“Chon Pwüng Repwe Tittin Usun Akkar”

“Ekewe chon pwüng repwe tittin usun akkar lon Mwün semer.”​—MAT. 13:43.

1. Jises a äeä kapas äwewe le affata met sokkun pworaus usun ewe Mwu?

 JISES KRAIST a eäni chommong kapas monomon are kapas äwewe pwe epwe affata sokkopaten pworaus usun ewe Mwu. A “aea pworausen awewe an epwe aiti ngeni ewe mwichen aramas ekei mettoch meinisin. Esap apasa och mettoch ngeniir lükün an epwe aea eu pworausen awewe.” (Mt. 13:34) Lon än Jises kewe kapas äwewe usun än emön amorafeili pwikilin pworaus mi enlet usun ewe Mwu, a menlapei lamoten letipen emön lon an etiwa ewe pworaus, me pwal wisen Jiowa le ämääraatä än emön riri ngeni. (Mark 4:3-9, 26-29) Jises a pwal äweweei usun chommongoloon ekkewe mi etiwa pworausen ewe Mwu inaamwo ika ese kon pwä mämmäärir me le poputään. (Mt. 13:31-33) A pwal affata pwe esap fich ngeni meinisin mi etiwa pworausen ewe Mwu ar repwe nom fän nemenian.​—Mt. 13:47-50. *

2. Lon än Jises kapas äwewe usun wiich me pötöwölingaw, met ekkewe pwikil mi mürinnö ra liosuetä?

² Iwe nge, eü me lein ekkena kapas äwewe a menlapei ioifengenin chokkewe repwe eti Jises le nemenem lon Mwuun we. Ena kapas äwewe usun wiich me pötöwölingaw a mak lon Mattu sopwun 13. Lon pwal eü kapas äwewe, Jises a erä pwe ekkewe pwikil ra liosuetä “kapasen ewe mu,” nge lon ei kapas äwewe, ekkewe pwikil mi mürinnö ra liosuetä och mettoch mi sokkolo, weween, “noun ewe mu.” (Mt. 13:19, 38, TF) Ese kapas usun chokkewe mi nom fän nemenien ewe Mwu, nge a kapas usun “noun ewe mu” weween, chokkewe mi älemwiri ena Mwu.​—Rom 8:14-17; älleani Kalesia 4:6, 7.

Ewe Kapas Äwewe usun Wiich me Pötöwölingaw

3. Äweweei osukosuken ewe mwän lon ewe kapas äwewe. Iwe, ifa usun a ataweei an na osukosuk?

³ Iei ewe kapas äwewe: “Mwün Läng a wewe ngeni eman mwän a amworafeili pwükil mi mürina lon an tanipi. Lon eu pwin, lupwen aramas meinisin ra möür, ewe chon oputan a war o amworafeili ekewe pwükil mi ngau lein ekewe pwükilin wiich, iwe, a feila. Lupwen ekewe irä ra märita o ekewe umwun wiich ra popuetä le sikiwu, ekewe pötöwölingau ra pwal pwä. Mürin nöün ewe mwän kewe chon angang ra feito ren o üreni, ‘Äm samol, ka amworafeili pwükil mi mürina lon om tanipi. Nge ia chök ekewe pötöwölingau ra feito me ie?’ A pölüeniir, ‘Eman chon oputaei a föri ei.’ Iwe, ekewe chon angang ra aisini, ‘Ifa usun, ka mochen aipwe feila o üttätä ekewe pötöwölingau?’ Iwe, a üreniir, ‘Apwi, pun lupwen oupwe üttätä ekewe pötöwölingau a tongeni fis pwe ekewe wiich repwe pwal etiir le üttütä. Oupwe likitiir pwe repwe mämäritäfengen tori fansoun kinikin. Mürin ngang üpwe üreni ekewe chon angangen räs pwe repwe akomwen üttätä ekewe pötöwölingau, repwe pilüküfengeniir o keniirela. Mürin repwe achufengeni ekewe wiich o iseniir lon ai lenien iseis.’”​—Mt. 13:24-30.

