‘Ol Stret Man Bambae Oli Saen Olsem San’
‘Ol Stret Man Bambae Oli Saen Olsem San’
“Biaen, ol stret man bambae oli go long niufala wol ya we Papa blong olgeta i king long hem [“kingdom blong Papa blong olgeta,” NW], nao long ples ya bambae oli saen olsem san.”—MAT. 13:43.
1. ?Wanem ol defren samting long saed blong Kingdom we Jisas i eksplenem long ol parabol?
JISAS KRAES i yusum plante pijatok mo parabol blong eksplenem ol defren samting long saed blong Kingdom. ‘Long ol tok ya blong hem, hem i toktok long ol man long parabol nomo.’ (Mat. 13:34) Hem i talem parabol long saed blong man blong sakem sid, we sid ya i minim trutok blong Kingdom. Parabol ya i soemaot se hat blong man nao i mekem se bambae hem i bilif long trutok no nogat. Hem i soemaot tu, olsem wanem Jeova i mekem trutok i gru long hat blong man. (Mak 4:3-9, 26-29) Jisas i yusum wan parabol bakegen blong soemaot olsem wanem ol man we oli lesin long tok blong Kingdom oli stap kam plante, nating se fastaem i had blong luksave se namba blong olgeta i stap kam antap. (Mat. 13:31-33) Mo tu, hem i yusum parabol blong soemaot se, i no olgeta man evriwan we oli lesin long tok blong Kingdom, we oli stret blong stap aninit long rul blong Kingdom ya.—Mat. 13:47-50. *
2. Long parabol blong Jisas long saed blong gudfala sid mo rabis gras, ?gudfala sid i minim wanem?
2 Wan long ol parabol blong Jisas i tokbaot wok blong hivimap olgeta we bambae oli rul wetem hem long Kingdom blong hem. Plante man oli kolem parabol ya se, parabol blong gudfala sid mo rabis gras. Parabol ya i stap long Matiu japta 13. Long wan narafala parabol, Jisas i talem se sid we man i sakem, i minim ‘tok blong kingdom.’ Be long parabol ya, hem i talem se gudfala sid ya i minim “ol pikinini blong kingdom.” (Mat. 13:19, 38, NW) Hem i no stap tokbaot ol man we oli stap aninit long rul blong Kingdom. Hem i tokbaot “ol pikinini” blong Kingdom, hemia olgeta we God i givim Kingdom ya i go long olgeta.—Rom 8:14-17; Gal. 4:6, 7.
Parabol Blong Gudfala Sid Mo Rabis Gras
3. Tokbaot trabol we masta long parabol ya i kasem, mo rod we hem i folem blong stretem.
3 Hemia nao parabol ya: Kingdom blong heven i olsem. “I gat wan masta we hem i go planem ol gudfala sid long garen blong hem. Be long naet, taem ol man oli slip, wan enemi blong hem i kam, i planem ol sid blong wan rabis gras long garen ya, nao i gowe. Nao ol gudfala sid ya oli gru, oli kam bigwan, oli gat kakae, be long semtaem tu, ol rabis gras ya oli gru, oli kam bigwan. Nao ol man blong wok blong masta ya oli kam luk hem, oli askem long hem se, ‘?Masta, olsem wanem? Ol sid ya we yu planem long garen blong yu, oli gudfala sid nomo. ?Be rabis gras ya i kam olsem wanem?’ Hem i talem long olgeta se, ‘No, hemia wan enemi ya we i mekem samting ya.’ Nao ol man blong hem oli askem long hem se, ‘?Be olsem wanem? ?Yu wantem mifala i go pulumaot olgeta?’ Be hem i talem se, ‘No, livim. Sipos yufala i go pulumaot ol rabis gras ya, maet bambae yufala i pulumaot ol kakae ya tu, wetem ol rabis gras ya. Tufala i save gru wantaem gogo kasem taem blong tekemaot ol kakae long garen. Long taem ya, bambae mi save talem long ol man we oli go blong tekemaot ol gudfala kakae ya, blong oli go katem ol rabis gras ya fastaem, oli fasem long bandel blong sakem i go long faea. Biaen, oli save go tekemaot ol gudfala kakae blong karem i kam long haos.’”—Mat. 13:24-30.
4. (a) ?Hu ya masta long parabol ya? (b) ?Wetaem Jisas i stat blong planem gudfala sid, mo hem i mekem samting ya olsem wanem?
