Oñeporandúva jepi

Oĩnepa hiʼupyrã ko yvy ape ári opa ára g̃uarã?

▪ Ñande yvy porãitépe ningo oĩ opa mbaʼe ñaikotevẽva jaikove hag̃ua. Péro jaikuaaháicha koʼág̃a rupi ñanderetave jahávo ha ojeporu vaipa umi mbaʼe porã omeʼẽva ñandéve ko yvy. Upévare heta oĩ oñeporandúva: “Oĩnepa hiʼupyrã ko yvy ape ári opa ára g̃uarã? Mboy tiémpopa ñandegueropuʼakáta gueteri ko yvy?”.

Ojapóma cuatro mil áño rasa Ñandejára oñeʼẽ hague upévare ha ipromésa tuicha ñanembopyʼaguapy. Haʼe heʼi: “Yvy oiko aja, oĩta ñemitỹ ha kóga monoʼõ. Haku ha hoʼysãta, oĩta ára haku ha ára roʼy, ára ha pyhare” (Génesis 8:22). Ndépa rejepyʼapy jepi nakoʼẽiramo g̃uarã? Upéva ningo avavépe ndoipyʼapýi, pe kuarahy osẽ katuete ára ha ára, upéicha avei ñande yvy akóinte omeʼẽta ñandéve ñaikotevẽva.

Peteĩ periodísta ontendéva koʼã mbaʼe hérava Alex Kirby heʼivaʼekue: “Ko yvy ningo omoheñói hiʼupyrã enterovépe g̃uarã. Upéicharamo jepe, heta vése ndaipóri mbaʼeve ojeʼuvaʼerã umi lugár oñekotevẽhápe, téra ndaikatúi oñeñongatu are ỹrõ hetaiterei oĩ imboriahúva ha ndoguerekóiva hepyrã. Upévare jaʼekuaa odependeveha umi polítiko rehe enterovéva ohupyty hag̃ua hiʼupy, ndahaʼéi umi sientífikore añónte” (¿Puede alimentarnos el planeta?–2004). Jaʼe porãsérõ g̃uarã oñembojaʼóramo hekopete umi mbaʼe ñaikotevẽva arakaʼeve ndofaltamoʼãi ñandéve jaʼuvaʼerã ha ñande yvy akóinte ombaʼapo porãta. Ymave upéicha oikovaʼekue Israélpe, Ñandejára heʼi chupekuéra mbaʼéichapa oiporuvaʼerã pe yvy: “Pe áño sietehápe katu pe yvy opytuʼuvaʼerã, [...] napeñemitỹmoʼãi pende kokuépe” (Levítico 25:4, ÑÑB). Haʼekuéra ningo noñemitỹivaʼerã un áño pukukue, upéicharamo jepe Ñandejára opromete omeʼẽtaha chupekuéra heta mbaʼe porã ha ndofaltamoʼãiha hiʼupyrã (Levítico 26:3-5).

Koʼág̃a rupi heta oĩ oñehaʼãva omyatyrõ yvyporakuéra ombyaivaʼekue, upéicharamo jepe ojeʼe tekotevẽha hetave mbaʼe ojejapo ha operdereimaha itiémpo hikuái. Péro jaʼe porãsérõ g̃uarã koʼã mbaʼe noĩvéima yvypóra pópe, Revelación (Apocalipsis) 11:18 heʼi Ñandejára ‘ohunditaha umi yvy ohundívape’. Haʼe oipeʼáta ko yvýgui umi opensávape ijehénte ha ohundipáva oĩva entéro. Ha heʼi avei arakaʼeve ndofaltamoʼãiha hiʼupyrã. Mbaʼépa ohupytýta umi oñemoĩva Ñandejára goviérno ykére? Salmo 72:16 heʼi: ‘Umi kóga tomyenyhẽ ñande yvy ha toñuvãmba umi yvyty’.

Ñandejára Jehová ningo iñarandueterei ha ñanderayhúgui ojapóta ko yvýgui peteĩ hardín neporãva yvyporakuérape g̃uarã, ikatu hag̃uáicha jaiko ha ñañangareko hese (Génesis 1:28). Igoviérno guýpe yvyporakuéra oiporukuaáta opa mbaʼe oĩva ko yvýpe ha umi mbaʼe porã arakaʼeve ndopamoʼãi. Ajépa jaagradesete Ñandejárape oheja rupi jaservi chupe ha omeʼẽ haguére ñandéve opa mbaʼe ñaikoteṽeva! Hiʼarive la Biblia heʼi hese: ‘Ndepojera ha nembaʼeporãme remoyg̃uatãta opa mbaʼe oikovévape’ (Salmo 145:16).

[Komentário oĩva páhina 29-pe]

“Jaʼekuaa odependeveha umi polítiko rehe enterovéva ohupyty hag̃ua hiʼupy, ndahaʼéi umi sientífikore añónte”