“Jo Makare Norieny Kaka Wang’ Chieng’”

“Eka jo makare norieny kaka wang’ chieng’ e pinyruodh Wuon-gi.”—MATH. 13:43.

1. Yesu notiyo gi ngeche e lero chal mage mopogore opogore mar Pinyruoth?

YESU KRISTO notiyo gi ranyisi kata ngeche mang’eny, e lero chal mopogore opogore mar Pinyruoth. “Noluwo ni ji gi ngeche, kendo ok noluwnigi gimoro ma onge ngero.” (Math. 13:34) Kotiyo gi ngero mar chwoyo kodhi mar adiera mar Pinyruoth, Yesu nojiwo ahinya kaka chal mar chuny ng’ato miyo orwako wach, kaachiel gi gima Jehova timo mondo ng’ato otim dongruok. (Mari. 4:3-9, 26-29) Yesu bende nochiwo ngero manyiso kaka wach Pinyruoth medo dongo e piny kae, kata kapo ni dongruokno ok nenre mayot motelo. (Math. 13:31-33) E wi mano, nojiwo ni ok ji duto marwako wach Pinyruoth biro doko jo mowinjore bedo e bwo Pinyruodhno.—Math. 13:47-50. *

2. E ngech Yesu mar ngano kod ogolo, kodhi maber ochung’ ne ang’o?

² Kata kamano, achiel kuom ngeche Yesu jiwo ahinya wach jogo mabiro locho kode e Pinyruodhe. Kinde mang’eny iluonge ni ngero mar ngano kod ogolo, kendo oyudore e Mathayo sula mar 13. Kata obedo ni e ngero machielo Yesu wachonwa ni kodhi michwoyo en “wach pinyruoth,” e ngeroni owachonwa ni kodhi maber ochung’ne gimoro mopogore—‘nyithind pinyruoth.’ (Math. 13:19, 38) Magi ok gin jogo ma Pinyruoth locho e wigi, to kar mano, gin “nyithind” Pinyruoth kata jocham gikeni.—Rumi 8:14-17; som Jo Galatia 4:6, 7.

Ngero mar Ngano kod Ogolo

3. Ler ane chandruok ma ng’at miwuoyoe e ngerono nigo, koda kaka ong’ado gima onego otim kuom wachno.

³ Ngerono e ma: “Pinyruodh polo porore gi ng’at moro ma nochwoyo kodhi maber e puothe. To ka noyudo ji nindo, jasike nobiro, mochwoyo ogolo bende e dier ngano, kendo noa odhi. Eka ka ite notwi monyak, ogolo bende nonenore. Wasumb wuon pacho nosudo ire mowachone niya, ‘Ruoth, ok nichwoyo kodhi maber e puothi koso? To ogolo mantie oa kure?’ Nokonigi ni, ‘Ng’at moro ma jasigu e motimo mano.’ To wasumbini nowachone ni, ‘Ara, idwaro wawuogi wachokgi koso?’ Nowachonigi ni, ‘Ooyo, dipo ni kuchoko ogolo, to upudho ngano kodgi. Wegiuru gidongi giduto kaachiel nyaka chop ndalo keyo; eka e ndalo mar keyo anawach ni jokeyo ni, Chokuru ogolo mondi, utuegi ndudi ndudi mondo uwang’gi; to ngano chokuru ukan e decha.’”—Math. 13:24-30.

4. (a) Ng’at miwuoyoe e ngerono en ng’a? (b) Yesu nochako timo tij chwoyo kodhi karang’o, to e yo mane?

⁴ Ng’at ma nochwoyo kodhi maber e puothe en ng’a? Yesu nochiwo dwoko bang’e kane olero ne jopuonjrene niya:  “Jachwo kodhi maber en Wuod dhano.” (Math. 13:37) Yesu, ma e “Wuod dhano,” noiko puoth chwoyo kuom higini adek gi nus ma ne otiyogo ne Nyasaye e piny ka. (Math. 8:20; 25:31; 26:64) Chakre chieng’ Pentekost higa 33 E Ndalowa ka dhi nyime, nochako chwoyo kodhi maber—“nyithind pinyruoth.” Chwoyo miwuoyoeni nenore ni ne otimore e kinde ma Yesu kaka jal moor gi Yehova, nochako olo roho maler e wi jopuonjre, kendo mano nowalogi kaka nyithind Nyasaye. * (Tich 2:33) Kodhi maber nodongo mobedo ngano motegno. Kuom mano, chwoyo kodhi maber ne en ni mondo gikone ochok kwan duto mag jogo ma ne dhi bedo jocham gikeni kendo joloch kaachiel gi Yesu e Pinyruodhe.

