‘Umi hekojojáva kuarahýicha omimbíta’

‘Upe tiémpope umi hekojojáva kuarahýicha omimbíta Itúva yvagapegua rréinope.’ (MAT. 13:​43, NM.)

1. Mbaʼépa Jesús omyesakã umi ehémplo rupive?

 JESUCRISTO oiporuvaʼekue heta komparasión térã ehémplo omyesakã hag̃ua heta mbaʼe Ñandejára Rréino rehegua. La Bíbliape heʼi voi Jesús akóinte omboʼe hague ‘la héntepe ehémplo rupive, haʼe ningo katuete oiporu upéva oñeʼẽ jave’ (Mat. 13:​34, NM). Umi komparasión oiporuvaʼekue apytépe Jesús ombojoja semíllare pe marandu porã. Upéicha haʼe ohechauka koʼã mbaʼe: primero peteĩ ñande rapicha ohendu hag̃ua pe marandu odependeha ikorasõme oĩvare. Segundo Jehová voi oipytyvõha pe mávape oikuaa porãve hag̃ua chupe (Mar. 4:​3-9, 26-29). Ambue ehémplope katu, Jesús ohechauka hetaveha umi ohendu ha omombaʼéva pe marandu porã ha omombeʼu ikatuha upéva ndojehechakuaái iñepyrũrã (Mat. 13:​31-33). Ha ambue ehémplope Jesús ohechauka naenterovéi ohendúva pe marandu porã oikotaha Ñandejára Rréino poguýpe (Mat. 13:​47-50). *

2. Mávapepa ombojoja koʼág̃a Jesús pe semílla rehe?

² Mateo kapítulo 13-pe jajuhu pe ehémplo oñeʼẽva trígo ha ñana vai rehe (cizaña), upépe ningo Jesús omombeʼu mbaʼéichapa oñembyatýta umi hemimboʼe oisãmbyhýtava hendive Irréinope. Jaikuaa ningo Jesús ombojoja hague semíllare pe marandu Ñandejára Rréino rehegua, péro koʼág̃a haʼe ombojojahína pe semílla ‘pe rréino yvagapegua raʼykuéra’ rehe (Mat. 13:​19, 38). Jahecha koʼápe noñeʼẽiha umi oĩvare pe Rréino poguýpe, oñeʼẽ uvei ‘pe rréino yvagapegua raʼykuéra’ térã umi oisãmbyhýtavare upe rréinope (Rom. 8:​14-17; jaleemína Gálatas 4:​6, 7).

Pe ehémplo oñeʼẽva trígo ha ñana vai rehe

3. Mbaʼépa oikóraʼe pe kuimbaʼére ha mbaʼéichapa osolusiona upéva?

³ Pe ehémplo ningo heʼi: ‘Pe rréino yvagapegua ojogua peteĩ kuimbaʼe oñotỹvaʼekuépe ikokuépe peteĩ semílla iporaĩtereíva. Ha pyhare oke aja ou pe ndaijaʼéiva hese ha oñotỹ ñana vai pe trigotýpe ha oho. Pe trígo heñói ha hiʼa, upévo osẽ avei pe ñana vai. Upérõ umi tembiguái ou heʼi pe kokue járape: “Ore jára, nde ningo reñotỹkuri semílla iporãva. Moõgui piko upéicharõ osẽ umi ñana?”. Haʼe ombohovái chupekuéra: “Peteĩ kuimbaʼe ijaʼeʼỹva cherehe ojapo upéva”. Umi tembiguái heʼi: “Reipotápa roho romondoro?”. Ha haʼe heʼi: “Nahániri, ani ág̃a pemondorokuévo pe ñana vai, pemondoro avei pe trígo hendive. Peheja mokõivéva tokakuaa oñondive pe kosécha tiémpo peve, ha upévo haʼéta umi omonoʼõvape: Pembyaty raẽ pe ñana vai ha pejokua pehapy hag̃ua, ha upéi pembyaty pe trígo che galpónpe”’ (Mat. 13:​24-30).

4. a) Mávapa oñotỹ pe semílla iporãitéva? b) Arakaʼe ha mbaʼéichapa Jesús oñepyrũ oñotỹ pe semílla?

