‘Ikiẹrẹe Na I Ti Lo Via Wọhọ Ọre’

“Kẹsena ikiẹrẹe na ite ti lo via eva uvie Ọsẹ rai wọhọ ọre.”—MAT. 13:43.

1. Eware vẹ Jesu ọ rehọ iriruo wuhrẹ ahwo kpahe Uvie na?

 JESU KRISTI ọ rehọ iriruo hayo ehare buobu ro wuhrẹ ahwo eware sa-sa kpahe Uvie na. ‘Ehare ọ rọ ta ẹme kẹ otu obuobu na; ohare o gbẹ rọ họ ọ rẹ ta ẹme kẹ ae he.’ (Mat. 13:34) Evaọ ehare nọ ọ rọ ta ẹme kpahe ẹkọ ubi Uvie na, Jesu o ru rie vẹ inọ epanọ ẹme na o te ohwo udu te gbe obufihọ Jihova oye u re dhesẹ sọ ohwo na ọ te sae gọ Ọghẹnẹ. (Mak 4:3-9, 26-29) Jesu ọ tẹ jẹ rehọ oriruo dhesẹ nọ enọ i ti yo usi Uvie na a te jọ buobu gaga, dede nọ ahwo a te kaki muẹrohọ ẹvi nana ha. (Mat. 13:31-33) O te je dhesẹ nọ orọnikọ enọ e nwane ziọ ukoko na kpobi e te ruọ Uvie na ha.—Mat. 13:47-50. *

2. Evaọ ohare Jesu orọ ikpoko avọ eka na, amono ubi uwoma na u dikihẹ kẹ?

² Jesu o bru ohare jọ nọ ọ rọ ta ẹme kpahe ẹsalọ enọ i ti lele iei su evaọ Uvie riẹ. Onana họ ohare ikpoko avọ eka na onọ ma rẹ sae ruẹ evaọ Matiu uzou avọ 13. Dede nọ evaọ ohare ọfa Jesu ọ ta nọ ubi na họ “ẹme uvie na,” evaọ ohare nana o te dhesẹ nọ ubi uwoma na u dikihẹ kẹ oware ofa, koyehọ ‘emọ uvie na.’ (Mat. 13:19, 38) Enana orọnikọ enọ e te jọ otọ Uvie na ha rekọ “emọ” hayo ereuku Uvie na.—Rom 8:14-17; se Ahwo Galesha 4:6, 7.

Ohare Ikpoko avọ Eka Na

3. Ta kpahe ẹbẹbẹ nọ ọzae nọ ọ kọ eka na ọ rẹriẹ ovao ku, gbe oghẹrẹ nọ o ro ku ẹbẹbẹ na họ.

³ Ohare na ona: “Uvie odhiwu o wọhọ ohwo nọ ọ kọ ibi iwoma họ udhu riẹ; rekọ nọ ahwo a jẹ rọ owezẹ, ọwegrẹ riẹ ọ tẹ nyaze ọ tẹ kọ ikpoko họ udevie eka na re, ọ jẹ nya vrẹ. Whaọ nọ eka e ro ze ejẹ whẹ iru họ, ikpoko na e tẹ via re. Idibo ọ nọ o wo ighẹ na a tẹ ze ta kẹe nọ, ‘Baba, whọ kọ ibi iwoma họ evaọ udhu ra ha? Jere bovẹ u je wo ikpoko?’ Ọ tẹ ta kẹ ae nọ, ‘Ọwegrẹ o ru onana.’ Idibo na e tẹ ta kẹe nọ, ‘Kẹvẹ whọ guọlọ nọ ma kuai kuku?’ Rekọ ọ tẹ ta nọ, ‘Ijọ; o tiẹsejọ nọ wha te kua ikpoko na wha re ti wolo eka avọ ae. Vu ai ivẹ wa e gbẹ ro bọ ezi orọ; ezi orọ mẹ rẹ te ta kẹ ekọrọ nọ, Kake kua ikpoko na wha gba ae ekru re a te mahe ae, rekọ wha kua eka na fihọ eru mẹ.’”—Mat. 13:24-30.

4. (a) Evaọ ohare na ono họ ọzae nọ ọ kọ eka na? (b) Oke vẹ gbe oghẹrẹ vẹ Jesu o ro muọ ibi na họ ẹkọ?

