Y segd n yɩɩ pʋ-peelem soab wakat fãa bɩ?

NEBÃ fãa mi n maanda pʋ-peelem, tɩ kẽer nong n maand pʋ-peelem. La rẽ yĩnga yãmb mii neb a wãn sẽn maood n maand pʋ-peelem wakat fãa?

Rũndã-rũndã, baa neb wʋsg sẽn mi Wẽnnaam tagsg pʋ-peelmã wɛɛngẽ wã, yɛl wʋsg pʋsẽ b maanda pʋ-lika. Wala makre, neb wʋsg miime tɩ Biiblã yeta vẽeneg tɩ d “ra zu ye.” (Yikri 20:15) La ne rẽ fãa, b tagsdame tɩ yɛl kẽer kõt-b-la sor tɩ b zu wall b zãmb b taaba. D gom yɛl a tãab yelle.

Naong soab tara bʋʋm n na n zu bɩ?

Rom nin-kãseng a ye da yeelame tɩ “yaa naongã n wat ne tʋʋm wẽnsã fãa.” Naong soab tõe n wa tagsdame t’a tara bʋʋm n na n zu. Tõe tɩ kẽer sã n yã neb a woto sẽn zuudi, b na n kõ-b-la bʋʋm. La a Zezi tagsg yɩɩ wãn rẽ zugu. A ra kʋmda naongã sẽn tar-b rãmbã. Biibla wilgame tɩ ‘b nimbãaneg ra tar-a lame.’ (Matɩe 9:36) La baasgo, a Zezi zɩ n kõ wagdr bʋʋm ye. Woto yĩnga, naong soab segd maana wãna?

Wẽnnaam kʋmda neb nins sẽn maood ne b sũy fãa n dat n sak-a wã, la a ningd modgr ning b sẽn maand n na n paam bũmb nins sẽn yaa tɩlae ne-bã barka. (Yɩɩl Sõamyã 37:25) Biiblã yeela woto: “Zusoabã ka basd nin-tɩrg t’a gãand kom ye. La bãmb ka sakd tɩ nin-wẽng paam a sẽn dat ye.” (Yelbũna 10:3) Rẽ yĩnga naong soab tõe n kɩsa sɩd ne gom-kãensã bɩ? A Victorine kɩsa sɩd tɩ tõeeme.

A Victorine yaa pʋg-kõor sẽn tar kamb a nu sẽn kẽ lekolle, la a nugã me pa zãad ye. Sẽn paase, a sẽn vɩ tẽng ning pʋgẽ wã goosneema pa tar tõog n sõngd nebã fãa ye. B soolmẽ wã, neb wʋsg sẽn wae n yit n basd b zags n kẽnd tʋʋmã yĩnga, ned sã n dat n zu, yaa nana. La ne rẽ fãa, a Victorine pa tagsd wagdem yell ye. Sẽn na yɩl n paam a noorã rɩɩbo, a tʋmda ne pʋ-peelem. A koosda teed sor noore. Bõe n kɩt t’a wɩngd ne pʋ-peelmã?

A Victorine yeela woto: “Pipi, yaa tɩ mam kɩsa sɩd tɩ Wẽnnaam yaa pʋ-peelem soaba, la tɩ m sã n dɩk a togs-n-taare, a na n pelga a pʋg ne-ma. Yiib-n-soaba, mam miime tɩ m sã n pa pʋ-peelem soaba, m pa kõt m kambã mak-sõng ye.”

Wãn-wãn la a maood ne a zu-loeesã? A yeela woto: “Tõnd tara rɩɩbo, futu, la roogo.  La baasgo, wakat kẽere, yɩɩ tɩlae tɩ m kos m zo-rãmb sõngre. Wala makre, bãag sã n mi n kẽ sʋk tɩ d segd n da tɩɩm. La mam zo-rãmbã wae n kõt-m-la m sẽn kot-bã. Bõe yĩnga? Bala mam sã n togs-b m yelle, b reegdame, b sẽn mi tɩ m yaa pʋ-peelem soaba, n pa baood sẽn yɩɩd sẽn yaa tɩlae ne-ma yĩnga.”

