Bo Mkeed Er A Dios

A Dios Ngsebechel el Mo Ouuchel er a Rengul?

MENGETEKLEL 2:11-18

 KEDE mo ouuchel er a rengud sel derellii a cheleuid el tekoi a lebebil er a taem e le kid el diak demecherrungel el chad. A Biblia a melekoi el kmo a Jehovah a dirrek el mo ouuchel er a rengul. Engdi a rebebil a kmo, ‘A Dios a cherrungel, me ngdiak el sebechel el meruul a cheleuid el tekoi!’ Me ngoeak a ngera el rolel e a Dios a ouuchel er a rengul? A nger er tiang a ngosukid el mo medengelii a belkul a klou el tekoi el kmo: A Jehovah a omelechesiu a tekoi, me a omerelled a sebechel el tomellii a rengul. Ka molatk a tekoi el medung er a Mengeteklel 2:11-18.

A babier er a Mengeteklel a mesaod er a meringel el taem er a reksi er a rechad er a Israel. Tia el renged a mla ngmukl a delengcheklir el mo kiei er a Kanaan, el ngii a el letilbir a Dios el mo er a Abraham. Ngar er a chelsel a betok el rak e a omerellir a rechad er a Israel a mlo ua di lomelekl a osisiu el blekeradel el ngii a: ultok me a odechelakl me a ongit me a dirrek el osobel. *

Ultok. A Jehovah a uleltngakl er a rechad er a Israel e le tir el “mlo diak longull el meluluuch” er Ngii, e bai mlo oltirakl er a rechad er a Kanaan el mengull “e milsiou a Baal ma Astarte.” * Chouaitia el omeruul a mlo uchul a ultok er a mera el osisechakl. Me a omerellir a rechad er a Israel a “ulengesechii a rengul” a Jehovah el ngii a ultebedeterir er a beluu er a Ekipten!​—Bades er a 11-13; Mengeteklel 2:1.

Odechelakl. A mekngit el omerellir a rechad er a Israel a mlo uchul a melemalt el ngesechel a rengul a Jehovah me ngmlo diak el omekerreu er tir. Me “ng milechititerir a rokui el cherarou el meliuekl er tir” me te mlo mesisiich er tir e ngiluu a belurir.​—Bades er a 14.

Ongit. Ngar er a taem er a ringel me a chelebuul e a rechad er a Israel a mlo melechesiu a mekngit el omerellir me te lilangel el olengit a ngeso er a Dios. Me a ongterir a medung er a (Bades er a 18) el kmo: “Tulengingd er a chelsel a ringelir ma ulecheracheb el odechelakl el mor tir.” A ongterir el mo er a Jehovah a tedebechel a blelekl el omeruul. (Mengeteklel 3:9, 15; 4:3; 6:6, 7; 10:10) Me ngmilekerang a longer?

Osobel. A Jehovah er a lerengeseterir a rechad er a Israel el ongingd er a kngtil a rengrir e ngmlo “chubteterir.” Me a tekoi er a Hebru el mloiuid el “chubteterir” a sebechel el belkul a kmo, “ngodechii a uldesuel.” A ta el babier a kmo: “A Jehovah er a lerengeseterir el ongingd er a kngtil a rengrir e ngngildechii a moktek er ngii el mle kirel el omals er tir e bai mlo olsobel er tir.” Ngoeak a klechubechub er Ngii e ‘ngmilsterir a remengeteklir’ a ngerachel el mo olsobel er a rechedal er a recherrouir.​—Bades er a 18.

Kid ngsebeched el mtebengii el kmo ngngera rirellii a Dios el mo ouuchel er a rengul me a lechub e ngngodechii a uldesuel? E le rechedal el ulemuchel el ngmodech a uldesuir. Ka molatk er tia el okesiu el kmo: A betik a rengul el chedam a mellach er a ngelekel el merrob er ngii er a bebil el soal el tekoi. Engdi sel lomes er a ngelekel el mera el melechesuar a mekngit el omerellel e ngsebechel a chedam el ousubes er ngii.

Ngera kede suubii el kirel a Jehovah el oeak tia el cheldecheduch? Kede suubii el kmo sel ledu rengud el mo er a klengit e ngolengasech er a rengul, e a douuchel er a rengud e dobult er a mekngit el omerelled e a Jehovah a sebechel el olecholt er a klechubechub el bedul kid. Kede mo melechesuar el kmo a mekngit me a ungil el omerelled a klou a lerellii er a uldesuel a Jehovah. Me ngkmal ungil a dosuub er a rolel e ngmo sebeched el ‘odeuir a rengul’ a Jehovah. (Osisechakl 27:11) Ngkmal diak bo douuchel er a rengud.

[Footnote]