Ua Fesili Mai le ʻAufaitau . . .

Pe Faamata o le a Lava Pea Taumafa i le Laueleele mo Tagata?

▪ E lava ma totoe mea o loo iai i lo tatou lalolagi matagofie e tausia ai tagata ma meafaiola uma o loo mau ai. Peitaʻi, o le faatuputupulaʻia o le faitau aofaʻi o tagata ma le vave ona faaaogā o alāmanuia o le laueleele e tatou te ono manatu ai: ‘⁠Pe taunuu moni le mea o loo popole i ai, o le a lē lava taumafa? Faamata e lava pea taumafa ma alāmanuia mo tagata uma?’

O le manatunatu i lenei fesili, ua faamautinoa ai iā i tatou le folafolaga a le Atua i le aiga faaletagata i le sili atu i le 4,000 tausaga ua mavae: “O aso uma e faaauau ona iai le lalolagi, e lē muta ai ona lūlū fatu ma selesele mai, o le mālūlū foʻi ma le vevela, o le tau māfanafana ma le tau mālūlū, o ao ma pō.” (Kenese 8:22) O lea, e pei ona mautinoa e susulu mai pea le lā i aso taʻitasi, e mafai foʻi ona tatou mautinoa o le a saunia e le laueleele mea e manaʻomia ina ia ola ai.

O Alex Kirby o se tusitala o le siʻosiʻomaga na fai sana lipoti i le 2004, ua faaulutalaina “Pe e Mafai e le Laueleele Ona Fafaga i Tatou?” Na ia taʻua ai: “O loo lava taumafa i le lalolagi mo tagata uma. Ae o le faafitauli, e lē o maua e tagata uma taumafa, pe e taugatā foʻi, ma e lē mafai ona tuu umi. O lea, ina ia lava taumafa mo tagata uma, e tatau ona faaleleia pulega faaletagata ae e lē faapea ua faalētonu laueleele.” Pe a vaavaaia faalelei le laueleele ma faasoasoa lelei ona alāmanuia, e leai la se mea e popole ai fua i le lē lava o taumafa. O se faataʻitaʻiga i taimi o Isaraelu anamua, na manino faatonuga a le Atua i le auala e tatau ona faaaogā ai le laueleele. I le Levitiko 25:4, na faatonu atu e le Atua Isaraelu: “O le fitu o tausaga e fai ma sapati lea e mapu ai le laueleele . . . aua e te lulu ai ni saito i lou fanua.” (O le Tusi Paia Samoa—Lomiga 1884) E ono tausaga e galueaʻiina ai le laueleele a o le tausaga lona fitu e mapu ai. Peitaʻi, na folafola atu e le Atua o le a olioli tagata i le anoanoaʻi o mea lelei e aunoa ma le popole i se oge i le lumanaʻi.—Levitiko 26:3-5.

E ui o loo faia ni taumafaiga filigā i nei aso e toe faaleleia mea ua faaleagaina o le laueleele ma ona alāmanuia, ae e toʻatele ua manatu e lē lava na taumafaiga ma ua fai si tuai. E pau le vaifofō tumau, o loo taʻua lea i le Faaaliga 11:18. O loo taʻua i inā se faamatalaga e faapea, o le a ‘⁠faafanoina e Ieova i latou o loo faaleagaina le laueleele.’ E lē gata o le a aveesea e Ieova i latou e lē pulea lelei le lalolagi ma ona alāmanuia, ae e faamautinoa foʻi o le a fau ma soloi taumafa mo tagata uma e nonofo ai. O le a faaumatia i latou uma e lē fia amanaʻia le finagalo o le Atua ma faaaogā sesē le laueleele ona o le manatu faapito. I le isi itu o i latou e lotomalilie e lagolagoina le pulega a Ieova, o le a tofo i le moni o upu o loo i le Salamo 72:16: “O le a tele saito i le laueleele; O le a fau ma soloi i tumutumu o mauga.”

I lona alofa tele ma lona atamai, na finagalo ai Ieova e nonofo tagata i le lalolagi parataiso ma vaavaai faalelei, ona o lo latou nofoaga tumau lea. (Kenese 1:28) I lana pulega, o le a iloa ai e tagata usiusitaʻi ona faaaogā ma le poto alāmanuia, e aunoa ma le faaleagaina o le anoanoaʻi o punaʻoa. Maʻeu lo tatou loto faafetai i Lē e saunia mai ma le alofa mea, auā le faamalieina o manaʻoga o meafaiola uma!—Salamo 145:16.

[Faamatalaga faaopoopo i le itulau 22]

“Ina ia lava taumafa mo tagata uma e ao ona faaleleia pulega faaletagata ae lē faapea ua faalētonu le laueleele”