“Ro Remõn Re Naj Rabõlbõl im Einwõt Al”

“Ien eo ro remõn re naj rabõlbõl im einwõt al ilo ailiñ in Jemeir.”​—MATU 13:43.

1. Ta mõtõn ko reoktõk jen dron kin Ailiñ eo an Anij me Jisõs ear kajerbal wanjoñok ko ñõn kemelele kaki?

 JISÕS KRAIST ear kajerbal elõñ wanjoñok ak parebõl ko ñõn kemelele kin mõtõn ko reoktõk jen dron kin Ailiñ eo an Anij. Ear “konono ñõn jar eo ilo parebõl ko: im ejij parebõl E jab konono ñõn ir.” (Matu 13:34) Ilo wanjoñok ko Jisõs ear kwaloki ikijen jeor ine eo kin mol eo kin Ailiñ eo, ear kalikar kin wãwen an buruen juõn armij mõnõnõ in bõk ennan eo, im bareinwõt ijo kwonan Jeova ñõn jibõñ armij eo bwe en ridtolok ilo jitõb. (Mark 4:​3-9, 26-​29) Bareinwõt, Jisõs ear wanjoñok kin joñõn an naj lõñlok armij ro rej mõnõnõ in roñjake ennan eo kin Ailiñ eo meñe ilo jinoin ejjab alikar an walok an laplok. (Matu 13:31-​33) Ear bareinwõt kemelele bwe elõñ armij renaj eoroñ ennan in kin Ailiñ eo, bõtab ejjab aolepeir renaj erom ro dron Ailiñ eo.​—Matu 13:47-50. *

2. Ta eo ine eo emõn ilo wanjoñok eo an Jisõs kin wit im tãõ ko ej jitõñlok ñõne?

² Bõtab, juõn ian wanjoñok ko Jisõs ear kwalok kaki ej kin wãwen an naj ainitok ro me renaj iroij iben ilo Ailiñ eo an. Ekkã an armij ro naetan men in, parebõl eo kin wit im tãõ ko, im kar je ilo Matu japter 13. Ilo bar juõn wanjoñok, Jisõs ej jiroñ kij bwe ine eo me kar jeore ej “nan in ailiñ eo,” bõtab ilo wanjoñok in, ej jiroñ kij bwe ine eo emõn ej jitõñlok ñõn “ro nejin ailiñ in lõñ.” (Matu 13:19, 38) Rein rejjab armij ro dron Ailiñ eo ak rej “ro nejin” ak dri jolit ro an Ailiñ eo.​—Rom 8:​14-​17; riit Dri Galetia 4:​6, 7.

Wanjoñok eo kin Wit im Tãõ Ko

3. Kemelele ta abañ eo leo ilo wanjoñok in ej jelmae im kin wãwen an kamarmire abañ in.

³ Eñin wanjoñok eo: “Ailiñ in lõñ ej einwõt juõn armij, eo e ar jeor ine emõn na ilo jikin kallip eo an: A ke armij rar kiki, an dri kijirãte ej item jeor tãõ ko na ilo bwiljin wit, im ilok. A ke bwilik edrek, im jebar leen, ien eo tãõ rej bareinwõt walok. Inem ro dri korijeran . . . rej item ba ñõn e, Iroij, kwar jab jeor ine emõn ilo am jikin kallip ke? Inem tãõ ko rar itok jen ia? Ej ba ñõn ir, Dri kijirãt eo, e ar kõmõn men in. Ro dri korijeran re ba ñõn e, Inem kwoj kõnan bwe jen ilem aini ir ke? A ej ba, Jab: elañe einwõt ñe komij aini tãõ ko, kom naj tutõki wit na ibeir. Ren jimor edrek ñõn ien jonikõn: im ilo ien jonikõn I naj ba ñõn ro dri marmir, Mokta komin aini tãõ ko, im kwori im tili: a komin ainitok wit na ilo aõ imõn wit.”​—Matu 13:24-​30.

