‘Iluartut seqinertut qaammarikkumaarput’

“Taava iluartut Ataatamik naalagaaffiani seqinertut qaammarikkumaarput.” — MATTHÆUSI 13:43.

1. Guutip naalagaaffianut tunngassuteqartut suut Jiisusip assersuusiorluni nassuiarpai?

JIISUSI KRISTUSI Guutip naalagaaffianut tunngassuteqartut assigiinngitsut erseqqissarniarlugit assersuusiarpassuaqarpoq. “Tamakku tamaasa assersuutitigut Jiisusip inunnut oqaatigai, tamatigullu assersuutit atorlugit oqaluffigisarpai.” (Matthæusi 13:34) Sallusuissutip naatsiiassartaanik siaruarterinermik assersuusiamini Jiisusip erseqqissarpaa inuup Guutip naalagaaffia pillugu tusarliussamik ilassinninnissaanut taassuma uummatikkut pissusia qanoq pingaaruteqartigisoq, aamma anersaakkut ineriartornissamut Jehova qanoq pingaaruteqartigisoq. (Markusi 4:3-9, 26-29) Aamma Jiisusip assersuusiaraa inuit Guutip naalagaaffia pillugu tusarliussamik tusartut maluginiarnartumik amerlinerat, naak amerliartorneq ingerlaannaq takuneqarsinnaasanngikkaluartoq. (Matthæusi 13:31-33) Aammattaaq erseqqissarpaa tusarliussamut ajunngitsumik periartut ilaannaat Guutip naalagaaffiani innuttaasussatut piukkunnartuujumaartut. — Matthæusi 13:47-50. *

2. Jiisusip qajuusiassanik naasupilunnillu assersuusiaani naatsiiassat pitsaasut sumut assersuutaappat?

² Jiisusilli assersuusiami ilaanni Guutip naalagaaffiani naalakkersueqatissami katersorneqarnerat pingaarnerutippaa. Assersuusiaq taanna qajuusiassat naasupiluillu pillugit assersuusiamik taaneqarajuppoq, taannalu Matthæusip iivangkiiliuani kapitali 13-imiippoq. Jiisusip assersuusiami allami oqaluttuaraa naatsiiassaq siaruarterneqartoq tassaasoq “Naalagaaffimmik oqaaseq”, assersuusiamili sammisassatsinni paasitinneqarpugut naatsiiassat pitsaasut allamut assersuutaasut, tassa ‘Naalagaaffiup qitornaanut’. (Matthæusi 13:19, 38) Guutip naalagaaffiani innuttaanngillat, naalagaaffiulli tamatuma ‘qitornaanik’ imaluunniit kingornussisussaanik, taaneqarput. — Romamiut 8:14-17; atuakkit Galatiamiut 4:6, 7.

Qajuusiassanik naasupilunnillu assersuusiaq

3. Assersuusiami inuup suna ajornartorsiutigaa, qanorlu aaqqinniarlugu aalajangerpa?

³ Jiisusi ima assersuusiorpoq: “Qilaap Naalagaaffiata assigaa inuk naatsiiassanik pitsaasunik narsaatimini siaruarterisoq. Inuilli sinitsillugit qinngarsortaa qajuusiassat akornannut naasupilussanik siaruarteriartorpoq qimagullunilu. Karrit naajartorlutik inerititaqalermata, taava aamma naasupiluit puttussuupput. Narsaammik piginnittoq kiffaasa ornippaat aperalugulu: Naalagaq, ilaa naatsiiassanik pitsaasunik narsaatinni siaruarterigaluarputit? Naasupiluimmi sumit pippat? Akivai: Qinngarsuisoq taamaaliorsimavoq. Taava kiffat aperaat: Piiaqquigit? Akivaali: Naamik, naasupiluiaanissinni qajuusiassat nutsuttooqinavasi. Katersuinissap tungaanut tamarmik naajartoqatigiiginnarlit. Katersuiffik nalliuppat katersuisussat ima oqarfigiumaarpakka: Naasupiluit siulliullugit nutsussigit qilertanngorlugillu qilersorlugit ikuallanneqaqqullugit, qajuusiassalli quinnut katersorsigit.” — Matthæusi 13:24-30.

4. (a) Assersuusiami inuk kinaava? (b) Qanga aamma qanoq Jiisusi naatsiiassanik taakkuninnga siaruarterilerpa?