4. (a) Iö ewe mwän lon ewe kapas äwewe? (b) Ineet me ifa usun Jises a poputä le fotuki pwikil?

 ⁴ Iö ewe mwän a amorafeili pwikil mi mürinnö lon an tänipi? Jises a pölüweni lupwen a ereni nöün kewe chon käeö: “Ewe mwän mi amworafeili ekewe pwükil mi mürina, iei i ewe Nöün Aramas.” (Mt. 13:37) Jises, ewe “Noun aramas,” a ammolnatä pwülün an tänipi atun a afalafal woon fönüfan ükükün ülüngät esopw ier. (Mt. 8:20; 25:31; 26:64) Iwe, seni Pentikos 33 C.E. feilo, a poputä le fotuki pwikil mi mürinnö, weween, “noun ewe mu.” Jises, ewe chon tupuni Jiowa, a poputä le foffot lupwen a ninatiw ewe ngün mi fel woon ekkewe chon käeö, a epitiir pwe repwe nöün Kot kewe. * (Fof. 2:33) Ekkewe pwikil mi mürinnö ra mämmääritä me äsimaüetä. Iwe, iei popunlapen an a fot pwikil mi mürinnö pwe epwe ochufengeni meinisin chokkewe repwe eti Jises le nemenem me älemwiri Mwuun we.

5. Iö ewe chon oput lon ei kapas äwewe? Ekkewe pötöwölingaw ra liosuetä iö?

⁵ Iö ewe chon oput, me iö ekkewe pötöwölingaw? Jises a apasa pwe ewe chon oput, i ewe “Tefil.” Ekkewe pötöwölingaw, iir “nöün ewe mi Ngau.” (Mt. 13:25, 38, 39) Ekkewe pötöwölingaw Jises a eäni äwewe woor ra poison, nge me le kükkünür, ra usun chök wiich. A fich ar repwe liosuetä ekkewe tipitipin chon Kraist, chokkewe mi erä pwe iir nöün ewe Mwu nge rese uwaani uwa mi enlet! Ekkena chon Kraist mi likotuputup ra chök apasa pwe ra tapwelo mwirin Kraist, nge iir wesewesen “mwirimwirin” Setan ewe Tefil.​—Ken. 3:15.

6. Ineet ra pwä ekkewe pötöwölingaw, me ifa usun aramas ra “möür” lon ena fansoun?

⁶ Ineet ra pwä ekkena chon Kraist mi usun chök pötöwölingaw? Jises a apasa pwe “fansoun aramas ra möür.” (Mt. 13:25, TF) Ineet ena? Sia tongeni küna pölüwan seni alon aposel Paul ei ngeni ekkewe elter lon Efisus: “Ngang üa silei pwe mürin ai üpwe feila senikemi, aramas mi wewe ngeni wolif mwacho repwe feito leimi o repwe fokun afeiengaua ämi we mwich. Epwe war ewe fansoun, lupwen ekoch me lon ämi we mwich repwe eäni kapas chofona ar repwe atokala ekewe chon lükü Jesus pwe repwe etiir.” (Fof. 20:29, 30) Iwe, Paul a pesei ekkena elter ar repwe nennelo me mammasa. Iwe, ra “pinei” afalafal chofona pwe resap tolong lon ewe mwichefel. Iwe nge, mwirin än ekkewe aposel möürülo lon mälo, chommong chon Kraist ra möürülo, weween, ra apwangapwangalo lon ar lükü. (2 Tesalonika 2:3, 6-8, TF.) Lon ena atun, a poputä än afalafal chofona tolong lon ewe mwichefelin Chon Kraist.

