“Baloki ba Tla Taga Bjalo ka Letšatši”

“Ka nako yeo baloki ba tla taga bjalo ka letšatši mmušong wa Tatago bona.”—MAT. 13:43.

1. Jesu o dirišitše dipapišo bakeng sa go hlalosa dika dife tše di fapa-fapanego tša Mmušo?

JESU KRISTE o ile a diriša diswantšho tše dintši, goba dipapišo, bakeng sa go hlalosa dikarolo tše di fapa-fapanego tša Mmušo. O “[boletše le] mašaba ka go diriša diswantšho. Ka kgonthe o be a sa bolele le bona ge e se ka seswantšho.” (Mat. 13:34) Papišong ya mabapi le go bjala peu ya therešo ya Mmušo, Jesu o gateletše tema yeo e kgathwago ke boemo bja pelo ya motho go amogeleng molaetša, gotee le karolo yeo Jehofa a e kgathago go direng gore go be le kgolo ya moya. (Mar. 4:3-9, 26-29) Papišong e nngwe, Jesu o ile a bolela ka kgolo e makatšago ya dikgahlego tša Mmušo mo lefaseng gaešita le ge kgolo yeo ka mehla e sa bonagale ge e thoma. (Mat. 13:31-33) Go oketša moo, o ile a gatelela gore ga se bohle bao ba arabelago molaetšeng wa Mmušo bao ruri e lego balata bao ba swanelegelago Mmušo woo.—Mat. 13:47-50. *

2. Papišong ya Jesu ya korong le mefoka, ke’ng seo se swantšhetšago peu e botse?

² Lega go le bjalo, e nngwe ya dipapišo tša Jesu e lebiša tlhokomelo go bao ba tlago go buša le Yena Mmušong wa gagwe. Ye gantši e bitšwa papišo ya korong le mefoka gomme e begilwe go Mateo kgaolo 13. Papišong e nngwe, Jesu o re botša gore peu yeo e bjetšwego e swantšhetša “lentšu la mmušo,” papišong ye, o re botša gore peu e botse e swantšhetša selo se sengwe se se fapanego—“barwa ba mmušo.” (Mat. 13:19, 38) Ba ga se balata ba Mmušo eupša, go e na le moo, ke “barwa,” goba bajabohwa, ba Mmušo.—Baroma 8:14-17, bala Bagalatia 4:6, 7.

Papišo ya Korong le Mefoka

3. Hlalosa bothata bjo monna wa mo papišong a lebeletšanego le bjona le kamoo a dirago phetho ya go swaragana le bothata bjoo.

³ Papišo yeo e re: “Mmušo wa magodimo o swantšhitšwe le motho yo a bjetšego peu e botse tšhemong ya gagwe. Eitše ge batho ba robetše, lenaba la gagwe la tla la bjalelela mefoka gare ga korong, la tloga. Ge lekgaba le gola le tšweletša dienywa, mefoka le yona ya tšwelela. Ke moka bahlanka ba mong wa ntlo ba tla ba re go yena, ‘Mong wa rena, na ga se wa bjala peu e botse tšhemong ya gago? Ka gona, go tla bjang gore e be le mefoka?’ A re go bona, ‘Motho wa lenaba ke yena a dirilego se.’ Ba re go yena, ‘Ka gona, na o nyaka gore re tšwe re yo e kgoboketša?’ A re, ‘Aowa; gore e se re ka kotsi, ge le kgoboketša mefoka, la tomola korong gotee le yona. Di leseng di gole gotee go fihla punong; lebakeng la puno ke tla botša babuni ka re, Pele kgobelang mefoka le e tleme dingata gore le e fiše, ke moka le ye le kgobele korong ka ngwakong wa-ka wa polokelo.’”—Mat. 13:24-30.

4. (a) Monna yo go bolelwago ka yena papišong ke mang? (b) Jesu o thomile go bjala peu ye neng, gona ka tsela efe?