⁴ Mávapa oñotỹ pe semílla iporãitéva? Jesús voi omombeʼu mávapa heʼívo hemimboʼekuérape:  ‘Pe kuimbaʼe oñotỹva pe semílla iporãva haʼehína pe Yvypóra Raʼy’ (Mat. 13:​37, NM). Jesús, pe ‘Yvypóra Raʼy’ ningo tres áño ha seis mése pukukue opreparavaʼekue la yvy upearã (Mat. 8:20; 25:31; 26:64). Ha áño 33-pe Pentecostés jave oñepyrũ oñotỹ pe semílla iporãitéva térã ‘pe rréino yvagapegua raʼykuéra’. Mbaʼéichapa ojapo upéva? Jaʼekuaa haʼe ojapo hague orrepresentávo Itúvape ha oñohẽvo espíritu sánto hemimboʼekuéra ypykue ári oiporavóvo chupekuéra Ñandejára raʼýramo (Hech. 2:33). * Upéi pe semílla okakuaa oiko peve chugui trígo ityarõmava. Upéicha pe semílla oñeñotỹkuri ikatu hag̃uáicha oñembyatypa umi kristiáno oisãmbyhýtavape Jesucristo ndive Irréinope.

5. Mávapa pe kuimbaʼe ndochaʼéiva hese, ha mávapepa orrepresenta pe ñana vai?

⁵ Mávapa pe kuimbaʼe ndochaʼéiva hese? Jesús voi heʼi upéva haʼeha Satanás pe ‘Aña Ruvicha’. Ha mávapepa orrepresenta pe ñana vai? Umíva hína pe ‘aña ñemoñarekuéra’ (Mat. 13:​25, 38, 39, NM). Oiménengo Jesús oñeʼẽrõ guare ñana vaíre opensáraʼe pe cizaña rehe. Upéva ningo peteĩ ñana ivenenoitereíva ha itaʼýrape ojoguaiterei trígope. Upévare oĩ porãiterei oñembojoja pe cizaña rehe umi heʼívape ijehe haʼeha ‘pe rréino yvagapegua raʼykuéra’, péro umíva kristiáno guaʼu ndoprodusíriva mbaʼeve. Koʼã tekove rovamokõi  haʼe avei pe “semílla” vai térã Satanás “ñemoñare” (Gén. 3:15).

6. Mbaʼe javépa heñoirakaʼe umi kristiáno oñembojojáva ñana vaíre? Ha mbaʼépa Jesús heʼiséraʼe heʼírõ guare ‘ojekepa aja’?

⁶ Mbaʼe javépa heñoirakaʼe umi kristiáno oñembojojáva ñana vaíre? ‘Ojekepa aja’ heʼi Jesús (Mat. 13:25). Ha arakaʼe piko oikóraʼe upéva? Jaikuaa hag̃ua ñanemanduʼami apóstol Pablo heʼivaʼekuére umi ansiáno Efesoyguápe: ‘Aikuaa che aha rire oiketaha pende apytépe aguara guasu ñarõicha ohundisétava ovechakuérape. Pende apytépe voi opuʼãvaʼerã oporomboʼéva japu, ogueraha hag̃ua hapykuéri umi ojeroviávape’ (Hech. 20:​29, 30). Upe rire heʼi umi ansiánope oñatende porã hag̃ua ani ikangy ijerovia. Péro okepávo térã omanombávo ohóvo umi apóstol oporojokóva ani hag̃ua oñesẽ Ñandejára rapégui, heta kristiáno oke avei térã noñatendeporãvéima ha ou ikangy ijerovia (jaleemína 2 Tesalonicenses 2:​3, 6-8). Ha péicha heñoivaʼekue umi kristiáno guaʼu oñembojojáva ñana vaíre.

7. Pe trígogui piko oikóraʼe ñana vai? Emombeʼu mbaʼérepa rembohovái upéicha.

⁷ Jesús ningo ndeʼirivaʼekue pe trígogui oikotaha ñana vai, heʼi uvei pe ñana vai oñeñotỹtaha pe trigotýpe. Upéicharõ ko ehémplope noñeñeʼẽihína umi kristiáno añetegua osẽtavare Ñandejára rapégui. Ohechauka uvei mbaʼeichaitépa Satanás oñehaʼãta ombyai hag̃ua pe kongregasión omoingévo pype umi hénte aña. Ha pe último apóstol omano mboyvemi ningo hetaitereíma voi oĩkuri umi omboʼéva japu oporoguenohẽ hag̃ua Ñandejára rapégui (2 Ped. 2:​1-3; 1 Juan 2:18).

