“Nin-tɩrsã na n yãga wa wĩndga”
“Nin-tɩrsã na n yãga wa wĩndga”
“Nin-tɩrsã na n yãga wa wĩndga, bãmb Ba soolem pʋgẽ.”—MAT. 13:43
1. Wilg-y makr nins a Zezi sẽn dɩk n bilg Rĩungã la b sẽn wilgd bũmb ninsã.
A ZEZI KIRIST da rɩka makr toɛy-toɛya, n bilg nebã Wẽnnaam Rĩungã sẽn yaa to-to. A Zezi “goma ne kʋʋngã ne yel-bũna, la b ka gom ne bãmba, sã n ka ne yel-bũnd ye.” (Mat. 13:34) A yel-bũn nins pʋgẽ a sẽn wilg tɩ Rĩungã koɛɛg mooneg wõnda rao sẽn fẽrgd bõn-buudã, a wilga vẽeneg tɩ koɛɛgã sakr bee ne kɛlgdã sũuri, la tɩ tũuda ne a Zeova sõngr me t’a soabã tẽeb tõog n bɩ. (Mark 4:3-9, 26-29) A Zezi leb n dɩka makr n wilg tɩ Rĩungã koɛɛg toeemda neb nins sẽn sakd-a wã hal wʋsgo, baa d sẽn pa ne koɛɛgã sẽn tʋmd b sũyẽ wã to-to n toeemd-bã. (Mat. 13:31-33) A yel-bũnd a ye pʋgẽ me, a wilgame tɩ pa neb nins fãa sẽn kelgd Rĩungã koɛɛgã n na n sɩd yɩ Rĩungã neb ye.—Mat. 13:47-50. *
2. Ki wã ne nadensã yel-bũndã pʋgẽ, bõn-bu-sõma wã makda bõe?
2 La a Zezi yel-bũnd a ye pʋga, a goma neb nins sẽn na n wa naag yẽ n dɩ naam a Rĩungã pʋgẽ wã tigsg yelle. Yel-bũn-kãng bee Matɩe sak 13 wã pʋgẽ. B wae n boond-a lame tɩ nadens ne ki yel-bũndi. Yel-bũnd a to pʋgẽ, a Zezi yeelame tɩ bõn-buudã b sẽn bʋdã yaa ‘Rĩungã koɛɛgã,’ la nadensã ne ki wã yel-bũndã pʋgẽ wã, a wilgame tɩ bõn-bu-sõma wã makda bũmb a to. A yeelame tɩ yaa Wẽnnaam soolmã bɩ a ‘Rĩungã kamba.’ (Mat. 13:19, 38) A pa yeel tɩ nin-kãensã yaa Rĩungã neb ye. A yeelame tɩ b yaa Rĩungã “kamba,” bɩ neb Wẽnnaam sẽn na n kõ Rĩungã tɩ b sooge.—Rom 8:14-17; karm-y Galat dãmb 4:6, 7.
Nadensã ne ki wã yel-bũndã
3. Yel-bũndã pʋgẽ, zu-loe-bʋg la pʋʋgã soab paam-yã, la a yãka yam n na n welg-a wãn-wãna?
3 Ad yel-bũndã: “[Saasẽ] soolem wẽnda wa rao sẽn fẽrg bõn-bu-sõma a pʋʋgẽ. La neb gõeem wakate, a bɛ wa n fẽrga nadens ki wã sʋka, n bas n looge. La ki wã sẽn yik n wom biisi, nadensã me pukame. Yirã soab tʋm-tʋmdb wa n soka yẽ yaa: ‘Zu-soaba, yãmb ka fẽrg bõn-bu-sõma yãmb pʋʋgẽ wã wɛ? Nadensã yii yɛ?’ Yẽ leoka bãmba: ‘Yaa bɛ wã n maan bõn-kãnga.’ La tʋm-tʋmdbã soka yẽnda: ‘Yãmb datame tɩ tõnd tɩ võ-b bɩ?’ Yẽ leoka bãmb yaa: ‘Ayo, yãmb sã n võ nadensã, daar ninga, yãmb na n võo ki wã me. Bɩ y bas bãmb b yiibã fãa tɩ b bɩ ne taaba, hal tɩ ta tigisg wakate. La tigsg wakate, mam na n yeela tigisdbã tɩ b reng n kɛ nadensã n loe kila, n yõog bugum, la b wʋk ki wã n sui m baoorẽ wã.’ ”—Mat. 13:24-30.