⁴ Ke mang monna yo a bjetšego peu e botse tšhemong ya gagwe? Jesu o nea karabo ka morago ge a hlalosetša baapostola ba gagwe, o re: “Mobjadi wa peu e botse ke Morwa wa motho.” (Mat. 13:37) Jesu, “Morwa wa motho,” o  ile a lokišetša tšhemo bakeng sa go bjala nakong ya bodiredi bja gagwe bja lefaseng bja nywaga e meraro le seripa. (Mat. 8:20; 25:31; 26:64) Ka gona, go tloga ka Pentekoste ya 33 C.E. go ya pele, o ile a thoma go bjala peu e botse—“barwa ba mmušo.” Go molaleng gore go bjala mo go ile gwa thoma ge Jesu, bjalo ka moemedi wa Jehofa, a be a tšhollela moya o mokgethwa go barutiwa, ka go rialo a ba tlotša gore e be barwa ba Modimo. * (Dit. 2:33) Peu e botse e ile ya gola gomme ya ba korong e kgolo. Ka gona, morero wa go bjala peu e botse e be e le gore mafelelong go kgoboketšwe palo e feletšego ya bao ba tlago go ba bajabohwa le babuši-gotee le Jesu Mmušong wa gagwe.

5. Lenaba leo go bolelwago ka lona papišong ke mang, gona mefoka e swantšhetša bomang?

⁵ Lenaba ke mang gomme mefoka ke’ng? Jesu o re botša gore lenaba “ke Diabolo.” Mefoka e hlaloswa e le “barwa ba yo kgopo.” (Mat. 13:25, 38, 39) Ka tsela ya kgonthe, mohlomongwe mefoka yeo Jesu a bolelago ka yona e be e le ngwang. Bjang bjo bjo bo bolayago bo swana kudu le korong ge bo sa tšwa go mela. A seswantšho se se swanetšego gakaakang bakeng sa Bakriste ba mankekišane, bao ba ipolelago e le barwa ba Mmušo eupša ba sa tšweletše dienywa tše dibotse! Ruri Bakriste ba ba baikaketši bao ba itirago eka ba latela Kriste ke karolo ya “peu” ya Sathane Diabolo.—Gen. 3:15.

6. Mefoka e thomile go tšwelela neng, gona ke bjang batho ba bego ba “robetše” ka nako yeo?

 ⁶ Bakriste ba bao ba swanago le mefoka ba tšweletše neng? Jesu o itše: “Ge batho ba robetše.” (Mat. 13:25) Se se ile sa direga neng? Re hwetša karabo mantšung a moapostola Paulo ao a a ngwaletšego bagolo ba phuthego ya Efeso a rego: “Ke a tseba gore ka morago ga ge ke tlogile, diphiri tše di gatelelago di tla tsena gare ga lena gomme di ka se sware mohlape ka bonolo, le gona gare ga lena ka noši go tla tsoga banna gomme ba bolela dilo tše di kgopamego gore ba goge barutiwa gore ba ba šale morago.” (Dit. 20:29, 30) O ile a tšwela pele a kgothatša bagolo bao gore ba tšwele pele ba phafogile moyeng. Ka morago ga go hwa ga baapostola, bao e bego e le “thibelo” kgahlanong le bohlanogi, Bakriste ba bantši ba ile ba robala moyeng. (Bala 2 Bathesalonika 2:3, 6-8.) Ye ke nako yeo bohlanogi bjo bogolo bo ilego bja thoma ka yona.

7. Na korong e nngwe e ile ya fetoga mefoka? Hlalosa.

⁷ Jesu ga se a bolela gore korong e tla fetoga mefoka eupša o itše mefoka e ile ya bjalwa gare ga korong. Ka gona, papišo ye ga e bolele ka Bakriste ba kgonthe bao ba tlogelago therešo. Go e na le moo, e bolela ka maiteko ao Sathane a a dirago ka boomo go leka go senya phuthego ya Bokriste ka go tliša batho ba kgopo ka gare ga yona. Nakong ya ge moapostola wa mafelelo, Johane, a be a tšofetše, bohlanogi bjo bo be bo bonala gabotse.—2 Pet. 2:1-3; 1 Joh. 2:18.