⁴ Inuk naatsiiassanik pitsaasunik siaruarterisoq kinaava? Jiisusip apeqqut taanna akivaa kingusinnerusukkut ajoqersukkani ima nassuiaakkamigit: “Naatsiiassanik pitsaasunik siaruarterisoq tassaavoq Inuup Ernera.” (Matthæusi 13:37) Jiisusip, Inuup Ernerata, ukiut sisamassaat qiteqqullugu nunami kiffartornermini narsaat piareersarpaa. (Matthæusi 8:20; 25:31; 26:64) Ukiumi 33-mi piinsip ullua aallarnerfigalugu siuaruartilerpai naatsiiassat  pitsaasut —  “Naalagaaffiup qitornai”. Siaruarterineq tamanna pigunarpoq Jiisusip, Jehovap sinniisuatut, anersaamik illernartumik ajoqersukkaminut kuisisarnini aallartimmagu taamaalillunilu taakku Guutip ernerisut tanimmagit. * (Apustilit Suliaat 2:33) Naatsiiassat pitsaasut naapput qajuusiassatullu inerillutik. Tassa naatsiiassanik pitsaasunik siaruarterinermi siunertaavoq piffissap ingerlanerani Jiisusip Guutip naalagaaffianik kingornusseqatigalugillu naalakkersueqatissaasa tamakkerlugit katersorneqarnissaat.

5. Assersuusiami qinngarsuisoq kinaava, naasupiluillu kikkunnut assersuutaappat?

⁵ Qinngarsuisoq kinaava, naasupiluillu kikkuuppat? Jiisusip nassuiarpaa qinngarsuisoq tassaasoq “Diaavulu”. Naasupiluit ‘Ajortup qitornaatut’ taaneqarput. (Matthæusi 13:25, 38, 39) Jiisusip assersuusiamini naasupiluit assersuutigisai tassaagunarput ivikkat ilaat (rajgræs-it) toqunartullit. Ivigaq toqunartulik taanna qajuusiassamut inerilluarneqanngitsumut assingusorujussuuvoq. Kristumiunut ilumuunngitsunut, naalagaaffimmut qitornaanerartunut, eqqortumilli inerititaqanngitsunut, assersuunneqarnerat tulluaqaaq! Kristumiut ilumoortuusaartut taakku Jiisusimut ajoqersugaaneraraluartut Saatanip Diaavulup ‘kinguaassaanut’ ilaapput. — 1 Mosesi 3:15, NV.

6. Naasupiluit takkussuunnerat qanga malunnarsilerpa, tamatumalu nalaani inuit ‘sinittut’ qanoq paasisariaqarpa?

⁶ Kristumiut ilumuunngitsut taakku takkussuunnerat qanga malunnarsilerpa? Jiisusi oqarpoq ‘inuit sinitsillugit’. (Matthæusi 13:25) Tamanna qanga piva? Tamatumunnga akissutaasoq apustilip Paulusip Efesosimi utoqqaanertanut  oqaasiini erserpoq: “Nalunngilara peerukkuma amaqqut qaasuttut ilissinnut tikiukkumaartut savaatinillu asattuussissanngitsut. Allaammi ilissi akornassinnit saqqummersoqarumaarpoq angutinik ilumoortuunngitsumik oqaluttunik ajoqersukkat imminnut malinnaatikkumallugit.” (Apustilit Suliaat 20:29, 30) Taava Paulusip taakku anersaakkut eqqumaqqullugit kajumissaarpai. Apustilit, tunussinermut illersuutaasut, toqorarnerat ilutigalugu kristumiorpassuit anersaakkut sinilerput. (Atuakkit 2 Thessalonikamiut 2:3, 6-8). Tamatuma nalaani tunussinersuaq aallartippoq.

7. Qajuusiassat ilaat naasupilunngorpat? Nassuiaruk.

⁷ Jiisusi oqanngilaq qajuusiassat naasupilunngussasut, oqarporli qajuusiassat akornannut naasupilunnik siaruarterisoqassasoq. Tassa assersuusiami kristumiut ilumoortut sallusuissummit qimaguttut pineqanngillat. Pineqarporli Saatanip inuit ajortut ilagiinnut ilanngutsinneratigut ilagiinnik kristumiunik ilungersorluni ajortunngortitsiniarnera. Apustilip kingulliup, Johannesip, utoqqalinerata nalaani tunussinersuaq tamanna erseqqippoq. — 2 Petrusi 2:1-3; 1 Johannesi 2:18.

