Kpep Nditọ Fo

Rebekah Ama Enyịme Ndinam Se Inemde Jehovah Esịt

REBEKAH edi ọsọ enyịn̄ ke ediwak ebiet mfịn. Ndi ọmọfiọk owo emi ekerede enyịn̄ oro?— * Rebekah ekedi akpan owo ke n̄wed oro ọwọrọde etop akan ke ererimbot, kpa Bible. Nso ke afo ọfiọk aban̄a enye?— Akpana ikpep n̄kpọ iban̄a Rebekah koro uwụtn̄kpọ esie ekeme ndin̄wam nnyịn inam n̄kpọ Jehovah, emi edide ata Abasi.

Rebekah edi ọyọhọ n̄wan iba ke Bible oro akatuakde ibuot ọnọ Jehovah ke nnennen usụn̄. Ndi ọmọfiọk n̄wan emi ekedide akpa?— Ekedi Sarah, n̄wan Abraham. Sarah akaman Isaac—ikpọn̄-ikpọn̄ eyen esie—ke usọn̄. Yak ise idahaemi nte Rebekah ekenyịmede ndinam se inemde Jehovah esịt, ye nte enye okosobode ye Isaac.

Isua 60 ẹbe tọn̄ọ Abasi ọkọdọhọ Abraham ye Sarah ẹwọrọ ke Haran ẹka isọn̄ Canaan. Ke ini Abraham ye Sarah ẹnen̄erede ẹsọn̄, Abasi ọn̄wọn̄ọ ke iyọnọ mmọ eyen emi mmọ ẹdisiode Isaac. Afo ọmọfọfiọk ke ete ye eka Isaac ẹma enye etieti. Sarah akpa ke ini edide isua 127, ndien Isaac eyen esie okpon ọwọrọ owo onyụn̄ enen̄ede ofụhọ n̄kpa eka esie. Abraham iyomke Isaac ọdọ n̄wan Canaan sia mmọ mînamke n̄kpọ Jehovah. Ke ntre, enye ọdọn̄ asan̄autom esie, eyedi Eliezer, aka akada n̄wan ke otu iman esie ke Haran, emi ebede kilomita 800, ọsọk Isaac!—Genesis 12:4, 5; 15:2; 17:17, 19; 23:1.

Eliezer asan̄a ye mme asan̄autom Abraham eken ke camel duop emi ẹbiomde mme n̄kpọ ye  mme enọ oro enye adade ọsọk n̄wanndọ edisịm Haran. Mmọ ẹtuak ẹda ke obube mmọn̄ sia Eliezer ọfiọkde ke mme owo ẹsidi ẹdikoi mmọn̄ do uwemeyo ẹnọ mme ufene ye ubon mmọ. Eliezer ọbọn̄ akam ete ke ini imọ idiben̄ede edin̄wọn̄ mmọn̄, yak n̄wan emi imọ idimekde inọ Isaac ọdọhọ imọ ete: “N̄wọn̄, ndien nyọnọ mme camel fo mmọn̄ ẹn̄wọn̄ n̄ko.”

Se itịbede edi oro! Rebekah, n̄kaiferi emi ‘eyede etieti ndise’ edi edisịm obube mmọn̄ oro. Ke ini Eliezer eben̄ede enye edin̄wọn̄ mmọn̄, enye ọdọhọ ete: “Nyonyụn̄ n̄koi mmọn̄ nnọ mme camel fo.” Enyene Eliezer “ndyọ” ke ini esede nte Rebekah “[efehede] afiak aka ke obube, okokoi” mmọn̄ ndien ndien. Ntefi! Rebekah enyene ndikoi mmọn̄ nyọhọ drọm ition edieke anade camel duop oro ẹn̄wọn̄ ẹyụhọ!

Eliezer ọnọ Rebekah nti enọ, onyụn̄ edi edifiọk ke enye edi eyen Bethuel, iman Abraham. Rebekah ọdọhọ Eliezer ye mme ufan esie ẹdi ‘ẹdidan̄’ ke ufọk mmimọ. Ekem, enye efehe aka ndisian mbonufọk mban̄a isenowo oro Abraham ọdọn̄de ẹto Canaan ẹdise mmimọ.

Ke ini Laban eyeneka Rebekah okụtde ọsọn̄urua enọ oro ẹkenọde eyeneka esie, onyụn̄ ọfiọkde owo emi Eliezer edide, enye ada enye odụk ufọk. Edi Eliezer ọdọhọ ete: “Ndiaha kan̄a [udia] tutu ndọhọ ikọ mi mma.” Ntre, enye etịn̄ ntak emi Abraham ọkọdọn̄de imọ. Bethuel, ọkọrọ ye n̄wan esie, ye Laban ẹkop inemesịt ẹnyụn̄ ẹnyịme ndọ oro.

Eliezer ye mbon oro ẹdude ye enye ẹdan̄ do ke ẹma ẹkedia udia. Ke ndan̄nsiere, Eliezer ọdọhọ ete: “Mbufo ẹyak nnyọn̄ ntiene ete mi.” Edi eka ye eyeneka Rebekah ẹte mmọ ẹtie kan̄a “baba usen duop.” Ke ini ẹbụpde Rebekah m̀mê enye enyịme ndiwara n̄ka, enye ọbọrọ ete, ‘Nyaka.’ Kpa idaha oro, enye etiene Eliezer aka. Enye akabade edi n̄wan Isaac ke ini mmọ ẹsịmde ufọk.—Genesis 24:1-58, 67.

Ndi ekere ke ama emem Rebekah ndikpọn̄ ubon ye mme ufan esie n̄ka ata anyan ebiet, sia ọkọfiọkde ke ekeme ndidi imọ idikwe mmọ aba tutu amama?— Baba, ikememke. Edi ẹma ẹdiọn̄ Rebekah ke ntak emi enye ekenyịmede ndinam se inemde Jehovah esịt. Andinyan̄a nnyịn, Jesus Christ, akamana ke ubon esie. Ẹyediọn̄ nnyịn n̄ko edieke inyịmede ndinam se inemde Jehovah esịt—nte Rebekah ekenyịmede.—Rome 9:7-10.

[Ikọ Idakisọn̄]

MBỤME:

▪ Anie ekedi Rebekah, ndien Eliezer okosobo ye enye ke m̀mọ̀n̄?

▪ Ntak emi Abraham mîkoyomke Isaac ọdọ n̄wan Canaan?

▪ Didie ke Rebekah okowụt ke imọ ididi eti an̄wan?

▪ Nso ke ikeme ndinam man itie nte Rebekah?