A Victorine paasa woto: “Mam zãmsda m kambã tɩ b yɩ pʋ-peelem dãmba. Sẽn nan pa kaoose, tõnd yak a yembr sẽn wa tõnd zakẽ wã yãa bõoneg sẽn dog taabl zugu, t’a sok maam m sã n pa yɛɛsd m kambã na n wa zuk ligdã. Mam leok-a lame tɩ b pa na n dɩk ye. La yɩɩ toog ne-a t’a tẽ-ma. Woto wã, a yãka yam n na n soos n mak-ba. A rɩgla pisi koeems a yiib zĩig kambã nif sẽn na yã, n bas n looge. Vẽkembeoogã, a lebg n waame n mik ligdã sẽn ket a zĩigẽ, tɩ ling-a. Yaa vẽeneg tɩ f sã n tar kamb sẽn yaa pʋ-peelem dãmba, a yõodã yɩɩda paoong buud fãa.”

La nebã wʋsg sã n zuuda?

Neb wʋsg zuuda b tʋʋm zĩisẽ. Woto kɩtame tɩ kẽer tagsdẽ tɩ bãmb me tara sor n na n zu. La Biiblã yeta vẽeneg woto: “Da lagem neb n maan wẽnga, b sẽn yaa wʋsg yĩng ye.” (Yikri 23:2) Pʋg-sad a ye yʋʋr sẽn boond t’a Victoire tũu sagl-kãngã. Rẽ naf-a lame bɩ?

A Victoire sẽn wa n tar yʋʋm 19, b rɩk-a-la tʋʋm luzin sẽn maand bɛ kaam pʋgẽ. Pa yã n kaoos la a bãng tɩ tʋʋmã sigb wakate, luzinnã pagb na maan pis-naasã fãa solgda bɛ wã biis b yaasẽ wã n kuusẽ ye. B sã n ta wɩkɛn n dɩk n koose, b paamda sẽn na ta b tʋʋmdã rasem a naas yaoodo. A Victoire yeela woto: “Luzinnã pagbã fãa la bal da zuudame. B ra tagsdame tɩ mam na n sak n naag-b lame n zu. La mam tõdgame, n yeel-b vẽeneg tɩ mam yaa pʋ-peelem soaba, tɩ b yaal maam, n yeel tɩ mam bõnda m menga.”

A Victoire paasa woto: “Daar a yembre, tʋʋmdã taoor soab waame n seg tõnd sẽn sig tʋʋmã n dat n kuli. A vaeesa tõnd ned kam fãa yaaga, n mik tɩ sã n pa maam m ye bala, sẽn ket-bã fãa ra zuu bɛ wã biisi. A yiisa kẽer tʋʋma, la a kɩt tɩ sãnda tʋm semen a yiib n pa reeg yaood ye. B sẽn tʋm semen a yiib n pa reeg bũmbã, kɩtame tɩ b bãng tɩ mam sẽn maand pʋ-peelmã, m pa bõn ye.”

Bũmb yãt la a soaad bɩ?

Yãmb sã n yã ned bõn-tɩrg sẽn menem n dɩke, y tagsg yaa wãna? Ne neb wʋsgo, zĩig pʋgẽ, b na n tagsame tɩ b sẽn yã bũmb ningã lebga bãmb dẽnda, tɩ kɩt tɩ b pa tags b na bao a soabã n lebs ye. Sã n yaa ne bãmba, bũmb yãt la a soaada. Neb kẽer tagsdame tɩ f sã n yã ned bũmb n dɩk n sooge, pa wẽng ye. B tagsdame tɩ bũmbã soab zoe n ninga a yamẽ tɩ sẽn menema, saame. Sãnda me sã n yã bũmb n dɩke, b tagsdame tɩ pa bãmb n segd n bao a soabã, bala na n lebga tʋʋm-toog n kõ-ba.