⁴ Ono họ ọzae nọ ọ kọ emamọ ibi fihọ udhu riẹ na? Jesu o ru ẹme na vẹ kẹ ilele riẹ uwhremu na nọ ọ ta nnọ: “Ọ nọ ọ kọ ibi iwoma na Ọmọ ohwo.”  (Mat. 13:37) Jesu họ “Ọmọ ohwo,” ọnọ ọ ruẹrẹ udhu na fihọ kẹ ekakọ evaọ ikpe esa gbe ubro nọ ọ jọ akpọ na ta usiuwoma na. (Mat. 8:20; 25:31; 26:64) Kẹsena anwọ Pẹntikọst 33 C.E. o te muọ emamọ ibi na họ ẹkọ, koyehọ “emọ uvie na.” U muẹro inọ Jesu, ọnọ Jihova o vi, o muọ ibi na họ ẹkọ okenọ o ku ẹzi ọfuafo na ku ilele na, nọ u dhesẹ nọ a zihe ruọ emọ Ọghẹnẹ no. * (Iruẹru 2:33) Emamọ ibi na e tẹ te rro zihe ruọ eka. Ẹjiroro nọ a rọ kọ emamọ ibi na họ re a salọ enọ i ti su kugbe Jesu evaọ Uvie riẹ.

5. Ono họ ọwegrẹ na evaọ ohare na, kọ amono ikpoko na i dikihẹ kẹ?

⁵ Ono họ ọwegrẹ na, kọ amono họ ikpoko na? Jesu ọ ta nọ ọwegrẹ na họ “ukumuomu na.” Ọ tẹ jẹ ta nọ ikpoko na họ “emọ oyoma na.” (Mat. 13:25, 38, 39) Evaọ ohare na, ikpoko nọ Jesu ọ t’ẹme te na yọ ẹbe oyoma jọ nọ ọ rẹ wọhọ ọka nọ ọ tẹ be dhẹ ze obọ. O nwani fo kẹhẹ re a rehọ ẹbe nana dhesẹ Ileleikristi eviẹhọ, enọ i bi se oma rai emọ Uvie na rekiyọ a be mọ emamọ ibi hi! Ileleikristi eviẹhọ nana nọ i bi se oma rai uvi Ileleikristi na yọ abọjọ ‘ubi’ Setan Ẹdhọ na.—Emu. 3:15.

6. Okevẹ ikpoko na i ro muọ oma họ ẹrọvia, kọ oghẹrẹ vẹ ahwo a jẹ rọ wezẹ evaọ oke yena?

 ⁶ Okevẹ Ileleikristi nọ e wọhọ ikpoko na e rọ roma via? Jesu ọ ta nnọ ‘okenọ ahwo a jẹ wezẹ.’ (Mat. 13:25) Okevẹ oye? Ma rẹ ruẹ uyo na evaọ ẹme nọ Pọl ukọ na ọ ta kẹ ekpako obọ Ẹfẹsọs inọ: ‘Mẹ riẹ no nọ mẹ te nya vrẹ no na, erao ijihẹ imuomu e rẹte ruọ udevie rai, enọ uthuru o rẹte zeziaro ho; ahwo a reti no evie rai tovrẹ jẹ ta eware nọ e rẹ liẹliẹ ahwo yoma, re a si ilele lele oma rai.’ (Iruẹru 20:29, 30) Pọl ọ tẹ tuduhọ ekpako na awọ re a jaja aro vi. Nọ ikọ na nọ a jẹ da otu iwuhrẹ erue ji a muọ owezẹ họ ekie ruọ no, koyehọ nọ a muhọ ewhu no, Ileleikristi a te muọ owezẹ abọ-ẹzi họ ekie ruọ re. (Se 2 Ahwo Tẹsalonika 2:3, 6-8.) Oke yena ikọ-erue e rọ bẹre oma lahwe.

7. Kọ eka jọ i zihe ruọ ikpoko? Ru ei vẹ.

⁷ Orọnikọ Jesu ọ ta inọ eka na i re ti zihe ruọ ikpoko ho, rekọ inọ a kọ ikpoko fihọ udevie eka. Fikiere orọnọ Ileleikristi nọ i kie no uzẹme na no ohare nana o be ta kpahe he. Ukpoye u bi dhesẹ epanọ Setan ọ be te rọ daoma re ọ raha ukoko Ileleikristi na ẹkwoma ahwo yoma nọ o ti fihọ iẹe. Okenọ Jọn ukọ na ọ kpako no, yọ ikọ-erue e roma via gaga no.—2 Pita 2:1-3; 1 Jọn 2:18.

