Kʼeʼex u kuxtaloʼob tumen le Bibliaoʼ

¿BAʼAX áant juntúul rastafari u kʼex u kuxtal yéetel u xuʼulul u pʼektik le máakoʼob saktakoʼoboʼ? ¿Baʼaxten tu kʼexaj u kuxtal juntúul xiʼipal ku meyaj kaʼach yéetel le máakoʼob ku konkoʼob drogaoʼ? Koʼox ilik baʼax ku yaʼalikoʼob.

«Xuʼul in pʼektik le máakoʼob saktakoʼoboʼ» HAFENI NGHAMA

U EDAD: 34

TUʼUX SÍIJI: ZAMBIA

KAʼACHEʼ: RASTAFARI

BIX KUXLIKEN KAʼACHI: Yoʼolal le guerra anchaj tu luʼumil Namibiaoʼ in maamaeʼ ook tiʼ junpʼéel organización (Organización del Pueblo de África del Suroeste). Le organizaciónaʼ táan kaʼach u baʼateʼel tu contra le máaxoʼob gobernartik u luʼumil Namibiaoʼ. In maamaeʼ bin tiʼ junpʼéel campo de refugiados yaan Zambia, tiʼ síijeniʼ.

Tin máansaj 15 años ichil le organización tuʼux ook in maamaoʼ. Le organizaciónaʼ letiʼ péeksik kaʼach le máakoʼob utiaʼal ka u tsʼáaubaʼob tu contra u gobiernoil Namibiaoʼ. Tsʼoʼoleʼ ku kaʼanskoʼob tiʼ le táankelmoʼob baʼaloʼob yaan yil yéetel política yéetel ka u pʼektoʼob le máaxoʼob sak u wíinkliloʼoboʼ.

Le yaanten 11 añosoʼ taakchaj in beetik in confirmación teʼ iglesiaoʼ, le oʼolal binen in wil u pastoril le iglesia teʼ tuʼux ku bin máakoʼob jejeláas u religiónoʼoboʼ. Teʼeloʼ ku bin kaʼach católicoʼob, luteranoʼob, anglicanoʼob yéetel uláakʼ máakoʼob jejeláas u religiónoʼob. Chéen baʼaleʼ le pastoroʼ tu yaʼalajten maʼ in beetik in confirmacióno’, jach tu desanimarten le baʼax tu yaʼaloʼ, le oʼolal tin beetinba ateo. Le yaanten 15 añosoʼ ooken teʼ religión rastafarioʼ, le religiónaʼ jach ku yoksikuba tiʼ política. Ooken ichiloʼob tumen jach uts tin wich kaʼach le paax reggaeoʼ yéetel tumen ku baʼateltikoʼob le derecho yaan tiʼ le máaxoʼob booxtakoʼob yaan Áfricaoʼ. Káaj in pʼatik u tsoʼotsel in pool jeʼex le rastafarioʼoboʼ (rastas), káaj in tsʼuʼutsʼik marihuana, xuʼul in jaantik bakʼ yéetel tin sen baʼateltaj u derecho le máaxoʼob booxtakoʼoboʼ. Kex tiaʼanen teʼ religión rastafarioʼ maʼ xuʼul in beetik baʼaloʼob kʼaastakiʼ, maʼ xuʼul in chaʼantik películaʼob tuʼux ku kíimskuba le máakoʼoboʼ yéetel maʼ xuʼul in poochʼiliʼ.

BIX TU KʼEXIL IN KUXTAL LE BIBLIAOʼ: Tu añoil 1995, le yaanten 20 añosoʼ, tin jach tuklaj baʼax ken in beet yéetel in kuxtal. Tsʼokaʼaniliʼ u máan kʼiin joʼopʼok in xokik le publicaciónoʼob ku jóoʼsik le rastafarioʼoboʼ. Kex teʼ publicaciónoʼoboʼ ku chʼaʼchiʼitkoʼob baʼax ku yaʼalik le Bibliaoʼ maʼ tu convencerken kaʼach baʼax ku yaʼalikoʼobi’. Le oʼolal tin chʼaʼtuklaj in xokik le Biblia chéen tin juunaloʼ.

Juntúul tiʼ in amigoʼob rastafarieʼ tu tsʼáajten junpʼéel publicación jóoʼsaʼan tumen u testigoʼob Jéeoba. Le kaʼa joʼopʼ in xokikeʼ tin kaxtaj tin Biblia le tekstoʼob ku yaʼalikoʼ. Ka máan kʼiineʼ tsikbalnajen yéetel le Testigoʼoboʼ, letiʼobeʼ tu yáantenoʼob in maas naʼat le Bibliaoʼ. Chéen baʼaleʼ antes tiʼ u káajal in xook tu yéeteloʼobeʼ tin beetaj yaʼab kʼeexoʼob ichil in kuxtal.

