Baibol Na Wene Ohwo

DIESORỌ ohwo ọvo ro kpo ẹga ri Rastafarian vwo bru ẹto ogrongron rọyen, je dobọ rẹ utuoma ro vwo kpahen iyibo ji? Die yen vwẹ ukẹcha kẹ eghene ọshare ọvo ro gbozighi mamọ, ro phi osa kẹ ihwo re she ihuvwun egangan vwo wene akpeyeren rọyen? Ja mrẹ oborẹ eshare ivẹ nana tare.

“Mi Tobọ Phi Uruemu rẹ Omaẹfẹnẹ Kparobọ.”​—HAFENI NGHAMA

UKPE RỌ HEPHA: 34

ẸKUOTỌ RO NURHE: ZAMBIA

AKPỌ RO YERIN JOVWO: RASTAFARIAN

AKPỌ MI YERIN JOVWO: Ọko rẹ oja ọvo vwẹ Zambia yen e de vwiẹ vwẹ. Oni mẹ djẹ nẹ Namibia vwẹ ọke rẹ ofovwin, ọ da vwomaba South West Africa People’s Organization (SWAPO). Ukoko nana họnra vwọsua usuon rẹ ihwo ri South Africa ro suẹn Namibia vwẹ ọke yena.

Me ghwọrọ ikpe 15 rẹ akpeyeren mẹ vwẹ ọko rẹ oja sansan. E yono ighene rehẹ evun rẹ ọko rẹ oja ri SWAPO na oborẹ ayen sa vwọ dia ihwo re ka obaro vwẹ ukoko rọ cha kẹ ayen ugbomọphẹn na. E ji yono avwanre nẹ avwanre vwo utuoma kpahen iyibo.

Mi vwo te ẹgbukpe 11, me da guọnọ dia Onenikristi, ọtiọyena, ishọshi ọvo rọhẹ ọko rẹ oja na kọyen me ra. Ipastọ ọvo re me ta ota kẹ da nẹrhẹ me dobọ rẹ owọẹjẹ yena ji. Vwo nẹ ọke yena yanran, mi rhe se Ọghẹnẹ gbuyota-a. Me vwọ hẹ ẹgbukpe 15, mi vwo ẹguọnọ ine ri rhege mamọ, me je guọnọ dobọ rẹ oshenyẹ rẹ ihwo ibiebi vwẹ Africa rioja rọyen ji, ọtiọyena, me da vwomaba ẹga ri Rastafarian. Ki mi mu ẹto grongron re chahenku, phopho isigati, dobọ rẹ eranvwe ẹriọ ji, je vuẹ ihwo efa kpahen oborẹ ihwo ibiebi se vwo vwo ugbomọphẹn. Ẹkẹvuọvo, mi wene akpọ rẹ ọfanrhiẹn ri mi yerẹn na-a, me je dobọ rẹ ughe ozighi eno vẹ erharhe eta ji-i.

OBORẸ BAIBOL NA WENE UVWE WAN: Vwẹ 1995, me vwọ hẹ omarẹ ẹgbukpe 20, ki mi roro kpahen obo re me guọnọ vwẹ akpeyeren mẹ vwo ru. Kẹbe kẹbe ri Rastafarian re me mrẹre kọyen mi se. Buebun rẹ ẹbe na riobọ kpo Biabol na, ẹkẹvuọvo, mi vwo ẹruọ obo ri mi se na-a. Ọtiọyena, mi de brorhiẹn ri mi vwo se Biabol na komobọ.

Ọke vwọ yanran na, ugbeyan mẹ ọvo ro ji kpo ẹga ri Rastafarian da kẹ vwẹ ọbe rọ ta ota kpahen Baibol na rẹ Iseri ri Jihova teyenre. Mi de yono ọbe nana vẹ Baibol na komobọ. Ọke evo vwọ wan nu, me da mrẹ Iseri ri Jihova, mẹ vẹ ayen de yono Baibol na kpobarophiyọ.

Me da davwẹngba mamọ vwọ dobọ rẹ isigati ephopho vẹ udi ẹda vroma ji. (2 Kọrẹnt 7:1) Mi ruẹ oma mẹ fon, bru ẹton igrongron mẹ na, dobọ rẹ ughe rẹ ozighi vẹ ihwo re banphiyọ ji, je kẹnoma kẹ ogbegbeta. (Ẹfesọs 5:​3, 4) Ọke vwọ yanran na, mi rhe vwo utuoma kpahen iyibo-o. (Iruo rẹ Iyinkọn Na 10:​34, 35) Mi se ru ewene nana kidie me dobọ rẹ uhworo ri titi uruemu rẹ omaẹfẹnẹ ji, je kẹnoma kẹ igbeyan mẹ ri jovwo, re cha riẹriẹ ovwẹ vwo rhivwin kpo oka rẹ akpọ mi yerẹn jovwo.

