Jelbat-o xkuxlejalik yuʼun li vivliae

¿KʼUSI la spas jun kerem sventa stsal li xkuxlejal ta rastafarie xchiʼuk kʼusi la spas sventa muʼyuk xa chopol kʼusi tsnop ta stojolal li sakil krixchanoetike? ¿Kʼu yuʼun la sjel xkuxlejal jun kerem ti ch˗abtej toʼox ta sjelubtasel drogae? Akʼo yalbutik stukik.

«Muʼyuk xa chopol kʼusi la jnop ta stojolal li yantike» (HAFENI NGHAMA)

SJABILAL: 34

SLUMAL: ZAMBIA

KʼU TOʼOX YELAN XKUXLEJAL: RASTAFARI TOʼOX

LI JKUXLEJAL TOʼOXE: Ta skoj li paskʼope, li jmeʼe jatav lokʼel ta Namibia xchiʼuk la stsak sbi li ta Organización del Pueblo de África del Suroeste (SWAPO, ta skoj li sletrailtak ta inglese). Li organisasion taje skontrainoj li ajvalil ta Sudáfrica ti sventainoj Namibia li vaʼ orae. Li jmeʼe te kʼot nakluk ta Zambia yoʼ bu chkʼotik skotol li buchʼutik jatavemik lokʼele xchiʼuk jaʼ te livokʼ.

15 jabil te linakikutik ta yosilal SWAPO xchiʼuk la sjelilanbunkutik ti bu linakikutike. Li organisasion taje ti jaʼ mas ojtikinbil li ta Namibiae, ta stsobanan talel buchʼutik chexik sventa xchanubtasik ta politika xchiʼuk ti akʼo spʼajik li sakil krixchanoetike.

Kʼalal 11 xa ox jabilale, ta ox jkʼan ta jpas jkonfirmasion, jaʼ yuʼun bat jkʼel li pastor kuʼunkutik li te ta chʼulnae. Li tee chkʼotik jkatolikoetik, jluteranoetik, j˗anglicanoetik xchiʼuk yantik. Pe li pastore muʼyuk la yakʼ jpas li jkonfirmasione. Lichibaj tajek, jaʼ yuʼun lipas ta ateo. Akʼo mi jech, kʼalal 15 xa ox jabilale, li˗och li ta s-organisasion rastafarietike. Jtos ti kʼuchaʼal li˗oche jaʼ ti ta jkʼupin li musika reggae. Li yan srasonale jaʼ ti taʼlo xa xkaʼi ti chilbajinik li buchʼutik ikʼ skoloralik ta Áfricae. Lik jbal o la jpechʼ jol kʼuchaʼal li jrastafarietike. Jlik jtunes marihuana. Muʼyuk xa ta jtibe li sbekʼtal chonbolometike, puro itaj xa noʼox ta jloʼ xchiʼuk tsots lik jpakbe skʼoplal li buchʼutik ikʼ skoloralike. Manchuk mi jech, muʼyuk-o la jel li kuxlejale. Ta jpas ti kʼusi xal koʼontone xchiʼuk ta jkʼel pelikulaetik ti bu chakʼ ta ilel majbail xchiʼuk milbaile. Jech xtok, chopol-o li jkʼopojele.

TI KʼU YELAN LA SJEL JKUXLEJAL LI VIVLIAE: Ta 1995, kʼalal 20 xa ox jabilale, la jnop lek kʼusi ta jpas li ta kuxlejale. Oy xa kʼuk sjalil ta jchan skotol li svun jrastafarietik ta jtaane. Manchuk mi oy junantik ti chalbe skʼoplal Vivliae, muʼyuk chkʼot ta koʼonton li kʼusi chale. Jaʼ yuʼun, jlik jchan jtuk li Vivliae.

Oy jun kamigo rastafari jaʼ la yakʼbun jlik vun ti jaʼ spasoj li stestigotak Jeovae. Ta anil noʼox jlik jchan xchiʼuk Jvivlia li vun taje. Ta tsʼakale, la jsaʼ li stestigotak Jeovae. Jaʼ la skoltaikun sventa jchanbe batel skʼoplal li Vivliae. Pe sventa jchan Vivlia xchiʼuk li stestigotak Jeovae, baʼyel oy kʼusitik la jel ta jkuxlejal.

Vokol kaʼi yiktael li sikʼolajele xchiʼuk li yakubele (2 Korintios 7:1). Jech xtok, la jel ti kʼu yelan xvinaj jpat xokone, la jset o la jlokʼ li jole. Laj kikta skʼelel pelikulaetik ti chakʼ ta ilel majbail xchiʼuk milbaile. Laj kikta skʼelel pornografia xchiʼuk la jel li jkʼopojele (Efesios 5:3, 4). Ta tsʼakal xtoke, muʼyuk xa kʼusi chopol la jnop ta stojolal li sakil krixchanoetike (Echos 10:34, 35). Sventa la jel jtalelale, baʼyel laj kikta xchikintael musikaetik ti chopol kʼusi chakʼ jnoptik ta stojolal li sakil krixchanoetike xchiʼuk muʼyuk xa la jchiʼin li kamigotak ti tsokes jtalelale.

