အခုခေတ် ဒေသအတော်များများမှာ ရေဗက္ကဆိုတဲ့နာမည်ကို လူသိများကြတယ်။ အဲဒီနာမည် မှည့်ထားတဲ့သူကို ကလေးတို့ သိသလား။— * ကမ္ဘာပေါ်မှာ အထင်ရှားဆုံးစာအုပ်ဖြစ်တဲ့ သမ္မာကျမ်းစာထဲမှာ ရေဗက္ကက အရေးပါတဲ့သူတစ်ယောက်ပေါ့။ သူနဲ့ပတ်သက်ပြီး ကလေးတို့ ဘာတွေ သိထားသလဲ။— ရေဗက္ကအကြောင်းကို တို့တွေ သိထားသင့်တယ်။ ဘာဖြစ်လို့လဲဆိုတော့ သူ့ရဲ့စံနမူနာက စစ်မှန်တဲ့ဘုရားသခင် ယေဟောဝါရဲ့ အမှုတော်ကို တို့တွေ ထမ်းဆောင်ဖို့ အကူအညီ ဖြစ်စေနိုင်လို့လေ။

ကျမ်းစာမှတ်တမ်းထဲမှာ ရေဗက္ကက ယေဟောဝါဘုရားသခင်ကို စစ်မှန်တဲ့နည်းနဲ့ ဝတ်ပြုခဲ့တဲ့ အမျိုးသမီးတွေထဲက ဒုတိယမြောက်ပေါ့။ ဒါဆို ပထမတစ်ယောက်က ဘယ်သူလဲဆိုတာ ကလေးတို့ သိသလား။— သူ့နာမည်က စာရာလေ၊ အာဗြဟံရဲ့ ဇနီးပေါ့။ စာရာက အသက်ကြီးမှ တစ်ဦးတည်းသောသားလေး ဣဇာက်ကို မွေးတယ်။ ရေဗက္ကက ယေဟောဝါဘုရားသခင်ရဲ့ အလိုတော်နဲ့တွေ့ဖို့ စိတ်လိုကိုယ်လျောက် ဘာလုပ်ခဲ့သလဲ၊ ဣဇာက်နဲ့ ဘယ်လို တွေ့ခဲ့သလဲဆိုတာ အခု သုံးသပ်ကြမယ်။

ခါရန်မြို့ကနေ ခါနာန်ပြည်ကိုသွားဖို့ အာဗြဟံနဲ့ စာရာကို ဘုရားသခင် စေလွှတ်ခဲ့တာ အနှစ် ၆၀ ကျော် ရှိသွားပြီ။ သားလေးဣဇာက် မွေးလိမ့်မယ်ဆိုပြီး အာဗြဟံနဲ့ စာရာ အသက်ကြီးလာချိန်မှာ ဘုရားသခင် ကတိပေးခဲ့တယ်။ ဣဇာက်ကို မိဘတွေ အရမ်းချစ်ကြမယ်ဆိုတာ ကလေးတို့ မြင်ယောင်ကြည့်နိုင်တယ်။ စာရာက အသက် ၁၂၇ နှစ်မှာ သေဆုံးသွားတယ်။ အဲဒီအချိန်မှာ ဣဇာက်က အရွယ်ရောက်နေပြီ။ အမေ ဆုံးသွားတဲ့အတွက် သူ အရမ်းဝမ်းနည်းခဲ့တယ်။ အာဗြဟံက ဣဇာက်ကို ခါနာန်မိန်းကလေးနဲ့ မပေးစားချင်ဘူး။ ဘာဖြစ်လို့လဲဆိုတော့ ခါနာန်လူတွေက ယေဟောဝါဘုရားသခင်ကို မကိုးကွယ်ကြဘူးလေ။ ဒါကြောင့် အာဗြဟံက ဧလျာဇာဆိုတဲ့ ကျွန်တစ်ယောက်ကို မိုင် ၅၀၀ ကျော်ဝေးတဲ့ ခါရန်မြို့က ဆွေမျိုးတွေဆီ သွားခိုင်းတယ်။ အဲဒီမှာ ဣဇာက်အတွက် မိန်းမတစ်ယောက် ရှာခိုင်းလိုက်တယ်။—ကမ္ဘာဦး ၁၂:၄၊ ၅။ ၁၅:၂။ ၁၇:၁၇၊ ၁၉။ ၂၃:၁။

 ဧလျာဇာက အာဗြဟံရဲ့ ကျွန်တွေနဲ့အတူ ခါရန်မြို့ကို ရောက်လာတယ်။ သတို့သမီးအတွက် ပစ္စည်းတွေနဲ့ လက်ဆောင်တွေကို ကုလားအုတ်ဆယ်ကောင်နဲ့ သယ်လာတယ်။ ရေတွင်းနားရောက်တော့ သူတို့ နားလိုက်ကြတယ်။ တိရစ္ဆာန်နဲ့ မိသားစုအတွက် နေ့လယ်မှာ လူတွေ ရေလာခပ်ကြမယ်ဆိုတာ ဧလျာဇာ သိလို့လေ။ ကျွန်တော် ရေတစ်ခွက်တောင်းတဲ့အခါ “သောက်ပါ၊ သင်၏ကုလားအုတ်တို့ကိုလည်း ရေတိုက်ပါမည်” လို့ပြန်ပြောတဲ့သူက ဣဇာက်ရဲ့ဇနီး ဖြစ်ပါစေဆိုပြီး ဧလျာဇာ ဆုတောင်းလိုက်တယ်။