4. a) Yel-bũndã pʋgẽ, pʋʋgã soab makda ãndã? b) Wakat bʋgo, la wãn to la a Zezi sɩng bõn-bu-sõma wã bʋdbo?
4 Rao ning sẽn fẽrg bõn-bu-sõma a pʋʋgẽ wã yaa ãnda? A Zezi sẽn wa n na n bilg yel-bũndã võor a karen-biisã, a wilga sẽn yaa ned ninga. A yeela woto: “Yaa Ninsaal Biigã n fẽrgd bõn-bu-sõma wã.” (Mat. 13:37) “Ninsaal Biigã” yaa a Zezi. Yɩɩ a koe-moonegã sẽn kaoos yʋʋm a tã la pʋɩ-sʋkã sasa, la a maneg pʋʋgã n na n wa bʋde. (Mat. 8:20; 25:31; 26:64) La yɩɩ yʋʋmd 33 Pãntekotã tɛk la a sɩng bõn-bu-sõma wã sẽn yaa ‘Rĩungã kambã’ bʋdbo. Wakat kãnga, a Zezi sẽn yaa Wẽnnaam sẽn tʋm a soabã pʋdga vʋʋsem sõngã a karen-biisã zugu, tɩ kɩt tɩ b lebg Wẽnnaam kamb a sẽn zae. Woto n wilg vẽeneg tɩ bʋdbã sɩngame. * (Tʋʋ. 2:33) Bõn-buudã yiime n lebg ki. Dẽnd yaa sẽn na yɩl n wa tigim neb sull ning sẽn na n tɩ rɩ naam ne a Zezi a Rĩungã pʋgẽ wã yĩng la b sẽn bʋd bõn-bu-sõma wã.
5. Yel-bũndã pʋgẽ, bɛ wã yaa ãnda, la nadensã makda ãnd dãmba?
5 Bɛ wã yaa ãnda, la nadensã yaa ãnd dãmba? A Zezi yeelame tɩ bɛ wã “yaa Sʋɩtãanã,” la tɩ nadensã yaa “wẽng soabã kamba.” (Mat. 13:25, 38, 39) Nadeng ning yell a Zezi sẽn gomd yel-bũndã pʋgẽ wã yaa ble nadenga. Sã n pa a wa n wekame, b pa tõe n bãng-a n welg ye. A biisã me tara zẽnem sẽn tõe n kʋ ned menga. A Zezi sẽn mak kiris-neb ne yʋʋrã ne nadensã sɩd zemsa kɛpɩ. Bala b yetame tɩ bãmb la Rĩungã kamba, tɩ b tʋʋmã yaool n pa lebd be baa bilf ye. Sɩd-sɩda, nin-kãensã sẽn boond b mens tɩ kiris-nebã naaga a Sʋɩtãan ‘yagensã.’—Sɩng. 3:15.
6. Wakat bʋg la nadensã sɩng yiibu, la b sẽn yeel tɩ yɩɩ gõeem wakatã võor yaa bõe?
6 Wakat bʋg la nadensã sẽn makd kiris-neb ne yʋʋrã puk-yã? A Zezi yeelame tɩ yɩɩ “nebã gõeem wakate.” (Mat. 13:25) La yaa wakat bʋg la a sẽn bool tɩ gõeem wakatã? Tʋm-tʋmd a Poll sẽn yeel Efɛɛz tigingã kãsem dãmb bũmb ningã sõngda tõnd tɩ d bãnge. A yeel-b-la woto: ‘Mam miime tɩ mam loogr poorẽ, kata sẽn yaa wẽns na n kẽe yãmb sʋka, n sãam piisã. La neb na n yika yãmb sʋk n zãms nebã sẽn ka sɩda, n belg karen-biisã tɩ b tũ bãmba.’ (Tʋʋ. 20:29, 30) Rẽ poore, a sagla kãsem dãmb kãensã tɩ b mao n da gũs tẽebã wɛɛngẽ ye. Yaa tʋm-tʋmdbã n da “gɩdgd” tɩ sɩdã kɩɩsg pa tõe n paam pãngã. La kũum sẽn wõnd gõeemã sẽn wa n kʋ tʋm-tʋmdb wʋsgã, kiris-nebã wʋsg gũsa tẽebã wɛɛngẽ. (Karm-y 2 Tesalonik rãmb 2:3, 6-8.) Wakat kãng la sɩdã kɩɩsg sɩng-yã.
