Kufanele Wetsembeke Ngaso Sonkhe Sikhatsi Yini?

WONKHE umuntfu uke etsembeke; labanyenti cishe ngaso sonkhe sikhatsi bayetsembeka. Kodvwa bangakhi bantfu lobatiko labetama kwetsembeka ngaso sonkhe sikhatsi?

Lamuhla, kungetsembeki kugcwele kuto tonkhe timo tekuphila. Nobe kunjalo, umbono waNkulunkulu mayelana nekwetsembeka watiwa kahle. Sibonelo saloku kutsi bantfu labanyenti betayelene nalomyalo lotsi “ungebi.” (Eksodusi 20:15) Nanobe kunjalo, labanyenti batsi ngalesinye sikhatsi kweba nekungetsembeki kufanele kucolelwe. Ase sifundze ngetibonelo letintsatfu tekweba imvamisa letitsatfwa njengaleto letemukelekile.

Kulungile Yini Kweba Nangabe Ngiphuyile?

Lenye indvodza lengumRoma lehamba embili kutepolitiki yatsi: “Buphuya bungumtfombo lohamba embili webugebengu.” Umuntfu lophuyile angatsi kuvumelekile kutsi ebe, ngisho nebantfu labambonako bangavumelana naye. Yini Jesu layisho ngalendzaba? Wakhombisa luvelo ngalesikhatsi asebentelana nalabahluphekile. “Inhlitiyo yakhe yagcwala sihawu.” (Matewu 9:36) Nanobe ativa ngaleyo ndlela, Jesu akashongo kutsi kweba kuvumelekile etimeni letitsite. Noko-ke, yini umuntfu lophuyile lokufanele ayente?

Nkulunkulu uyabavela labo labetama kumlalela ngebucotfo, futsi utayibusisa imetamo yabo yekutfola loko labakudzingako. (Tihlabelelo 37:25) LiBhayibheli liyetsembisa: “Simakadze [Jehova] akavumi kutsi lolungile alambe; kodvwa lababi uyabavimba kutsi bakutfole loko labakufunako.” (Taga 10:3) Umuntfu lophuyile angasetsemba yini lesetsembiso? Victorine uyasetsemba.

Njengobe angumfelokati lonebantfwana labasihlanu labasafundza, Victorine udvonsa ngeligiya lekugcina. Uhlala eveni lelisatfutfuka futsi lelite lusito lolungako loluchamuka kuhulumende. Uphila ngekwehla enyuka, lokwenta kutsi abe manyenti ematfuba ekutsi ebe. Nobe kunjalo, Victorine akalingeki kutsi ebe. Esikhundleni saloko, uwa avuka etama kutiphilisa ngekutsi atsengise lokutsite emgwacweni. Yini lembangela kutsi ahlale etsembekile?

Utsi: “Kwekucala, ngikholwa kutsi Nkulunkulu wetsembekile futsi nangabe ngimlingisa naye utawetsembeka kimi. Kwesibili, bantfwabami batawufundza kwetsembeka nangabe nami ngetsembekile.”

 Timhambele njani tintfo ekuphileni kwakhe? Uchubeka atsi: “Sinekudla, timphahla kanye nendlu yekuhlala. Nobe kunjalo, ngaletinye tikhatsi ngiyalucela lusito kubangani bami, mhlawumbe kute ngikwati kubhadala imali yekwelashwa lekhuphuka ungakagadzi. Lengikudzingako ngikhonile kukutfola. Yini lebangele loko? Kungobe bangani bami bayati kutsi ngibachazela ngekwetsembeka ngesimo lengibhekene naso, futsi angetami kusitakala ngabo.

“Bantfwabami nabo bakhula betsembekile. Muva nje, lomunye makhelwane wami ubone imali etafuleni wangibuta kutsi angesabi yini kutsi labantfwana bangahle bayebe. Kwaba matima ngaye kukholwa nangimtjela kutsi bantfwabami angeke sebakwente loko. Angakangitjeli, wakhetsa kutihlolela kutsi betsembekile yini. Washiya imali yakhe ngemabomu ekhaya lami lapho kwakutawuba melula khona ngebantfwabami kutsi bayibone. Nakabuya ngakusasa, wamangala wacishe wafa nakakhandza kutsi lemali yayisolo nje ilapho. Kunemvuzo lomkhulu kakhulu kuba nebantfwana labetsembekile, kwendlula ngisho kuba nemcebo.”

