‘Mi Felte Chu Nî Angin An Eng Ang’
‘Mi Felte Chu Nî Angin An Eng Ang’
“Chu mi hunah chuan mi felte chu an pa ramah chuan ni angin an êng tawh ang.”—MT. 13:43.
1. Isua chuan eng ang Lalram hmêlhmang chi hrang hrangte hrilhfiah nân nge tehkhin thu a hman?
ISUA KRISTA chuan Lalram hmêl hmang chi hrang hrang hrilhfiah nân tehkhin thute a hmang a. Ani chuan “tehkhin thuin mipuite hnênah a sawi a, tehkhin thu lovin an hnênah engmah a sawi lo.” (Mt. 13:34) Lalram thutak buh chi thehna tehkhin thu-ah, Isua chuan thuchah pawm tûra mite rilru put hmang a pawimawh thu leh thlarau lama ṭhang chho tûra Pathian Jehova hnathawh chu a sawi uar a ni. (Mk. 4:3-9, 26-29) Isua chuan kan rawngbâwlna rah chhuah chu hmuh nghâl theih ni ṭhîn lo mah se, Lalram thuchah pawmtu nasa taka an pun tûr chungchâng pawh tehkhin thuin a sawi bawk a. (Mt. 13:31-33) Chu bâkah, Lalram thuchah pawmtu apiangte chu Ram khua leh tui ni tlâk an ni kher lo tih a târ lang bawk.—Mt. 13:47-50. *
2. Isua sawi buh lem leh buh tak tehkhin thu-ah hian, chi ṭha chuan tute nge a entîr?
2 Amaherawhchu, Isua sawi tehkhin thu pakhat chuan ama ruala Lalrama rorêltu tûrte lâk khâwmna chungchâng a thlûr bîk a. Chu chu Matthaia bung 13-a kan hmuh, buh lem leh buh tak tehkhin thu tia hriat hi a ni. Tehkhin thu dangah, Isua chuan buh chi chu “ram thu” a nihzia sawi mah se, he tehkhin thu-ah hi chuan buh chi ṭha hian thil dang daih—“ram fate”—a entîr tih a târ lang. (Mt. 13:19, 38) Anni chu Lalram khua leh tuite ni lovin, Lalram “fate,” a nih loh leh roluahtute an ni zâwk a ni.—Rom 8:14-17; Gal. 4:6, 7.
Buh Lem leh Buh Tak Tehkhin Thu
3. Tehkhin thua miin harsatna a tawh leh a chinfel dân chu sawi rawh.
3 A tehkhin thu sawi chu hei hi a ni: “Vân ram chu, mi a lova chi ṭha thehtu nên chuan tehkhin a ni, nimahsela mi a muthilh hlânin a hmêlma a lo kal a, buh zingah chuan buh lem a theh a, a kal bo leh ta a. Tin, buh chu a lo ṭo va a lo vuih chuan buh lem chu a lo lang ve ta a. Tin, in neitu bâwihte chu an lo kal a, a hnênah chuan, ‘Ka pu, i lovah chi ṭha i theh lo vem ni? buh lem saw khawi ata lo awm nge ni le?’ an ti a. Tin, ani chuan an hnênah, ‘Chu chu hmêlmain a lo ti ta a nih chu’ a ti a. Tin, bawite chuan a hnênah, ‘A nih leh chûng chu va la khâwm mai ila rem i ti em?’ an ti a. Ani erawh chuan, ‘Ti lo ve; buh lem chu in lâk khawmzâwngin buh chu in pawt tel hlauh dah ang e. Buh seng thlengin ṭo za rawh se; tin, buh seng hunah chuan buh âttute hnênah, Buh lem chu la khâwm hmasa zet ula, hâl tûrin têl rawh u; buh erawh chu ka buh inah seng lût rawh u,’ a ti a,” tih hi.—Mt. 13:24-30.
4. (a) Tehkhin thua mi chu tunge ni? (b) Eng hunah leh engtin nge Isua’n buh chi ṭha chu a theh ṭan?
