Jelontesbot skuxlejalik yuʼun te Biblia

¿BIN-UTʼIL la sjeltay skuxlejal jtul rastafari sok te maba la spʼajix te machʼa sakike? ¿Bin tijbot yoʼtan ta sjeltayel skuxlejal jtul kerem te ya x-aʼtej ta stojol te jchon drogaetik? Kiltik te bin ya scholik kaʼiytike.

«Maba pʼajawanonix» (HAFENI NGHAMA)

YAʼBILAL: 34

SLUMAL: ZAMBIA

STALEL TA NAIL TAL: RASTAFARI-A

TE BIN YILEL JKUXLEJAL-A: Ta skaj te guerrae, te jmama lokʼ bael ta Namibia sok och ta Organización del Pueblo de África del Suroeste (te siglaetik yuʼun ta inglés jaʼ SWAPO). Te grupo-abi jaʼ skontrainoj-a te bitʼil ya xwentainwanik ta Namibia. Te jmama kʼot ta Zambia te banti ayik te machʼatik anemik lokʼel ta slumalik, tey ayinon-a.

Te kʼalal ayinon jaʼto te kʼalal ayix 15 kaʼbilal-ae kuxinon sok yanyantik grupo te jaʼnix yuʼun te SWAPO. Te grupo ini te skontrainoj te Namibia ya snojptesik te jchʼiel keremetik ta swenta te política sok ta spʼajel te machʼatik sakike.

Te kʼalal 11 kaʼbilal-a la jkʼan ochon ta jchʼuunjel yuʼun Cristo, jaʼ yuʼun boon ta stojol jtul pastor te ya x-aʼtej ta iglesia ta banti nainemotike, ta iglesia-abi ya xkʼotik catolicoetik sok yantikxan religión. Pero, te pastor maba la skʼan te ya x-ochon ta jchʼuunjele. Bayal la schebajtesbon koʼtan, jaʼ yuʼun, jajch kal te maʼyuk Diose. Te kʼalal 15 kaʼbilal-ae, ochon ta grupo rastafari. Ochon ta grupo-abi ta swenta te ya jmulan te música reggae, soknix te ya jkʼan ya jkoltay te machʼatik ijkʼ stsʼumbalik ta África te ya yichʼik utsʼinel. La kakʼ ta bechʼtiklanel te stsotsel jol —jich te bitʼil kʼayemik ta spasel te rastafarietik⁠—, jajch jnukʼ marihuana, maba la jweʼix tiʼbal sok jajch jkoltay te grupo te ya skoltayik te machʼatik ijkʼ stsʼumbalik. Pero, maba la kijkitay te spasel mulwej sok te yilel peliculaetik yuʼun majtamba. Jaʼnix jich, maba la kijkitay yalel chopol kʼopetik.

¿BIN-UTʼIL LA SJELBON JKUXLEJAL TE BIBLIAE? Ta 1995, te kʼalal 20 kaʼbilal-ae, la jojkʼoybey jba bin ya jpas ta jkuxlejal. Ay jkʼoponojix-a te junetik yuʼun te rastafarietik, manchukme ay la jta textoetik tey-a, ma kʼot ta koʼtan te bin-utʼil ya scholbeyik skʼoplale. Jaʼ yuʼun, jajch jkʼopon ta jtukel te Bibliae.

Jtul kamigo te rastafari-euk, la yakʼbon jun libro te jaʼ spasojik te testigoetik yuʼun Jehová. Oranax jajch jkʼopon sok la jle ta Biblia te textoetike. Tey-abi kʼopojon sok te Testigoetik sok bayalxan bin la yakʼbonik jnop. Pero te kʼalal mato xjajchon ta snopel-a te Biblia sok te Testigoetike, bayal bin la jeltay ta jkuxlejal.

Wokol la kaʼiy yijkitayel te yakubel sok te snukʼel may (2 Corintios 7:1). Jaʼnix jich la jeltay te bin yilel ya jchajpan jba —la kakʼ ta setʼel lokʼel te stsotsel jol te la kakʼ ta bechʼtiklanel⁠—, maba la kilix te peliculaetik yuʼun majtamba sok pornografía, jaʼnix jich maba la kalix chopol kʼop (Efesios 5:3, 4). Ta patil bael, maba la jpʼajix te machʼatik sakike (Hechos 10:34, 35). Swenta la kijkitay spisil-abi, nail la kijkitay yaʼiyel te kʼayojiletik ta swenta pʼajaw sok maba la jokinix te kamigotak te ya stijbonik koʼtan ta spasel te bin ma leke.