7. Rẽ yĩnga, yaa ki wã kẽer n da na n wa lebg nadensã bɩ? Wilg-y y leoorã võore.
7 A Zezi pa yeel tɩ yaa ki wã n na n lebg nadens ye. A yeelame tɩ b bʋda nadens ki wã sʋka. Rẽnd nadensã pa makd kiris-neb hakɩk sẽn da na n wa bas sɩdã ye. Yaa nin-wẽns a Sʋɩtãan sẽn da na n maan sɩlem n kẽes kiris-neb hakɩkã sʋka, sẽn na yɩl n sãam tigingã. Tʋm-tʋmdbã fãa renga a Zã n ki. La a Zã kʋʋlem sasa tɩ sɩdã kɩɩsdb ra zoe n puka vẽenega.—2 Pɩɛ. 2:1-3; 1 Zã 2:18.
Bas-y “b yiibã fãa tɩ b bɩ ne taab hal tɩ ta tigisg wakate”
8, 9. a) Bõe yĩng tɩ pa yɩ toog ne a Zezi kɛlgdbã tɩ b wʋm yirã soab sẽn yeelã võore? b) Yel-bũndã pidsg pʋgẽ, wãn to la ki wã ne nadensã naag taab n bɩ?
8 Yirã soab tʋm-tʋmdb sẽn wa n togs-a yellã poore, b sok-a-la woto: “Yãmb datame tɩ tõnd tɩ võ [nadensã] bɩ?” (Mat. 13:27, 28) Tõe t’a sẽn leok-b to-to wã ling-y lame. A yeel-b lame tɩ b bas ki wã ne nadensã fãa tɩ b bɩ ne taab hal tɩ ta tigisgã wakate. La a Zezi karen-biisã yẽ wʋma gomdã võore. B ra miime tɩ yɩl n bãng kaaf ne nadeng n welg yaa toogo. Sẽn yaa-b ka-koaadbã me miime tɩ nadeng sã n pẽ kaafo, a yẽgã kẽeda kaafã yẽgã. * Dẽnd yirã soab sẽn yeel a tʋm-tʋmdbã tɩ b ra yãg n võ nadensã, a bee bʋʋm.
9 Sɩd yɩɩ woto yʋʋmã sẽn pʋgl tʋm-tʋmdbã kũum poorã. Kiris-neb ne yʋʋrã sul toor-toorã yɩɩ sabaab tɩ nadens wʋsg puki. Reng n sɩnga ne katolik rãmbã la ortodogs rãmbã, la kell n yɩɩ woto ne portɛstã rãmbã sul toɛy-toɛyã me. La wakat kãng me tɩ b bʋda bõn-bu-sõma, tɩ kɩt tɩ ki me ra beẽ, baa b sã n da pa waooge. Pʋʋgã soab maaga a yĩng n gũ tɩ b fãa naag taab n bɩ, hal tɩ ta tigisgã wakate. La tigisgã wakat pa kaoos n ta gũubã wakat ye.
Tigisgã wakat b sẽn da sɩng n gũudẽ wã
10, 11. a) Tigisgã yaa wakat bʋgo? b) Wãn to la b wʋk ki wã n sui a Zeova baoorẽ wã?