‘Peheja mokõivéva tokakuaa oñondive pe kosécha tiémpo peve’

8, 9. a) Mbaʼérepa umi tembiguái ontende porã Ijára heʼíva chupekuéra ojapo hag̃ua? b) Mbaʼéichapa are guivéma okakuaa oñondive pe trígo ha ñana vai?

⁸ Umi tembiguái ningo ohókuri omombeʼu pe Ijárape osẽha ñana vai itrigotýpe ha oporandu chupe hikuái: ‘Reipotápa roho romondoro?’ (Mat. 13:​27, 28). Ha haʼe heʼi chupekuéra ohejánte hag̃ua okakuaa pe trígo ndive kosécha tiémpo peve. Ñande ningo ikatu nañantendéi mbaʼérepa heʼi upéicha, péro umi hembiguái oikuaa porã ojojoguaitereiha umi plánta ha hasyetereiha ojekuaa hag̃ua mavaitévapa pe trígo. Ha umi chokokue oikuaa porã avei pe ñana vai térã cizaña rapo ojeliaha pe trígo rapóre. * Ajépa ivalete pe kokue jára ajeve heʼi chupekuéra ojapo hag̃ua upéicha!

⁹ Ha Jesús heʼi haguéicha, are guivéma hetaiterei ñana vai osẽ opaichagua rrelihionkuérape. Primero Iglesia Católica Romana ha Ortodoxa-pe ha upéi hetaiterei grúpo protestántepe. Upéicharõ jepe, upe tiémpope oñeñotỹ avei pe trígo semílla “kokuépe” térã ko múndope. Pe kokue jára ningo pyʼaguapýpe ohaʼarõkuri okakuaa oñondive pe trígo ha ñana vai kosécha tiémpo peve. Ha upe kosécha tiémpo ningo ndaipukúi.

Og̃uahẽma pe kosécha tiémpo

10, 11. a) Arakaʼépa oñepyrũ pe kosécha? b) Mbaʼéicha piko oñembyatýraʼe oikóvo Jehová ‘galpónpe’ umi kristiáno oñembojojáva pe trígore?

¹⁰ Upe rire Jesús heʼi kóicha: ‘Pe kosécha oiko ko múndo ára paha oñemoag̃uívo; ha umi omonoʼõva katu, umi ánhel’ (Mat. 13:​39, NM). Ha péicha oiko, ko múndo aña ára pahápe oñembyatyvaʼerã ‘pe Rréino yvagapegua raʼykuéra’ ha oñemoĩ apárte umi kristiáno guaʼúgui, oñembojojáva pe ñana vaíre. Apóstol Pedro ningo heʼi voi: ‘Og̃uahẽma pe ára oñepyrũ hag̃ua pe huísio Ñandejára rogayguakuéragui. Ha pe huísio oñepyrũramo ñandehegui voi, mbaʼépa oikóne umi nohendúivagui Ñandejára marandu porã?’ (1 Ped. 4:17).

 ¹¹ Oñepyrũ riremi ‘ko múndo ára paha’ ojehusga ñepyrũ umi heʼívape ijehe kristiáno añeteha, ‘pe Rréino yvagapegua raʼykuérape’ ha ‘pe aña ñemoñarekuérape’. Ha mbaʼépa oiko oñepyrũvo pe kosécha? Pe ehémplope heʼiháicha, “primero” hoʼa Babilonia Guasu, ha “upéi” oñembyaty ‘pe Rréino yvagapegua raʼykuérape’ (Mat. 13:30). Ha mbaʼéicha piko oñembyatýraʼe oikóvo Jehová ‘galpónpe’ umi kristiáno oñembojojáva pe trígore? Upéva ojejapo ‘pe Rréino yvagapegua raʼykuéra’ omanovaʼekue ohóvo yvágape, ha ambue katu osegívo kongregasiónpe. Upépe haʼekuéra omombaʼeguasuhína Jehovápe hekopete ha Haʼe katu oñangareko hesekuéra, oguerohory ha ovendesi chupekuéra.

12. Mboy tiémpopa ipuku pe huísio?

¹² Mboy tiémpopa ipuku pe huísio? Jesús ningo oñeʼẽkuri pe ‘kosécha tiémpore’, upéicha ohechauka ndahaʼemoʼãiha mbykyetereíva upe tiémpo (Rev. 14:​15, 16). Pe huísio ojejapóva umi ungídope ningo osegi voi pe ára paha aja entéro ha oñemohuʼãta ojesellaite vove chupekuéra (Rev. 7:​1-4).