Mi vwo ru ewene nana ejobi nu, me da guọnọ Ọguan Ruvie rẹ Iseri ri Jihova je vuẹ ayen nẹ me guọnọ vwomaba ẹga rayen. Mi de rhi brorhiẹn ri mi vwo bromaphiyame kerẹ ọvo usun rẹ Iseri ri Jihova, ẹkẹvuọvo oma vwerhen orua mẹ-ẹ. Oni mẹ vuẹ vwẹ nẹ me sane ẹga rẹ “Inenikristi” ọfa ukperẹ me vwọ dia Oseri ri Jihova. Ọkieje yen ọshare ọvo vwẹ orua rẹ oni mẹ, rọ dia ohwo rẹ igọmẹti ra nabọ vughe vwo kpokpo uvwe fikirẹ orhiẹn ri mi bruru me vwọ dia ọvo usun rẹ Iseri ri Jihova.

Ẹkẹvuọvo, obo ri Jesu nene ihwo yerin wan re me vwẹrokere chọn vwẹ uko vwo chirakon rẹ ẹvwọsuọ vẹ ehwẹjẹ. Me vwọ reyọ oborẹ Iseri na yonori vwọ vwanvwan obo ri Baibol na tare, o de muvwẹro nẹ me mrẹ ẹga rẹ uyota na re. Kerẹ udje, ayen nene iji ri Baibol na rọ tare nẹ e re ghwoghwo kẹ ihwo efa. (Matiu 28:​19, 20; Iruo rẹ Iyinkọn Na 15:14) Ayen vwobọ vwẹ oseghe rẹ usuo-on.​—Une rẹ Ejiro 146:​3, 4; Jọn 15:​17, 18.

ERERE RE ME MRẸRE: Kidie nẹ mi yeren akpọ nene iwan ri Baibol na, ọ da chọn vwẹ uko vwẹ idjerhe sansan. Kerẹ udje, isigati ephopho re me dobọ rọyen ji nẹrhẹ me sẹro igho buebun kemeranvwe kemeranvwe. Mi rha rioja rẹ imuoshọ ro nẹ ihuvwun egangan ẹreyọ cha-a, obo ri mi roro vẹ ẹdia rẹ omakpokpọ mẹ rhi yovwin vrẹ obo ri jovwo.

Mi yeren uvi rẹ akpọ rọ vọnre vẹ omavwerhovwẹn enẹna, ọna yen obo re me guọnọ rhanvwe ọke me vwọ hẹ emeghene. Ma rho kparobọ, mi rhi sikẹrẹ Ọghẹnẹ.​—Jems 4:8.

“Mi Yono Kpahen Obo ri Mi se Vwo Sun Ophu Mẹ.”​—MARTINO PEDRETTI

UKPE RỌ HEPHA: 43

ẸKUOTỌ RO NURHE: AUSTRALIA

AKPỌ RO YERIN JOVWO: OHWO RỌ SHẸ IHUVWUN EGANGAN

AKPỌ MI YERIN JOVWO: Orua mẹ kua nasan kpo asan vwẹ ọke me vwọ ghwanra cha. Me dia irere itete vẹ otorere rode, me je dia asan ro ji ghwe rhie-e vwẹ Australia ọmọke. Me riavwerhen ọke me vẹ emọ rẹ iniọvo oni mẹ, vẹ iniọvo oni mẹ eshare ghwọrọ kuẹgbe​—avwanre kpo iyerin ehwe, bẹrẹ ibefi, ji ruẹ erọnvwọn efa.

Ọsẹ mẹ ọyen odjubi, o de yono uvwe obo ra họnra ọke me vwọ hẹ omotete. Ozighe egbe da rhe dia ẹbẹre ọvo rẹ akpeyeren mẹ. Me vwọ hẹ emeghene, me ghwọrọ ọke buebun vwọ da idi vwẹ asan ra da shẹ idi. Ohọnre ọvo yen mẹvwẹ vẹ igbeyan mẹ guọnọ. Avwanre reyọ ephia vẹ irhe ri baseball vwọ họnra ihwo ri te 20 yẹrẹ vrẹ ọtiọyen.

Me womarẹ ihuvwun egangan vẹ erọnvwọn re cho bru vwe cha re me shẹ vwọ mrẹ igho. Mi phi osa kẹ ihwo re she ihuvwun egangan, je reyọ ihwunu itete vwọ djuguegue muẹ ihwo re riosa. Me guọnọ dia igbunegbu ra djoshọ rọyen. Ọkieje yen me vwọ vuẹ oma mẹ: “Hwe ihwo tavwen ayen ki hwe we.”