7. Mi wor ekkoch wiich ra wiliti pötöwölingaw? Äweweei mwo.

⁷ Jises ese apasa pwe ewe wiich epwe wiliti pötöwölingaw, nge a erä pwe ekkewe pötöwölingaw repwe fot lein irään wiich. Ina minne, ei kapas äwewe ese weneiti än Chon Kraist tokolo seni ewe enlet. Nge a affata än Setan achocho le angawalo ewe mwichefelin Chon Kraist ren an atolonga aramas mi ngaw. Atun ewe säingoon aposel itan Jon a chinnap, a fen pwä chommong sense mi eäni afalafal chofona.​—2 Pit. 2:1-3; 1 Jon 2:18.

“Oupwe Likitiir pwe Repwe Mämäritäfengen Tori Fansoun Kinikin”

8, 9. (a) Pwata ekkewe chon käeö repwe weweiti alon ewe Masta ngeni nöün kewe chon angang lon än Jises we kapas äwewe? (b) Lon pwönütään ei kapas äwewe, ifa usun ra mämmäärfengen wiich me pötöwölingaw?

⁸ Nöün ewe Masta kewe chon angang ra esile ngeni ewe osukosuk, iwe, ra eisini:  “Ka mochen aipwe feila o üttätä ekewe pötöwölingau?” (Mt. 13:27, 28) Eli pölüwan epwe ämäirü. A ereniir pwe repwe likitiir pwe repwe mämmäärfengen tori fansoun räs. Nöün Jises kewe chon käeö ra weweiti pwüngün alon. Ra mirititi weiresin ar älefila lefilen irään wiich me pötöwölingaw. Chokkewe mi sile atake ra pwal mirititi pwe waren ewe pötöwölingaw epwe fokkun nikofitfengen me waren ewe wiich. * Ina pwata ewe Masta a ereniir repwe witiwit!

⁹ Pwal ina chök usun, seni chök me loom, ekkewe keangen lamalamen Kristentom ra uwaani chommong pötöwölingaw, akkomw lein ekkewe lamalamen Katolik me Orthodox, iwe mwirin, lein chommong keangen lamalamen Pirostan mi fförütä. Lon chök ena atun, äkkäeföü pwikilin ewe wiich ra pwal fotetiw lon tanipiin fönüfan. Ewe chon atake lon ewe kapas äwewe a mosonottam le witiwiti mämmääritään tori fansoun ewe räs epwe war.

A Tori Ewe Fansoun Räs

10, 11. (a) Ineet ewe fansoun räs? (b) Ifa usun ekkewe wiich lon kapas äwewe ra iseis lon än Jiowa leenien iseis?

¹⁰ Jises a erenikich: “Ewe fansoun kinikinin räs, iei ewe fansoun lesopolan, nge ekewe chon angangen räs, ir ekewe chon läng.” (Mt. 13:39) Atun ekkewe ränin lesopwoloon ei otot mi ngaw, nöün ewe mwu kewe repwe ioifengen me käimulo  seni ekkewe pötöwölingaw. Ren ei, ewe aposel Piter a erenikich: “A tori ewe fansoun pwe Kot epwe popuetä le eäni kapwüng, nge epwe akomwen popuetä won nöün Kot aramas. Iwe, are epwe popuetä rech, epwe ifa usun sopolan chokewe resap aleasochisi ewe Pworausen Manau seni Kot?”​—1 Pit. 4:17.

¹¹ Ekiselo mwirin poputään “ekkewe ränin lesopwoloon,” a poputä kapwüngün chokkewe mi erä pwe iir chon Kraist mi enlet, ese lifilifil ika wesewesen iir “noun ewe mu” are “noun ewe mi Ngau.” “Akkomw” Papilon mi Lapalap a turutiw, me “mwirin,” nöün ewe Mwu kewe ra kochufengen lepoputään ewe fansoun räs. (Mt. 13:30) Nge ikenäi, ifa usun ekkewe wiich lon kapas äwewe ra iseis lon än Jiowa we leenien iseis? Ekkoch ra iseis lon ewe mwichefelin Kraist, ikewe ra küna än Kot chen me tümün ie, nge pwal ekkoch ra küna feiöchür lon läng.

