Na o Swanetše go Botega ka Dinako Tšohle?

KA DINAKO tše dingwe motho yo mongwe le yo mongwe o a botega; mohlomongwe ba bantši ba botega ka dinako tše dintši. Eupša ke batho ba bakae bao o ba tsebago ba katanelago go botega ka dinako tšohle?

Lehono, go hloka potego go apareditše dibopego tše dintši tša bophelo. Lega go le bjalo, pono ya Modimo mabapi le potego e tsebja kudu. Ka mohlala, batho ba bantši ba tlwaelane le mantšu a molao wa seswai wa Melao e Lesome a rego: “O se kê wa utswa.” (Ekisodo 20:15) Lega go le bjalo, batho ba bantši ba nagana gore ka dinako tše dingwe maemo a ka lokafatša go utswa goba dibopego tše dingwe tša go se botege. Anke re ele hloko mehlala e meraro yeo ka tlwaelo e lokafatšago go utswa.

Na Bodiidi bo Lokafatša go Utswa?

Mokgomana yo mongwe wa Moroma o kile a bolela gore: “Bodiidi bo tswala bosenyi.” Go ka direga gore modiidi a ka nagana gore go utswa go ka lokafatšwa. Batho bao ba lebeletšego mohlomongwe ba ka dumelelana le seo. Boemo bja Jesu e be e le bofe tabeng ye? O be a e-na le kwelobohloko ditirišanong tša gagwe le bahloki. O ile a ba “šokela.” (Mateo 9:36) Lega go le bjalo, le ka mohla ga se a ka a lokafatša go utswa—ka tlase ga maemo le ge e le afe. Ke’ng seo modiidi a swanetšego go se dira?

Modimo o na le kwelobohloko go bao ka potego ba lekago go mo kwa gomme o tla šegofatša maiteko a bona a go hwetša seo se nyakegago. (Psalme 37:25) Beibele e holofetša gore: “Morêna x’a latše moloki le tlala; ό hlaswa bojatô bya babe.” (Diema 10:3) Na modiidi a ka bota kholofetšo ye? Victorine o kgodišitšwe ke seo.

Ka ge e le mohlologadi yo a nago le bana ba bahlano bao ba tsenago sekolo, Victorine o hwetša boemo bo se bonolo. O dula nageng yeo e hlabologago moo tšhelete yeo mmušo o ba thušago ka yona e lego e nyenyane. Bophelo bja letšatši le letšatši gantši bo fetšwa ka ntle ga magae, moo dibaka tše dintši kudu tša go utswa di atilego. Lega go le bjalo, Victorine ga a lekege gore a utswe. Go e na le moo, o leka go iphediša ka go ba morekiši yo a botegago wa setarateng. Ke ka baka la’ng a dula a botega?

“Sa mathomo, ke dumela gore Modimo o a botega le gore o tla botega ge a dirišana le nna ge ke mo ekiša. Sa bobedi, bana ba-ka ba ka ithuta potego ge feela ba e bona go nna.”

O ile a atlega bjang? “Re na le dijo, diaparo gotee le bodulo. Lega go le bjalo, go be go e-na le dinako tšeo ke ilego ka kgopela thušo go bagwera—ka mohlala, bakeng sa go lefelela ditshenyagalelo tša tša kalafo tšeo di sego tša letelwa. Ka mehla  ke be ke hwetša seo se nyakegago. Ka baka la’ng? Ka gobane bagwera ba-ka ba tseba maemo a-ka ao ka potego ke ilego ka ba hlalosetša ona le gore ga ke leke go hwetša se se fetago seo se nyakegago.

“Bana ba gola ba botega. Morago-bjale moagišani o ile a bona ditšhelete tša tšhipi tafoleng ya rena gomme a mpotšiša ge e ba ke sa tšhabe gore bana ba be ba tla di tšea. O ile a hwetša go le thata go dumela ge ke mmotša gore bana ba-ka le ka mohla ba ka se dire bjalo. Ka ntle le go mpotša, o ile a dira phetho ya go ba leka. Ka sephiring, o ile a uta ditšhelete tše pedi tša tšhipi ka ntlong ya rena moo bana ba bego ba ka ikhweletša tšona gabonolo. Letšatšing le latelago ge a e-tla, o ile a makala ge a bona gore ditšhelete tšeo tša tšhipi di sa dutše di le moo. Go ba le bana ba botegago go putsa kudu go feta go ba le dilo tše dintši tše di bonagalago.”

“Yo mongwe le yo Mongwe o a Utswa”

Go utswa mošomong go atile kudu. Ka lebaka leo, batho ba bantši ba nagana gore, “Motho yo mongwe le yo mongwe o a utswa, ka gona, ke ka baka la’ng ke sa swanela go utswa?” Ka mo go fapanego, Beibele e bolela gore: “O se kê wa latêla bontši xe bo senya.” (Ekisodo 23:2) Victoire o ile a kwa keletšo ye. Na e bile le mafelelo a mabotse?