“Ingani Wonkhe Umuntfu Uyeba Nje”

Kuvame kakhulu kweba emsebentini. Ngaleso sizatfu labanyenti batsi: “Wonkhe umuntfu uyeba, yini-ke mine lengivimbela kutsi ngingebi?” Ngendlela leyehlukile, liBhayibheli liyachaza: “Ungalilandzeli linyenti lelenta lokubi.” (Eksodusi 23:2) Victoire usilalele lesiyalo. Yini layizuzile ngekusilalela kwakhe?

Nakaneminyaka lengu-19 budzala, Victoire watfola umsebenti enkampanini lehluta emafutsa iwasusela esihlahleni selusundvu. Masinyane wabona kutsi bafati labesebenta nabo labangu-40, bebasebentisa emabhasikidi kute bebe tinhlavu letakha lamafutsa. Ngemphelaviki ngayinye, bebatfola imali lelingana nemholo wemalanga lamatsatfu nobe lamane. Victoire utsi: “Ecinisweni, wonkhe umuntfu abeteba letinhlavu letakha lamafutsa. Bebacabanga kutsi nami ngitawungena kulomkhuba wabo, kodvwa ngala, ngabachazela ngalokusebaleni kutsi mine ngiphila ngekwetsembeka. Bangihleka bulima, basho nekusho kutsi ngitawuba sehluleki.

“Ngalelinye lilanga njengobe sasesiphuma emsebentini, kwatsi chamu! imenenja. Yasesha emabhasikidi etfu, yatfola tinhlavu letakha emafutsa kuwo onkhe lawa lamanye emabhasikidi ngaphandle kweyami. Bonkhe labo lababanjwa, kwakufanele bacoshwe ngaleso sikhatsi nobe basebente emaviki lamabili bangaholi. Kulawo maviki lamabili, labafati kwabakhanyela bha! kutsi angisiso sehluleki.”

“Kungatfotisi”

Utiva njani nawutfola intfo lelahlekele lotsite? Bantfu labanyenti bavame kutitjela kutsi leyontfo seyabo, batitsele ngalabandzako endzabeni yekukutfotisa. Banemkhuba ‘wekungatfotisi.’ Batitsetselela batsi kungatfotisi akulimati muntfu. Kafisha nje bavele bacabange kutsi lololahlekelwe sewuphonse lithawula. Labanye banembono lotsi akusilo lidoko leligayelwe bona kufuna umnikati waleyo mphahla, futsi ngumsebenti lofuna sikhatsi loyo.

Nkulunkulu uyibona njani lendzaba? Umbhalo waDutheronomi 22:1-3 ucacisa kutsi lotfolile kumelwe angagcini kahle kuphela lakutfolile, kodvwa akugcine “kuze kufike sikhatsi lapho atfola umnikati.” (The New English Bible) Nangabe ungakutfotisi lokutfolile wawufananiswa nelisela. (Eksodusi 22:9) Kuyasebenta yini loko lamuhla? Christine uyavuma.

Christine nguthishela lomkhulu wesikolwa lesingekho ngephansi kwahulumende. BekunguLesitsatfu ngesikhatsi atfola umholo wakhe wenyanga. Wafaka lomholo wakhe esikhwameni wagcisha nemaphepha etikwenedi takhe, njengobe kwenta bantfu labanyenti labahlala edolobheni lelisenshonalanga kulelivekati lase-Afrika. Wamisa itekisi leyamtsatsa yamphutfumisa emhlanganweni wasemsebentini. Nango asatatatela naketama kubhadala etekisini. Lokubuhlungu kutsi ekutatateleni kwakhe wafaka sandla esikhwameni wabhadala kodvwa wangaboni kutsi sewulahla lokutsite.

Ngemuva kwesikhashana, kwachamuka  Blaise loneminyaka lengu-19 budzala atihambela. Lelijaha belite kutewubona umngani walo endzaweni lefanako lapho Christine abebambele khona umhlangano. Blaise, watfola lesishumpa semaphepha, wasifaka ekhikhini naye washona emhlanganweni. Ekupheleni kwemhlangano watjela umngani wakhe ngalesishumpa lasitfolile nekutsi lolahlekelwe ukhululekile kumtsintsa ngelucingo.