13. Mbaʼéichapa umi rrelihión japu omoakãva ombotavy la héntepe? Ha mbaʼe ivaívapa ojapo hikuái?

¹³ Pe Jesús ehémplo ningo heʼi avei ojepeʼataha pe Rréinogui umi oporombotavy ha opa ojapóvape umi mbaʼe Ñandejára léi heʼíva ivaiha (Mat. 13:41). Mávarepa oñeñeʼẽhína koʼápe? Umi ñana vai apytépe oĩhína umi rrelihión japu omoakãva. Koʼãva ningo hetaiterei áñorema ombotavy heta héntepe omboʼévo umi japu oheja vaíva Ñandejárape. Pór ehémplo omboʼe hikuái Túva, Taʼýra ha espíritu sánto peteĩnteha ha avei Ñandejára oporombohasa asyha opa árare tata rendýpe. Oĩ avei umi rrelihión omoakãva nomoĩriva ehémplo porã irrelihionguakuérape. Mbaʼérepa jaʼe upéva? Haʼekuéra ningo nomombaʼeguasúi Ñandejárape hekópe ojeheʼávo ko múndore, ha oĩ voi katu umi hekovai formálva (Sant. 4:4). Umi rrelihión japu omoakãva ningo a más día oheja reíntema voi oĩramo hekovaíva irrelihiongua apytépe (jaleemína Judas 4). Upéicharõ jepe, haʼekuéra ojehechauka ohayhurõguáicha Ñandejárape. Upévare oiméne ovyʼaite ‘pe Rréino yvagapegua raʼykuéra’ ojeaparta haguére chupekuéra pe ñana vaígui ha umi japu omboʼévagui oporombotavy hag̃ua.

14. Mbaʼérepa hasẽsoro ha ipyahẽhína ‘aña ñemoñarekuéra’?

¹⁴ ‘Aña ñemoñarekuéra’ oñembojojáva pe ñana vai rehe ningo ‘hasẽsoro ha ipyahẽhína’ (Mat. 13:42). Mbaʼérepa? Pórke ‘pe Rréino yvagapegua raʼykuéra’ ohesapeʼa la héntepe ohechakuaa hag̃ua mbaʼeichaguápa hikuái ha añetehápe ojoguaha pe ñaña vai ivenenoitereívape. Ha umi rrelihión japu omoakãvape oipyʼapy avei ohechávo káda día saʼiveha oho la hénte tupaópe ha mbeguekatúpe ndorekoveimaha chupekuéra ipoguýpe (jaleemína Isaías 65:​13, 14).

15. Mbaʼépa heʼise oñembyaty ha ojehapyha pe ñana vai?

¹⁵ Mbaʼépa heʼise oñembyaty ha ojehapyha pe ñana vai? (Mat. 13:40.) Jaikuaa ningo peteĩ mbaʼe japoíramo tatápe oñehundietemaha. Upéicharõ pe ñana vai ojehapyha heʼisehína umi kristiáno guaʼu oñehunditaha  opa ára g̃uarã (Rev. 20:14; 21:8). Koʼã tekove japu oñehundíta pe ‘jehasa asy guasúpe’ (Mat. 24:21).

‘Kuarahýicha omimbíta hikuái’

16, 17. Mbaʼépa heʼi Malaquías ojejapotaha Ñandejára témplope, ha mbaʼéichapa oñepyrũ oñekumpli upe profesía?

¹⁶ Mbaʼe tiémpopa omimbíta kuarahýicha umi hekojojáva Jesús ombojojavaʼekue pe trígore? (Mat. 13:43.) Jaikuaa hag̃ua ikatu ñahesaʼỹijo pe profesía ohaivaʼekue Malaquías oñeʼẽva pe Ñandejára témplo ñemopotĩre. Upe profesía heʼi: ‘“Pe Jára peẽ pehekáva oúta itémplope ha pe hemimbou peẽ peipotáva”. Jehová voi ningo heʼi upéva. “Péro mávapa ikatúne ogueropuʼaka upe ára? Mávapa ikatúne opyta oñemboʼyhápe? Og̃uahẽta tatáicha ñanemopotĩ hag̃ua ha havõicha oipeʼáta kyʼa ñandehegui. Ha oñemopotĩháicha pláta ha óro tatápe, Ñandejára oguapýta omopotĩ Leví ñemoñarekuéra. Upéi haʼekuéra ikatútama ombaʼekuaveʼẽ hekópe Ñandejárape”’ (Mal. 3:​1-3).