4 ?Hu ya masta ya we i planem ol gudfala sid long garen blong hem? Jisas i talem ansa blong kwestin ya long ol disaepol blong hem, i se: “Masta ya we i planem ol gudfala sid, hemia mi ya, mi Pikinini blong Man.” (Mat. 13:37) Long tri yia haf we Jisas, “Pikinini blong Man,” i prij long wol ya, hem i mekem rere wan garen blong planem gudfala sid long hem. (Mat. 8:20; 25:31; 26:64) Long lafet blong Pentekos long yia 33 K.T., hem i stat blong planem ol gudfala sid ya, hemia “ol pikinini blong kingdom.” Jisas i mekem olsem taem Jeova i yusum hem blong makemaot ol disaepol wetem tabu spirit, blong oli kam ol pikinini blong God. * (Wok 2:33) Gudfala sid ya i gru, i kam bigwan, mo i karem kakae. Taswe, risen blong planem gudfala sid ya i blong hivimap fulnamba blong ol man we bambae oli rul wetem Jisas long Kingdom blong hem.
5. Long parabol ya, ?hu ya enemi ya? ?Mo hu ya ol rabis gras?
5 ?Hu ya enemi ya, mo hu ya ol rabis gras? Jisas i talem se enemi ya “hemia Setan.” Ol rabis gras “hemia ol man blong Setan.” (Mat. 13:25, 38, 39) Rabis gras we Jisas i yusum olsem pijatok, hem i posen. Be taem hem i smol, hem i luk olsem gru blong gudfala sid ya wit. !Pijatok ya i nambawan blong eksplenem ol giaman Kristin, olgeta we oli stap talem se oli ol pikinini blong Kingdom, be oli no karem gudfala frut! Ol giaman Kristin ya we oli stap talem se oli man blong Kraes, oli rili “ol pikinini” blong Setan.—Jen. 3:15.
6. ?Wetaem ol rabis gras i stat blong kamaot? ?Long taem ya, olsem wanem ol man “oli slip”?
6 ?Ol giaman Kristin we oli olsem rabis gras ya, oli kamtru wetaem? Jisas i talem se: “Long naet, taem ol man oli slip.” (Mat. 13:25) ?Hemia wetaem? Ansa i stap long ol tok we aposol Pol i talem long ol elda long Efesas, se: “Mi mi save finis, se bambae, taem mi mi aot long yufala, olgeta ya we oli olsem wael dog, bambae oli kam long yufala, mo bambae oli ronem yufala ol man blong Jisas, olsem we yufala i sipsip nomo. Yes, i gat taem i stap kam, we sam man blong yufala bambae oli save girap, oli giaman nomo blong lidim ol man blong Jisas oli biaen long olgeta, oli go krangke.” (Wok 20:29, 30) Hem i gohed blong talem long ol elda ya se oli mas stap wekap gud. Ol aposol oli “stap blokem” ol man ya we oli karem giaman tijing i kam insaed long Kristin kongregesen. Be taem ol aposol ya wanwan oli stap ded mo oli go slip long beregraon, plante Kristin oli stat blong slip long saed blong wosip. (Ridim 2 Tesalonaeka 2:3, 6-8.) Hemia nao taem we plante giaman tijing oli stat blong kam insaed long Kristin kongregesen.
7. ?I gat sam long ol gudfala sid ya we i kam rabis gras? Eksplenem.
7 Jisas i no talem se ol gudfala sid bambae i kam rabis gras, nogat. Hem i talem se wan man i planem rabis gras ya long medel blong ol gudfala sid. From samting ya, parabol ya i no stap tokbaot sam trufala Kristin we oli lego trutok. Hem i stap tokbaot traehad blong Setan blong spolem Kristin kongregesen, taem hem i putum sam rabis man insaed long hem. Taem laswan aposol, hemia Jon, i kam olfala, plante man oli kamtru finis we oli tijim ol giaman tijing.—2 Pita 2:1-3; 1 Jon 2:18.
‘Tufala i Save Gru Gogo Taem Blong Tekemaot Kakae Long Garen’
8, 9. (a) ?From wanem i isi long ol man we oli lesin long Jisas, blong kasem save long tok we masta i talem long ol man blong wok blong hem? (b) ?Long taem blong yumi, olsem wanem gudfala sid ya mo rabis gras tufala i gru wantaem?