Kʼalal laj kikta spasel li kʼusi chopol ti nopem toʼox xkaʼi pasele, jlik jsaʼ li salon ti bu tstsob sbaik li stestigotak Jeovae, vaʼun laj kichʼ chanubtasel ta Vivlia xchiʼuk la jnop chkichʼ voʼ. Li kutsʼ kalale muʼyuk lek la yaʼi. Li jmeʼe laj yalbun ti jaʼ lek ti xibat ta yan relijione, ti mu xibat xchiʼuk li stestigotak Jeovae. Jun kutsʼ kalalkutik ti tsots yabtel ta ajvalile chchopol kʼoptaun ta skoj li kʼusi kʼot ta nopel kuʼune.

Manchuk mi la skontrainikun xchiʼuk la slabanikun li kutsʼ kalale, kuch kuʼun, yuʼun la jchanbe stalelal li Jesuse xchiʼuk laj kakʼ ta jkuxlejal li kʼusitik laj yakʼ ta chanele. Lek jchʼunoj ti jaʼ melel relijion li stestigotak Jeovae. Yuʼun laj kakʼ venta ti te lokʼem ta Vivlia li kʼusi chakʼik ta chanele. Li stukike chchʼunbeik smantal li Diose, yuʼun ta xcholik mantal (Mateo 28:19, 20; Echos 15:14). Xchiʼuk muʼyuk tstikʼ sbaik ta politika (Salmo 146:3, 4; Juan 15:17, 18).

KʼUSITIK SBALIL JTAOJAN: Ep sbalil jtaojan ti ta xkakʼ ta jkuxlejal li mantaletik ta Vivliae. Laj xa kikta li marihuana ti meʼinem toʼox ta koʼonton xchiʼuk ti ep tajek chlaj jtakʼin yuʼun jujun ue. Muʼyuk xa chkil jvokol yuʼun li drogae. Lekubem xa li jkuxlejale xchiʼuk mas xa lek li jnopbene.

Ta jbikʼtal onoʼox ta jkʼan ti oyuk sbalil li jkuxlejale. Laj onoʼox jta un. Pe li kʼusi mas tsots skʼoplale, jaʼ ti mas xa nopol chkaʼi jba ta stojolal li Diose (Santiago 4:8).

«Komem xa kuʼun ti xkapet jole» (MARTINO PEDRETTI)

JABILAL: 43

SLUMAL: AUSTRALIA

KʼU TOʼOX YELAN XKUXLEJAL: JMILVANEJ XCHIʼUK JCHON DROGA TOʼOX

LI JKUXLEJAL TOʼOXE: Kʼalal kʼoxun toʼoxe, lajelilan tajek jnailkutik. Linakikutik kʼu sjalil ta bikʼit jteklum xchiʼuk ta mukʼta jteklum. Te van kʼu sjalile, te linakikutik ta jun paraje ti nom to bu chʼikil batele. Oy kʼusitik lek xvul ta jol ti la jpaskutik xchiʼuk li jprimotak xchiʼuk li juntotake. Chbat jtsakutik choy, chibatkutik ta nutsol xchiʼuk ta jpaskutik kabtejebkutik sventa nutsolajel xchiʼuk yan kʼusitik.

Toj lek jsaʼkʼop, yuʼun ta jbikʼtal onoʼox la xchanubtasun ta majvanej li jtot ti jaʼ toʼox bokseadore. Kʼalal la jta jvaʼleje, jaʼ jnainoj li nail uchʼ poxetike. Li voʼon xchiʼuk li kamigotake lek xkaʼikutik saʼel kʼop. Xchʼiket noʼox jnavajakutik xchiʼuk x˗ichʼet noʼox kuʼunkutik steʼel beisbol (bates de béisbol). Ta jsaʼkutik ta kʼop 20 krixchanoetik o mas.

Sventa jsaʼ jtakʼine, ta jchon droga xchiʼuk ta jchon li kʼusitik yelkʼanojik li j˗abteletik ta kotleb varkoetike. Jech xtok, ta jchiʼinik ta abtel li buchʼutik ta sjelubtasik drogae. Voʼon chbat jkʼanbe tal li buchʼutik kechajtik yilik ta drogae xchiʼuk ta jsibtasik ta pistola sventa xakʼbeikune. Nopem xkaʼi xi chkale: «Chimilvan o mi chkichʼ milel». Li kʼusi oy ta koʼontone jaʼ ti xikʼot ta jmilvaneje.