4 A lova chi ṭha thehtu chu tunge ni? Isua chuan a hnu lama a zirtîrte a hrilhfiahnaah chu zawhna chu a chhâng a ni: “Chi ṭha thehtu chu Mihring Fapa hi a ni,” tiin. (Mt. 13:37) “Mihring Fapa” Isua chuan leia a rawngbâwl hun, kum thum leh a chanve chhûngin lo chu buh chi theh nân a lo buatsaih tawh a ni. (Mt. 8:20; 25:31; 26:64) Chutah, C.E. 33, Pentikost aṭangin chi ṭha—“ram fate”—chu a theh ṭan a. Chu mi nîah chuan, Pathian Jehova aiawhtu angin Isua’n zirtîrte chungah thlarau thianghlim a leih a, Pathian fate ni tûrin hriak a thih a ni. * (Tirh. 2:33) Chi ṭha chu buh tak angin a lo puitling chho va. Chuvângin, chi ṭha theh chhan ber chu a tâwp a tâwpa Isua Lalram roluahpui tûr leh chuta a rorêlpui tûrte an vaia lâk khâwm chu a ni.
5. Tehkhin thua hmêlma chu tunge ni a, buh lemte chuan tute nge a entîr?
5 Hmêlma chu tunge ni a, tute nge buh lemte chu? Isua chuan hmêlma chu “diabola a ni” tih min hrilh a. Buh lemte erawh chu “mi sual fate an ni.” (Mt. 13:25, 38, 39) Isua sawi buh lemte chu a puitlin hma chuan buh tak nên a inang hle a; mahse, tûr a nei thung a ni. Chu chu Ram fate anga inchhâl si a, rah ṭha chhuah si lo Kristian derte sawi nân a va inhmeh tak êm! Krista hnung zuia inchhâl chûng Kristian vervêk takte chu Diabol-Setana “thlah” zînga mi an ni tak zet a ni.—Gen. 3:15.
6. Engtik khân nge buh lem chu a lo lan ṭan a, engtin nge chutih lai chuan mite chu an “muthilh”?
6 Buh lem ang hêng Kristiante hi engtik khân nge an lo lan? Isua chuan “mi a muthilh hlânin,” a ti. (Mt. 13:25) Engtik khân nge mi chu a muthilh? A chhânna chu Ephesi khuaa upate hnêna tirhkoh Paula lehkha thawnah kan hmu a ni: “Ka kal hnuin chinghne kawlhte in zîngah an lo lût ang a, pâwlho chu an zuah lo vang tih ka hria e. In zînga mi ngei pawh hi, zirtîrhote in hnêna pakaitîr tûrin thu hran sawi in lo la awm ang,” tihah hian. (Tirh. 20:29, 30) Ani chuan chûng upate chu thlarau lama harhvâng tlat tûrin a fuih zawm a ni. Kristian kohhran chhûnga zirtîrna dik lo lo lût tûr ‘khaptu’ tirhkohte thihnaa an muthilh hnu chuan, Kristian tam tak chu thlarau lamah an lo muhîl ta a. (2 Thessalonika 2:3, 6-8 chhiar rawh.) Chu chu zirtîrna dik lo nasa tak a lo luh ṭanna chu a ni.
7. Buh tak ṭhenkhat chu buh lemah an chang em? Hrilhfiah rawh.
7 Isua chuan buh tak chu buh lemah a lo chang ang a ti lo va, buh lem chu buh tak zînga theh a nih thu a sawi zâwk a ni. Chuvângin, he tehkhin thu hian Kristian dikte thutak aṭanga an kal bo thu a sawi lo. Setana’n Kristian kohhran tihchhiat nâna mi suaksualte dah luh a tum luih tlatna a kâwk zâwk a ni. Tirhkoh hnuhnûng ber, Johana a tar tawh meuh chuan, kohhran chhûngah zirtîrtu der tam tak an lo lût tawh a ni.—2 Pet. 2:1-3; 1 Joh. 2:18.
“Buh Seng Thlengin Ṭo Za Rawh Se”
8, 9. (a) Engvângin nge chhiahhlawhte hnêna Pu ber thupêk chu Isua thusawi ngaithlatute chuan an hriatthiam ang? (b) Tehkhin thu thlen famkimnaah, engtin nge buh lem leh buh tak chu an ṭo za?