8 Ol man blong wok blong Masta oli talemaot rabis gras ya long hem. Biaen, oli askem long hem se: “?Olsem wanem? ?Yu wantem mifala i go pulumaot [ol rabis gras ya]?” (Mat. 13:27-30) Maet samfala oli sapraes long ansa blong hem. Hem i talem long olgeta blong letem gudfala sid mo rabis gras tufala i gru tugeta, gogo kasem taem blong tekemaot kakae long garen. Ol disaepol blong Jisas oli kasem save se i waes blong mekem olsem. Oli save se i hadwok tumas blong luksave weswan i gru blong wit mo weswan i gru blong rabis gras ya. Mo sam long olgeta we oli man blong wokem garen, bambae oli save se oltaem ol rus blong rabis gras ya oli fasfas wetem ol rus blong gudfala sid ya wit. !From ol risen ya nao Masta i talem long olgeta blong wet!
9 Long sem fasin, long ol handred yia we oli pas, ol jos we oli stap talem se oli Kristin oli fulap long rabis gras. Fastaem, samting ya i stat long ol Katolik mo Otodoks jos, mo biaen i kamaot long ol defren grup blong Protestan we oli stanap. Be long semtaem, i gat sam gudfala sid blong wit we masta i planem long garen, hemia wol ya. Long parabol ya, masta i mas wet longtaem lelebet blong ol sid ya oli gru. Hem i wet gogo kasem taem blong tekemaot kakae long garen. Taem ya blong tekemaot kakae i wan taem we i sot moa long taem ya we sid i stap gru.
Taem Blong Tekemaot Kakae, We Oli Wet Longtaem Long Hem
10, 11. (a) ?Taem blong tekemaot kakae long garen, hemia wetaem? (b) ?Olsem wanem ol enjel oli tekemaot ol man we oli olsem gudfala sid long garen, mo karem olgeta oli go long haos blong Jeova?
10 Jisas i talem se: “Taem blong karem kakae long garen, hemia taem ya we i klosap long en blong rabis wol ya. Mo ol man blong karem kakae, hemia ol enjel.” (Mat. 13:39, NW) Long ol las dei blong rabis wol ya, wok ya blong hivimap ol pikinini blong Kingdom mo seraotem olgeta long ol man we oli olsem rabis gras, i stap gohed. Aposol Pita i tokbaot wok ya se: “Naoia, taem i kam finis blong God i jajem olgeta man. Mo faswan blong hem, hem i mas jajem ol famle blong hem. Mo sipos hem i statem wetem yumi, be taem hem i finisim wok ya long olgeta we oli no bilif long gud nius blong hem, bambae i nogud tumas long olgeta.”—1 Pita 4:17.
11 Smoltaem afta we ol las dei oli stat, hemia long “taem ya we i klosap long en blong rabis wol ya,” jajmen i stat wetem olgeta we oli stap talem se oli ol trufala Kristin—nating se oli rili “ol pikinini blong kingdom” no “ol man blong Setan.” Long stat blong taem blong tekemaot kakae long garen, Bigfala Babilon i foldaon “fastaem,” mo “biaen,” ol enjel oli hivimap ol pikinini blong Kingdom. (Mat. 13:30) ?Olsem wanem ol enjel oli tekemaot ol man we oli olsem gudfala sid ya mo karem olgeta oli go long haos blong Jeova? Sam long olgeta we oli ded finis oli kasem praes blong olgeta long heven. Ol narawan we oli olsem gudfala sid, oli kam insaed long Kristin kongregesen, oli mekem trufala wosip, nao God i lukaot gud long olgeta mo i glad long olgeta.
12. ?Taem blong tekemaot kakae long garen i gohed longtaem no olsem wanem?
12 ?Jajmen ya i gohed longtaem no olsem wanem? Jisas i tokbaot “taem” blong tekemaot kakae long garen. Yes, wok ya i tektaem lelebet, taswe jajmen ya tu i tektaem. (Rev. 14:15, 16) Jajmen blong ol wanwan man we tabu spirit i makemaot olgeta, i stap gohed long ol las dei blong wol. Mo bambae i gohed gogo God i putum laswan mak blong hem long olgeta.—Rev. 7:1-4.
13. ?Olsem wanem ol rabis gras oli mekem man i foldaon? ?Olsem wanem oli mekem sin?