“Vu Ai Ivẹ Wa E Gbẹ Ro bọ Ezi Orọ”

8, 9. (a) Fikieme enọ e jẹ gaviezọ kẹ Jesu a rọ ruẹ nọ areghẹ ọ rrọ ẹme nọ Olori na ọ ta kẹ idibo riẹ? (b) Evaọ orugba ohare na, ẹvẹ ikpoko avọ eka na e rọ rro kugbe?

⁸ Idibo na a tẹ ta oware nọ o via kẹ Olori rai jẹ nọe nọ: “Kẹvẹ whọ guọlọ nọ ma [kua ikpoko na] kuku?” (Mat. 13:27, 28) Uyo nọ ọ kẹ rai o rẹ sai gbe omai unu. Ọ ta kẹ ai nọ a kẹ ikpoko avọ eka na uvẹ re a rro bọwo ezi orọ koyehọ ezi ivuẹvu. Ilele Jesu a ruẹ areghẹ nọ o rrọ uyo nọ Olori na ọ kẹ na. A vuhumu nọ o rọ bẹbẹ re a vuhu ikpoko evaọ udevie eka. Enọ e riẹ kpahe ekakọ a riẹ nọ awọ ikpoko e rẹ sai thuru awọ eka evaọ obotọ. * Agbẹta nọ Olori na ọ rọ ta kẹ ai nọ a vu ai wa!

⁹ Epọvo na re, anwọ ikpe buobu ze, ichọche Kristẹndọm a be ginẹ gbọ wọhọ ikpoko, muhọ no ichọche Roman Catholic avọ erọ Ọtọdọs ze, kẹsena kọ erọ Protẹstant nọ e rrọ imivu kpobi na. Oke ovona yọ a be kọ umutho uvi Ileleikristi nọ e wọhọ eka fihọ akpọ na. Evaọ ohare na, ọnọ o wo ighẹ na ọ hẹrẹ oke lelehie bẹsenọ ekakọ na i ro te ezi orọ.

Ezi Orọ Hayo Ivuẹvu nọ A be Hẹrẹ Anwẹdẹ Na

10, 11. (a) Okevẹ ivuẹvu na i ro muhọ? (b) Ẹvẹ a rọ rehọ enọ e wọhọ ikpoko na ziọ uwou emu Jihova?

¹⁰ Jesu ọ ta nọ: “Ezi orọ na họ urere akpọ na.” (Mat. 13:39) Evaọ edẹ urere nana, a be hẹriẹ emọ Uvie na no ahwo nọ e wọhọ ikpoko. Pita ukọ na ọ ta kpahe onana nọ: “Oke ẹdhọ-oguo u te no, nọ ọ te rehọ uviuwou Ọghẹnẹ muhọ; kọ o tẹ rehọ omai muhọ, kẹvẹ o rẹ te jọ kẹ otu nọ ọ kezọ usiuwoma Ọghẹnẹ hẹ?”—1 Pita 4:17.

¹¹ U kri hi nọ edẹ urere na koyehọ  “urere akpọ na” u muhọ no, a tẹ be rehọ enọ i se oma rai uvi Ileleikristi kpobi guẹdhọ sọ a ginẹ rrọ “emọ uvie na” hayo “emọ oyoma na.” Orọ ọsosuọ Babilọn Ologbo na o te kie, kẹsena a te koko emọ Uvie na họ evaọ emuhọ ivuẹvu na. (Mat. 13:30) Rekọ ẹvẹ a bi ro koko eka na họ uwou emuọriọ Jihova? A rehọ enana ziọ ukoko Ileleikristi na, oria nọ a jọ wo aruoriwo gbe ẹruọsa Ọghẹnẹ, ogbẹrọ ere he o vẹ jọ osohwa obọ odhiwu rai nọ ejọ a wo no.

12. Ẹvẹ ivuẹvu na i ti kri te?