Wẽnnaam tagsg yel-kãngã zug la bʋgo? Tõod 22:1-3 wã wilgdame tɩ ned sã n yã bũmb n dɩke, a pa segd n soog ye. A segd n ‘tall-a lame, t’a soab sã n wa bolg bɩ a kɩs-a.’ Ned ning sẽn yã bũmbã sã n solg n pa wilgi, yaa wagdem. (Yikri 22:8) No-kãensã tũub ket n tara yõod bɩ? Pag a yembr yʋʋr sẽn boond t’a Christine kɩsa sɩd ne rẽ.

A Christine yaa lekoll a ye karen-saam dãmb taoor soaba. Daar a yembre, a tɩ rɩka a kiuugã yaoodo. La wa b tẽngã neb wʋsg sẽn minim n maandẽ wã, a sẽba ligdã ne sũud n sui a korgẽ. Rẽ poore, a yalsa montɛɛr soab sẽn dɩkd neb n deegd ligdi, n kos t’a sik-a Rĩungã roogẽ. Bala yɩɩ arb daar zaabre, tɩ b ra tar tigisga. A sẽn ta n sigã, a vaeesa a korgã n bao bõoneg n yao montɛɛrã soaba. La vaeesgã pʋgẽ, a kiuugã ligd a sẽn da sẽbg n saglã lʋɩɩme, la sẽn da yaa likã yĩnga, a pa bãng ye.

Sẽn yɩ bilfu, yʋʋm 19 bi-bɩɩg yʋʋr sẽn boond t’a Blaise n wa a Christine dãmb tigisgẽ wã, a zoa nengẽ. La a ra yaa sãana. A yãa ligdã n dɩke. Tigisgã poore, a wilga a zoa wã tɩ yẽ yãa  bũmb yɩngã n dɩke, la a yeel-a t’a bolg tɩ ned sã n menesa a bũmbu, bɩ a bool-a n wilg sẽn yaa bũmb ning n menemã, tɩ sã n yaa rẽ bɩ a lebs-a.

Baraar yʋngo, a Christine sẽn ta yir n mik t’a ligdã menemame wã, a sũur sãama hal wʋsgo. Rasem a yopoe loogr poore, a togsa a zoa a ye yʋʋr sẽn boond t’a Josephine tɩ yẽ ligd n meneme. La a Josephine togs-a lame tɩ sãan n da wa tigisgẽ wã, n yeel t’a yãa bũmb n dɩke. Woto wã, a Christine boola a Blaise sẽn yaa sãanã n yeel-a t’a ligd n meneme, la a wilg-a ligdã sõore. A Blaise lebs-a-la ligdã, t’a Christine sũur yɩ noog hal wʋsgo. La a Blaise yẽ? Rasem a yopoe la a sẽn bĩng ligdã. A yeela woto: “Mam sẽn tõog n lebs ligdã, kõo maam sũ-noog n yɩɩd m sẽn da na n tall-a.”

B sẽn modgd n yɩt pʋ-peelem dãmb wakat fãa wã võore

A Victorine ne a Victoire la a Blaise yita zĩis toɛy-toɛya, la b pʋd n pa mi taab ye. La bũmb a ye n kɩt tɩ b wõnd taaba. B fãa yaa a Zeova Kaset rãmba, n modgd n tũud Biiblã sagls nins sẽn wilgd tɩ d yɩ pʋ-peelem dãmbã. Sẽn paase, b fãa gũuda dũni paalg ning Wẽnnaam sẽn pʋlem tɩ watẽ wã. Biiblã yeta woto: “Tõnd gũuda yĩngr paalg la tẽn-paalga, tɩrlem sẽn na n zĩnd b pʋsẽ.” Neb nins sẽn na n vɩɩmd dũni kãng pʋgẽ wã fãa na n yɩɩ nin-tɩrse, la pʋ-peelem dãmba.—2 Pɩɛɛr 3:13.