Te kʼalal kijkitayojix-a te bintik ma lek kʼayemon ta spasele, la jle jun sNail Tsoblej yuʼun te testigoetik yuʼun Jehová. Jaʼ yorail-abi te jajch kichʼ nojptesel yuʼun Biblia sok la kichʼ jaʼ. Te jfamilia maba la smulan-abi. Te jmama la yalbon te yakuk jtsa biluk religión, pero manchuk jaʼuk sok te Testigoetike. Sok ay jtul sfamilia te jmama —te yichʼoj tulan yaʼtel ta stojol te ajwalil⁠— spisil-ora ya slabanon-a ta swenta te ochon ta Testigo.

Manchukme la skontrainonik sok la slabanonik te jfamiliae, maba chebaj koʼtan ta swenta te la jtʼunbey stalel te Jesús sok la jchʼuun te nojpteseletik yuʼune. Jaʼnix jich, kʼoem ta koʼtan-a te jaʼik te smelelil religión te Testigoetike, melel spisil te bin ya yakʼik ta nopel lokʼem ta Biblia. Te bitʼil ya schʼuunik spisil te mantaliletik yuʼun Dios te ay ta Biblia, ya scholbeyik skʼop Dios te ants winiketik (Mateo 28:19, 20; Hechos 15:14). Jaʼnix jich ma schʼik sbaik ta política (Salmo 146:3, 4; Juan 15:17, 18).

¿BINTIK LEKILAL JTAOJ YUʼUN? Bayal lekilal jtaoj yuʼun te ya jchʼuun te mantaliletik te ay te Biblia. Jich bitʼil te ma jnukʼix te marihuana te bayal ya jlajin jtakʼin yuʼun-ae. Jich yuʼun, maʼyuk bin ya yutsʼinbonix jpensar sok ma bayal ya stsakonix chamel.

Jaʼtonix te kʼalal chʼinonto-a ya jkʼan ya jtabey swentail-a te jkuxlejale, sok la jtaix ta ora ini. Pero te bin mukʼxan skʼoplale, jaʼ te nopol ayonix ta stojol te Diose (Santiago 4:8).

«Ma oraukix ya x-ilinon» (MARTINO PEDRETTI)

YAʼBILAL: 43

AYIN TA: AUSTRALIA

STALEL TA NAIL TAL: JMILAWAL-A SOK JCHON DROGA-A

TE BIN YILEL JKUXLEJAL-A: Te kʼalal chʼinonto-a, bayal banti bootik ta kuxinel sok te jfamiliae; ta chʼin lumetik, ta mukʼul lumetik, sok ta yantik lugaretik. Kʼax tʼujbil te bintik ya xjul ta koʼtan te kʼalal kuxinon ta yorail-abi sok te jprimotak sok jtiotak. Ya xbootik ta tsak chay, ta stsakel chambalam sok ya jpastik aʼtejibaletik yuʼun nutsojel sok yantikxan.

Bayal ya xmajawanon-a, melel te jpapa jaʼ boxeador-a sok la snojpteson ta majtamba te kʼalal chʼinonto-ae. Te kʼalal mukʼubonxan jajchon ta bael ta yakubel ta baretik. Te joʼon sok te kamigotak ya jmulantik sjachel majtamba. Chapalotik sok jnavajatik sok teʼetik, sok ya jtsak jbatik sok 20 ta tul ants winiketik o bayalxan.

Swenta ya jta jtakʼin, ya jchon drogaetik sok ya jchon biluketik te elkʼanbil te ya yakʼbonik te machʼatik ya x-aʼtejik te banti ya skojtan sbaik te barcoetik. Jaʼnix jich aʼtejon ta stojol te machʼatik ya schonik droga, joʼon ya jkʼanbey sbetik te machʼatik ya sbetanik droga sok ya jxiwteslanik ta pistola. Spisil-ora jich ya kal-a: «Joʼon nail ya jmil te machʼa ya skʼan ya smilone». Ya jkʼan ya xkʼoon ta jmilawal-a.