4. (a) Wõn eman eo ilo wanjoñok eo? (b) Ñãt im ewi wãwen Jisõs ear jino jeor ine eo?

⁴ Wõn eman in me ear jeor ine eo emõn ilo melaj eo an? Jisõs ej kwalok uak eo tokelik ke ej kemelele ñõn dri kalor ro an: “Eo ej jeor ine emõn E Nejin armij.” (Matu  13:37) Jisõs, eo ej “Nejin armij,” ear kapoje jikin kallip eo iomin jilu im jimõtõn yiõ ko ke ear kwalok nan. (Matu 8:​20; 25:31; 26:64) Jen ran in Pentekost eo ilo yiõ eo 33 im manlok, Jisõs ear jino jeor ine eo emõn me ej jitõñlok ñõn “ro nejin ailiñ in lõñ.” Ien jeor eo ear walok ke Jisõs, eo Jeova ear kãlet e bwe en jutõk ikijen, ear jino lutõklok jitõb kwojarjar eo ion dri kalor ro, ilo wãwen in ear kabit ir einwõt ro nejin Anij. * (Jerb. 2:​33) Ine eo emõn ear edreklok im erom juõn wit eridto. Inem unin kar jeore ine eo ej bwe ilo jemlokõn naj kar ainitok aolep ro renaj iroij im kiñ iben Jisõs ilo Ailiñ eo an.

5. Wõn dri kijirãt eo ilo wanjoñok in, im wõn ro rej einwõt tãõ ko?

⁵ Wõn dri kijirãt eo, im wõn ro rej tãõ ko? Jisõs ej jiroñ kij bwe dri kijirãt eo ej “Devil” eo. Kar kwalok kin tãõ ko einwõt “ro nejin eo dri nana.” (Matu 13:25, 38, 39) Menin edrek in ebaijin ej einlok wõt wit ilo ien ej jino edrek. Elukkun jejit wanjoñok in ñõn ro rej ba bwe rej nejin Ailiñ eo, ak rejjab jebar leen ko remõn! Dri Kristian rein retao me rej ba rej dri kaloran Kraist, ilo mol rej mõtõn “inen” Setan Devil eo.​—Jen. 3:​15.

6. Ñãt eo ro me rej einlok wot tãõ ko rar jino walok, im ewi wãwen armij ro rar “kiki” ilo ien in?

 ⁶ Ñãt eo dri Kristian rein me rej einlok wõt tãõ ko rar jino walok? Jisõs ej ba: “Ke armij rar kiki.” (Matu 13:25) Ñãt in? Jej lo uak eo ilo nan ko an dri jilik Paul ñõn elder ro ilo Epesõs: “I jela bwe elikin aõ ilok kiru wulf ko re kanuij lej, re naj dreloñ ibemi, im jab tiriamokake bwijin. Bareinwõt jet iami re naj jutõk, im konono men ko r’ankeke, bwe ren karel ro dri kalor ilokair.” (Jerb. 20:29, 30) Ear wõnmanlok wõt im rejañ elder rein ñõn mimij wõt ilo jitõb. Dri jilik ro rar einwõt juõn kein “bõprae” nae ro rar jumae mol eo, im ke rar jino mijlok, elõñ dri Kristian ro rar kikilok ilo jitõb. (Riit 2 Dri Tessalonika 2:​3, 6-8.) Eñin ien eo ear jino walok ro rar jumae mol eo me rej einlok wõt tãõ ko.

7. Jet ian wit ko rar ke oktõk im erom tãõ? Kemelele.

⁷ Jisõs ear jab ba bwe wit ko renaj kar erom tãõ ko, bõtab ear ba bwe kar jeori tãõ ko ibwiljin wit ko. Kin men in, wanjoñok in ejjab pijaiklok armij ro me ilo jinoin rar dri Kristian ro remol bõtab tokelik rar ilok ak buñ jen tõmak. Ijellokin, ej jitõñlok ñõn jibarbar eo an Setan bwe armij ro renana ren dreloñ im kokkure congregation eo an Kristian. Ilo ien eo dri jilik eo eliktata, Jon, ear bwijwõlã, jumae in ear lukkun alikar.​—2 Pit. 2:​1-3; 1 Jon 2:​18.