“Di Leseng di Gole Gotee go Fihla Punong”

8, 9. (a) Ke ka baka la’ng taelo ya Mong wa ntlo go bahlanka ba gagwe e ile ya ba e kwagalago go batheetši ba Jesu? (b) Mafelelong, ke bjang korong le mefoka di ilego tša gola gotee?

⁸ Bahlanka ba Mong wa ntlo ba mmotša bothata gomme ba mmotšiša gore: “Ka gona, na o nyaka gore re tšwe re yo . . . kgoboketša [mefoka]?” (Mat. 13:27, 28) Karabo ya gagwe e ka bonala e makatša. O ba botša gore ba lese korong le mefoka di gole gotee go fihla nakong ya puno. Taelo yeo e be e ka kwagala go barutiwa ba Jesu. Ba be ba tla lemoga kamoo go lego thata ka gona go bona korong gare ga ngwang. Bao ba nago le tsebo ya tša temo ba be ba tla lemoga le gore medu ya ngwang gantši e ikopanya le medu ya korong. * Ga go makatše ge Mong wa bona a ba laela gore ba lete!

⁹ Ka mo go swanago, go theoša le nywaga-kgolo, dihlotswana tše di fapa-fapanego tša Bojakane di ile tša tšweletša puno e ntši ya mefoka—mathomong e bile magareng ga kereke ya Roma Khatolika le ya Orthodox gomme ka morago e bile magareng ga dihlopha tše mmalwa tša Protestanta tšeo di ilego tša tšwelela. Ka nako e swanago, dipeu tše mmalwa tša korong ya kgonthe di ile tša bjalwa tšhemong ya lefase. Nakong ya ge di sa gola, mong wa ntlo papišong ye o ile a leta ka lebaka le letelele ka go se fele pelo go fihlela nako e kopana ya puno e fihla.

Nako ya Puno Yeo e Bego e Letetšwe ka Nako e Telele

10, 11. (a) Nako ya puno e neng? (b) Ke bjang korong ya seswantšhetšo e tlišwago ngwakong wa polokelo wa Jehofa?

¹⁰ Jesu o re botša gore: “Puno ke bofelo bja tshepedišo ya dilo, gomme babuni ke barongwa.” (Mat. 13:39) Mehleng ya bofelo bja tshepedišo ye e kgopo ya dilo, go thoma nako ya go hlaola—barwa ba Mmušo ba a kgoboketšwa le go hlaolwa go batho bao ba swanago le mefoka. Mabapi le se, moapostola Petro o re botša gore: “Ke nako e beilwego ya gore kahlolo e thome ka ntlo ya Modimo. Bjale ge e ba e thoma ka rena pele, pheletšo ya bao ba sa kwego ditaba tše dibotse tša Modimo e tla ba eng?”—1 Pet. 4:17.

 ¹¹ Nakwana ka morago ga go thoma ga mehla ya bofelo, goba “bofelo bja tshepedišo ya dilo,” go ile gwa thoma kahlolo go bao ba ipolelago gore ke bona Bakriste ba kgonthe—go sa šetšwe gore ruri e be e le “barwa ba mmušo” goba e le “barwa ba yo kgopo.” Sa “pele” Babilona o Mogolo o wele, “ke moka” barwa ba Mmušo ba be ba kgoboketšwa mathomong a puno. (Mat. 13:30) Eupša ke bjang korong ya seswantšhetšo ga bjale e kgobokeletšwago ngwakong wa polokelo wa Jehofa? Ba bao ba bunnwego ba be ba tlišwa phuthegong e tsošološitšwego ya Bokriste, moo ba amogelwago ke Modimo le go šireletšwa ke yena, goba ba hwetša moputso wa bona wa legodimong.

12. Puno e tla tšwela pele ka nako e kae?

¹² Kahlolo e tšea nako e kae? Jesu o boletše ka puno e le ‘lebaka,’ ka gona e tla tšwela pele ka nako e itšego. (Kut. 14:15, 16) Kahlolo ya ditho tša batlotšwa e tšwela pele go fihlela nakong ya bofelo. E tla tšwela pele go ba go fihla ge ba swailwe ka moka.—Kut. 7:1-4.