¹⁷ Jaʼekuaa ñane tiémpope ko profesía oñepyrũ hague oñekumpli 1918-pe. Upe áñope Jehová ha Jesucristo, pe ‘hemimbou’ ou ohecha ha omopotĩ itémplo térã opa mbaʼe haʼe omoĩva oñemombaʼeguasu hag̃ua chupe. Malaquías omombeʼu mbaʼépa oikóta upe rire: ‘Upépe pehecháta mbaʼéichapa idiferénte ojuehegui hekojojáva ha hekoʼañáva, umi omombaʼeguasúva Ñandejárape ha umi nomombaʼeguasúiva chupe’ (Mal. 3:18). Upéicha umi kristiáno añetéva oñakarãpuʼã jey ha oñepyrũ ombaʼapo kyreʼỹ. Upéicharõ jaʼekuaa upe tiémpope oñepyrũ hague pe kosécha.

18. Mbaʼépa heʼi Daniel oikotaha avei ko ñane tiémpope?

¹⁸ Proféta Daniel omombeʼu avei mbaʼépa oikóta ko ñane tiémpope. Haʼe heʼi: ‘Umi iñarandúva omimbíta pe yvága omimbiháicha, ha umi oipytyvõva hapichápe oguata hag̃ua Ñandejára rapére omimbivaʼerã ku mbyjáicha opa árare’ (Dan. 12:​3, ÑÑB). Mávapa hína umi yvágaicha omimbíva? Umi ungído Jesús ombojojavaʼekue pe trígore. Péro omoirũ avei chupekuéra ambue ovecha aty guasu. Koʼãva ningo oĩtahína Ñandejára goviérno poguýpe ha ohechakuaa hikuái ko tiémpope oñemondorohahikóni pe ñana vai térã umi kristiáno guaʼu. Ha umi ungído ndive ko ovecha aty guasu omimbihína ko múndo oikóvape pytũnguýpe (Zac. 8:23; Mat. 5:​14-16; Fili. 2:15).

19, 20. Mbaʼépa hiʼãitereíma pe ‘Rréino yvagapegua raʼykuérape’ ha mbaʼépa jahecháta pe artíkulo oúvape?

¹⁹ ‘Pe Rréino yvagapegua raʼykuérape’ ningo hiʼãitereíma oho yvágape (Rom. 8:​18, 19; 1 Cor. 15:53; Fili. 1:​21-24). Péro ohaʼarõ aja upéva, iñeʼẽrenduvaʼerã Ñandejárape ha omimbi hikuái kuarahýicha. Ha ojekuaavaʼerã hesekuéra ndojoguaiha ‘aña ñemoñarekuérape’ (Mat. 13:38; Rev. 2:10). Ajéiko tuichaite mbaʼe ñandéve g̃uarã jaiko ko tiémpo ojeapartamahápe Ñandejára siervokuérape ñana vaígui.

²⁰ Péro mbaʼéichapa ombaʼapo oñondive ‘pe Rréino yvagapegua raʼykuéra’ ha pe aty guasu ohaʼarõva oiko opa ára g̃uarã ko yvy ape ári? Ko porandu ñambohováita pe artíkulo oúvape.

[Nóta]

Nemanduʼápa koʼã mbaʼére?

Mbaʼépa orrepresenta koʼã mbaʼe Jesús heʼivaʼekue iñehémplope?

• Pe semílla iporãitéva

• Pe kokue jára

• Pe ñemitỹ

• Pe ndochaʼéiva kokue járare

• Pe cizaña térã ñana vai

• Pe kosécha tiémpo

• Pe galpón

• Hasẽsoro ha ipyahẽva

• Oñembyaty ha ojehapy

[Porandu ñahesaʼỹijóva]

[Nóta oĩva taʼanga ndive páhina 20]

Pe semílla iporãitéva oñepyrũ oñeñotỹ Pentecostés áño 33-pe

[Nóta oĩva taʼanga ndive páhina 23]

Umi oñembojojáva pe trígore oñembyatyhína Jehová ‘galpónpe’

[Roagradese]

Pictorial Archive (Near Eastern History) Est.