Jach istikyaj úuchik in pʼatik in tsʼuʼutsʼik chamal yéetel in káaltal (2 Corintios 7:1). Tsʼoʼoleʼ tin kʼosaj u tsoʼotsel in pool, xuʼul in chaʼantik películaʼob jach kʼaastak yéetel xuʼul xan in poochʼil (Efesios 5:​3, 4). Ka máan kʼiineʼ xuʼul in pʼektik le máaxoʼob sak u wíinkliloʼoboʼ (Hechos 10:34, 35). Utiaʼal leloʼ xuʼul in wuʼuyik le paax ku tʼaan yoʼolal racismooʼ yéetel in biskinba yéetel le amigoʼob ku yaʼalikoʼobten ka in beet baʼax kʼaasoʼ.

Ka tsʼoʼok in kʼexik bix in kuxtaleʼ, binen tiʼ junpʼéel reunión teʼ tuʼux ku muchʼkuba u testigoʼob Jéeobaoʼ. Ka tsʼoʼokeʼ tsʼaʼabten xook yéetel le Bibliaoʼ yéetel okjaʼanajen. Pero in láakʼtsiloʼobeʼ maʼ utschaj tu tʼaanoʼob le baʼax kin beetkoʼ, maases in maama. Hasta tu yaʼalajten ka xiʼiken tiʼ jeʼel baʼalak religióneʼ, pero menos yéetel u testigoʼob Jéeoba. Tsʼoʼoleʼ juntúul tiʼ in láakʼtsiloʼob ku meyaj kaʼach tiʼ le gobiernooʼ ku sen aʼalikten baʼal yoʼolal le baʼax tsʼoʼok in chʼaʼtuklikoʼ.

Kex beyoʼ maʼ lúub in wóoliʼ tumen tin wilaj in tsʼáaik ichil in kuxtal le baʼaxoʼob tu kaʼansaj Jesucristooʼ. Teneʼ in wojel u testigoʼob Jéeobaeʼ letiʼe religión kaʼansik u jaajiloʼ tumen tuláakal le baʼax ku kaʼanskoʼoboʼ tiaʼan teʼ Bibliaoʼ. Letiʼobeʼ mantatsʼ ku yuʼubikoʼob u tʼaan Dios, le oʼolal ku kaʼanskoʼob le baʼax ku yaʼalik le Biblia tiʼ u maasil máakoʼoboʼ (Mateo 28:19, 20; Hechos 15:14). Tsʼoʼoleʼ maʼatech u yoksikubaʼob tiʼ política (Salmo 146:​3, 4; Juan 15:17, 18).

UTSILOʼOB TSʼOʼOK U TAASIKTEN: Jach maʼalob u binten ikil in beetik baʼax ku yaʼalik le Bibliaoʼ. Por ejemploeʼ bejlaʼeʼ maʼ tin jach xupik taakʼin tumen maʼ tin tsʼuʼutsʼik marihuana. Maʼ tu saʼatal in wóol, maas toj in wóol yéetel yaanten jeetsʼelil.

Bejlaʼeʼ jach kiʼimak in wóol tumen yaan u biilal in kuxtal, lelaʼ desde tin paalil kin tsʼíiboltik kaʼachi. Pero le baʼax maas beetik u kiʼimaktal in wóoloʼ letiʼe in wuʼuyik naatsʼ yanilen tiʼ Diosoʼ (Santiago 4:8).

«Jach kʼaas bix in modos kaʼachi» (MARTINO PEDRETTI)

U EDAD: 43

TUʼUX SÍIJI: AUSTRALIA

KAʼACHEʼ: KU KONIK DROGAS YÉETEL KU KÍIMSIK MÁAK

BIX KUXLIKEN KAʼACHI: Tin chichnileʼ in familiaeʼ kajlaj tiʼ mejen kaajoʼob, tiʼ nukuch kaajoʼob yéetel junpʼéel tiempoeʼ áantaʼaboʼon tumen junpʼéel religión protestante. Kʼajaʼanten kin bin tsʼoon yéetel chuk kay yéetel in tíoʼob bey xan yéetel in primoʼob, tsʼoʼoleʼ k-póolik nuʼukuloʼob de cheʼ (bumeranes) bey xan uláakʼ nuʼukuloʼob.

Desde tin paalil jach kʼaas in modos tumen in papáeʼ boxeador kaʼachi, le oʼolal desde tin chichnil tu kaʼansajten loox. Ka maas nojochchajeneʼ káaj in sen káaltal. Teen yéetel in amigoʼobeʼ jach uts t-tʼaan k-kaxtik baʼateʼel, ku meyajtoʼon navaja wa u bateil béisbol utiaʼal k-bin baʼateʼel kex yéetel 20 máakoʼob.

Utiaʼal u yantalten taakʼineʼ kin konik drogas kaʼachi yéetel le baʼaxoʼob ku yoklaʼal tumen le máaxoʼob ku meyajoʼob teʼ tuʼux ku jeʼelel le barcoʼoboʼ. Le máaxoʼob ku konkoʼob drogaoʼ ku contratarkenoʼob xan utiaʼal in bin in cobrart le máaxoʼob pʼaxmiloʼoboʼ. Utiaʼal ka boʼolnakoʼobeʼ kin amenazarkoʼob yéetel in tsʼoon. Teneʼ suuk in waʼalik kaʼachi: «Wa maʼ tin kíimskoʼobeʼ yaan u kíimskenoʼob». Teneʼ bey in tuukul kaʼachoʼ tumen letiʼe baʼax taak in beetkoʼ, in kíimsik u maasil.

