Karanih Koht

Koht Kak Ketin Koluhla?

SOUNKOPWUNG 2:11-18

NIN duwen aramas soh unsek kei, kitail koaros kin ekei pak ahneki pepehm en koluhla. Karasepe, ele kitail kin nsensuwedla mwurin atail tehkada me kitail wiahda sapwung. Paipel mahsanih me Siohwa kin kak ketin koluhla. Ahpw mwein ke pahn nda, ‘Koht me unsek oh e sohte kak wiahda sapwung!’ Ni ahl dahieu me Koht kin ketin koluhla? Pasapengpen peidek wet kak sewese kitail en wehwehki mehkot kesempwal: Siohwa sapwellimanki pepehm oh atail wiewia kan kak kamwakid sapwellime pepehm kan. Tehk mahsen kan me kileldi nan Sounkopwung 2:11-18.

Pwuhken Sounkopwung kin kasalehda duwen ahnsou apwal ehu nan poadopoad en mehn Israel kan. Mehn Israel kan kousoanlahr nan Kenan, sahpw me Koht ketin inoukihong Eipraam. Erein sounpar epwiki kei mwurin mwo, wiewiahn mehn Israel kan kin kasalehda soahng pahieu me kin kalapw pwarada: arail kin wiahda sapwung, lokolok, pek sawas, oh doareparail. *

Sapwung kan. Mehn Kenan ko kahrehiong mehn Israel kan en ‘sohla kaudokiong Siohwa’ oh tepida papah koht teikan, duwehte “Paal ko oh Asdarde ko.” * Sapwung wet kahrehiong irail en kesehla arail kaudok ong Siohwa. Ihme kahrehda Siohwa, Koht me ketin kapitirailla sang nan Isip, “ketin engiengda kowahlap.”​—Iretikitik 11-13; Sounkopwung 2:1.

Lokolok. Pwehki Siohwa ketin engiengda ni pwung, e solahr ketin pere mehn Israel kan me soikala ih. Mehn Israel kan eri “lohdiong pahn manaman en arail imwintihti kan” me kalowehirailldi.​—Iretikitik 14.

Pek sawas. Ni arail kin lelohng nan lokolok, mehn Israel kan kin koluhkihla arail sapwung kan oh pek sawas rehn Koht. Arail pek sawas kin sansalda sang arail kin “sengisengki ar lokolok laud pahn ar imwintihti kan.” (Iretikitik 18) Re kin pwurepwurehng pek sawas rehn Koht. (Sounkopwung 3:9, 15; 4:3; 6:6, 7; 10:10) Ia duwen Koht eh ketin mwekidki met?

Doareparail. Siohwa kin ketin karonge ahn mehn Israel kan arail sengiseng oh “kupwurehla” irail. Lepin lokaiahn Ipru me kadoadoahk wasaht pil kak wehwehki ‘koluhla.’ (Kilang Senesis 6:6) Met kin wehwehki en “wekidala omw madamadau de mehkot me ke lemehda me ke pahn wia.” Ehu dikseneri koasoia: “Siohwa ketin mwekidki arail sengiseng oh ketin wekidala kupwure en kaloke irail ong doareirailla.” Pwehki Siohwa kin ketin kupwureirailla, e ketikihong irail sounkopwung kan me pahn doarehla sapwellime aramas kan sang arail imwintihti kan.​—Iretikitik 18.

Ke kilang dahme kamwakid Koht en ketin koluhla de wekidala sapwellime madamadau? Iei ni sapwellime aramas akan arail wekidala arail madamadau oh wiewia. Medewe ni ahl wet: Pahpa limpoak men kak kaweid nah seri men me wiahda sapwung sang ni eh keinepwihsang soahng kei. Ahpw ni en pahpao eh kin kilang me serio uhdahn koluhla, e mweidohng serio dahme e keinepwihsang ih.

Dahme kitail sukuhlki duwen Siohwa nan ire pwukat? Ma emen kin nsenki wiahda dihp, e pahn ketin engiengda. Ahpw ma emen koluhla mehlel, met pahn kamwakid ih en kasalehda mahk. E kin kesempwal kitail en medewe duwen atail wiewia kan eh kak kamwakid sapwellimen Koht pepehm kan. Ke sou sukuhlki ia duwen omw kak kaperenda Siohwa? (Lepin Padahk 27:11) Ke sohte pahn koluhkihla met.

[Nting tikitik kan me mi pah]