“Ren Jimor Edrek ñõn Ien Jonikõn”

8, 9. (a) Etke dri roñjake ro an Jisõs rar melele nan in kakien eo an Iroij eo ñõn dri korijer ro an ilo wanjoñok eo? (b) Ilo jejit in kitien wanjoñok in, ewi wãwen wit im tãõ ko rar edrek iben dron?

⁸ Ro dri korijeran Iroij in rar itok im kennanek e kin abañ eo im kajitõk iben: “Kwoj kõnan bwe jen ilem aini [tãõ ko] ke?” (Matu 13:27, 28) Uak eo an Iroij eo emaroñ kar kailbõk ir. Ear jiroñ ir bwe ren kõtlok an wit im tãõ ko jimor edrek iben dron mae ien jonikõn. Dri kalor ro an Jisõs remaroñ kar melele kin nan in kakien eo. Rar melele kin joñõn an naj kar bin ñõn air kile oktõk in wit ko jen tãõ ko. Ro me eor air iminene kin jerbal in kallip remaroñ kar bareinwõt kile bwe okar in tãõ im wit ko ekkã air idepdep iben dron. * Eñin unin an kar Iroij eo kakien ir bwe ren kõtar!

⁹ Ilo ejja wãwen in lok wõt, jen ebeben ko mantak, elõñ kabuñ ko rewan me rej ba rej lor Kraist ilo kõkkar rar jebar elõñ ine in tãõ ko, ear ijjino iben kabuñ in Catholic, kabuñ in Orthodox, im tokelik iben kumi ko relõñ im rar jino walok jen kabuñ in Protestant. Ilo ejja ien in wõt, kar jeori jet ine ko inen wit eo emõn ibelakin lõl in. Armij eo ilo wanjoñok eo ear kijenmij wõt ilo an kõtar an men ko edreklok iomin juõn ien eaitok mae ien jonikõn eo ekaru kitien ej itok.

Ien Marmir Jonikõn eo Kar Kijoruretok

10, 11. (a) Ñãt ien marmir jonikõn eo? (b) Ewi wãwen kar bõklok wit ko ilo kõkkar ñõn iloan imõn ekan eo an Jeova?

¹⁰ Jisõs ej jiroñ kij: “Ien marmir lokõn lõl: im ro dri marmir rej enjel rõn.” (Matu 13:39) Ilo ran ko eliktata an jukjuk im ber in, naj ainitok ro nejin Ailiñ eo im kajenolok ir jen ro rej einwõt tãõ. Ikijen men in, dri jilik Paul ej jiroñ kij: “Ien in ien jino ekajet ilo imõn Anij; im elañe ej jino iber mokta, re naj it, ro re jab bokake gospel an Anij?”​—1 Pit. 4:​17.

¹¹ Ejjabto elikin an jino ran ko eliktata,  ak “lokõn lõl,” naj jino ekajete ro rej ba rej dri Kristian ro remol ñõn etale elañe rej lukkun “ro nejin ailiñ in lõñ” ak “ro nejin eo dri nana.” Ilo jinoin ien marmir jonikõn eo, Babilõn Elap enaj buñ mokta, inem naj ainitok ro nejin Ailiñ eo. (Matu 13:30) Ak ewi wãwen kar bõklok wit ko ilo kõkkar ñõn iloan imõn ekan eo an Jeova? Rein me kar ainitok ir kar lelok ñõn ir ãjinkij eo ñõn mour ilõñ ak bõklok ir ñõn iloan congregation eo an Kristian me kar bar kajutõke, ijo me rej bõk buñburu im kejbãrok eo an Anij.

12. Ewi toõn an ien marmir eo wõnmanlok?

¹² Ewi toõn naj ran in ekajet eo? Jisõs ear konono kin juõn “ien” marmir jonikõn me ekkã an wõnmanlok iomin juõn ien aitok. (Rev. 14:15, 16) Ekajet eo nae kajjojo ro uan dri kabit ro enaj wõnmanlok wõt ilo ran ko eliktata. Enaj jemlok ilo ien eo emwij sili ir.​—Rev. 7:​1-4.