5. Jasigu en ng’a e ngerono, to ogolo ochung’ne ng’a gini?

⁵ Jasigu en ng’a, to ng’a gini ma gin ogolo? Yesu wachonwa ni jasigu en “Satan.” Ogolo to inyiso ni gin ‘nyithind ng’a marachno.’ (Math. 13:25, 38, 39) E yo masie, nyalo bedo ni ogolo ma Yesu ne wuoyoe ne en kit yath moro marach ma ne chalo ahinya gi ngano kapok otegno. Mano kaka ranyisino owinjore ndi gi Jokristo mawacho awacha ni gin nyithind Pinyruoth to ok ginyag olemo madier! Kuom adier, Jokristo mawuondore kendo  mawacho ni gin jolup Kristo, gin jogo maloso ‘koth’ Satan Jachien.—Chak. 3:15.

6. Ogolo nochako betie karang’o, to ere kaka ji ne “nindo” e kindego?

⁶ Jokristo machalo ogologi, nochakore nade? Yesu nowacho ni, “ka noyudo ji nindo.” (Math. 13:25) Mani ne en karang’o? Wayudo dwoko e weche ma jaote Paulo nondiko ne jodong-kanyakla ma Efeso niya: ‘Ang’eyo ni ka asea, ondiegi moowore nodonj e dieru, kendo ok giniwe kweth; kendo kuomu uwegi bende jo moko nowuogie ma puonjo weche ma ketho adiera, ni mondo giywago jopuonjre bang’gi.’ (Tich 20:29, 30) Ne odhi nyime jiwo jodongogo mondo kik ginindi to gibed ka gitang’. Bang’ ka joote ma ne tiyo kaka ‘josind’ ng’anjo ochako tho, thoth Jokristo nodonjo e nindo. (Som 2 Jo Thessalonika 2:3, 6-8.) Mago e kinde ma ng’anjo maduong’ ne ochakoree.

7. Be moko kuom ngano nolokore mobedo ogolo? Ler ane.

⁷ Yesu ne ok owacho ni ngano ne dhi bedo ogolo, to nowacho ni ne ochwo ogolo e kind ngano. Omiyo, ngeroni ok wuo kuom Jokristo madier ma bang’e weyo adiera. Kar mano, owuoyo kuom kinda ma Satan timo goyiem mondo oketh godo kanyakla mar Jokristo kokalo kuom rwako joma richo e iye. Ka nochopo kinde ma koro Johana, jaote mogik ne oti, ng’anjoni koro ne nenore ayanga ahinya.—2 Pet. 2:1-3; 1 Joh. 2:18.

“Wegiuru Gidongi Giduto Kaachiel Nyaka Chop Ndalo Keyo”

8, 9. (a) Ang’o momiyo nyaka bed ni jowinjo mag Yesu nowinjo tiend weche ma Ruoth nowacho ne wasumbinine? (b) E chopo wechego, ere kaka ngano kod ogolo nodongo kaachiel?

⁸ Wasumb Ruoth dhi ire to ginyise chandruok mantie ka gipenje kama: ‘Ara, idwaro wawuogi wachok ogolo koso?’ (Math. 13:27, 28) Dwoko mochiwo nyalo miyo ng’ato owuor matin. Owachonegi ni giwe ngano kod ogolo odongi kaachiel nyaka chop kinde keyo. Jopuonjre Yesu ne dhi winjo tiend chikno. Ne gidhi fwenyo kaka pogo ngano gi ogolo en gima tek. Jogo mong’eyo weche pur ne dhi ng’eyo kaka pile mise mag ogolo makore ka gitweyore gi mag ngano. * Kare emomiyo ok kawwa gi wuoro ni Ruodhgi ne ochikogi ni girit komondi!

⁹ E yo machalo kamano, kuom higini mang’eny, dinde mopogore opogore maluongore ni Jokristo osenyago ogolo mang’eny ahinya—mokwongo kuom dinde mag jo Katholik kod Othodoks, to bang’e kuom dinde mogwaro mag jo Protestant ma bende nobedoe. Gie kindeno bende, kodhi manok mag ngano madier ne opidhi e piny ma en kaka puodho. Wuon pacho miwuoyoe e ngerono norito mos kuom kinde mogwaro mar chwoyo, nyaka kinde keyo ma en kinde machuok, chopi.