12. Epwe ifa ttamen än ewe räs sopwosopwolo?

¹² Ifa ttamen ewe fansoun kapwüng? Iwe, Jises a kapas usun ewe “fansoun” räs, weween, mi chök sopwosopw. (Pwar. 14:15, 16) Kapwüngün emön me emön mi kepit epwe sopwosopwolo atun ekkewe rän le sopwoloon tori ar repwe mechenilo.​—Pwar. 7:1-4.

13. Ifa usun ekkewe pötöwölingaw ra pwisin föfföringaw me oturukapa aramas?

¹³ Iö kewe repwe wiwiitä seni ewe Mwu, me ifa usun ra föfföringaw me oturukapa ekkoch? (Mt. 13:41) Fite fite ier, ekkewe nöüwisen lamalamen Kristentom mi usun chök pötöwölingaw ra fen otupu fite million aramas. Ra föri ena ren ar kewe afalafal mi osüfölüngawa Kot, “ekkewe minen oturukapa meinisin,” äwewe chök, ewe afalafal pwe Kot a kan eriäfföüü aramas lon eü ekkein ell me ewe afalafalen Trinitas. Chommong nöüwisen lamalam ra isetiw leenien äppirü mi ngaw ngeni chon ar kewe pekin ren ar chiechi ngeni ei fönüfan me ar kewe föfföringaw. (Jem. 4:4) Pwal och, chommong tipitipin lamalamen Kraist ra mutatä sokkopaten föfförün lisowu mwääl lein chon ar kewe lamalam. (Älleani Juta 4.) Inaamwo ika ra föfföri ekkeei mettoch, nge ra chüen elingepin me tipin ämmäfel. A ifa me pwapwaan nöün ewe Mwu kewe le imu seni etipetipaen me afalafalaen ekkewe mi usun chök pötöwölingaw mi oturukapa aramas!

14. Met weween än ekkewe pötöwölingaw kechiw me asüngürü ngiir?

¹⁴ Met weween än ekkewe pötöwölingaw kechiw me asüngürü ngiir? (Mt. 13:42) “Noun ewe mi Ngau” kewe ra riäfföü pun “noun ewe mu” kewe ra pwäri mwäällin ar kewe afalafal me föfföringaw mi usun chök poison. Ra pwal kechiweiti kisiloon älillis seni chon ar kewe lamalam, me pöütüloon ar nemenem woor.​—Älleani Aisea 65:13, 14.

15. Met weween än ekkewe pötöwölingaw ioifengen me kekilo?

¹⁵ Met weween än ekkewe pötöwölingaw ioifengen me kekilo? (Mt. 13:40) A wewe ngeni kapwüngür lon mwachkkan. Repwe koturulong lon ewe ekkei mi ngetenget mi liosuetä mälofochofoch. (Pwar. 20:14;  21:8) Ekkewe tipitipin chon Kraist mi usun chök pötöwölingaw, iir chon likotuputup, iwe, repwe rosolo atun ewe ‘riaffou mi lapalap.’​—Mt. 24:21, TF.

“Repwe Tittin Usun Akkar”

16, 17. Met Malakai a oesini usun än Kot imwenfel, me ineet a poputä le pwönütä?

¹⁶ Ineet atun ekkewe mi usun chök wiich repwe “tittin usun akkar”? (Mt. 13:43) Iei än Malakai we oesini atun limelimen ewe imwenfelin Kot, a apasa: “‘Ewe Samol mi Lapalap, ewe oua kütta, epwe müttir feito lon imwan imwenfel. Nengeni, epwe feito ewe chon künön ewe pwon, ätewe oua pwapwaiti. Nge iö epwe tongeni pwäk lon ewe ränin an feito? Iö epwe tongeni ütä, lupwen epwe pwä? Pun i a wewe ngeni soop mi müttir limetawu limengau, a pwal wewe ngeni än eman ekkein ketel mächä. I epwe mot usun eman chon ketel mächä me eman chon limelim silifer. Epwe limeti chon ewe ainangen Lefi o alimöchüür usun eman a limeti kolt me silifer, tori repwe uwato ekewe asor mi fich ngeni ewe Samol mi Lapalap.’”​—Mal. 3:1-3.