13. Ilo wãwen it tãõ ko rej menin latibñil, im ewi wãwen rej kõmõni men ko renana?

¹³ Wõn ro renaj ainilok ir jen Ailiñ eo, im ewi wãwen rej kõmõni men ko renana im rej menin latibñil? (Matu 13:41) Dri tel in kabuñ ko me rej einlok wõt tãõ ko rar tel biloik million armij ro iomin elõñ ebeben ko. Rar kõmõn eindrein ikijen air kwalok katak ko rejjab koutiej Anij me rej “men in latibñil,” einwõt katak eo kin iñtan ilo kijeek eo ñõn indrio im katak eo ekabwokbwok kin Jilu Anij ilo Juõn. Elõñ dri tel ro an kabuñ ko rewan rar likit juõn joñok enana ñõn ro uan kabuñ ko air ikijen air lũñ iben kien ko an lõl im bareinwõt ikijen air mour etton. (Jem. 4:4) Bareinwõt, elaplok an kabuñ ko rewan kõtlok bwe ro uan kabuñ ko air ren mour in lũñ. (Riit Jud 4.) Meñe eindrein, dri tel in kabuñ ko rej wõnmanlok im kimji mejen armij ro ilo air kowãppen ir mõke. Elap an ro nejin ailiñ eo lukkun mõnõnõ bwe rej jenolok jen kilan ko renana an rein rej einwõt tãõ ko, im katak ko air rebwir me rej menin latibñil!

14. Ewi wãwen ro rej einwõt tãõ rej jõñ im ñi lõllõl?

¹⁴ Ewi wãwen ro rej einwõt tãõ rej jõñ im ñi lõllõl? (Matu 13:42) “Ro nejin eo dri nana” rej iñtan kin an “ro nejin ailiñ in lõñ” kajjerwawaik kilan ko air renana im katak ko air rebwir. Rej bareinwõt buromõj bwe edriklok jibõñ rej bõk jen ro uan kabuñ ko air im edriklok maroñ ko air ion armij ro.​—Riit Aiseia 65:13, 14.

15. Ta melelen air kar ainitok tãõ ko im tili ilo kijeek?

¹⁵ Ta melelen air kar ainitok tãõ ko im tili ilo kijeek? (Matu 13:40) Men in ej jitõñlok ñõn men eo enaj walok ñõn tãõ ko. Kinke kar jolok ir ñõn iloan kijeek eo ilo kõkkar, men in ej kalikar bwe naj kokkure ir ñõn indrio. (Rev. 20:14; 21:8) Dri Kristian rein retao im rej einwõt tãõ renaj joko ilo ien “iñtan eo elap.”​—Matu 24:21.

 Renaj “Rabõlbõl im Einwõt Al”

16, 17. Ta eo Malkai ear kanan kake kin tempel eo an Anij, im ewi wãwen an kar men in jino jejit kitien?

¹⁶ Ñãt eo ro rej einwõt wit rej “rabõlbõl im einwõt al”? (Matu 13:43) Ikijen karreo tempel eo an Anij, Malkai ear kanan: “Iroij Ekajur Bõtata [Jeova], ej uak im ba,  . . . ‘Iroij eo komij bukõte enaj mõkaj an iwõj ñõn Temple eo an. Innem ri keañ eo emwij kallimur kake im eto ami kõnan loe, enaj iwõj im kwalok bujen eo aõ.’ Ak wõn eo enaj maroñ in bed ilo ran eo ñe ej itok? Wõn eo enaj maroñ mour wõt ñe ej waloktok? Enaj einwõt soap eo elab an karreoeo; einwõt kijeek eo elab an bwil im ej karreoik mãl ko. Ri keañ eo an Iroij enaj itok im ekajete armij einwõt eo ej kaõnlok silver im gold kin kijeek bwe ren erreo, im enaj karreoik priest ro bwe ren maroñ bõklok menin jortak ko rewebben ñõn Iroij.”​—Mal. 3:​1-3, UBS.