Kwema inhloko kuChristine entsambama nakatfola kutsi umholo wakhe wonkhe ulahlekile. Kwatsi hhamu! nakeva ngemngani wakhe Josephine kutsi leso sishumpa sitfolwe ngumuntfu lotsite. Christine wavele washaya lucingo ngalesosikhatsi wachaza kutsi lesishumpa besicuketseni. Wabamba wangephansi Christine ngalesikhatsi Blaise amtfotisela. Wativa njani Blaise? Besekuphele liviki ingakuye lemali, kodvwa watsi: “Injabulo lengaba nayo ngemuva kwekutsi ngibuyisele lemali kumnikati, beyiyinkhulu kunenjabulo lebinginayo ngesikhatsi ngisayigcinile.”

Imbangela Yekwetsembeka Kwabo Ngaso Sonkhe Sikhatsi

Victorine, Victoire kanye naBlaise bahlala etindzaweni letehlukene futsi abatani. Bafanana ngentfo yinye. BaboFakazi BaJehova futsi babambelele emfundzisweni yeliBhayibheli yekwetsembeka, bakubuke ngalabovu kuphumelela kwesitsembiso saNkulunkulu semhlaba lomusha. “Kepha ngesetsembiso sakhe silindzele emazulu lamasha, nemhlaba lomusha, lapho kubusela khona kulunga.” Bantfu labayobe baphila ngaleso sikhatsi batawube balungile futsi betsembekile.—2 Phetro 3:13.

Victorine utitjela kutsi njengobe adla imbhuya ngelutsi, simo siyolungiswa nguNkulunkulu. Kodvwa-ke, unjingile ngekukholwa lokuyintfo lengatsengwa ngemali. Bantfwabakhe banesimilo lesihle futsi betsembekile. Njalo ngeLisontfo “bajatjuliswa” kushumayela kubomakhelwane ngebuhle baNkulunkulu baphindze bachaze nendlela latabenetisa ngayo “bonkhe labambita ngeliciniso” futsi avikele “bonkhe labamtsandzako.”—Tihlabelelo 145:7, 18, 20.

Ngemuva kwesikhatsi, Victoire wawuyekela umsebenti enkampaneni leyakha emafutsa. Waticalela wakhe umsebenti wekutsengisa i-garri (leyakhiwa ngemjumbula) emakethe. Kwetsembeka kwakhe kwamdvonsela emakhasimende lamanyenti. Liciniso ngaye litsi sewunesikhatsi lesinyenti lasisebentisela kushumayela bantfu, abanika dvolocina ngelive lelisha lelitawuba bete kungetsembeki. Sewushadile futsi yena nendvodza yakhe bangemahlahlandlela.

Christine walahlekelwa yimali yakhe eHholweni laboFakazi BaJehova. Blaise bekangabati kahle labantfu labebanaye emhlanganweni, kodvwa bekati kutsi babazalwane bakhe labetama kwetsembeka sikhatsi sonkhe.

Bangakhi bantfu lobatiko labenta umetamo wekwetsembeka ngaso sonkhe sikhatsi? Ticabange unebantfu labangu-50, 100 nobe 200 labetsembekile. Bahlangana ngenjabulo lenjalo boFakazi BaJehova emaHholweni abo eMbuso. Kungani ungenti umetamo wekubavakashela utetayelanise nabo?

[Emavi lacashuniwe lasekhasini 12]

“Kunemvuzo lomkhulu kakhulu kuba nebantfwana labetsembekile, kwendlula ngisho kuba nemcebo.”—VICTORINE

[Libhokisi ekhasini 14]

Umbhalo WeTaga 6:30 Uyakutsetselela Yini Kweba?

Umbhalo weTaga 6:30, utsi: “Bantfu abalibukeli phansi lisela lelebela kucosha indlala ngobe lilambile.” Lenkhulumo iyakuvuna yini kweba? Cha. Umnyombo walendzaba ubonisa kutsi Nkulunkulu ulindzele kutsi lisela litfwale tono talo. Livesi lelilandzelako litsi: “Kodvwa nangabe libanjwa, kufanele likukhokhe sekuphindvwe kasikhombisa, tonkhe timphahla tendlu yakhe atetfule.” (Taga 6:31) Nome lisela lelebe ngesizatfu sekutsi lilambile lingafani nelisela lelebe ngesizatfu semona futsi lingatami kulwa namuntfu, nalo kumelwe ‘lente lokuhle’ nome libhadale. Bonkhe labafisa kujabulisa Nkulunkulu kumelwe bangalokotsi bebe.