Ge a e-na le nywaga e 19, Victoire o ile a hwetša mošomo lefelong leo go tšweletšwago makhura a mopalema. Kapejana o ile a lemoga gore basadi ba 40 bao ba bego ba thwetšwe moo ba be ba diriša diroto tša bona bakeng sa go utswa dithoro tša mopalema lefelong leo. Mafelo-bekeng a mangwe le a mangwe, ba be ba rekiša dithoro tšeo di ka lekanago le mogolo wa matšatši a mararo go ya go a mane. Victoire o anega ka gore: “Yo mongwe le yo mongwe o be a dira bjalo. Ba be ba letetše gore le nna ke ba tlatše eupša ke ile ka gana, gomme ka ba botša gore potego ke tsela ya-ka ya bophelo. Ba ile ba nkwera gomme ba bolela gore ke a lahlegelwa.

“Ka letšatši le lengwe ge ka moka ga rena re be re e-tšwa ka feketoring, molaodi o ile a tšwelela gatee-tee. O ile a phuruphutša seroto sa yo mongwe le yo mongwe gomme a hwetša dithoro tša mopalema ka serotong se sengwe le se sengwe ka ntle le ka serotong sa-ka. Bohle bao ba ilego ba swarwa ka morwalo ba be ba tla rakwa le semeetseng goba go šoma dibeke tše pedi ntle le tefo. Nakong ya dibeke tšeo tše pedi, basadi bao ba ile ba kgodišega gore ke be ke se ka lahlegelwa.”

“Ka ge ke se Thwetše, e Napile e tla ba Sa-ka.”

O ka ikwa bjang ge o ka hwetša selo se sengwe se bohlokwa seo motho yo mongwe a ilego a se timetša? Go batho ba bantši, se se ka tsoša maikwelo a kapejana a go se tšea gomme gwa dira gore a phaele ka thoko kgopolo le ge e le efe ya go se bušetša. Ba latela mokgwa wa gore “ka ge ke se thwetše, e napile e tla ba sa-ka.” Ba bangwe ba ka nagana gore ga go phošo yeo ba e dirilego. Go ba gona, ba nea lebaka la gore ka ntle le pelaelo, mong wa sona o se lobile. Ba bangwe ba bolela gore ga se boikarabelo bja bona go yo tsoma mong wa sona—modiro woo o ka nyakago boiteko bjo bogolo.

Pono ya Modimo ke efe tabeng ye? Doiteronomio 22:1-3 e bontšha gore motho yo a thwetšego selo se itšego o be a sa swanela go ipolokela sona eupša go e na le moo, o be a swanetše go se boloka ‘go fihla ge mong wa sona a se tsoma, ke moka a se boetše go yena.’ Ge e ba motho yo a se thwetšego a se a ka a bolela gore o se thwetše, o be a tla latofatšwa ka go utswa. (Ekisodo 22:9) Na se se a kgonega lehono? Christine o kgodišegile gore se a kgonega.

Christine ke molaodi wa sekolo seo e sego sa mmušo. Ka Laboraro le lengwe o ile a yo tšea mogolo wa gagwe wa kgwedi. Ka ge ba bantši ba dira bjalo dinageng tša ka Afrika Bodikela, o ile a phuthela ditšhelete tša pampiri gomme a di tsentšha ka mokotleng wa gagwe. Ke moka o ile a namela thekisi ya sethuthuthu gomme a kitimela sebokeng. Ge a fihla, o ile a nyaka ditšhelete tša tšhipi bakeng sa go lefa mootledi. Ge a le lefsifsing, sephuthelwana sa ditšhelete tša pampiri di ile tša wela fase a sa lemoge.

Metsotso ka morago, Blaise yo a nago le nywaga e 19, yo a sa tsebjego lefelong leo, o be a sepela ka setarata seo. O be a rulagantše gore a kopane le mogwera sebokeng seo Christine a bego a le go sona. O ile a bona tšhelete yeo e bego e phuthetšwe gomme a e tsentšha ka potleng. Mafelelong a  seboka seo, o ile a botša mogwera wa gagwe gore o thwetše selo se sengwe ka ntle le gore motho le ge e le ofe yo a timeditšego selo se itšego a ka mo leletša mogala le go mmotša gore selo seo se timetšego ke eng.

