Druaklok ñõn Anij

Anij Emaroñ Ke Ukwelok Iben kin Men ko Rej Walok?

DRI EKAJET RO 2:​11-​18

EINWÕT armij ro rejjab wãppen, eor jet ien kij aolep jej ukwelok iber mõke kin men ko jej kõmõni. Ñõn wanjoñok, jemaroñ buromõj elikin ar kile bwe jar kõmõne juõn bwir. Ekaitoktoklimo bwe Baibel eo ej ba Jeova emaroñ ukwelok iben kin men ko rej walok. Bõtab, kwomaroñ ba: ‘Ak Anij ewãppen. Ejjab kõmõn bwir!’ Inem ilo wãwen it Anij ej ukwelok? Uak eo ñõn kajitõk in emaroñ jibõñ kij ñõn melele kin men in bwe Jeova eor an iñjake, im kõmõn ko ar rej jelet iñjake ko an. Jen etale nan ko kar jei ilo Dri Ekajet Ro 2:11​-​18.

Buk in Dri Ekajet ej kwalok kin juõn ien ekanuij kar nana ilo bwebwenato an dri Israel ro. Ilo tõre in, dri Israel ro rar jokwe ilo Kenean, eneo Anij ear kalimur kake ñõn Ebream. Elõñ ebeben ko tokelik, eor emen men ko ekkã an kar walok ñõn dri Israel ro. Rar jumae, kar kaiñtan ir, rar akwelap im kajitõk jibõñ, im kar lomoren ir. *

Rar jumae. Kin air kar bo iben dri Kenean ro, dri Israel ro rar “illok jen Jeova” im rar jino air lor anij ro jet. Rar “korijer ñõn Beal im Ashterot.” * Ilo air kar kabuñ ñõn anij rein rewan, rar jumae Jeova. Eñin unin dri Israel ro “rar kaillu Jeova,” Anij eo ear kadrioijlok ir jen enen Ijipt!​—Eon 11-13; Dri Ekajet Ro 2:1.

Kar kaiñtan ir. Jeova ear kanuij illu iben dri Israel ro kin air kar ellok jen e, im ear joko an kejbãrok ir. Kin men in, dri Israel ro rar buñ ‘na ilo pein dri kijirãt ro air,’ im rein rar itok ñõn eneo eneir im rakimi ir.​—Eon 14.

Rar akwelap im kajitõk jibõñ. Ke rar kanuij ber ilo iñtan, dri Israel ro rar ukwelok jen men eo enana rar kõmõne im kir ñõn Anij bwe en jibõñ ir. Nan kein “iñir kin ro rar kamakokoik ir” rej kalikar bwe dri Israel ro remaroñ kar akwelap im kajitõk jibõñ. (Eon 18) Kajitõk jibõñ jen Anij ear juõn ian men ko ekkã air kar kõmõni ñe rej iion jorran. (Dri Ekajet Ro 3:​9, 15; 4:3; 6:​6, 7; 10:10) Ta eo Anij ear kõmõne?

Kar lomoren ir. Jeova ear roñ an dri Israel ro iñir im ear “ukwelok iben” kin an buromõj kake ir. Ilo kajin Hibru, nan in “ukwelok” emaroñ bar melelen “ukõt an lemnok.” (Keiri Exodus 32:14, UBS) Juõn buk in kemelele ej ba: “Kin air kar iñir, Jeova ear oktõk jen an kajeik ir im lomoren ir.” Ilo an tiriamokake, Jeova ear “kajutõk ñõn ir ro dri ekajet,” im rein rar lomoren armij ro an jen dri kijirãt ro air.​—Eon 18.

Kwar ke kile ta eo ear kamakõt Anij bwe en ukwelok, ak ukot lemnok eo an? Ej kinke armij ro an rar oktak. Lemnok kin men in ilo wãwen in: Juõn jemen emaroñ kajeik ajiri eo nejin kin an kar kõmõne juõn men enana, bwelen ilo an jab kõtlok bwe en kõmõni men ko ekõnan. Ak ke ej lo bwe ajiri eo nejin ej mol an jolok an bwir, ej bwijrõk jen an kajeik e.

Ta eo jemaroñ katak kin Jeova jen bwebwenato in? Meñe jerawiwi eo an juõn armij elap ej kaillu Jeova, ak elañe ej lukkun ukwelok kin aolepen buruen, men in emaroñ kamakõt Anij bwe en tiriamokake e. Eaurõk bwe jen jela bwe men ko jej kõmõni remaroñ jelet iñjake ko an Anij. Etke kwojjab katak kin wãwen eo kwomaroñ ‘kamõnõnõik buruen’ Jeova? (Jabõn Kennan Ko 27:11) Men in enaj kamõnõnõik yuk.

[Kamelele ko itulal]