8 Chhiahhlawhte chuan a Pu hnênah thil awm dân chu hrilhin, heti hian a zâwt a: “A nih leh chûng [buh lemte] chu va la khâwm mai ila rem i ti em?” tiin. (Mt. 13:27, 28) A chhânna pêk chu mak kan ti mai thei. Buh seng thlenga buh lem leh buh tak chu ṭo zatîr tûrin a hrilh a ni. Chu thupêk chu Isua zirtîrte chuan an hre thiam ngei ang. Anni chuan buh lem leh buh tak thliar hran harsatzia chu an hria ang a. Thlai lam hre mite chuan buh lem zung chuan buh tak zung a zem ngheh tlatzia an hre bawk ang. * Chuvângin, Pu berin nghâk rih tûra a hrilh pawh hi a mak lo ve!
9 Chutiang bawkin, kum zabi kalta chhûng zawng khân, Kristianna ram sakhaw hrang hrang chuan buh lem tam tak an thar chhuak a—a hmasa berin Roman Catholic leh Orthodox kohhrante chuan an thar chhuak a, a hnuah chuan Protestant pâwl hrang tam tak lo chhuakte chuan an thar chhuak leh a ni. Chutih rual chuan, khawvêl hmun hrang hrangah buh tak chi tlêm tê chu theh a ni ve bawk a. Tehkhin thua in neitu chuan buh ṭhan hun nêna khaikhina rei lo zâwk, buh seng hun a lo thlen hma loh zawng dawhthei takin a nghâk ṭâng ṭâng a ni.
Hun Rei Tak Chhûng Lo Beisei Tawh Buh Seng Hun
10, 11. (a) Buh seng hun chu eng hunah nge a inṭan? (b) Engtin nge entîr nei buh tak chu Pathian Jehova buh ina seng luh a nih?
10 Isua chuan: “Buh seng chu khawvêl tâwpna tûr a ni; buh âttute chu vântirhkohte an ni,” tih min hrilh a. (Mt. 13:39) He khawvêl suaksual tâna ni hnuhnûngah hian buh lem ang mite zîng ata Ram fate lâk khâwm a, hlîrna chu a thleng mêk a ni. He mi chungchângah hian, tirhkoh Petera chuan: “Rorêlna chu Pathian chhûngteah hian ṭan a hun tawh si a; tin, keimahni maha a ṭan hmasak chuan Pathian chanchin ṭha thu zâwm lote tâwpna chu engtin tak ni ang maw?” tih min hrilh a ni.—1 Pet. 4:17.
11 Ni hnuhnûng, a nih loh leh “khawvêl tâwpna” hun a inṭan hnu lawkah, Pathian Jehova betu dik nia inchhâlte chu “ram fate” an ni tak zet nge, “mi sual fate” zâwk tih hriat nân an chunga rorêlna neih ṭan a ni a. Buh seng ṭan hun chuan Babulon Khaw Ropui chu a tlu “hmasa” a, a hnuah Ram fate chu lâk khâwm an ni. (Mt. 13:30) Mahse, engtin nge entîr nei buh tak chu tûnah Pathian Jehova buh ina seng luh a nih? Chûng seng luha awmte chu Pathian duhsakna leh humhimna an dawnna, Kristian kohhran din tharah lâk luh an ni a, a nih loh leh an vân lam lâwmman an dawng tawh a ni.
12. Buh sengna chuan eng chen nge a la awh dâwn?
12 Pathian chhûngte chunga rorêlna chuan eng chen nge a awh ang? Isua chuan buh tak lâk khâwmna chu ‘buh seng hun’ tia a sawi avângin, chu chuan eng emawti chhûng a awh tihna a ni. (Thup. 14:15, 16) Hriak thihte chunga a mi mala rorêlna chu tâwpna hun chhûng zawngin a thleng zêl ang a. Chhinchhiahna hnuhnûng zâwk an dawn hunah chauh a tâwp ang.—Thup. 7:1-4.