10 A Zezi sẽn wa n wilgd yel-bũndã võorã, a yeela woto: “Tigisgã yaa dũniyã sɛɛbo, la tigisdbã yaa malɛk rãmbã.” (Mat. 13:39) Yaa dũniyã sɛɛb wakatã, rat n yeel tɩ dũni-wẽn-kãngã yaoolem wakatã sasa, la b tigsd ki wã sẽn yaa Rĩungã kambã, n welgd-b ne neb nins fãa b sẽn mak ne nadensã. Rẽ wɛɛngẽ, tʋm-tʋmd a Pɩɛɛr da yeela woto: “Wakat taame tɩ bʋʋd na n sɩng ne Wẽnnaam nebã. La a sã n deng n sɩng ne tõndo, neb nins sẽn ka sakd Wẽnnaam koe-noogã baasg na n yɩɩ bõe?”—1 Pɩɛ. 4:17.
11 “Dũniyã sɛɛb wakatã” sɩngr poor bilf bala, b sɩnga neb nins fãa sẽn yet tɩ b yaa kiris-nebã, rat n yeel tɩ ‘Rĩungã kambã’ ne “wẽng soabã kambã” bʋʋd kaoobo. Tigisgã wakat sẽn ta wã, “b reng” n luba Babilon Kãsengã. Rẽ poor ‘la b yaool’ n tigim Rĩungã kamba. (Mat. 13:30) La wãn to la b wʋk ki wã sẽn makd nin-kãensã wã n sui a Zeova baoorẽ wã? Yaa tɩ rẽ tɛka, b sãnda paam n zĩnda kiris-neb tigingã a Zeova sẽn lebg n luglã pʋgẽ, zĩig ning b sẽn paamd a nonglem la a koglgã, tɩ b kẽer paam n kẽng saasẽ n tɩ reeg b keoorã.
12. Tigisgã na n kaoos n tãaga wakat bʋgo?
12 Bʋ-kaoorã kaoosa wakat a wãna? A Zezi boola bʋ-kaoorã wakat tɩ tigisg “wakate,” la d yaool n miime tɩ tigisg wakat pa rasem a wãn bal ye. (Wil. 14:15, 16) Rẽnd sẽn paam-b zaeebã ned kam fãa bʋʋd kaoob na n kaoos n tãaga yaoolem wakatã saabo. Na n tãaga b ned kam fãa sẽn na n wilg t’a zemsa ne boollã.—Wil. 7:1-4.
13. B sẽn yeel tɩ nadensã kɩtdame tɩ neb lagsdẽ wã võore yaa bõe, la wãn to la b maand sẽn yaa wẽnga?
13 Yaa ãnd dãmb la b sẽn na n yiis Rĩungã pʋgẽ wã, la bõe yĩng tɩ b yeel tɩ b kɩtdame tɩ neb lagsdẽ la tɩ b yaa neb sẽn maand wẽnga? (Mat. 13:41) Hal na maan yʋʋm ka tɛka, kiris-neb ne yʋʋrã tũudmã taoor dãmb tudga neb milyõ rãmba. B zãmsa nebã yɛl sẽn pa sɩda la sẽn paoogd Wẽnnaam. Rẽ la “bõn-lakdsã.” Wala makre, b zãmsa nebã tɩ Wẽnnaam namsda nin-wẽnsã bugum yir wakat sẽn kõn sa yĩnga. B zãmsda nebã me tɩ Wẽnnaam yaa mens a tãabo, baa ne nebã sẽn pa tõe n wʋm a võor tɩ bãmb me pa tõe n bilg a võorã. Tũudmã taoor dãmb kẽer sẽn vɩ to-to wã pa tol n yaa mak-sõng ye. B yõga zood ne dũniyã tɩ rẽ wõnd yoob Wẽnnaam nifẽ. Sãnda me tʋmda tʋʋm kɛg buud toor-toore, tɩ nebã neẽ. (Zak 4:4) Sẽn paase, kiris-neb ne yʋʋrã taoor dãmb mumda b nin tɩ b nebã tʋmd tʋʋm yood buud toor-toore. (Karm-y Ziid 4.) Baa ne rẽ fãa, nebã nifẽ, b maanda wa yaa wẽn-tũudba. Ad Rĩungã kamb sẽn paam tɩ b welg-b ne nin-kãensã la ne b ziri zãmsgã sẽn yaa bõn-lakdsã, b sũy yaa noogo!