¹⁷ Lon ach ei fansoun, pwönüetään ei oesini a poputä lon ewe ier 1918, atun Jiowa me “chon künön ewe pwon,” Jises Kraist, repwe etittina ewe imwenfel, weween, ewe kokkotun fel ngeni Jiowa. Malakai a erenikich met epwe fis atun ei angangen limelim epwe wes, a erä: “Oupwe tongeni alefilasefäli lefilen eman chon pwüng me eman aramasangau, lefilen ätewe mi angang ngeni Kot me ätewe esap angang ngeni.” (Mal. 3:18) Än ekkewe chon Kraist mi enlet öttüressefäl le föri ar angang a affata pwe ina atun a poputä ewe räs.

18. Met Taniel a oesini pwe epwe fis lon ach ei fansoun?

¹⁸ Ewe soufos Taniel a fosun ach keei fansoun atun a oesini: “Iwe, ekewe chon mirit repwe meriweriw usun meriweriwen läng, nge chokewe mi aiti ngeni chomong aramas usun ar repwe föri mine a pwüng repwe titin usun fü kana tori feilfeilachök.” (Tan. 12:3) Iö keei ra tittin usun akkar? Ikkena iir ekkewe Chon Kraist mi kepit ra liosutiw ren ewe wesewesen wiich Jises a kapas usun lon an we kapas äwewe usun wiich me pötöwölingaw. Eü mwichen siip mi chommongolo ra esilla ‘wiwiitään’ ekkewe tipitipin chon Kraist mi usun chök pötöwölingaw. Lupwen repwe pach ngeni lusun chon Israel mi kepit, chokkana mi mochen nonnom fän nemenien Mwuun Kot ra pwal etina saram lon ei otot mi rochopwak.​—Sek. 8:23; Mt. 5:14-16; Fil. 2:15.

19, 20. Met “noun ewe mu” kewe ra mwötöresiti, me met sipwe pworaus usun lon en lesen mwirin?

¹⁹ Ikenäi, “noun ewe mu” kewe ra mwötöresiti ar repwe angei liwiniir lon läng. (Rom 8:18, 19; 1 Kor. 15:53; Fil. 1:21-24) Iwe nge, tori ena fansoun, repwe chök tuppwöl, sopwosopwolo lon ar tittin, me sokkolo seni “noun ewe mi Ngau” kewe. (Mt. 13:38; Pwar. 2:10) A ifa me pwapwaach pwe sia tongeni küna mwiriloon wiwiitään ekkewe pötöwölingaw lon ei fansoun!

²⁰ Nge ifa usun nöün ewe Mwu keei me ewe mwich mi lapalap mi äpilükülükü manau esemuch woon fönüfan ra ririfengen? En lesen mwirin epwap pölüweni ei kapas eis.

[Ekkewe pwóróus fan]

Ka Chechchemeni?

Lon än Jises we kapas äwewe usun ewe wiich me ekkewe pötöwölingaw, met weween ekkeei kinikin?

• Ekkewe pwikil mi mürinnö

• Ewe mwän mi foffot pwikil

• Fotetiwen ekkewe pwikil

• Ewe chon oput

• Ekkewe pötöwölingaw

• Ewe fansoun räs

• Ewe leenien iseis

• Kekkechiw me asüngürü ngii

• Ewe leenien kek mi ngetenget

[Ekkewe Kapas Eis Fan Iten Ewe Lesen]

[Ekkewe sasing lón pekin taropwe 23]

Fotetiwen pwikil mi mürinnö a poputä lon Pentikos 33 C.E.

[Sasing lon pekin taropwe 25]

Iei ewe wiich lon kapas äwewe a iseis lon än Jiowa we leenien iseis

[Credit Line]

Pictorial Archive (Near Eastern History)