¹² Ẹvẹ ẹdhoguo na o ti kri te? Jesu ọ fodẹ “ezi” ivuẹvu, onọ u dhesẹ nọ o te rehọ oke. (Evia. 14:15, 16) A ti gu enọ a wholo na kpobi ẹdhọ rite ekuhọ akpọ na. Ẹdhoguo na o ve ti kuhọ nọ aikpobi a tẹ gbunu no evaọ obọ odhiwu.—Evia. 7:1-4.

13. Ẹvẹ ikpoko na a be rọ wha ezoruẹ ze, kọ ẹvẹ a bi ro ru umuomu?

¹³ Amono a rẹ te kua no Uvie na, kọ oghẹrẹ vẹ enana i bi ro ru umuomu je ru ahwo zoruẹ? (Mat. 13:41) U kri no nọ isu-egagọ Kristẹndọm a bi ro su ahwo thọ. A rehọ iwuhrẹ nọ i re si ọghọ no Ọghẹnẹ oma, wọhọ uwuhrẹ erae ehẹle gbe Eghẹnẹ esa nọ e rrọ ọvo rọ viẹ ahwo họ no. Isu-egagọ buobu a rehọ fiki esuo ohrowo gbe uruemu ọfariẹ-ogbe rai fi ekpehre oriruo họ otọ kẹ enọ e rrọ otọ rai no. (Jem. 4:4) Ofariẹ, a be daezọ ọfariẹ-ogbe nọ u bi vihọ evaọ udevie rai hi. (Se Jud 4.) Ghele na, yọ a gbe bi ru oma rai wọhọ ẹsenọ a kẹle Ọghẹnẹ gaga. Eva e be were emọ Uvie na inọ a si rai no udevie ikpoko nana gbe iwuhrẹ erue rai nọ e rẹ wha ezoruẹ ze!

14. Oghẹrẹ vẹ enọ e wọhọ ikpoko na a be rọ viẹ jẹ riakọ?

¹⁴ Oghẹrẹ vẹ enọ e wọhọ ikpoko na a be rọ viẹ jẹ riakọ? (Mat. 13:42) “Emọ oyoma na” a bi bruenu keme “emọ uvie na” a be fere iruemu gbe iwuhrẹ iyoma rai via. A te bi je dimẹ keme ahwo egagọ rai a gbẹ be jẹ igho wọhọ epaọ ọsosuọ họ, yọ a gbẹ be rọ oma kpotọ kẹ ai hi.—Se Aizaya 65:13, 14.

15. Oghẹrẹ vẹ a te rọ rehọ erae mahe enọ e wọhọ ikpoko na?

¹⁵ Oghẹrẹ vẹ a rọ kua ikpoko na koko jẹ mahe ae? (Mat. 13:40) Onana u dhesẹ oware nọ o te via kẹ ikpoko na evaọ obaro. Ẹtẹre erae nọ a ti gbolo ikpoko na fihọ na u dhesẹ ọraha ebẹdẹ bẹdẹ nọ u ti te ai. (Evia. 20:14; 21:8) A te raha Ileleikristi eviẹhọ nana nọ e wọhọ ikpoko na no evaọ ‘uye ulogbo’ na.—Mat. 24:21.

 A ‘Ti Lo Via Wọhọ Ọre’

16, 17. Eme Malakae ọ ruẹaro riẹ kpahe etẹmpol Ọghẹnẹ, kọ oghẹrẹ vẹ u ro muhọ erugba?

¹⁶ Okevẹ enọ e wọhọ eka na a ‘ti ro lo via wọhọ ọre’? (Mat. 13:43) Malakae ọ ruẹaro kpahe erufuọ etẹmpol Ọghẹnẹ inọ: “ỌNOWO na nọ wha rẹ gwọlọ na ọ vẹ te ze uwou-egagọ-ode riẹ idudhe; ukọ ọvọriọ na nọ ọ were owhai na, riri, ọ be tha, ere ỌNOWO ogbaẹmo na ọ tae. Rekọ o no ọ rẹ sai ria eva edẹ ẹtha riẹ, hayo o no ọ rẹ sai mudhe nọ ọ te rehọ oma via? Keme ọ wọhọ erae orufuọ gbe odha ọfọrọ ehọ; Ọ rẹ te keria wọhọ ọwozẹ gbe ọnọ o re ru Siliva fua, o re ti ru emọ Livai fua ọ vẹ wozẹ ae fo wọhọ igoru gbe Siliva, kẹsena a te ti dhe-idhe ikiẹrẹe kẹ ỌNOWO na.”—Mal. 3:1-3.