Ndalo Keyo ma ne Irito Ahinya

10, 11. (a) Kinde keyo en mane? (b) Ere kaka irwako ngano mar ranyisi e dech Jehova?

¹⁰ Yesu wachonwa kama: “Keyo en giko mar ndalo; to jokeyo gin malaika.” (Math. 13:39) E kinde mag ndalo giko mar piny marachni, nitie tij pogo ji madhi nyime—nyithind Pinyruoth onego ochoki kipogogi gi moro amora machalo gi ogolo. Kowuoyo kuom wachni, jaote Petro luwonwa niya: ‘Ndalo osechopo mondo bura ochakre kuom jood Nyasaye. To kochakore kuomwa, nobed nadi ne jogo maok  winj wach maber mar Nyasaye?’—1 Pet. 4:17.

¹¹ Mapiyo bang’ chakruok mar ndalo giko, kata “giko mar ndalo,” bura nochakore kuom jogo ma ne wacho ni gin Jokristo madier—mondo ong’e kabe kuom adier ne gin “nyithind pinyruoth” koso ‘nyithind ng’a marachno.’ E kar chakruok mar keyo, Babulon maduong’ ne opodho “mondi,” kae “to” ne ochok nyithind Pinyruoth kaachiel. (Math. 13:30) To ere kaka ikano ngano mar ranyisi e dech Jehova? Joma ne ikayogi ne irwako e kanyakla mar Jokristo ma ne oduoki kendo, kama Nyasaye dewogie kendo ritogie, kata ne giyudo pokgi mar polo.

12. Keyo dhi nyime kuom kinde maromo nade?

¹² Ndalo bura kawo kinde maromo nade? Yesu nowuoyo kanyiso ni keyo kawo “ndalo,” omiyo en gima dhi nyime kuom kinde. (Fwe. 14:15, 16) Omiyo, bura mar jakanyo ka jakanyo mar kweth mar Jokristo mowal, dhi nyime kuom kinde duto mag ndalo giko. Burano biro dhi nyime nyaka gikone giduto oketnegi kido.—Fwe. 7:1-4.

13. Ogolo kelo chwanyruok e yo mane, to ere kaka gitimo maricho?

¹³ Ng’a gini mibiro gol oko mar Pinyruoth, to ere kaka gikelo chwanyruok kendo timo maricho? (Math. 13:41) Joma chalo kaka ogolo ma gin jotend dinde maluongore ni Jokristo osewuondo ji tara gi tara kuom higini mang’eny. Gisetimo mae kokalo kuom puonj maok mi Nyasaye duong’, ma e gigo “ma kelo chwanyruok,” kaka puonj mar ni nitie kar mach miwang’oe ji nyaka chieng’ koda puonj machocho paro ni nitie Nyasaye ma Nyadidek. Thoth jotend din oseketo ne kwethgi ranyisi marach kuom timo osiep gi pinyni, kendo nitie moko mosedonjo koda e timbe maricho mag terruok. (Jak. 4:4) E wi mago, dinde maluongore ni Jokristo osemedo mbeko tol kuom timbe terruok ma joggi timo. (Som Juda 4.) Kata obedo ni magi duto timore, gidhi nyime nyiso gi oko ni giluoro Nyasaye. To mano kaka nyithind Pinyruoth mor nikech ipogogi gi gik machalo kaka ogolo kamago, koda puonj maricho makelo chwanyruok!

14. Jogo machalo kaka ogolo ywak kendo muodo lakgi e yo mane?

¹⁴ Ere kaka jogo machalo kaka ogolo ywak kendo muodo lakgi? (Math. 13:42) ‘Nyithind ng’a marachno’ winjo malit nikech “nyithind pinyruoth” ose elo puonjgi maricho. Giywak bende nikech kwan mar jo kanisegi medo dok chien, kaachiel gi bedo ni gilalo teko margi kuomgi.—Som Isaiah 65:13, 14.

15. Jogo machalo kaka ogolo iwang’o gi mach e yo mane?

¹⁵ Ogolo ichoko kendo iwang’ogi gi mach e yo mane? (Math. 13:40) Mani en ranyisi mar gima timorenegi mogik. Bedo ni iwitogi e ataro mar mach, nyiso ni gikogi en kethruok mochwere. (Fwe. 20:14; 21:8) Jogo machalo kaka ogolo, ma  gin Jokristo maketore kendo mawuondore, ibiro kethi e ‘masira maduong’no.’—Math. 24:21.