13. Ke ka tsela efe mefoka e bakago kgopišo, gona ke bjang e hlokago molao?

¹³ Ke bomang bao ba tla tlošwago Mmušong, gona ke bjang ba bakago kgopišo le go dira dilo tša go hloka molao? (Mat. 13:41) Baruti ba Bojakane bao ba swanago le mefoka ba arošitše ba dimilione ka nywaga-kgolo e mentši. Ba dirile se ka dithuto tšeo di hlomphollago Modimo, dilo “tšeo di bakago kgopišo,” tše bjalo ka thuto ya tlhokofatšo ya ka mo go sa felego mollong wa dihele le thuto e gakantšhago le e sa kwagalego ya Boraro Botee. Baetapele ba bantši ba bodumedi ba beetše balatedi ba bona mohlala o mobe ka segwera sa bona sa bohlotlolo le lefase gomme maemong a mangwe le ka boitshwaro bja bona bjo bo gobogilego. (Jak. 4:4) Go oketša moo, Bojakane bo tšwela pele bo dumelela boitshwaro bjo bo sa hlwekago gare ga ditho tša bjona. (Bala Juda 4.) Go sa šetšwe tše ka moka, ba tšwela pele ba bontšha boitsholo bja ka ntle bja bomponeng le bja go se boife Modimo. Ruri barwa ba Mmušo ba a thaba gore ba arogantšwe le ditutuetšo tše bjalo tše di swanago le mefoka le dithuto tše di tletšego kgobogo tšeo di bakago kgopišo!

14. Ke bjang bao ba swanago le mefoka ba llago le go tsikitlanya meno?

¹⁴ Ke bjang bao ba swanago le mefoka ba llago le go tsikitlanya meno? (Mat. 13:42) “Barwa ba yo kgopo” ba tshwenywa ke taba ya gore “barwa ba mmušo” ba pepentšhitše boemo bja moya bjo bo swanago le mpholo bja bao ba swanago le mefoka. E bile ba llela thekgo e fokotšegago ya ditho tša dikereke tša bona, gaešita le go palelwa ga bona ke go ba laola.—Bala Jesaya 65:13, 14.

15. Bao ba swanago le mefoka ba tla fišwa mollong ka kgopolo efe?

¹⁵ Ke ka kgopolo efe mefoka e kgoboketšwago le go fišwa ka mollo? (Mat. 13:40) Se se bolela ka ditla-morago tša mefoka. Go lahlelwa ga bona ka tsela ya seswantšhetšo mollong o laumago go bolela gore ba lebane le phedišo ya sa ruri. (Kut. 20:14; 21:8) Baikaketši, e lego Bakriste bao ba swanago le mefoka, baikgakanyi, ba tla fedišetšwa sa ruri nakong  ya “masetlapelo a magolo.”—Mat. 24:21.

“Ba tla Taga Bjalo ka Letšatši”

16, 17. Maleaki o ile a porofeta’ng mabapi le tempele ya Modimo, gona seo se ile sa thoma go phethagala bjang?

¹⁶ Ke ka kgopolo efe bao ba swanago le korong ba ‘tagago bjalo ka letšatši’? (Mat. 13:43) Mabapi le go hlwekišwa ga tempele ya Modimo, Maleaki o porofetile ka gore: “Ka go akgofa Morena o tlo tla Tempeleng ya gagwe, e lego Yo le mo tsomago, Morongwa wa kgwerano Yo le mmelaelago; bonang o e tla, go bolela Jehofa Tsebaothe. Gomme ke mang e a ka emelago letšatši la go tla ga gagwe, gomme go tlo ema mang go bonaleng ga gagwe? Gobane o tlo ba bjalo ka mollo wa motološi wa digauta, le bjalo ka sešepe sa mohlatswi wa mašela. O tlo tla a dulela go tološa le go sekiša disilifera, o tlo thakgafatša barwa ba Lefi, o tlo ba sekiša bjalo ka digauta le disilifera; ke moo ba tlogo tlišetša Jehofa dihlabelo ka go loka.”—Mal. 3:1-3, PK.