13. Eng kawngin nge buh lemte chuan mi dangte an tlûktîr a, engtin nge thil ṭha lo an tih?
13 Tute nge Ram ata thiar chhuah tûrte chu ni a, engtin nge an ni chu tihsualtîrtute leh thil tisualtute an nih? (Mt. 13:41) Buh lem ang mi Kristianna rama sakhaw hruaitute chuan kum zabi tam tak chhûng mi tam tak an hruai sual tawh a. Anni chuan Pathian chawimawi lo zirtîrna—hremhmun meidîla chatuana nghaisakna leh hriatfiah theih loh Trinity zirtîrna ang chi—‘tihsualtîrtu,’ a nih loh leh mi dangte tlûktîrtu zirtîrnate hmangin mite chu an hruai sual a ni. Sakhaw hruaitu tam takte chuan he khawvêl nêna inṭhianna bawlhhlawh leh an nungchang bawlhhlawhna hmangin, an hote tân entawn tûr ṭha lo tak an siam a. (Jak. 4:4) Chu bâkah, Kristianna ram chuan a mi leh sate zînga nungchang bawlhhlawhna chu a pawmzam tawlh tawlh bawk a ni. (Juda 4 chhiar rawh.) Chutiang a ni chung pawhin, a pâwn lângin sakhaw mi tak leh Pathian ngaihsak mi tak angin an awm tho a ni. Ram fate chu chutiang buh lemte leh mi dangte tlûktîrtu zirtîrna suakte thununa an awm lo chu an va lâwm tak êm!
14. Engtin nge buh lem ang mite chu an ṭah a, an ha an ṭhial?
14 Engtin nge buh lem ang mite chu an ṭah a, an ha an ṭhial? (Mt. 13:42) “Ram fate” hian “mi sual fate” thlarau lam dinhmun leh zirtîrna dik lo tak an laih lan avângin, chûng buh lem ang mite chu rilru hrehawm takin an awm a. Tin, an mi leh sate ṭanpuina an dawn loh tial tialna leh anmahni an thunun theih loh tial tialna chu pawi an ti hle bawk.—Isaia 65:13, 14 chhiar rawh.
15. Eng kawngin nge buh lemte chu meia hâl an nih?
15 Eng kawngin nge buh lemte chu lâk khâwm leh meia hâl an nih? (Mt. 13:40) Hei hian buh lemte chunga a tâwpa thilthleng tûr chu a târ lang a ni. Entîr nei meia hâl an nihna chuan chatuana boralna an hmachhawn tih a târ lang. (Thup. 20:14; 21:8) Buh lem ang Kristian suak leh mi bumtute chu ‘hrehawm nasa takah’ tihboral phiar an ni ang.—Mt. 24:21.
Anni Chu ‘Ni Angin An Eng Ang’
16, 17. Malakia’n Pathian biak in chungchângah eng nge a sawi lâwk a, chu chu engtin nge a thlen famkim ṭan?
16 Eng hunah nge buh takte chu ‘nî anga an ên’? (Mt. 13:43) Pathian biak in thenfaina chungchângah, Malakia chuan: “In zawn Lalpa chu a biak inah a lo kal phut ang; ngai teh u, thuthlung tirhkoh in lawm êm êm chu a lo kal e, sipaihote LALPA chuan a ti. Amaherawhchu a lo kal nî chu tunge tuar zo vang? A lo lan hunah chuan tunge ding thei ang? Ani chu rawhtuina mei ang leh puan sutute sabawn ang a ni si a: tangkaraw rawhtuitu leh tithianghlimtu angin a ṭhu ang a, Levia fate a tithianghlim ang a, rangkachak leh tangkarua angin anmahni a tifai ang a; LALPA tân chuan felnaa thil hlântute an ni ang,” tiin a hrilh lâwk a ni.—Mal. 3:1-3.
17 Tûn lai hunah hian, he hrilh lâwkna hi kum 1918-a Pathian Jehova leh “thuthlung tirhkoh,” Isua Krista’n thlarau lam biak in an rawn endik aṭang khân a thleng famkim ṭan a ni tih kan hria a. Malakia chuan thenfaina hna zawh a nih hnua thil awm dân chu hetiang hian min hrilh a ni: “Mi fel leh mi suaksual, Pathian rawngbâwltu leh bâwl lotu chu in thliar thei tawh ang,” tiin. (Mal. 3:18) Kristian dik chak thar lehte’n rawngbâwlna an thar thawh lehna chuan chu mi hun chu buh seng inṭan hun a ni tih a hril a ni.