BIX TU KʼEXIL IN KUXTAL LE BIBLIAOʼ: Tin chichnileʼ kʼajaʼanten u yúuchul tʼaan yoʼolal u testigoʼob Jéeoba. Chéen baʼaleʼ hasta le yaanten maas tiʼ 20 años ka tin kʼáataj tiʼ in maama tu yoʼolaloʼoboʼ. Ka máan dos díaseʼ taal Dixon tin wotoch, letiʼeʼ u testigo Jéeoba. Xáanchaj táan k-tsikbal, ka tsʼoʼokeʼ tu invitarten reunión. Desde le jeʼeloʼ maʼ xuʼuluk in biniʼ. Uts tin tʼaan in beetiktiʼob preguntaʼob tumen ku núukikoʼob yéetel le Bibliaoʼ.

Tin kaneʼ Jéeoba Dioseʼ u yaabiltmaj tuláakal máak, tak le máaxoʼob kʼaas u modosoʼoboʼ (2 Pedro 3:9). Tin kanaj xaneʼ kex maʼ in wáantaʼal tumen u maasileʼ Jéeobaeʼ bey juntúul Taatatsil mantatsʼ ken u kanáanteneʼ. Jach tu líiʼsaj in wóol in kanikeʼ wa kin kʼexik in kuxtaleʼ Jéeobaeʼ jeʼel u perdonartik tuláakal le baʼaxoʼob kʼaastak in beetmoʼ. Efesios 4:​22-​24, jach tu beetaj in tuukul. Teʼeloʼ ku yaʼalik: «Unaj a pitkeʼex le úuchben modos yanchajteʼex[o’] [...] yéetel unaj a búukintikeʼex le túumben modos beetaʼan jeʼex uts tu tʼaan Dios[o’]».

Maʼ chéen chʼaʼabil úuchik in pʼatik le kuxtal yaanten kaʼachoʼ. Kaʼacheʼ jeʼel u máan yaʼab kʼiinoʼob sin ke in drogarkinbaeʼ, pero kéen kʼuchuk sábado yéetel domingoeʼ kin muchʼkinba yéetel in amigoʼobeʼ yéetel kin kaʼa drogarkinba. Tin tsʼáaj cuentaeʼ wa maʼ tu xuʼulul in biskinba tu yéeteloʼobeʼ maʼ ten in wutskíint in kuxtal. Le oʼolaleʼ xuʼul in biskinba tu yéeteloʼobeʼ ka binen kajtal yaanal tuʼux. Jujuntúuloʼobeʼ tu láakʼintenoʼob teʼ viajeoʼ, chéen baʼaleʼ tu yaʼaloʼobten ka in tsʼuʼutsʼ marihuana. Pero teneʼ tin waʼalajtiʼobeʼ yaan in pʼatik le vicio jeʼeloʼ. Le oʼolal le ka kʼuchoʼon tuʼux unaj k-binoʼ cada juntúuleʼ bin yaanal tuʼux. Maʼ sen úucheʼ tin wojéelteʼ u machmaj u tsʼoonoʼob ka ookolnajoʼob tiʼ junpʼéel banco.

UTSILOʼOB TSʼOʼOK U TAASIKTEN: Le ka xuʼul in biskinba yéetel in amigoʼoboʼ maas chéen chʼaʼabil úuchik in kʼexik in kuxtal. Le oʼolal tu añoil 1989, okjaʼanajen bey u testigo Jéeobaeʼ. Ka máan kʼiineʼ okjaʼanaj xan in wíitsʼin bey xan in papáʼob.

Tsʼoʼok u máan 17 años tsʼoʼokok in beel yéetel yaan óoxtúul in paalal. Bejlaʼeʼ jeʼel u páajtal in waʼalikeʼ tsʼoʼok in wutskíintik bix in modos. Kex ka aʼalaʼakten baʼaleʼ maʼ tin jáan kʼuuxil. Tsʼoʼoleʼ in yaabiltmaj tuláakal máak kex jeʼel baʼalak u razail wa idioma ka u tʼaneʼ (Apocalipsis 7:9). Maʼ tu tuʼubulten le baʼax tu yaʼalaj Jesúsaʼ: «Wa ku pʼáatal ta puksiʼikʼaleʼex baʼax kin waʼalikeʼ jach tu jaajil in discípuloʼex. Teʼexeʼ yaan a kʼaj óoltikeʼex le jaajoʼ, le jaaj túunoʼ yaan u jáalkʼabtikeʼex» (Juan 8:​31, 32).

[Uláakʼ baʼax ku tsoʼolol]

Xuʼul in wuʼuyik le paax ku tʼaan yoʼolal racismooʼ

[Uláakʼ baʼax ku tsoʼolol]

Teen yéetel in amigoʼobeʼ jach uts t-tʼaan k-kaxtik baʼateʼel, ku meyajtoʼon navaja wa u bateil béisbol utiaʼal k-bin baʼateʼel kex yéetel 20 máakoʼob