Ababelenga Ino Magazini Balepusha Ukuti . . .

Bushe Ifya Kulya ne Filengwa na Lesa Fikatwalilila Ukubako mu Calo?

▪ Isonde lyesu ilyayemba, lyalikwata fyonse ifikabilwa pa kuti abantu babe abomi. Nomba ifi abantu bele balefulilako fye mu calo ne filengwa na lesa na fyo fileya filepwa, kuti calenga mwaipusha ukuti: ‘Bushe abantu tabakafwe nga ca kutila ifilengwa na lesa fyapwa fyonse? Bushe ifya kulya ne filengwa na lesa fikatwalilila ukubako?’

Nga tulatontonkanya pali ifi fipusho, kuti twakoseleshiwa no bulayo Lesa alaile abantu imyaka ukucila 4,000 iyapita, ubwa kuti: “Pantu inshiku shonse fye isho isonde likabako, ukubyala imbuto no kulobolola, inshita ya kutalala ne nshita ya kukaba, ulusuba ne nshita ya mpepo, akasuba no bushiku, tafyakaleke ukubako.” (Ukutendeka 8:22) Kanshi, filya fine tushitwishika ukuti akasuba kakatula, e fyo twingacetekela no kuti isonde talyakaleke ukutupeela ifyo tukabila pa kuti tutwalilile abomi.

Muli lipoti ya mu 2004 iyaleti “Bushe Isonde Kuti Lyakwata Ifya Kulya Ifya Kukumana Bonse?” Alex Kirby, uwasambilila pa mpanga ne fimenwa, atile: “Icalo cilamesha ifya kulya ifingi ifingakumana abantu bonse. Nomba ilingi icicitika ca kuti ifya kulya tafisangwa mu ncende shonse umo balefikabila, filakosa umutengo, nangu ukonaika bwangu. Kanshi amabuteko e yakabila ukushininkisha ukuti abantu bonse bali ne fya kulya, pantu kale kale kwaliba ubuyantanshi mu fya bulimi.” Nga ca kutila isonde lilesungwa bwino no kusakamana bwino ifilengwa na Lesa, te kuti tulesakamikwa ukuti ifya kulya fikacepa. Ku ca kumwenako, mu nshita ya bena Israele, Lesa alibebele bwino bwino ifyo bali no kulasunga umushili. Nge fyo calembwa pa Ubwina Lebi 25:4, Lesa aebele abena Israele ukuti: “Mu mwaka walenga 7 kukaleba isabata pa kuti umushili ukatuushe . . . Wikabyalamo imbuto mwi bala lyobe.” Nangu ca kutila tabali na kulima mu mwaka walenga 7, Lesa alaile ukuti akalenga abantu bakwe ukusangalala pa fintu ifingi ifyo bakakwata kabili tabali na kusakamikwa ukuti ifya kulya fikapwila pa nshila.—Ubwina Lebi 26:3-5.

Nangu ca kutila kuli ukubombesha muno nshiku ukufwaya ukuwamya isonde e lyo ne fyabamo, abengi bamona ukuti tapali ifine fine ifingafumamo, isonde lyalyonaika kale. Icikawamya fye isonde calembwa pa Ukusokolola 11:18. Baibolo ilanda ukuti Yehova “akonaula abaleonaula isonde.” Yehova takonaule fye abonaula isonde ne fyabamo, lelo akalenga no kuti isonde likameshe ifya kulya ifingi ifya kukumana abantu bonse pe sonde. Bonse abasuula ubufwayo bwa kwa Lesa na bonaula isonde pa mulandu wa bukaitemwe, bakonaulwa. Lelo, abatungilila ukuteka kwa kwa Yehova bakamonako na menso uko amashiwi yaba pa Amalumbo 72:16 yakafikilishiwa, ayatila: “Ingano shikafula nga nshi pano isonde; pa muulu wa mpili shikafula icine cine.”

Pa mulandu wa kutemwa kwakwe ukukalamba na mano, Yehova alipekanya ukuti abantu bakekale mu mushi wabo no kulausakamana, e kutila bakekala mwi sonde lya paradaise. (Ukutendeka 1:28) Ilyo Yehova akalateka, abantu ba cumfwila bakasambilila ukubomfya bwino ifyaba mu calo, ukwabula ukonaula ifili fyonse ifyabamo. Ala mwandini tulatasha nga nshi Lesa uutupeela fyonse kabili uukapeela ica mweo conse ifyo cilefwaya!—Amalumbo 145:16.

[Amashiwi pe bula 22]

“Amabuteko e yakabila ukushininkisha ukuti abantu bonse bali ne fya kulya, pantu kale kale kwaliba ubuyantanshi mu fya bulimi”