13 ?Hu olgeta we ol enjel oli tekemaot olgeta oli no moa stap long Kingdom? ?Mo olsem wanem olgeta ya oli mekem man i foldaon, mo oli ol man blong mekem sin? (Mat. 13:41) Long plante handred yia finis, ol lida blong ol giaman Kristin skul we oli olsem rabis gras, oli lidim plante milian man oli gorong. Oli tijim olgeta long “ol samting blong mekem man i foldaon.” Hemia ol tijing we oli spolem nem blong God, olsem tijing ya se man bambae i panis blong olwe long helfaea, mo tijing blong Triniti we ol man oli konfius long hem mo oli no save eksplenem. Plante lida blong skul oli soemaot wan nogud eksampol long ol sipsip blong olgeta, taem oli agri long ol rabis fasin blong wol ya. Mo plante long olgeta oli mekem ol rabis fasin tu, we oli no sem nating from. (Jem. 4:4) Mo tu, ol jos we oli giaman se oli Kristin, oli no moa tok agensem ol rabis fasin. Oli letem ol memba blong olgeta oli gohed nomo long rod ya. (Ridim Jud 4. *) Be long fes blong olgeta man, oli mekem olsem we oli ona long God. !Tru ya, ol pikinini blong Kingdom oli glad tumas blong seraot long ol rabis gras ya, mo ol kruked tijing we oli mekem man i foldaon!
14. ?Olsem wanem olgeta we oli olsem rabis gras oli stap krae mo kakae tut blong olgeta?
14 Olgeta we oli olsem rabis gras oli stap krae mo kakae tut blong olgeta. ?Hemia i minim wanem? (Mat. 13:42) ‘Ol man ya blong Setan’ oli harem nogud, from we “ol pikinini blong kingdom” oli mekem ol giaman tijing blong olgeta, we oli olsem posen, oli kam long klia ples. Oli harem nogud tu from we ol memba blong jos oli no moa sapotem gud olgeta, mo oli no moa letem ol lida ya oli bos long olgeta.—Ridim Aesea 65:13, 14.
15. ?Wanem mining blong tok ya se bambae oli bonem ol rabis gras long faea?
15 ?Wanem mining blong tok ya se bambae oli hivimap ol rabis gras ya mo bonem long faea? (Mat. 13:40) Hemia i stap tokbaot laswan samting we bambae i hapen long ol rabis gras ya. Bonem long faea i min se bambae oli lus blong olwe. (Rev. 20:14; 21:8) Ol giaman Kristin ya we oli olsem rabis gras, bambae oli lus olgeta long taem blong “bigfala trabol.”—Mat. 24:21.
“Bambae Oli Saen Olsem San”
16, 17. ?Profet tok blong Malakae i talem wanem long saed blong haos blong God? ?Mo olsem wanem profet tok ya i stat blong kamtru?
16 ?Wetaem olgeta we oli olsem gudfala sid blong wit bambae oli “saen olsem san”? (Mat. 13:43) Malakae i talemaot wan profet tok long saed blong wok blong klinim haos blong God, i se: “Hae God i gat olgeta paoa, mo hem i talem se, ‘ . . . Masta ya blong yufala we yufala i stap wet blong luk, hem bambae i kamtru long tabu haos blong hem kwiktaem nomo, we bambae yufala i sek long hem. Man ya we yufala i wantem blong luk hem, bambae i kamtru, nao i talemaot promes we mi mi mekem wetem yufala. . . . ?Be taem hem i kam, hu nao bambae i naf blong stanap long dei ya? ?Taem we hem i kamtru, hu nao bambae i save stanap long fes blong hem? Taem hem i kam, wok blong hem, bambae i mekem man i klin, olsem we man i yusum sop blong wasem klos we i doti. Wok blong hem bambae i olsem faea we man i yusum blong bonem aean blong mekem i klin. Bambae hem i kam blong jajem olgeta man. Bambae hem i mekem olsem we man i bonem silva mo gol blong mekem i kam klin. Hem bambae i mekem laef blong ol pris i klin long fes blong Hae God, blong oli save tekem ol presen we oli stret i kam long hem.’”—Mal. 3:1-3.
17 Long taem blong yumi, profet tok ya i stat kamtru long yia 1918. Hemia nao taem we Jeova, wetem Jisas Kraes, ‘man ya blong talemaot promes we God i mekem,’ tufala i kamtru blong jekemap haos blong God. Malakae i talem wanem we i hapen afta we tufala i klinim haos blong God, i se: “Long taem ya, ol man blong mi bambae oli luksave fasin we bambae mi mekem long ol man. Ol stret man oli stap mekem wok blong mi, mo bambae mi mekem i stret long olgeta. Be ol man nogud, oli no stap mekem wok blong mi, nao bambae mi mekem i narafala long olgeta.” (Mal. 3:18) Long taem ya, ol trufala Kristin oli girap mo wok wetem niufala paoa. Samting ya i soemaot se taem blong tekemaot kakae long garen i stat.
