Leeqkuna Tapukuyanqan

¿Patsachö imëka këkaqkuna imëllapis ushakanqatsuraq?

▪ Patsachöqa imëkakunam kan nunakuna y animalkunapis kawayänampaq. Tsënö kaptimpis, nunakuna más miraptin y Patsachö imëka këkaqkunata lluta ushakätsiyaptinmi wakinkunaqa kënö tapukuyan: “¿Patsachö imëka këkaqkuna imëllapis ushakanqatsuraq? ¿Ëka tiempo masraq nunakunapaq y animalkunapaqpis Patsachö mikï kanqa?”.

Chusku waranqa watakunanam pasarishqa Dios nunakunata kënö awninqan: “Patsa kanqanyaqqa, manam imëpis ushakanqatsu murukï ni ëllupaki, ni achachë ni alalë, ni tsaki tiempo ni tamya tiempo, ni paqas ni hunaq” (Génesis 8:22). Imanömi Rupay o Inti cada hunaq yarqamun, tsënöllam Patsachöpis nunakuna kawayänampaq imëka këkaqkuna imëpis ushakanqatsu.

“¿Patsa wayunqan tinkunku llapan nunakuna mikuyänampaq?” neq tïtuloyoq willakïchömi, 2004 watachö periodista Alex Kirby kënö nirqan: “Patsachöqa llapan nunakunapaqmi tukïläya mikï yarqun, pero wanayanqan sitiomanqa manam chantsu, ni atska tiempo churaratsiyänampaq allitsu o wanaq nunakuna rantiyänampaq qellëninkuna kantsu. Tsëmi llapan nunakunapaq mikï kanampaqqa cienciata estudiaqkunapitatsu, sinöqa polïticokunapita”. Alli rikäyaptin y shumaq rakiyaptinqa manam mantsashwantsu kë Patsachö këkaqkuna imëpis ushakänanta. Tsënömi karqan unë Israel nacionchöpis. Diosmi nirqan patsata imanö muruyänampaqpis. Levítico 25:4 textom willakun israelïtakunata Jehová kënö ninqanta: “Qanchis kaq wata säbadochömi chakrata paqwë hamatsiyänëki [...] manam chakrëkita murunëkitsu”. Tsë watachö chakrata mana muruyänan kaptimpis, Diosmi llapan wanayanqankunata qonan karqan y manam imëpis pachankunapaq yarpachakuyänantsu karqan (Levítico 26:3-5).

Kanan witsankunaqa kë Patsata imëka mana alli rurayanqankunapita altsëtam tïrayashqa. Tsënö kaptimpis pï mëmi pensayan imëkata rurayaptimpis manana altsakänampaq kaqta. Kë Patsata pï rasumpa altsamunampaq kaqtaqa willakun Apocalipsis 11:18 (QKW) textom. Tsëchömi “patsa ushakatseqkunata” Jehová ushakätsinampaq kaqta willakun. Diosqa ushakätsinqam pë munanqanta mana cuentapaq churarnin, kë Patsachö imëka këkaqkunata lluta ushakätseqkunata. Hinamampis pëmi ruramunqa llapan nunakunapaq Patsachö mikï kanampaq. ¿Imataraq chaskiyanqa pëpa Gobiernonta yanapaqkuna? Salmo 72:16 texto ninqan rasumpa kanqantam rikäriyanqa, “patsachöqa alläpa atska gränom kanqa, hirkakunapa puntanchöpis sobrakonqam”.

Jehoväqa alläpa kuyakoq y llapanta musyaq karmi, kë Patsa huk shumaq paraíso tikrananta y tsëchö llapan nunakuna cuidarnin täräyänanta munan (Génesis 1:28). Pëpa Gobiernonchöqa, Patsachö imëka këkaqkunata shumaq utilicëtam nunakuna yachakuyanqa y manam lluta ushakätsiyanqanatsu. ¡Alläpa agradecïdom servintsik llapan wananqantsikta qomaqnintsik Diosta! Y manam tsëllatsu, Bibliaqa willakun shamoq tiempochö ‘llapan kawaqta munanqanwan bendecinampaq’ kaqtam (Salmo 145:16).

[8 kaq päginachö ninqan]

“Llapan nunakunapaq mikï kanampaqqa [manam] cienciata estudiaqkunapitatsu, sinöqa polïticokunapita[m]”