¹⁷ Evaọ oke mai nana, onana u muhọ erugba evaọ 1918 nọ Jihova avọ “ukọ ọvọriọ na,” Jesu Kristi, a nyaze ti rri etẹmpol abọ-ẹzi na. Malakae ọ ta kẹ omai oware nọ o te via nọ a te ru orufuọ nana no: “Kẹsena wha ve ti vuhu enọ ikiẹrẹe gbe iruimuomu, gbe ọnọ ọ be gọ Ọghẹnẹ gbe ọnọ ọ be gọ e he.” (Mal. 3:18) Ẹnyaharo nọ ọ roma via evaọ udevie Ileleikristi uzẹme evaọ oke yena u dhesẹ nọ ivuẹvu na i muhọ no.

18. Eme Daniẹl ọ ruẹaro riẹ inọ o te via evaọ oke mai na?

¹⁸ Daniẹl ọruẹaro na ọ ta kpahe edẹ mai nana inọ: “Otu nọ o wo areghẹ kọ a reti lo wọhọ ẹgho-ehru; jegbe otu nọ o ku ahwo rẹriẹ ruọ ẹrẹreokie kọ a reti lo wọhọ isi obehru bẹdẹ bẹdẹ.” (Dan. 12:3) Amono họ enana nọ i bi lo na? Avro ọ riẹ inọ enana họ Ileleikristi nọ a wholo na, eye họ eka nọ Jesu ọ fodẹ evaọ ohare ikpoko avọ eka na! Otu obuobu nọ u bi dhe ebuebu na a vuhumu no inọ a muọ Ileleikristi eviẹhọ nọ e wọhọ ikpoko na họ ẹkua koko no. Otu obuobu na omarai a bi lo evaọ akpọ ebi nana keme a kuomagbe okiọkotọ Izrẹl abọ-ẹzi na.—Zek. 8:23; Mat. 5:14-16; Fil. 2:15.

19, 20. Eme “emọ uvie na” a be rọ ọwhọ hẹrẹ, kọ eme ma te ta kpahe evaọ uzoẹme nọ ọ rrọ aro na?

¹⁹ Nẹnẹ na, “emọ uvie na” a be rọ ọwhọ hẹrẹ okenọ a ti ro kpobọ odhiwu. (Rom 8:18, 19; 1 Kọr. 15:53; Fil. 1:21-24) Bọwo oke yena, a re kru ẹgbakiete rai, a vẹ gbẹ hai lo re a dhesẹ nọ a wo ohẹriẹ no “emọ oyoma na.” (Mat. 13:38; Evia. 2:10) Eva e be were omai gaga nọ ma be rọ jọ oke mai na ruẹ epanọ a be rọ hẹriẹ ikpoko na no eka gbe emamọ iyẹrẹ nọ i bi no onana ze!

²⁰ Kọ usu vẹ emọ Uvie na a wo kugbe otu obuobu nọ o bi dhe ebuebu na nọ i wo ẹruore ẹria bẹdẹ bẹdẹ evaọ otọakpọ na? Uzoẹme nọ o rrọ aro na o te kẹ uyo onọ nana.

[Oruvẹ-obotọ]

Kọ Whọ Kareghẹhọ?

Evaọ ohare Jesu kpahe ikpoko avọ eka na, eme họ otofa eware nana?

• Emamọ ibi na

• Ọzae nọ ọ kọ ibi na

• Ẹkọ ibi na

• Ọwegrẹ na

• Ikpoko na

• Ezi ivuẹvu na

• Uwou emuore na

• Oviẹ gbe akọriọ na

• Erae na

[Enọ Uwuhrẹ]

[Iwoho nọ e rrọ ẹwẹ-obe avọ 20]

A mu ibi iwoma na họ ẹkọ evaọ Pẹntikọst 33 C.E

[Uwoho nọ o rrọ ẹwẹ-obe avọ 23]

Enẹna a be rehọ enọ e wọhọ eka na ziọ uwou Jihova

[Ọnọ o wo uwoho 23]

Pictorial Archive (Near Eastern History) Est.