“Katersuinissap tungaanut tamarmik naajartoqatigiiginnarlit”

8, 9. (a) Sooq narsaammik piginnittup peqqussutaa Jiisusip ajoqersugaasa silatusaarnerusoraat? (b) Assersuusiap eqquunneratut qajuusiassat naasupiluillu qanoq naajartoqatigiippat?

⁸ Narsaammik piginnittoq kiffaasa ornillugu ajornartorsiummik tamatuminnga oqaluttuuteriarlugu naasupiluit pillugit ima aperaat: “Piiaqquigit?” (Matthæusi 13:27, 28) Narsaammik piginnittup akissutaa tupaallannarsinnaavoq. Oqarpoq katersuinissap tungaanut qajuusiassat naasupiluillu naajartoqatigiissasut. Jiisusilli ajoqersugaasa tamanna silatusaarnerusoraat. Nalunngilaat qajuusiassat ivikkallu ilaat (rajgræs-it) toqunartullit qanoq immikkoortikkuminaatsigisut. Aamma naggorissaanermik ilisimasallit nalunngilaat naasupiluit sorlaat qajuusiassat sorlaannut ilaguttartut. * Tupinnanngilaq kiffat utaqqeqquneqarmata.

⁹ Tamatumunnga assingusumik ukiut hundredellit ingerlaneranni kristumiuuneraqatigiinni upperisarsioqatigiit assigiinngitsut naasupilunnik katersaqangaarsimapput — siullermik ilagiinni katuullini Romalerisuni ilagiinnilu ortodoksini, kingusinnerusukkullu upperisarsioqatigiippassuarni naaggaartuni saqqummertuni. Piffissamili tamatumani aamma, silarsuarmi tamarmi, qajuusiassanik siaruarterisoqarpoq. Assersuummi narsaammik piginnittup siaruartikkat naajartorneranni sivisuumi erinitsajuilluni katersuiffissap sivikikujuttup aallartinnissaa utaqqivaa.

Katersuiffik sivisuumik utaqqisaq

10, 11. (a) Katersuiffik qanga aallartippa? (b) Qajuusiassat assersuutaasut Jehovap quianut katersorneqarnerat qanoq paasisariaqarpa?

¹⁰ Jiisusi ima oqarpoq: “Katersuiffik tassa silarsuup naggatissaa [pissutsit aaqqissuussaanerata naggataatungaa, NV], katersuisullu tassa inngilit.” (Matthæusi 13:39) Pissutsit aaqqissuussaanerata ajortup maanna atuuttup ulluini kingullerni immikkoortiterisoqarpoq —  “Naalagaaffiup qitornai” katersorneqarput naasupiluttullu eqqartorneqartunit immikkoortinneqarlutik. Tamanna pillugu apustili Petrusi ima allappoq: “[Maanna] eqqartuussinissaq aallartittussanngorpoq, Guutip inoqutaanit aallartilluni; uatsinnilli aallartippat qanormitaava ittumik Guutip iivangkiiliuanut naalasseriitsut naggateqassappat?” — 1 Petrusi 4:17.

¹¹ Ullut kingulliit, imaluunniit ‘pissutsit aaqqissuussaanerata naggataatungaata’ aallartinnerata kingorna sivitsunngitsoq imminnut tassaanerartut kristumiut ilumoortut — tassaagaluarpata “Naalagaaffiup qitornai” imaluunniit “Ajortup qitornai” — eqqartuunneqarnerat aallartippoq. Katersuiffiup aallartinnerani Babylonersuaq uppiteqqaariarlugu “Naalagaaffiup qitornai” katersorneqarput. (Matthæusi 13:30) Qajuusiassalli assersuutaasut qanoq ilillutik Jehovap quianut katersorneqarpat? Katersorneqarnerat ima paasisariaqarpoq ilagiinnut kristumiunut pilerseqqitaasunut, Guutimit iluarisaallutillu sernissorneqarfigisaminnut, pisinneqartut imaluunniit qilammi akissarsiassartik pigaat.

