Okuti Huku Upondola Okulivela?
Okuti Huku Upondola Okulivela?
Fuenei Ku Huku
MOKONDA tuvakuankhali ovikando vimwe tulivela. Mongeleka, onthue pamwe tulivela tyina tuamaimbuka okuti tualinga otyipuka tyapenga. Mahi, Ombimbiliya ipopia okuti Jeova upondola okulivela. Ove upondola okupopia okuti, ‘mahi Huku utupu onkhali.’ ‘Oe kapengesa!’ Iya omonkhalelo patyi Huku elivela? Ekumbululo lipondola okutuvatela okunoñgonoka otyipuka tyimwe tyihuvisa: Jeova una omutima, iya ovipuka tulinga vipondola okumunumanesa ine okumuhambukiswa. Tala onondaka mbuvahiwa mu Juízes 2:11-18.
Ombimbiliya momukanda wa Juízes uhipulula omuvo wepuiya wova Isilayeli. Elongo ankho likahi mo Kanaa, otyilongo Huku alaele Abraiau. Mokueenda kuomanima omanyingi, ovituwa viova Isilayeli vipondola okupopiwa monondaka ononkhuana: Okulavisa, onya, okuita nomalikuambelo, nokuyovolwa. a
Okulavisa. Nokuhongiliyua no va kananeu, ova Isilayeli “vasapo Jeova” avalandula ono huku ononkhuavo, “okufenda Baale novilolo via Astarote.” b Okulavisa Jeova monkhalelo oyo, tyihangununa okuyapuka metavelo liotyotyili. Tyotyili, ova Isilayeli “vanumanesile Jeova,” Huku weveyovolele ko Egitu!—Onoversikulu 11-13; Juízes 2:1.
Onya. Nonyengo yaviuka, Jeova wayekapo okuamena ovanthu vae ankho vemuanya. Iya ova Isilayeli “avawila pomaoko onondyale mbavo,” avapundwa otyilongo.—Oversikulu 14.
Okuita Unene. Etyi vapita mononkhumbi ononene, ova Isilayeli velivela mokonda yovivi valinga iya avaiti ombatelo ku Huku. Okuita unene tyipondola okulekeswa no nondaka mbokuati “ankho vakema mokonda yonondyale mbavo.” (Oversikulu 18) Okuita unene ku Huku tyilekesa okuwana-wana. (Juízes 3:9, 15; 4:3; 6:6, 7; 10:10) Oñgeni Huku akumbulula?
Okuyovolwa. Jeova watehelela omukemo wova Isilayeli iya “elivele.” Ondaka mo Hebreu yapitiyua “okulivela” ipondola okuhangununa “okupilulula olusoke.” Omukanda umwe wati: “Omukemo wavo walunda Jeova, okupilulula ehando liae liokuvehitisa, iya eveyovola.” Nokankhenda kae, Jeova “waholovona ovakoyesi” opo vayovole ovanthu vae konondyale mbavo.—Oversikulu 18.
Okuti ove wamona oityi tyalunda Huku okulivela ine okupilulula olusoke lwae? Omokonda ovanthu vae vapilulula ovituwa viavo. Nkhele soka kongeleka ei: He una oluembia upondola okulonga omona wehetavela, hamwe okuhemuyeke alinge ovipuka vimwe ehole. Mahi tyina atala okuti omona tyotyili welivela, he utokola okuhemuhitisa vali.
Ehipululo olio litulongesa tyi konthele ya Jeova? Namphila hamwe ononkhali tulinga mbunumanesa Huku, mahi okulivela nomutima auho tyimulunda okulekesa okankhenda. Tyakolela unene okusoka okuti etyi tulinga tyipondola okunumanesa ine okuhambukiswa Jeova. Omokonda yatyi tuhelilongesila oñgeni tupondola okuhambukiswa “omutima wa Jeova”? (Provérbios 27:11) Okulinga ngotyo, nalumwe mokelivela.
[Onondaka Poutoi]
a Omukanda wa Juízes 2:11-18 uhimbika okupopia konthele yovituwa vio Isilayeli, viapopiwa vali nawa movikapitulu vilandulako.
b Baale ankho o huku wankhimana wova kananeu, iya Astarote o huku yomukai ankho utalwa ngatyina omukai wa Baale.