, ne momea malosi aka toku fiafia ki pese reggae mo toku manakoga ke faka‵tonu aka a nisi faifaiga sē fakamaoni kolā ne logo‵mae i ei a tino uli Afelika, telā ne takitaki atu ei au ke kau atu ki gasuesuega a te potukau fakalotu ko te Rastafarian. Ne faka‵loa toku ulu, ne ‵pusi maluana au, kae ne seki toe kai meafasi au, kae ‵lago atu ki te saolotoga o tino uli. Kae ne seki ‵fuli i ei a toku olaga fai valevale io me fakagata toku onoono ki ata fakasaua. Kae ne tumau eiloa au i toku gutu pati masei.

TE AUALA NE ‵FULI EI TOKU OLAGA NE TE TUSI TAPU: I te 1995, kāti ko 20 oku tausaga, ne kamata o toe mafaufau ‵mafa au ki toku vaegā olaga. Ne sukesuke au ki tusi a te kau Rastafarian kolā ne mafai o maua ne au. Ne maua atu a nisi pati i ei kolā ne siki mai i te Tusi Tapu, kae e se ‵tagi ‵lei ki a au olotou fakamatalaga. Tela la, ne fakaiku aka ne au ke faitau eiloa au ki te Tusi Tapu.

Fakamuli ifo, ne tuku mai ne soku taugasoa Rastafarian se tusi faka-te-Tusi Tapu telā ne ‵lomi ne Molimau a Ieova. Ne sukesuke eiloa au ki te tusi tenei fakatasi mo te Tusi Tapu. Fakamuli ifo, ne fetaui au mo Molimau a Ieova kae ne kamata o fai ne latou taku akoga ki te Tusi Tapu.

Mai i taumafaiga e uke, ne fakagata ne au taku ‵pusi mo taku inu malosi. (2 Kolinito 7:1) Ne fai faka‵lei oku foliga, ‵kati toku ulu ‵loa kae fakagata toku onoono ki ata ma‵sei mo ata fakasaua, kae penā foki mo toku gutu pati masei. (Efeso 5:3, 4) Fakamuli ifo, ne manumalo au i te fakailoga tino ki tino ‵kena. (Galuega 10:34, 35) A te faiga o ‵fuliga konei ne aofia i ei a te fakagata o toku fakalogologo ki pese kolā e fakamalosi aka ei a te fakailoga tino, kae ‵kalo keatea mai i oku taugasoa mua kolā ne fakamalosi mai ke toe foki atu ki toku vaegā olaga mua.

Mai tua o ‵fuliga konei, ne ‵sala atu au ki se Fale Tapuaki o Molimau a Ieova kae fakamolemole atu me ko fia kau au ki te lotu. Ne fai i ei taku akoga faka-te-Tusi Tapu. I te taimi ne fakaiku aka ne au ke papatiso e pelā me se Molimau a Ieova, ne seki fia‵fia toku kāiga. Ne fai mai toku mātua ke filifili aka so se isi lotu “Kelisiano” kae e se ko Molimau a Ieova. E tokotasi toku fakatamana, se sui lauiloa i te malo, ne fakamasei faeloa ne ia taku fakaikuga ke kau atu ki te kau Molimau.

Kae ne tauloto ne au a faifaiga a Iesu ki tino kae ko te fakagalue aka o ana pati fakatonutonu, ne fesoasoani mai ke kufaki ne au a ‵tekemaiga mo fakatauemuga. Kafai e fakatusa ne au a mea e akoako mai ne te kau Molimau mo mea e fai mai te Tusi Tapu, ne talitonu au me ko oti ne maua ne au te lotu tonu. E pelā mo te lotou faka‵logo ki te fakatonuga i te Tusi Tapu ke talai atu ki nisi tino. (Mataio 28:19, 20; Galuega 15:14) Kae e se aofia foki latou i mea fakapolitiki.—Salamo 146:3, 4; Ioane 15:17, 18.

TE AUALA NE MAUA EI NE AU A MEA AOGA: A te ola e ‵tusa mo tulaga faka-te-Tusi Tapu, ne fesoasoani mai ki a au i auala aoga. E pelā mo te taofi aka o taku ‵pusi maluana, ne mafai ei o ‵sao a te fia selau o tupe kolā ne fakamāumāu i masina takitasi. Ne seki toe moe mataku au kae ne kamata foki o ‵lei toku malosi i te feitu faka-te-mafaufau mo te feitu faka-te-foitino.

Ko tokagamalie kae aoga nei toku olaga, se mea telā ko leva ne manako au ki ei talu mai te taimi koi talavou ei au. Kae e sili atu i te tāua, ko mafai nei ne au o fakapilipili atu ki te Atua.—Iakopo 4:8.

“Ne tauloto au ke pule faka‵lei atu ki toku kaitaua.”—MARTINO PEDRETTI

TAUSAGA: 43

TENA FENUA: AUSETALIA

TENA TALA FAKASOLOPITO: SE TINO AVEAVE ‵FUNA VAILAKAU TAPU

TOKU OLAGA MUA: Ne masani o olo atu toku kāiga ki koga kese‵kese i te taimi ne tupu aka ei au. Ne nofo au i tamā fa‵kai, se fa‵kai lasi, kae mō se vaitaimi ne nofo atu foki au i se koga telā e ‵nofo i ei a tino uli. E isi ne taimi ‵gali ne masaua ne au fakatasi mo oku fakataina mo fakatamana—faiika, atuli manu, faitega o mea ta‵fao pelā mo boomerangs, kae penā foki loa mo nisi mea.