A Victorine tagsdame tɩ sã n pa dũni paalgã pʋgẽ tɩ Wẽnnaam toeem yɛlã, tõe t’a na n ket n tara ligd zu-loeese. La baasgo, rũndã-rũndã a yaa arzɛk soab Wẽnnaam nifẽ. A tõog n wuba a kambã sõma tɩ b mi neb waoogre, la b yaa pʋ-peelem dãmba. Hat daar fãa, b yita ne sũ-noog n sõsd ne nebã, n wilgd-b Wẽnnaam sõmblmã, la b tẽegd-b tɩ Wẽnnaam na n wa yolsa “neb nins sẽn boond-a ne sɩdã,” la a ‘gũ neb nins sẽn nong-a wã.’—Yɩɩl Sõamyã 145:7, 18, 20.

A Victoire yẽ wa n basa luzinnã pʋgẽ tʋʋma, n kẽnd raag n koosd gaari. A pʋ-peelmã yĩng kɩtame t’a paam raadens wʋsgo. La rẽ kɩtame t’a wa tõog n boog sẽk ning a sẽn dɩkd n koosdẽ wã, n paamd n moond koɛɛgã, n wilgd nebã tɩ b tõe n wa paam n vɩɩmda dũni pʋgẽ zãmb sẽn pa na n zĩndi. A wa n kẽe kãadem, tɩ yẽ ne a sɩdã fãa yaa so-pakdba, rat n yeel tɩ neb sẽn moond koe-noogã wakat fãa.

Yɩ a Zeova Kaset rãmbã Rĩung roog noor la a Christine ligdã sẽn menemã. A Blaise ra pa mi neb wʋsg tigingã pʋgẽ ye. La a ra miime tɩ neb nins sẽn da be fãa yaa yẽ tẽed-n-taase, rat n yeel t’a saam-biis la a saam-bi-pogse, sẽn modgd n maand pʋ-peelem wakat fãa.

La yãmb mii neb a wãn sẽn maood ne b sũy fãa n yaa pʋ-peelem dãmba? Tags-y n ges-y y sẽn na n be ne neb 50, neb 100, wall neb 200, tɩ b fãa yaa pʋ-peelem dãmba. A Zeova Kaset rãmbã sẽn tigimd taab Rĩungã rotẽ wã fãa yaa woto. Y sã n kẽnd b tigissẽ wã, y na n bãngame tɩ b sɩd yaa pʋ-peelem dãmba.

[Foto rãmba, seb-neng 12]

“Yaa vẽeneg tɩ f sã n tar kamb sẽn yaa pʋ-peelem dãmba, a yõodã yɩɩda paoong buud fãa.”—A VICTORINE

[Box on page 14]

Rẽ yĩnga Yelbũn 6:30 wã wilgdame tɩ wagdem pa wẽng bɩ?

Yelbũna 6:30 wã yeta woto: “Kom sã n tar ned t’a zu rɩɩb n na n dɩ, b ka yet t’a yaa wagdr ye.” Woto wilgdame tɩ wagdem pa wẽng bɩ? Abada! Goam nins sẽn pʋgl vɛrse kãnga wã wilgdame t’a võorã pa woto ye. Sɩd me, Yelbũn 6:31 wã paasa woto: “La baoosgo, b sã n yõk-a, a na n yaoa naoor a yopoe. B na n deega a yirã paoongã fãa.” Yaa sɩd tɩ kom sã n tar ned t’a zu rɩɩbo, a taallã pa ta ned sẽn zuudi, a sẽn dat wʋsg yĩnga, bɩ a sẽn pa kʋmd a taab yĩng ye. La baasgo, pa rat n yeel tɩ rɩɩb wagdem pa wẽng ye. Bala b paasame tɩ b sã n yõk-a, a “na n yaoa naoor a yopoe.” Rat n yeel t’a na n dolame. Dẽnd vẽenega, ned ning fãa sẽn dat n ta Wẽnnaam yam pa tar bʋʋm n na n zu ye.