Mu Chuchugur Ngak Got

Rayog ni Nge Kireban’ Got me Thilyeg e Lem Rok, Fa?

JUDGES 2:11-18

BOCHAN e dawor da flontgad ma yu ngiyal’ e ma kireban’dad u boch ban’en ni kad rin’ed. Bod u tomuren ni kad nanged ni kad olobochgad. Be yog e Bible ni Jehovah e rayog ni nge kireban’ me thilyeg e lem rok u ban’en ni ke dugliy ni nge rin’. Machane sana ra lungum, ‘Got e der ma oloboch, ya ba flont!’ Machane uw rogon ni ma kireban’ Got? Fulweg riy e rayog ni nge ayuwegdad ngad nanged ban’en nrib manigil u rarogon Jehovah ni aram e ir reb e Got ni ma felfelan’, maku ma kireban’, maku rayog ni nge damumuw. Ere n’en ni gad ma rin’ e bay rogon ngak. Am guy fapi thin ni bay ko Judges 2:11-18.

Fare babyor u Bible ni Judges e be weliy chepin piyu Israel u nap’an ni ka ranod ra pared nga Kanaan, ni aram fare nam ni micheg Got ngak Abraham. Ma n’en ni buch rok piyu Israel ko pi chibog nga tomuren e ba muun ngay aningeg i ban’en ni i buch u bayay ngu bayay ni aram e: togopluw, nge gafgow, nge wenig, nge ngan chuwegey ko gafgow. *

Togopuluw. I un piyu Israel ngak piyu Kanaan ngar denengad nib togopluw ngak Jehovah mar uned ko liyor ko pi got rorad mi yad chel “ngar pigpiggad ngak fapi kan ni ka nog fithingrad ni Baal nge fapi kan ni ka nog fithingrad ni Astarte.” * Bochan e ra togopuluwgad ma aram fan ni sum boch e machib nde riyul’. Ere n’en ni buch e “ra k’aringed e damumuw ngak” Jehovah ni fare Got ni fekrad nga wuru’ yu Egypt!​—Verse 11-13; Judges 2:1.

Gafgow. I k’aring piyu Israel e damumuw ngak Jehovah ma aram e daki ayuwegrad. Ma aram me “pag e pi toogor rorad ngar chamgad ngorad” ngan fek e chugum rorad u fithik’ e yargel.​—Verse 14.

Wenig. Nap’an ni gafgow piyu Israel mfin aram e ngiyal’ nra kalgadngan’rad ko kireb rorad mi yad wenig ngak Got ni nge runguyrad. Wenig ni ur ted e ba gagiyel ni ur “gel’gel’gad u fithik’ e gafgow nge togopluw.” (Verse 18) Ere boor yay ni ur weniggad ngak Got. (Judges 3:9, 15; 4:3; 6:6, 7; 10:10) Ere mang e rin’ Got?

Ngan chuwegey ko gafgow. I rung’ag Jehovah lungun piyu Israel ni yad be gel’gel’ “me runguyrad.” Fare bugithin ni Hebrew ni kan piliyeg ni “runguy” e be yip’ fan ni “ngan thilyeg lanin’uy u ban’en ni kan rin’.” I yog reb e Babyor ni gaar: “Bochan e gel’gel’ ni ur ted ma aram me thilyeg Jehovah e lem rok nge chuwegrad u fithik’ e gafgow.” Nap’an ni runguy Jehovah e girdi’ rok ‘me pi’ be’ ngorad ni ir e nge yog e thin rorad’ me chuwegrad u pa’ e pi toogor rorad.​—Verse 18.

Ga manang ko mang fan ni runguy Got e girdi’ rok me thilyeg e lem rok? Bochan e kar thilyeged e ngongol rorad. Am lemnag: Reb e matam nib t’uf pi fak rok e ra oloboch bagayad me yal’uweg, ni bod ni nge taleg u boch ban’en. Machane nap’an nra guy ni ke kal fare tir ngan’ ko n’en ni ke rin’, ma rayog ni nge thilyeg e lem rok.

Mang e kad filed u murung’agen Jehovah ko re n’ey? Ra rin’ be’ reb e denen ni lem rok ma ra damumuw, machane faanra kalngan’ ma ra runguy. Ba puluw ni ngad lemnaged ni ngongol rodad e bay rogon ngak Got. Ere ngam fil rogon ni ngam ‘felfelan’nag’ Jehovah. (Proverbs 27:11, BT) Faan ga ra rin’ ni aram rogon ma dab mu kalngan’um.

[Footnotes]