¹⁷ Mehleng ya rena, go bonagala boporofeta bjo bo thomile go phethagala ka 1918 ge Jehofa, gotee le “Morongwa wa kgwerano,” Jesu Kriste, ba be ba hlahloba tempele ya moya. Maleaki o re botša seo se diregago ge go hlwekišwa mo go fetšwa, o re: “Xôna Le tlo buša Lè hlatha moloki le e a sa lokaxo, Lè hlaoloxanya modirêla-Morêna le e a sa Mo direlexo.” (Mal. 3:18) Modiro woo o mogolo wa Bakriste ba therešo bao ba tsošološitšwego o šupa nakong yeo ya go thoma ga puno.

18. Daniele o porofetile gore go tla direga’ng mehleng ya rena?

¹⁸ Ge moporofeta Daniele a bolela e sa le pele ka mehla ya rena, o itše: “[Bao ba nago le temogo, NW] bôná ba tlo taxa byalo ka leratadima; ba ba išitšexo ba bantši xo lokeng ba tlo taxa byalo ka dinaledi ka mehla ya neng le neng.” (Dan. 12:3) Ke bomang ba bao ba tagilego wa leratadima? Ge e le gabotse, ke Bakriste ba tloditšwego, korong ya kgonthe yeo Jesu a boletšego ka yona papišong ya gagwe ya korong le mefoka! Go ‘hlaola le go ntšha’ Bakriste ba mankekišane ba swanago le mefoka go lemogilwe gabotse ka go oketšega mo go tšwelago pele ga lešaba le legolo la bao ba swanago le dinku. Ge ba ikgokaganya le mašaledi a Isiraele ya moya, balata ba ba Mmušo le bona ba dira gore seetša sa bona se bonege lefaseng le leo le lego lefsifsing.—Sak. 8:23; Mat. 5:14-16; Bafil. 2:15.

19, 20. “Barwa ba mmušo” ba letetše’ng ka tetelo-kgolo, gona ke’ng seo re tlago go se ahla-ahla sehlogong se se latelago?

¹⁹ Lehono, “barwa ba mmušo” ba letetše ka tetelo-kgolo go tagafatšwa ga bona, moputso wa legodimong. (Baroma 8:18, 19; 1 Bakor. 15:53; Bafil. 1:21-24) Lega go le bjalo, go ba go fihla ka nako yeo, ba swanetše go dula ba botega, ba tšwele pele ba taga gomme ba se swane le “barwa ba yo kgopo.” (Mat. 13:38; Kut. 2:10) Bohle re ka thaba ka baka la go ba le tokelo ya go bona mafelelo a go ‘hlaola le go ntšha’ mefoka mo ga seswantšhetšo mehleng ya rena!

²⁰ Eupša ke tswalano efe yeo e lego gona magareng ga barwa ba ba Mmušo le lešaba leo le tšwelago pele le gola la bao ba nago le kholofelo ya go phela ka mo go sa felego lefaseng bjalo ka balata ba Mmušo? Sehlogo se se latelago se tla araba potšišo ye.

[Mengwalo ya tlase]

Na o a Gopola?

Papišong ya Jesu ya korong le mefoka, ke’ng seo se emelwago ke dikarolo tše?

• Peu e botse

• Monna yo a bjalago peu

• Go bjalwa ga peu

• Lenaba

• Mefoka

• Nako ya puno

• Ngwako wa polokelo

• Go lla le go tsikitlanya meno

• Mollo o laumago

[Dipotšišo tša Thuto]

[Diswantšho go letlakala 20]

Pentekoste ya 33 C.E. e ile ya swaya mathomo a puno ya peu e botse

[Seswantšho go letlakala 23]

Peu ya seswantšhetšo ga bjale e tlišwa ngwakong wa Jehofa wa polokelo

[Mothopo]

Pictorial Archive (Near Eastern History) Est.