18. ?Profet Daniel i talem se wanem bambae i hapen long taem blong yumi?
18 Profet Daniel i tokbaot taem blong yumi, i se: “Olgeta we oli waes gud bambae oli saen we i saen olsem san. Mo olgeta we oli bin tijim ol man blong mekem ol stret fasin, bambae oli saen olsem ol sta gogo i no save finis.” (Dan. 12:3) ?Hu olgeta ya we oli saen we i saen? !Hemia ol Kristin we tabu spirit i makemaot olgeta! !Olgeta ya oli ol gudfala sid blong wit we Jisas i tokbaot long parabol blong hem! Wan bigfala kampani blong ol sipsip blong God oli luksave klia nomo wok ya blong “pulumaot” ol giaman Kristin we oli olsem rabis gras. Bigfala kampani ya we i gat janis blong laef aninit long rul blong Kingdom, i joen wetem ol laswan blong Isrel blong God we oli stap yet long wol. Olgeta evriwan ya oli letem laet blong olgeta i saenaot long wol ya we i tudak nomo.—Sek. 8:23; Mat. 5:14-16; Fil. 2:15.
19, 20. ?“Ol pikinini blong kingdom” oli stap wet blong kasem wanem praes we oli wantem tumas? ?Bambae yumi tokbaot wanem long nekis stadi?
19 Tede, “ol pikinini blong kingdom” oli wet blong kasem praes we oli wantem tumas, hemia laef long heven. (Rom 8:18, 19; 1 Kor. 15:53; Fil. 1:21-24) Be go kasem taem ya, oli mas holemstrong long God, gohed blong saen olsem san, mo stap defren long “ol man blong Setan.” (Mat. 13:38; Rev. 2:10) !Yumi evriwan i save glad tumas we yumi gat janis blong luksave ol pikinini blong kingdom we oli saen olsem san, mo we oli defren olgeta long ol rabis gras we ol enjel oli stap “pulumaot”!
20 ?Be olsem wanem ol pikinini blong Kingdom wetem bigfala kampani we i save laef olwe long wol ya aninit long rul blong Kingdom, oli olsem wan kampani nomo? Nekis stadi bambae i ansa long kwestin ya.
[Ol futnot]
^ par. 1 Blong kasem save moa long ol parabol ya, ridim Wajtaoa blong Julae 1, 2008, pej 22-32.
^ par. 4 Long parabol ya, planem sid i no minim wok blong prij mo pulum ol man oli kam disaepol, blong hivimap ol Kristin we bambae tabu spirit i makemaot olgeta, nogat. Long saed blong gudfala sid ya we masta i planem long garen blong hem, Jisas i talem se: “Olgeta ya oli ol pikinini blong kingdom [i no talem se bambae “oli kam” ol pikinini blong kingdom].” Planem ol gudfala sid ya i min se tabu spirit i makemaot ol pikinini ya blong Kingdom, taem oli stap long wol ya we i olsem garen.
^ par. 13 Jud 4, NW: “Mi mekem olsem from we sam man we oli kam insaed long kampani blong yufala, Baebol i talemaot jajmen long olgeta longtaem finis. Ol man ya oli no ona long God, mo oli yusum gladhat blong God blong yumi olsem eskius blong mekem ol fasin olbaot. Oli no stap tru long Masta blong yumi, Jisas Kraes, we yumi blong hem nomo.”
?Yu Yu Rimemba?
?Long parabol blong Jisas long saed blong gudfala sid mo rabis gras, wanem mining blong ol samting ya?
• Gudfala sid
• Masta we i planem sid
• Planem sid
• Enemi
• Ol rabis gras
• Taem blong tekemaot kakae long garen
• Haos blong hivimap kakae long hem
• Krae mo kakae tut blong olgeta
• Faea
[Kwestin]
[Tok blong pija long pej 20]
Lafet blong Pentekos long yia 33 K.T. hem i stat blong wok ya blong planem gudfala sid
[Tok blong pija long pej 23]
Naoia ol enjel oli stap karem ol man we oli olsem gudfala sid ya wit oli kam long haos blong Jeova
[Foto]
Pictorial Archive (Near Eastern History) Est.