¹⁷ Ilo ran kein, kanan in ear jejit kitien ilo 1918 ke Jeova im “ri keañ eo emwij kallimur kake,” Jisõs Kraist, rar karreoik tempel eo ilo jitõb. Malkai ej jiroñ kij bwe elikin an rerelok air karreoik tempel eo, jenaj kile oktõk eo ikõtan “ro ri wãnik, ro rej jerbal ñõn [Anij], im ta eo enaj walok ñõn ro ri nana, ro rejjab jerbal ñõn [E].” (Mal. 3:​18, UBS) Ke dri Kristian ro remol rar kalaplok jerbal in kwalok nan eo air, eñin ien eo ear jino ien marmir jonikõn eo.

18. Ta eo Daniel ear kanan kake bwe enaj walok ilo ran kein ar?

¹⁸ Dri kanan Daniel ear konono kin ran kein ar ke ear kanan: “Ro remeletlet renaj romak einwõt an mejatoto kanuij in meram. Im ro rar katakin elõñ armij bwe ren kõmmõni men ko rejimwe, renaj romak indrio einwõt iju.” (Dan. 12:3, UBS) Wõn rein me rej romak einwõt maram? Ejelok bar juõn ak ej dri Kristian dri kabit ro, me rej wit ko Jisõs ear konono kaki ilo wanjoñok eo an kin wit im tãõ ko! Jerbal in “ainilok” ro rej einwõt tãõ ej alikarlok kin an laplok ro uan jar eo elap me rej einwõt s̃ip. Ñe rein rej kobalok iben bween Israel eo ilo jitõb, rej bõk jerammõn eo ñõn erom ro dron Ailiñ eo im bareinwõt romak air maram ilo lõl in ekanuij marok.​—Zek. 8:​23, UBS; Matu 5:​14-​16; Pil. 2:​15.

19, 20. Ta eo ro “nejin ailiñ eo “rej kijoruretok, im ta eo jenaj katak kake ilo katak eo tok juõn?

¹⁹ Ranin, “ro nejin ailiñ in lõñ” rej kijoruretok ien eo renaj bõk ãjinkij eo air ñõn mour ilõñ. (Rom 8:​18, 19; 1 Kor. 15:53; Pil. 1:​21-​24) Mae tõre en, rej aikwij drebij wõt air tiljek, wõnmanlok wõt im romak einwõt maram, kalikar air oktõk jen “ro nejin eo dri nana.” (Matu 13:38; Rev. 2:​10) Elap ar mõnõnõ bwe eor iber jerammõn eo ñõn lo tõbrõkin “ainilok” tãõ ko ilo ran kein ar!

²⁰ Bõtab, ta oktõk eo ikõtan ro nejin Ailiñ eo im jar eo elap me kejatrikrik eo air ej ñõn mour indrio ion lõl einwõt ro dron Ailiñ eo? Katak in tok juõn enaj uake kajitõk in.

[Kamelele eo itulals]

Kwoj Ke Kememej?

Ilo wanjoñok eo an Jisõs kin wit ko im tãõ ko, ta melelen men kein?

• Ine eo emõn

• Eman eo ear jeor ine eo

• Jeor ine eo

• Dri kijirãt eo

• Tãõ ko

• Ien marmir jonikõn

• Imõn ekan eo

• Jõñ im ñi lõllõl

• Kijeek eo

[Kajitõk ko ñan katak]

[Kamelele in juõn pija ilo peij 20]

Kar jinoe jeor ine eo emõn ilo ran in Pentekost eo ilo yiõ eo 33

[Kamelele in juõn pija ilo peij 23]

Rej ainitok wit ko ilo kõkkar ñõn imõn ekan eo an Jeova

[Kamelele in juõn pija ilo peij 23]

Pictorial Archive (Near Eastern History) Est.