‘Ginirieny Kaka Wang’ Chieng’’

16, 17. En wach mane ma Malaki nokoro e wi hekalu mar Nyasaye, to ere kaka wachno nochako chopo?

¹⁶ En kinde mane ma jogo machalo ngano ‘rienyie kaka wang’ chieng’’? (Math. 13:43) Kowuoyo kuom pwodho hekalu mar Nyasaye, Malaki nokoro niya: ‘“Ruoth, nochopi e hekalune apoya, kendo jaote mar muma, ma umorgo. Neuru! Obiro,” Jehova mar ogendini owacho. “To ng’a manyalo chungo e ndalo mar birone kendo ng’a ma dibedie kobiro? Nikech ochalo mach mar jatheth, kendo ochal gi sabund jalos nanga. Mi nobedi ka jatheth gi jalos fedha, mi enopwodh yawuot Lawi; kendo enopwodhgi kaka dhahabu gi fedha, mi ginitim ni Jehova misengini makare.”’—Mal. 3:1-3.

¹⁷ E kindegi, weche ma ne okorgo nenore nochako chopo e higa 1918 kane Jehova kaachiel gi “jaote mar muma” Yesu Kristo, ne onono hekalu mar ranyisi. Malaki wachonwa gima timore bang’ tieko tij pwodhono: “Unuduogi kendo unupog kind jo makare gi jo maricho, kind jalo motiyo ni Nyasaye gi jalo ma ok otiyone.” (Mal. 3:18) Kinda momedore ma Jokristo madier bedogo, nyiso ni mano e kinde chakruok mar keyo.

18. Ang’o ma Daniel nokoro ni ne dhi timore e ndalowa?

¹⁸ Janabi Daniel nowuoyo kuom ndalowa kane okoro kama: “Jogo mobedo mariek norieny ka ler mar polo; kendo jogo maloko chuny ji mang’eny mondo gitim kare, ginibedi kaka sulini, chieng’ ma nyaka chieng’.” (Dan. 12:3) Joma rieny ahinyago gin jomage? Ok gin jomoko nono, to mana Jokristo mowal, ma e ngano madier ma Yesu nowuoyoe e ngech ngano gi ogolo! Tij ‘golo oko’ Jokristo mawuondore machalo ogolo osenenore maler, kaluwore gi kwan masiko ka medore mar oganda mang’ongo mar jogo machalo rombe. Sama giriwore gi jo modong’ mag Israel mar roho, jogo mageno bedo e bwo loch mar Pinyruoth bende weyo ler margi orieny e piny mopong’ gi mudhoni.—Zek. 8:23; Math. 5:14-16; Fili. 2:15.

19, 20. En ang’o ma “nyithind pinyruoth” rito ahinya, to wach mane mwabiro nono e sula maluwo?

¹⁹ Sani, “nyithind pinyruoth” rito ahinya pok margi maduong’ mar polo. (Rumi 8:18, 19; 1 Kor. 15:53; Fili. 1:21-24) Kata kamano, ka kindeno podi, nyaka gisiki ka gichung’ motegno, ka gidhi nyime rieny ahinya, kendo nyiso ni gipogore chuth gi ‘nyithind ng’a marachno.’ (Math. 13:38; Fwe. 2:10) Mano kaka waduto wamor ni wasebedo gi thuolo mar neno gigo ma tij ‘golo oko’ ogolo e yor ranyisi, chopo e ndalowa!

²⁰ Kata kamano, nitie tudruok mane e kind nyithind Pinyruoth kod oganda mang’ongo mamedore mar jogo ma nigi geno mar dak e piny nyaka chieng’ e bwo loch Pinyruoth? Sula maluwo biro dwoko penjono.

[Weche moler piny]

Be Iparo?

E ngech Yesu mar ngano gi ogolo, tiend weche maluwogi gin ang’o?

• Kodhi maber

• Jal ma nochwoyo kodhi

• Tij chwoyo kodhi

• Jasigu

• Ogolo

• Ndalo keyo

• Dero

• Ywagruok kod muodo lak

• Mach

[Penjo mag Puonjruok]

[Picha manie ite mar 20]

Pentekost mar higa 33 E Ndalowa ema ne en chakruok mar chwoyo kodhi maber

[Picha manie ite mar 23]

Sani ikelo ngano mar ranyisi e dech Jehova

[En mar]

Pictorial Archive (Near Eastern History) Est.