Ge Christine a fihla gae mantšiboeng ao, o ile a makatšwa ke go lemoga gore mogolo wa gagwe wa kgwedi o timetše. Ka morago ga beke, ge a botša mogwera wa gagwe Josephine ka tahlegelo yeo, o ile a botšwa gore moeng yo a bego a tlile sebokeng seo o be a thwetše selo se itšego. Christine o ile a leletša Blaise mogala gomme a mmotša gore o timeletšwe ke bokae. O ile a thaba kudu ge Blaise a buša tšhelete yeo. Go thwe’ng ka Blaise? O ile a boloka tšhelete yeo lebaka la beke, eupša Blaise o itše: “Lethabo leo ke bego ke e-na le lona ge ke se na go bušetša tšhelete le be le phala la ge nka ipolokela yona.”

Lebaka Leo ka Lona ba Katanelago go Botega ka Dinako Tšohle

Victorine, Victoire le Blaise ba dula mafelong a fapa-fapanego gomme ga ba tsebane. Lega go le bjalo, go na le seo ba swanago ka sona. Ke Dihlatse tša Jehofa, tšeo di kgomarelago seo Beibele e se bolelago mabapi le potego. Ba letetše phethagatšo ya kholofetšo ya Modimo ya lefase le lefsa. “Go na le magodimo a mafsa le lefase le lefsa tše re di letetšego go ya ka kholofetšo ya gagwe, gomme toko e tla aga go tšona.” Batho bohle bao ba tla bego ba phela nakong yeo ba tla be ba lokile—e bile ba botega—2 Petro 3:13.

Victorine ga a holofele gore boemo bja gagwe bja tša ditšhelete bo tla kaonefala go ba go fihlela ge Modimo a fetola maemo. Lega go le bjalo, o humile moyeng, e lego selo seo tšhelete e ka se kgonego go se reka. Bana ba gagwe ba a botega e bile ba na le mekgwa e mebotse. Sontaga se sengwe le se sengwe ba tlala ka lethabo ge ba boledišana le baagišani ba bona ka botho bja Modimo le go hlalosa kamoo a tla kgotsofatšago “bohle ba e rexo xe ba mmitša ba rereša” le gore o tla hlokomela “bohle ba ba mo rataxo.”—Psalme 145:7, 18, 20.

Ge nako e dutše e e-ya, Victoire o ile a tlogela go šoma lefelong leo go tšweletšwago makhura a mopalema. O ile a thoma kgwebo ya gagwe gomme a rekiša garri (e lego mohuta wa motepa woo o dirwago ka cassava) mmarakeng. Potego ya gagwe e ile ya goga bareki ba bantši. Ge e le gabotse, go se go ye kae o be a kgona go fokotša nako ya gagwe mmarakeng gomme a fetša nako e oketšegilego a boledišana le batho ka tebelelo ya go phela lefaseng leo le se nago go se botege. Ka morago o ile a nyalwa gomme yena le monna wa gagwe ga bjale ba hlankela e le badiredi ba nako e tletšego.

Christine o ile a timetša tšhelete ya gagwe ka pele ga Holo ya Mmušo ya Dihlatse tša Jehofa. Blaise o be a tseba ba mmalwa bao ba bego ba le sebokeng seo, eupša o be a tsebe gore ke bana babo le dikgaetšedi tša Bakriste, bao ba lekago go dula ba botega ka dinako tšohle.

O tseba batho ba bakae bao ba tlogago ba katanela go dula ba botega ka dinako tšohle? Akanya feela o e-na le batho ba ka bago ba 50, ba 100, goba ba 200. Ye ke phihlelo e thabišago ya Dihlatse tša Jehofa Diholong tša tšona tša Mmušo. O re’ng o sa ye moo gomme o tlwaelane le tšona?

[Ntlhakgolo go letlakala 12]

“Go ba le bana ba botegago go putsa kudu go phala go ba le dilo tše bonagalago tše dintši.”—VICTORINE

[Lepokisi go letlakala 14]

Na Diema 6:30 e Dumelela go Utswa?

Diema 6:30 e re: “’Hodu xa xo nyatšwe la xo utswa lè lapile lè swerwe ke tlala.” Na polelo ye e lokafatša go utswa? Le gatee. Taba e dikologilego e bontšha gore Modimo o sa dutše a bona lehodu le ikarabela bakeng sa molato wa lona. Temana e latelago e bolela gore: “Xe le ka swarwa, le lefa xa-šupa; le ka nthša thoto yohle ya lapeng.” (Diema 6:31) Gaešita le ge lehodu leo le utswago ka baka la tlala le ka se solwe go etša leo le utswago ka baka la megabaru goba ka maikemišetšo a go gobatša mohlaselwa wa lona, le lona le sa dutše le ikarabela go dira se botse goba go lefa gape. Bao ba kganyogago go hwetša kamogelo ya Modimo ga se ba swanela go ba le molato wa mohuta le ge e le ofe wa bohodu.