A toku tamana se tagata fai pelē kae ne kamata o akoako ne ia au ke fusu i te taimi koi foliki au. Tela la, a te uiga fakasaua ne fai mo fai se vaega o toku olaga. I te taimi koi talavou ei au, ne fanatu sāle au ki fale kava. Ne taumafai faeloa matou mo oku taugasoa ke faka‵tupu taua. Ne fakaaoga ne matou a naifi mo pate baseball ke taua atu ki se potukau o tino e toko 20 io me e tokouke atu.

Ne maua aku tupe mai te ‵togi atu o vailakau tapu mo mea e kaisoa mai ne tino ga‵lue i uafu. Ne ‵tae sāle foki ne au a tupe mō te kau aveave ‵funa vailakau tapu, kae ne fakamatakutaku malosi atu ki tino mai te fakaaogaga o fana. A te mea ne fakamoemoe au ki ei ke fai mo fai se tino tatino. Toku manatu tāua, Tatino io me mate.

TE AUALA NE ‵FULI EI TOKU OLAGA NE TE TUSI TAPU: Ne lagona ne au a mea e uiga ki Molimau a Ieova i te taimi koi tupu aka ei au. I te taimi ko 20 tupu fua ei oku tausaga, e masaua ne au me ne fesili atu au ki toku mātua me e iloa ne ia a latou. E lua a aso mai tua ifo kae tukituki mai se Molimau e igoa ki a Dixon i toku mataloa. Mai tua o te ma sau‵talaga, ne ‵kami ne ia au ki se fakatasiga a Molimau a Ieova. Ne fanatu au ki te fakatasiga tenā kae ne seki toe galo au i fakatasiga konā i tausaga ko sili atu nei i te 20. A fesili katoa ne mafaufau au ki ei, ne mafai ne te kau Molimau o tali mai e auala i te Tusi Tapu.

Ne fiafia malosi au ke iloa atu me e saga tonu mai a Ieova ki a tatou taki tokotasi, ke oko foki ki tino amio sē atua. (2 Petelu 3:9) Ne iloa aka ne au me i a ia se Tamana alofa telā e mafai o tausi mai ki a au māfai e seai aka foki se isi tino e mafai ne ia o tausi au. Ne pelā aka loa oku lagonaga i te iloaga ne au me e mafai ne ia o fakamagalo aku agasala māfai e ‵fuli toku olaga. A fuaiupu i te Tusi Tapu i te Efeso 4:22-24 ne lasi ‵ki te fakamalosiga ki a au. Ne fakamalosi mai a fuaiupu konā “ke tiakina a uiga mua” kae ke “‵pei ki uiga ‵fou kolā ne faite e ‵tusa mo te loto o te Atua.”

Ne tai leva eiloa te taimi ke ‵fuli ei toku olaga. Ne nofo ki se vaiaso e aunoa mo toku patele ki vailakau tapu, kae i te fakaotiga o te vaiaso, kafai ko fanatu au ki oku taugasoa, ko toe takavale foki au. Ne iloa aka ei ne au me ne ‵tau o fano keatea au mai i oku taugasoa māfai e manako au ke ‵fulu faka‵ma toku olaga, telā ne fakaiku aka ei ne au ke fanatu ki te suā fa‵kai. Ne fai mai a nisi o oku taugasoa ke olo tasi matou kae ne talia ne au. I te taimi o te malaga, ne kamata o ‵pusi maluana latou kae fakamalosi mai foki ki a au. Ne fai atu au me ko fia tiaki ne au a faifaiga konā, telā ne ma‵vae ei matou i te tuakoi o te fa‵kai. Fakamuli ifo ne iloa aka ne au me ne kaisoa ne oku taugasoa a te pagike mai te fakaaogaga o se fana.

TE AUALA NE MAUA EI NE AU A MEA AOGA: I te taimi ne ‵vae keatea ei au mai i oku taugasoa konā, ne momea aka te faigofie ki a au ke fai a nisi ‵fuliga e manakogina i toku olaga. I te 1989, ne papatiso ei au e pelā me se Molimau. Mai tua o taku papatisoga, ne ‵kau mai foki a toku tuagane, toku mātua mo toku tamana i te tavini atu ki a Ieova.

Ko oti ne avaga nei au mō tausaga e 17 kae ko tokotolu aku tama pele. Ko oti ne tauloto au ke pule faka‵lei atu ki toku kaitaua, ke oko foki loa māfai ko fai ne se tino ke kaitaua au. Kae ne tauloto foki au ke alofa ki tino mai i ‘matakāiga, tino, mo ‵gana’ katoa. (Fakaasiga 7:9) Ne lagona ne au a te ‵tonu o pati a Iesu i toku olaga. Ana muna: “Kafai e tumau koutou i aku muna, ko oku soko ‵tonu koutou, kae ka iloa ne koutou te munatonu, kae ko te munatonu ka fakasaoloto ne ia koutou.”—Ioane 8:31, 32.

[Ata]

A te faiga o ‵fuliga ne aofia i ei a te fakagata o toku fakalogologo ki pese kolā e fakamalosi aka ei a te fakailoga tino

[Ata]

Ne taumafai faeloa matou mo oku taugasoa ke faka‵tupu taua. Ne fakaaoga ne matou a naifi mo pate baseball ke taua atu ki se potukau o tino e toko 20 io me e tokouke atu