မကြာခင်မှာ အဲဒီအတိုင်း ဖြစ်လာပါလေရော။ “အလွန်အဆင်းလှ” တဲ့မိန်းကလေး ရေဗက္ကက ရေတွင်းနား ရောက်လာတယ်။ ဧလျာဇာ ရေတောင်းတဲ့အခါ “သင်၏ကုလားအုတ်တို့သည်လည်း ဝစွာသောက်စရာဖို့ ရေခပ်ပါမည်” လို့ ရေဗက္ကက ပြန်ပြောတယ်လေ။ “တစ်ဖန် ခပ်ခြင်းငှာ ရေတွင်းသို့” ရေဗက္က ပြေးသွားတဲ့အခါ ဧလျာဇာက “အံ့ဩ” ပြီး သူ့ကို ကြည့်နေတယ်။ စဉ်းစားကြည့်ပါဦး။ ကုလားအုတ် ဆယ်ကောင် သောက်ဖို့ ရေဂါလံ ၂၅၀ တောင် ရေဗက္က ခပ်ပေးရတယ်။

ဧလျာဇာက ရေဗက္ကကို လက်ဆောင်လှလှလေးတွေ ပေးပြီးတော့ အာဗြဟံရဲ့ဆွေမျိုး ဗေသွေလရဲ့သမီးဆိုတာလည်း သိသွားတယ်။ ရေဗက္ကက မိဘအိမ်မှာ “တည်းခို” ဖို့ ဧလျာဇာနဲ့ အဖော်တွေကို ဖိတ်ခေါ်လိုက်တယ်။ ပြီးတော့ အိမ်ကို အရင်ဆုံးပြေးသွားပြီး အာဗြဟံလွှတ်လိုက်တဲ့ ခါနာန်ပြည်က ဧည့်သည်တွေအကြောင်း သွားပြောပြတယ်။

အစ်ကိုလာဗန်က ညီမလေး ရေဗက္ကရထားတဲ့ အဖိုးတန်လက်ဆောင်တွေကို တွေ့သွားတဲ့အပြင် ဧလျာဇာ ဘယ်သူလဲဆိုတာ သိသွားတဲ့အခါ သူ့ကို အိမ်ထဲဝင်ဖို့ ဖိတ်ခေါ်လိုက်တယ်။ ဒါပေမဲ့ ဧလျာဇာက “ကျွန်ုပ်သည် ကိုယ်အမှုကို မပြောမီ မစားလိုပါ” လို့ပြောပြီး သူ့ကို အာဗြဟံ စေလွှတ်လိုက်ရတဲ့အကြောင်း ရှင်းပြတယ်။ ဗေသွေလရယ်၊ သူ့ဇနီးရယ်၊ လာဗန်ရယ် ကျေနပ်သွားပြီး လက်ထပ်ပေးဖို့ သဘောတူလိုက်ကြတယ်။

ဧလျာဇာနဲ့ အဖော်တွေက စားသောက်ပြီး တစ်ည တည်းခိုကြတယ်။ မနက်မိုးလင်းတဲ့အခါ ဧလျာဇာက “သခင်ထံသို့ ပြန်ပါရစေ” လို့ပြောပေမဲ့ ရေဗက္ကရဲ့အမေနဲ့ အစ်ကိုက သူတို့ကို “ဆယ်ရက်ခန့်” နေစေချင်သေးတယ်။ အခုချက်ချင်း လိုက်သွားချင်သလားလို့ ရေဗက္ကကို မေးတဲ့အခါ “ကျွန်ုပ်လိုက်ပါမည်” လို့ သူပြန်ဖြေတယ်။ ဒါနဲ့ ရေဗက္ကက ဧလျာဇာနဲ့ ချက်ချင်း လိုက်သွားပါလေရော။ ခါနာန်ပြည်ကို ရောက်တဲ့အခါ သူက ဣဇာက်ရဲ့ဇနီး ဖြစ်သွားတယ်။—ကမ္ဘာဦး ၂၄:၁-၅၈၊ ၆၇။

မိသားစုနဲ့ သူငယ်ချင်းတွေကို ဘယ်တော့မှ ပြန်တွေ့ရတော့မှာ မဟုတ်ဘူးဆိုတာ သိသိကြီးနဲ့ အဝေးကြီးကို လိုက်သွားရတာ ရေဗက္ကအတွက် လွယ်မယ်လို့ ကလေးတို့ ထင်သလား။— ဟုတ်တယ်၊ မလွယ်တာတော့ အမှန်ပဲ။ ဒါပေမဲ့ ယေဟောဝါဘုရားသခင်ရဲ့ အလိုတော်နဲ့တွေ့ဖို့ စိတ်လိုကိုယ်လျောက် ရေဗက္က လုပ်ဆောင်ခဲ့တဲ့အတွက် ကောင်းချီးတွေ ခံစားရတယ်။ သူကနေတစ်ဆင့် တို့တွေရဲ့ ကယ်တင်ရှင် ယေရှုခရစ် မွေးဖွားလာတာပေါ့။ တို့တွေလည်း ရေဗက္ကလို ယေဟောဝါဘုရားသခင့် အလိုတော်နဲ့တွေ့ဖို့ စိတ်လိုကိုယ်လျောက် လုပ်ဆောင်မယ်ဆိုရင် ကောင်းချီးတွေ အများကြီးရမှာ။—ရောမ ၉:၇-၁၀။