Babadi ba Rena ba a Botšiša . . .

Na Lefase le tla Dula le Tšweletša Dilo tše Lekanego Bakeng sa go Thekga Bophelo?

▪ Polanete ya rena e botse, Lefase, e na le bokgoni bjo bogolo bja go thekga bophelo. Lega go le bjalo, ka baka la palo e golago ya baagi le tsela yeo ditšweletšwa tša lefase di dirišwago ka lebelo, o ka ipotšiša gore: ‘Na lefase le tla dula le tšweletša dilo? Na dijo le ditšweletšwa tše dingwe di tla dula di le gona?’

Re naganišiša ka potšišo ye, re ka newa kgodišego ke seo Modimo a se holofeditšego batho nywaga e 4 000 e fetilego: “Byale le mehleng yohle ya lefase xo ka se kê xwa hlwa xò kxaotša xo byala le xo buna, le maruru le xo fiša, le lehlabula le marexa le mosexare le bošexo.” (Genesi 8:22) Ka gona, ka ge re kgodišegile gore letšatši le tla hlaba ka mehla, re ka kgodišega gore lefase le ka se kgaotše go tšweletša seo se nyakegago bakeng sa go thekga bophelo.

Ka pegong ya 2004 ya sehlogo seo se rego “Na Lefase le ka re Fepa?” Alex Kirby, mmegi wa ditaba tša tikologo, o boletše gore: “Lefase le tšweletša dijo tše di lekanego bakeng sa go fepa batho. Eupša gantši dijo di moo di sa swanelago go ba gona, goba di bitša kudu, goba di ka se kgone go bolokwa nako e telele ka mo go lekanego. Ka gona, go kgonthišetša gore motho yo mongwe le yo mongwe o ba le dijo tše lekanego ke taba ya dipolitiki e sego ya thutamahlale.” Ge lefase le laolwa gabotse le ditšweletšwa tša lona di abja ka mo go swanetšego, ga se gwa swanela go ba le lebaka la go boifa gore dijo di tla fela. Ka mohlala, mehleng ya Isiraele ya bogologolo, Modimo o neile tlhahlo e kwagalago mabapi le go diriša lefase gabotse. Ka ge go begilwe go Lefitiko 25:4, Modimo o boditše Baisiraele gore: “Ngwaxa wa xo šupa e tlo ba Sabatha ya xo khutša xa naxa, . . . O se kê wa lema thšemo ya xaxo.” Gaešita le ge ka ngwaga wa bošupa ba be ba se ba swanela go lema naga, Modimo o be a ba holofeditše gore o tla kgonthišetša gore batho ba ba le motlalo wa dilo tše dibotse gore ba se tshwenyege kudu ka taba ya gore dijo di tla fela.—Lefitiko 26:3-5.

Gaešita le ge lehono go dirwa maiteko a botegago a go lokiša tshenyo yeo e bakilwego lefaseng le dilong tšeo le di tšweletšago, ba bantši ba tshwenyega ka gore maiteko a bjalo ga se a lekana, e bile a šiilwe ke nako. Tharollo e nnoši ya sa ruri e hwetšwa go Kutollo 11:18. Go yona Beibele e bolela gore Jehofa o tla “senya bao ba senyago lefase.” Jehofa a ka se fediše feela bao ba senyago lefase le ditšweletšwa tša lona eupša o tla kgonthišetša le gore lefase le tšweletša ka boati bakeng sa badudi ba lona. Go hlokomologa morero wa Modimo ka manganga le go senya lefase bakeng sa go ikhola go tla fedišwa. Ka lehlakoreng le lengwe, bao ka go rata ba thekgago pušo ya Jehofa ba tla bona go phethagala ga mantšu ao a hwetšwago go Psalme 72:16, a rego: “Xo tlo ba le mohora wa mabêlê’ mo naxeng; ’phoxong tša thaba meré ya dienywa e tlo xwaša.”

A tutuetšwa ke lerato le le sa bapišwego le bohlale, Jehofa o rerile gore batho ba phele ka mo go sa felego mo lefaseng le go hlokomela legae la bona—paradeise yeo e lego lefase. (Genesi 1:28) Pušong ya gagwe, batho ba kwago ba tla ithuta go diriša ditšweletšwa tša lefase ka bohlale, ntle le gore ba senye mothopo wa tšona. Ruri re leboga Monei yo lerato yo a tlago go kgotsofatša kganyogo ya dibopiwa ka moka tše phelago!—Psalme 145:16.

[Ntlhakgolo go letlakala 22]

“Go kgonthišetša gore motho yo mongwe le yo mongwe o ba le dijo tše lekanego ke taba ya dipolitiki e sego ya thutamahlale”