14. B sẽn yeel tɩ nadensã yãbdame la b wãbd b yẽnã võor yaa bõe?
14 B sẽn yeel tɩ nadensã na n yãbame la b wãb b yẽnã võor yaa bõe? (Mat. 13:42) Yaa ‘Rĩungã kamb’ sẽn puk “wẽng soabã kamb” bãongo, n kɩt tɩ nebã bãng b ziri wã la b tʋʋm-wẽnsã tɩ zabd-bã, la b sẽn yeel tɩ b yãbdame la b wãbd b yẽnã. Sẽn paase, b yãbda b sẽn pa le paamd tɩ b nebã teend-bã, la b sẽn pa le tõe n soog-b zãng-zãng wa pĩndã.—Karm-y Ezai 65:13, 14.
15. B sẽn yeel tɩ b na n yõoga nadensã bugmã rat n yeelame tɩ bõe?
15 B sẽn yeel tɩ b kɛ nadensã n wʋk n yõog bugmã rat n yeelame tɩ bõe? (Mat. 13:40) Yaa bũmb ning sẽn na n wa paam-bã la b sẽn mak ne bugum yõogrã. Rat n yeelame bal tɩ b na n paama sãoong wakat sẽn ka sat yĩnga. (Wil. 20:14; 21:8) “To-kãsengã” sasa, b na n menesa kiris-neb ne yʋʋrã sẽn yaa wẽn-kɩɩsdbã zãng-zãnga.—Mat. 24:21.
B “na n yãga wa wĩndga”
16, 17. Bõe la a Malaki reng n togs Wẽnnaam doogã yɩlgr wɛɛngẽ, la wãn to la a gomdã pidsg a ye sɩng-yã?
16 Yaa wakat bʋg la b sẽn mak b rãmb ne ki wã “na n yãg wa wĩndga”? (Mat. 13:43) No-rɛɛs a Malaki ra goma Wẽnnaam doogã yɩlgr yelle, n yeel woto: “Yãmb sẽn baood Zusoab ningã na n waa bãmb doogã pʋgẽ tao-tao. Gese, kaoolã koɛɛg soab yãmb sẽn datã watame. La bãmb sã n wa, yaa ãnda n tõe n kaoose? Ãnda n tõe n yalse? Tɩ bõe, bãmb na n yɩɩ wa boaag bugum la sãnfãnde. Bãmb na n zĩnda wa ned sẽn ning wanzuri boaag pʋgẽ. Bãmb na n manega a Levi yagensã wa ned sẽn manegd sãnem ne wanzuri. La bãmb na n zãa kũun n tɩ kõ Zusoabã ne tɩrlem.”—Mal. 3:1-3.
17 Bãngr-gom-kãngã pidsg a ye n sɩng yʋʋmd 1918 soabã tɛka. Wakat kãnga, a Zeova ne “kaoolã koɛɛg soab” sẽn yaa a Zezi Kiristã wa n gesa wẽnd-doogã, rat n yeel tɩ neb nins fãa sẽn yet tɩ b yaa kiris-nebã. A Malaki wilga bũmb ning sẽn na n maan wẽnd-doogã yɩlgr poorã. A Zeova kɩtame t’a yeel woto: “Yãmb na n le tõog n bãnga nin-sõng ne nin-wẽng n bake, la ned sẽn sakd maam ne ned sẽn ka sakd maam n bake.” (Mal. 3:18) B sẽn yɩlg kiris-neb hakɩkã kɩtame tɩ b lebs n paam daood n yãng koɛɛgã moonego, tɩ woto wilgdẽ tɩ tigisgã sɩd sɩnga wakat kãnga.