18. Daniela chuan kan huna thil lo thleng tûr eng nge a sawi lâwk?
18 Zâwlnei Daniela’n: “A fingate chu vân êng angin an êng ang a, mi tam tak felnaa hawi kîrtîrtute chu arsi angin kumkhaw thlaitluanin an êng ang,” tia a sawi khân, kan tûn lai hun chungchâng hi a sawi a ni. (Dan. 12:3) Tute nge vân êng anga êngte chu? Anni chu Isua sawi buh lem leh buh tak tehkhin thua buh tak, hriak thih Kristiante bâk tu dang nge ni thei tehrêng ang! Buh lem ang Kristian suakte ‘thiar chhuahna’ chu berâm ang mipui tam tak pung chho mêkte chuan chiang takin an hmu a ni. Thlarau lam Israel a la bângte nêna an inkawm hian, Lalram khua leh tui la ni tûr hêng mite hian he khawvêl thimah hian an êng chu an ênchhuahtîr a ni.—Zak. 8:23; Mt. 5:14-16; Phil. 2:14-16.
19, 20. “Ram fate” chuan eng nge nghâkhlel taka an thlîr a, a dawta thuziakah eng nge kan sawiho dâwn?
19 Tûn laiah hian, “ram fate” chuan an vân lam lâwmman ropui tak chu nghâkhlel takin an thlîr reng a. (Rom 8:18, 19; 1 Kor. 15:53; Phil. 1:21-24) Mahse, chu mi hun a lo thlen hma loh chuan rinawm taka awm rengin, vân angin an êng zêl tûr a ni a, “mi sual fate” lakah an danglam tlat tûr a ni. (Mt. 13:38; Thup. 2:10) Kan hun laia entîr nei buh lemte ‘thiar chhuahna’ kan hmuh avângin kan va lâwm tak êm!
20 Mahse, Ram fate leh Ram khua leh tuite anga leia chatuana nun beiseina nei mipui tam tak pung chho mêkte inlaichînna chu eng nge ni? A dawta thuziak chuan he zawhna hi a rawn chhâng ang. (w10-E 03/15)
[Footnote-te]
^ par. 1 Hêng tehkhin thute chungchâng chipchiar taka sawihona chu, July 1, 2008 chhuak Vênnainsâng, phêk 17-21 leh 25-29-ah en ang che.
^ par. 4 He tehkhin thu-ah hian, buh chi thehna chuan hriak thih Kristian lo la ni tûrte lâk khâwmna tûr thu hrilhna leh zirtîra siamna a kâwk lo. Lova buh chi ṭha thehna chungchângah, Isua chuan anni chu ram fa lo la ni tûrte anga sawi lovin, “Ram fate an ni,” a ti zâwk a ni. Buh chi thehna chuan khawvêl puma Lalram fate hriak thihna a kâwk a ni.
^ par. 8 Buh lem zung chuan buh tak zung chu a zem ngheh êm avângin, buh seng hmaa phawi a nih chuan buh tak a chân ṭhen theih dâwn a ni.—Insight on the Scriptures, Volume 1, phêk 1178 en rawh.
Kan La Hria Em?
Isua sawi buh lem leh buh tak tehkhin thua hêng thute hian eng nge a entîr?
• Buh chi ṭha
• Chi ṭha thehtu
• Buh chi thehna
• Hmêlma
• Buh lem
• Buh seng hun
• Buh in
• Ṭah leh ha ṭhialna
• Rawh tuina mei
[Zirlai Atâna Zawhnate]
[Phêk 24-naa milemte]
Pentikost C.E. 33 chuan chi ṭha thehna inṭan hun a hril
[Phêk 27-naa milem]
Entîr nei buh ṭhate chu Pathian Jehova buh ina seng luh an ni
[Milem Hawhtîrtu]
Pictorial Archive (Near Eastern History) Est.