OBORẸ BAIBOL NA WENE UVWE WAN: Mi nyo kpahen Iseri ri Jihova jovwore ọke me vwọ ghwanra cha. Me vwọ hẹ omarẹ ẹgbukpe 20, me karophiyọ ọke me vwọ nọ oni mẹ sẹ ọ riẹn asan ra da sa mrẹ ayen. Ẹdẹ ivẹ vwọ wan nu, Oseri ri Jihova ọvo re se Dixon de hworo ẹchẹ mẹ. Avwanre vwọ ta ota nu, o de durhie uvwe kpo omẹvwa rẹ Iseri ri Jihova. Me de kpo omẹvwa na, ọ vrẹ ẹgbukpe 20 re me vwọ vwomaba Iseri na vwẹ emẹvwa rayen. Ayen vwẹ Biabol na vwọ kpahenphiyọ konọ konọ re me nọre.

Oma vwerhen ovwẹ me vwọ riẹn nẹ Jihova davwerhọn rẹ ihwoeje, tobọ tẹ irumwemwu. (2 Pita 3:9) Me da rhe mrẹvughe nẹ ọyen Ọsẹ ro vwo ẹguọnọ rọ cha vwẹrote vwe, tobọ vwẹ ọke rẹ ihwoeje de chukoku uvwe. Ẹwẹn mẹ ji te otọ me vwọ mrẹvughe nẹ o che vwo ghovwo uvwe siẹrẹ mi de wene idjerhe mẹ. Ẹkpo ri Baibol rọhẹ Ẹfesọs 4:​22-​24 te vwe ẹwẹn mamọ. Ọ tare nẹ mi “ku . . . uruemu rẹ . . . awanre na . . . kufia,” rere mi “ku ohwo ọkpokpọ na phihọ oma, ra mare vwẹ uhoho rẹ Ọghẹnẹ.”

Ọ reyọ ovwẹ ọke mi ki se wene oka rẹ akpọ mi yerẹn. Me reyọ ihuvwun egangan vwẹ uvwre rẹ udughwrẹn na-a, ẹkẹvuọvo, vwẹ oba rẹ udughwrẹn na mẹ vẹ igbeyan mẹ da hero, ke me reyọ ihuvwun egangan. Me da rhe mrẹvughe nẹ ofori me vwọ yanjẹ igbeyan mẹ na vwo me da guọnọ ru akpọ mẹ fọn, ọtiọyena, mi de kpo ẹbẹre ọfa vwẹ Australia. Evo usun rẹ igbeyan mẹ na de sun vwe kpo oyan na. Avwanre vwọ hẹ idjerhe, ayen da ton isigati ephopho phiyọ, je kẹ vwẹ evo. Me da vuẹ ayen nẹ mi brorhiẹn me vwọ dobọ rẹ uruemu nana ji re, avwanre da hẹriẹ oma vwẹ ibọda. O kriri-i, mi de rhi nyo nẹ igbeyan mẹ yena kpo uji vwẹ ibanki ọvo vẹ ihwunu rẹ ayen muru.

ERERE RE ME MRẸRE: Me vwọ kẹnoma kẹ igbeyan mẹ yena eje nu, ọ da rhe dia lọlọhọ kẹ vwẹ mi vwo ru ewene ri fori vwẹ akpeyeren mẹ. Mi de rhi bromaphiyame kerẹ Oseri ri Jihova vwẹ ukpe ri 1989. Ọyena vwọ wan nu, oniọvo mẹ ọmọtẹ, oni mẹ, kugbe ọsẹ mẹ da vwomaba vwẹ vwọ ga Jihova.

Ẹgbukpe 17 yen me rọvwọn re, mi ji vwo emọ iyoyovwin erha. Mi rhi yono oborẹ mi se vwo sun ophu mẹ re, tobọ vwẹ ọke re de ru obo re nẹrhẹ ivun miovwo uvwe. Mi rhi yono obo re vwo ẹguọnọ rẹ ihwo ri nẹ ‘korua korua, ihwo kugbe ephẹrẹ rhe.’ (Ẹvwọphia 7:9) Me mrẹvughe nẹ eta ri Jesu tare na ghene uyota. Ọ tare nẹ ovwan “de phi obọ phihọ ota mẹ vwẹ ọ rẹ uyota ovwan ke dia idibo mẹ, ovwan ke riẹn uyota na, uyota na ko ru ovwan phihọ ọmuvwiẹ.”​—Jọn 8:​31, 32.

[Ẹkpo rọ teyenphia]

Mi se ru ewene nana kidie me dobọ rẹ uhworo ri titi uruemu rẹ omaẹfẹnẹ ji

[Ẹkpo rọ teyenphia]

Ohọnre ọvo yen mẹvwẹ vẹ igbeyan mẹ guọnọ. Avwanre reyọ ephia vẹ irhe ri baseball vwọ họnra ihwo ri te 20 yẹrẹ vrẹ ọtiọyen