12. Qanoq sivisutigisumik katersuisoqassava?

¹² Eqqartuussineq tamanna qanoq sivisutigaa? Jiisusip katersuineq assersuutaasoq tamanna  pillugu oqaaseq “katersuiffik” atorpaa, taamaattumik piffissaq sivisungaatsiarsimassaaq. (Saqqummersitat 14:15, 16) Piffissaq tamanna tanitat inuttut ataasiakkaatut eqqartuunneqarfiat, naggatissap aallartinneraniit naaneranuusimassaaq. Inaarutaasumik naqissuserneqarnissaasa tungaanut eqqartuussineq ingerlassaaq. — Saqqummersitat 7:1-4.

13. Naasupilunnut assersuunneqartut qanoq ilillutik tunussisitsippat, inatsisinillu qanoq unioqqutitsippat?

¹³ Kikkut Guutip naalagaaffianit piiarneqassappat, taakkualu qanoq ilillutik tunussisitsissappat inatsisinillu unioqqutitsillutik? (Matthæusi 13:41) Kristumiuunerartut palasiisa, ‘naasupiluttut’ ittut, ukiut hundredellit ingerlaneranni inuit millionillit tammartissimavaat. Taamaaliorput ajoqersuutit Guutimut kanngunarsaataasut, “tunussisitsisut tamaasa”, assersuutigalugu ataasiullunilu pingasuussuseq paasiuminaatsoq anniarfimmilu ikualasumi naassaanngitsumik naalliutsinneqarneq, ajoqersuutigileramikkik. Upperisarsiornikkut siuttut ilarpassui savaatiminnut maligassiunerlupput, ilaatigut kannguttaatsumik kinguaassiuutitigut inuunerlunnermikkut. Aamma silarsuarmut ikinngutaanermikkut anersaakkut ittumik allasiorput. (Jaaku 4:4) Aammattaaq kristumiuunerartut ilagiivini ilaasortaasut inuunerlunnerat akuersaarneqaraluttuinnarpoq. (Atuaruk Judasi 4). Taamaakkaluartoq qallikkuinnaq Guutimut tunniusimajuarlutillu upperluartuusaartuarput. ‘Naalagaaffiup qitornaasa’ nuannaarutigingaarpaat naasupiluttut ajoqersuinerluutinit, tunussisitsisunit, tamakkunannga sunnertissimannginnamik.

14. Naasupiluttut eqqartorneqartut qanoq ilillutik ‘qiallutillu qorsaqqortassappat’?

¹⁴ Naasupiluttut eqqartorneqartut qanoq ilillutik ‘qiallutillu qorsaqqortassappat’? (Matthæusi 13:42) “Ajortup qitornai” naalliupput anersaakkut toqunartoqarnertik ‘Naalagaaffiup qitornaanit’ qulaarneqarmat. Aamma upputigaat oqaluffimmut ilaasortarisaminnit siornatigutulli tapersersorneqarunnaarnertik inuinnarnullu sunniutaarunnertik. — Atuakkit Esaja 65:13, 14.

15. Naasupiluit ikuallanneqarnerat qanoq paasisariaqarpa?

¹⁵ Naasupiluit qanoq nutsunneqarlutillu ikuallanneqarpat? (Matthæusi 13:40) Oqaatsini taakkunani naasupiluit naggataatigut qanoq pineqarumaarnerat pineqarpoq. ‘Aatsitsivimmut ikumasumut’ iginneqarnerat isumaqarpoq naassaanngitsumik piuneerussaajumaartut. (Saqqummersitat 20:14; 21:8) Kristumiut ilumuunngitsut, peqquserluttut, ‘naalliunnartoqangaarnissami’ nungutinneqassapput. — Matthæusi 24:21.

“Seqinertut qaammarikkumaarput”

16, 17. Malaki Guutip naalaffia pillugu qanoq siulittuiva, eqquunneralu qanoq aallartippa?

¹⁶ Qajuusiassatut eqqartorneqartut qaqugu ‘seqinertut qaammarississappat’? (Matthæusi 13:43) Guutip naalaffiata minguiarneqarnera pillugu Malaki ima siulittuivoq: “Naalagaq ujagarsi, tassanngaannaq naalaffimminut tikiukkumaarpoq, inngili angerfigeqatigiissitsisussaq erinigisarsi aggerumaarpoq, oqarpoq [Jehova] Katersaarsuit Naalagaat. Kia ulloq tikiuffissaa attassinnaavaa? Kina atasinnaava taanna saqqummerpat? Assigiumaarpaami inneq aatsitsivimmiittoq qarsorsiisullu qaqorsaataa. Ingikkumaarpoq aatsitsissalluni sølvimillu akuiaassalluni. Levikkut eqqiarumaarpai kuultitut sølvitullu akuiarlugit eqqortumik [Jehovamut] pilliutinik aatsisinnaaqqullugit.” — Malaki 3:1-3.