TI KʼU YELAN LA SJEL JKUXLEJAL LI VIVLIAE: Xvul ta jol ti kaʼiojbe xa onoʼox skʼoplal stestigotak Jeova kʼalal kʼoxun toʼoxe. Akʼo mi jech, jaʼ to la jakʼbe skʼoplalik kʼalal mas xa ox ta 20 jabilale. Jaʼ la jakʼbe li jmeʼe. Ta xchaʼejale, kʼot jun stestigo Jeova ta jna ti Dikson sbie. Lek jlikel li loʼilajkutik xchiʼuk la yalbun ti xibat li ta stsobajelike. Jaʼo te lik batkun li ta tsobajeletike. Oy xa 20 jabil ti chikʼotilane. Li kʼusi lek chkile jaʼ ti ta Vivlia tstakʼbeikun skotol li kʼusi ta jakʼbeike

Te laj kaʼi ti oyutik ta yoʼonton li Diose xchiʼuk oy ta yoʼonton xtok li chopol krixchanoetike (2 Pedro 3:9). Te la jchan xtok ti chchabiun kʼuchaʼal jun jkʼanvanej Totil akʼo mi muʼyuk jech chchabiikun li yantike. La spatbun koʼonton kʼalal laj kaʼi ti chchʼaybun jmul mi la jel jtalelale. Oy jun teksto ti la skoltaun tajeke, jaʼ li Efesios 4:22 kʼalal 24. Te chal ti skʼan jiptik lokʼel li jmol talelaltik xchiʼuk ti skʼan jlaptik li achʼ talelal ti jech la yichʼ pasel jech kʼuchaʼal la skʼan yoʼonton li Diose.

Jamal xkaltike, vokol tajek laj kaʼi ti jel jkuxlejale. Xkuch kuʼun ti muʼyuk ta jlajes droga jayibuk kʼakʼale. Pe kʼalal ta jtsob jba xchiʼuk li kamigotak ta savado xchiʼuk ta domingoe, ta jlajes yan velta li drogae. Laj kakʼ venta ti mu xjel kuʼun jkuxlejal mi te jchiʼukik˗oe. Jaʼ yuʼun, kʼot ta nopel kuʼun ti muʼyuk xa ta jchiʼinanike xchiʼuk ti chibat ta naklej ta yan lume. Laj kakʼ ti xchiʼinikun batel jayvoʼuke, pe lik yakʼbeikun marihuana. Laj kalbeik ti kʼotem xa ta nopel kuʼun ti chkiktae, vaʼun kʼalal likʼotkutik ta stsʼakil li lume, te la jchʼak jbakutik. Ta tsʼakale, laj kaʼi ti stsakoj ochel stukʼik ta jun vanko sventa x˗elkʼajike.

KʼUSITIK SBALIL JTAOJAN: Ta skoj ti muʼyuk xa ta jchiʼinan li kamigotak toʼoxe, muʼyuk xa mas vokol laj kaʼi ti jel li jkuxlejale. Laj kichʼ voʼ ta 1989. Ta tsʼakale, la yichʼ voʼ ek li kixlele xchiʼuk li jtot jmeʼe.

Ximuyubaj tajek ti lokʼ xa 17 jabil jnupunele xchiʼuk oy oxvoʼ jnichʼnab. Avie xuʼ xkal ti komem xa kuʼun ti xkapet jole akʼo mi yolbaj tsaʼikun ta kʼop. Jchanoj xtok ti akʼo jkʼan skotol krixchanoetike mu ventauk bu likemik o ti kʼusi skʼopike (Apokalipsis 7:9). Mu xchʼay ta jol li kʼusi laj yal Jesus ti jech kʼotem ta jtojolal eke: «Voʼoxuk me kajchankʼopoxuk ta melel mi te oyoxuk ta stojolal li jkʼope, vaʼun chavojtikinik li kʼusi melele xchiʼuk jaʼ chakʼ akolebalik li kʼusi melele» (Juan 8:31, 32).

 [Tsʼib ti mukʼtik sletraile ta pajina 19]

Sventa la jel jtalelale, baʼyel laj kikta xchikintael musikaetik ti chopol kʼusi chakʼ jnoptik ta stojolal li sakil krixchanoetike

 [Tsʼib ti mukʼtik sletraile ta pajina 20]

Li voʼon xchiʼuk kamigotake lek xkaʼikutik saʼel kʼop. Xchʼiket noʼox jnavajakutik xchiʼuk x˗ichʼet noʼox kuʼunkutik steʼel beisbol. Ta jsaʼkutik ta kʼop 20 krixchanoetik o mas