¿BIN-UTʼIL LA SJELBON JKUXLEJAL TE BIBLIAE? Ya xjul ta koʼtan te aynix la kaʼiybey skʼoplal te testigoetik yuʼun Jehová te kʼalal chʼinonto-ae. Pero, jaʼto te kʼalal kʼaxemix ta 20 kaʼbilal-a te la jojkʼoybey te jmama te machʼatik-a te Testigoetike. Cheb kʼajkʼal ta patil tal yulaʼtayon jtul Testigo te Dixon sbiil. Jalajotik ta kʼop jtebuk, sok la spason invitar ta tsoblejetik. Jaʼ te sbabial buelta kʼoone, jaʼto tal-abi, ayix 20 jaʼbil te ya xboone. Bayal ya jmulan-a te ya yakʼbonik kil ta Biblia te sujtib te jojkʼoyeletik ya jpasbeyike.

La yakʼbonik jnop te kʼuxik ta oʼtanil yuʼun Dios spisil te ants winiketik manchukme maba ya yichʼik ta mukʼ (2 Pedro 3:9). Jaʼnix jich la jnop te jaʼ jtul Tatil te bayal skʼuxul yoʼtan te ya skanantayon te kʼalal maʼyuk machʼa ya spase. ¡La yakʼbon bayal smukʼul koʼtan snaʼel te ya xjuʼ ya spasbon perdón spisil te jmul teme ya jeltay jtalele! Ay jun texto te bayal la jmulane jaʼ Efesios 4:22-24. Tey ya yal te akʼa jcholtik lokʼel te jpokoʼ jtaleltik sok te akʼa jlaptik «te yachʼil cuxlejal, te hich pasbil te bin utʼil ay te Diose».

Jamal ya kal te wokol la kaʼiy sjeltayel te jkuxlejale. Ya xjuʼ kuʼun-a te maba ya jtuuntes droga bayal kʼajkʼal, pero ta slajibal semana te kʼalal ya jta jba sok te kamigotak, ya xjajch jtuuntes yan buelta. La jta ta ilel te maba xa juʼuk jeltayel te jkuxlejal teme maba ya kijkitay te kamigotak-abi, jaʼ yuʼun la jta ta nopel te maba ya jokinlanix sok boon ta nainel ta yan estado. Ay machʼatik la skʼan la sjokinonik bael, pero jajch sjapbonik marihuana. La kalbeyik te ya jkʼan ya kijkitayix ta jkʼaxele, jich te kʼalal kʼootik ta yan estado, maba la kilix jbatik-a. Ta patil la kaʼiy stojol te ochik ta yelkʼanel jun banco sok jun pistola.

¿BINTIK LEKILAL JTAOJ YUʼUN? Te kʼalal maba la jokinix te kamigotak-abi, maba wokolix la kaʼiy te ya jeltay te jtalele. La kichʼ jaʼ ta 1989. Ta patil, jaʼnix jich la yichʼik jaʼ te jwix sok te jmeʼ jtat.

Ayix 17 jaʼbil te nujpunemon sok ay oxtul jnichʼnab. Ta ora ini ma oraukix ya x-ilinon manchukme ay machʼa ya stijon ta kʼop. Jaʼnix jich kʼuxix ta koʼtan spisil te ants winiketik manchukme yanyantik stsʼumbalik o skʼopik (Apocalipsis 7:9). Maʼyuk bin-ora ya schʼay ta koʼtan te bin la yal te Jesús te jich kʼoem ta pasel ta jtojole: «Teme jun awoʼtanic ya xʼayinex ta stojol te jcʼope, mero jnopojelex cuʼun ya xcʼohex; soc ya me anaʼbeyic sba te smelelil cʼop, soc ha ya yaqʼuex ta libre te smelelil cʼope» (Juan 8:31, 32).

[Te bin ya yal]

Swenta la jeltay te jtalel, nail la kijkitay yaʼiyel kʼayojiletik ta swenta pʼajaw

[Te bin ya yal]

Te joʼon sok te kamigotak ya jmulantik sjachel majtamba. Chapalotik sok jnavajatik sok teʼetik, sok ya jtsak jbatik sok 20 ta tul ants winiketik o bayalxan