¹⁷ Siulittuutip tamatuma nalitsinni eqquunnera aallartikkunarpoq 1918-imi Jehovap, “inngili angerfigeqatigiissitsisussaq”, Jiisusi Kristusi, peqatigalugu naalaffik anersaakkut ittoq misissuiffigimmagu. Malakip siulittuutigaa minguiaaneq tamanna  naammassineqarpat qanoq pisoqarumaartoq: “Kingumut immikkoortissinnaanngussavarsi iluartoq iluanngitsumit, tassa Guutimik kiffartuussisoq kiffartuussisuunngitsumit.” (Malaki 3:18) Kristumiut ilumoortut nakussatsinneqarsimasut suliniutigiligaannit amerlaqisunit erserpoq katersuiffik piffissami tamatumani aallartittoq.

18. Nalitsinni pisussaq pillugu Danieli qanoq siulittuiva?

¹⁸ Pruffiiti Danieli nalerput pillugu ima siulittuivoq: “[Paasisimasartuut] qaammarikkumaarput qilaap qaarujunnerata qaammarissusiatut. Amerlasuunillu unnersuussisut iluarnermut ullorissatut qaamassapput naassaanngilluinnartumik.” (Danieli 12:3) Kikkunuku taama qaammaritsigisut? Tassaapput kristumiut tanitat, Jiisusip qajuusiassat naasupiluillu pillugit assersuusiaani qajuusiassaasut. Savat assersuutaasut amerliartuinnartut paasisimavaat naasupiluit, kristumiut ilumuunngitsut, ‘nutsunneqarsimasut’, imaluunniit immikkoortinneqarsimasut. Tamatumunnga assingusumik Guutip naalagaaffiani innuttaalersussat taakkua anersaakkut Israelikkunnut kinguleruttunut ilanngunnermikkut silarsuarmi taartumi matumani qaamasortik qaamatippaat. — Zakaria 8:23; Matthæusi 5:14-16; Filippimiut 2:15.

19, 20. ‘Naalagaaffiup qitornaasa’ suna qilanaaraat, apeqqullu suna allaaserisami tulliuttumi sammineqassaava?

¹⁹ ‘Naalagaaffiup qitornaasa’ qilammi akissarsiassartik alutornangaartoq ullumikkut qilanaaraat. (Romamiut 8:18, 19; 1 Korinthimiut 15:53; Filippimiut 1:21-24) Tamannali nalliutsinnagu aalajaattuartariaqarput qaammarittuartariaqarlutillu, taamaalillutik ‘Ajortup qitornaanit’ avissaaqqassapput. (Matthæusi 13:38; Saqqummersitat 2:10) Nuannaarutigingaarsinnaavarput nalitsinni immikkut pisinnaatitaaffigigatsigu naasupiluit assersuutaasut immikkoortinneqarnerisa qanoq kinguneqarnerannik takunnittuusinnaanerput.

²⁰ “Naalagaaffiup qitornai” aamma amerlangaartut, Guutip naalagaaffiani innuttaasutut nunarsuarmi naassaanngitsumik inuunissamik neriugisaqartut, amerliartuinnartut imminnut qanoq attaveqatigiippat? Apeqqut tamanna allaaserisami tulliuttumi akineqassaaq.

[Quppernerup ataani ilanngussat]

Eqqaamavigit?

Jiisusip qajuusiassat naasupiluillu pillugit assersuusiaanut tunngasut uku sumut assersuutaappat?

• Naatsiiassat pitsaasut

• Inuk naatsiiassanik siaruarterisoq

• Naatsiiassanik siaruarterineq

• Qinngarsuisoq

• Naasupiluit

• Katersuiffik

• Qui

• Ajortup qitornai qiallutillu qorsaqqortassasut

• Aatsitsivik ikumasoq

[Atuaqqissaarnermi apeqqutit]

[Qupp. 24-mi assiliartaq]

Ukiumi 33-mi piinsip ulluani naatsiiassat pitsaasut siaruarterneqalerput