18. A Daniɛll da wilgame tɩ bõe n na n zĩnd tõnd wakatã?
18 Bãngr-gomd a ye la no-rɛɛs a Daniɛll me ra togs tɩ pidsd rũndã-rũndã. A ra yeela woto: “Yam dãmb na n pɩla wa sa-gãongã. La neb nins sẽn kɩtd tɩ neb wʋsg lebg nin-tɩrsã na n pɩla wa ãds wakat fãa, n ka tol n bas ye.” (Dan. 12:3) Yaa ãnd dãmb la sẽn na n yãg woto fãa wã? Vẽenega, yaa kiris-neb hakɩkã. Bãmb la a Zezi sẽn mak ne ki a yel-bũndã pʋgẽ wã. Rũndã-rũndã, kʋʋn-kãseng sẽn yaa sakdb wa piisi, tɩ b sõorã tar paasgo, n sak n deeg tɩ b sɩd tigimda kiris-neb ne yʋʋrã b sẽn mak ne nadensã toore, n na n wa sãam-ba. Nin-kãensã sẽn saagd n na n wa yɩ neb Rĩungã sẽn na n soogã sakd n sõngda Wẽnnaam Israɛllã neb sẽn ket tẽngã zugã. Woto kɩtame tɩ bãmb me vẽenemã yãgd dũni-kãngã sẽn yaa likã pʋgẽ.—Zak. 8:23; Mat. 5:14-16; Fil. 2:15.
19, 20. Bõe la Rĩungã kamb gũud ne b sũy fãa, la bõe yell la d na n gom sõsg ning sẽn pʋgdã pʋgẽ?
19 ‘Rĩungã kamb’ gũuda keoor ning b sẽn na n wa tɩ reeg saasẽ wã ne b sũy fãa. (Rom 8:18, 19; 1 Kor. 15:53; Fil. 1:21-24) La nananda, b segd n ket n sakda Wẽnnaam la b yãgd wa wĩndga, n yaa toor fasɩ ne “wẽng soaba kamba.” (Mat. 13:38; Wil. 2:10) B sẽn tigimd nadensã toor tɩ d ne rẽ vẽenegã wata ne nafa toɛy-toɛya. La woto sɩd noogda d sũy hal wʋsgo!
20 La bõe n be Rĩungã kamb ne kʋʋn-kãsengã sʋka, rat n yeel tɩ sẽn debd-b saasẽ wã ne neb nins Rĩungã sẽn na n wa sooge, n kɩt tɩ b vɩɩmd tẽngã zug wakat fãa yĩngã sʋka? Sõsg ning sẽn pʋgdã na n leooka sok-kãngã.
[Tẽngr not rãmbã]
^ sull 1 Y sã n dat kibay mak-kãensã zug n paase, bɩ y ges yʋʋmd 2008 sẽoog kiuug pipi raar Gũusg Gasgã seb-neng 20-29.
^ sull 4 Yel-bũn-kãngã pʋgẽ, bʋdbã pa makd koɛɛgã mooneg la karen-biisã maaneg sẽn da na n sõng tɩ neb kẽer wa paam vʋʋsem sõngã zaeebã ye. A Zezi yeelame tɩ bõn-bu-sõma wã b sẽn bʋdã yaa ‘Rĩungã kamba.’ A pa yeel tɩ b na n wa lebga ‘Rĩungã kamb’ ye. Dẽnd pʋʋgã makda dũniyã, tɩ bʋdbã makd Rĩungã kamb zaeebã.
^ sull 8 Ges-y Étude perspicace des Écritures, volim 1, seb-neng 836.
Y tẽrame bɩ?
Ki wã ne nadensã yel-bũndã pʋgẽ, gom-kãensã rat n yeelame tɩ bõe?
• Bõn-bu-sõma wã
• Pʋʋgã bɩ yirã soabã
• Bõn-bu-sõma wã bʋdbã
• Bɛ wã
• Nadensã
• Tigisgã wakatã
• Baoorã
• Yãbrã la yẽnã wãbrã
• Bugmã yõogrã
[Zãmsgã sogsgã]
[Foto rãmba, seb-neng 25]
Yaa yʋʋmd 33 Pãntekotã sasa la b sɩng bõn-bu-sõma wã bʋdbo
[Foto, seb-neng 28]
B wʋkda b sẽn mak b rãmb ne ki wã n suiid a Zeova baoorẽ wã
[Fotã sẽn yitẽ]
Pictorial Archive (Near Eastern History) Est