“Saray Matunong et Onsinag a Singa Kaliwawa na Agew”

“Diad satan a panaon, saray matunong et onsinag a singa kaliwawa na agew diad panarian na Ama ra.”​—MAT. 13:43.

1. Antoran ilustrasyon so inusar nen Jesus pian ipaliwawa so nanduruman aspekto na Panarian?

DAKEL so inusar nen Jesu-Kristo ya ilustrasyon odino parabolo pian ipaliwawa so nanduruman aspekto na Panarian. Sikatoy ‘akisalita ed saray totoo diad panamegley na saray ilustrasyon. On, sikatoy naynay a manguusar na ilustrasyon sano mansasalita ed sikara.’ (Mat. 13:34) Diad saramay ilustrasyon nipaakar ed panangisibwag ed bini na katuaan na Panarian, indanet nen Jesus a baleg so nagawaan na kipapasen na puso na sakey a too diad pangawat ed mensahe. Ontan met, indanet to a bayuboan nen Jehova so iyaaligwas ed espiritual. (Mar. 4:3-9, 26-29) Inyilustra to met so makapadinayew ya idakel na totoon ondengel ed mensahe na Panarian anggano ag-itan tampol a naimano. (Mat. 13:31-33) Sakey ni, impabitar to ya aliwan amin ya ondengel ed mensahe et manepeg lan sakop na satan a Panarian.​—Mat. 13:47-50. *

2. Diad samay ilustrasyon nen Jesus nipaakar ed saray trigo tan sisanyas, antoy irerepresenta na maong a bini?

² Balet, walay sakey ed saray ilustrasyon nen Jesus a nipaakar ed panipon ed saramay miuley ed sikato diad Panarian to. Say tawag ed saya et parabolo na saray trigo tan sisanyas, tan nabasa iya ed Mateo kapitulo 13. Tua, wala imay sakey nin ilustrasyon ya inkuan nen Jesus a say binin intanem et “salita na panarian.” Anggaman ontan, diad parabolo na saray trigo tan sisanyas, ipapaimano to a duma so irerepresenta na maong a bini, salanti, saray “ananak na panarian.” (Mat. 13:19, 38) Aliwa irayan sakop na Panarian, noagta sikara so “ananak” odino tomatawir na Panarian.​—Roma 8:14-17; basaen so Galacia 4:6, 7.

Say Ilustrasyon Nipaakar ed Saray Trigo tan Sisanyas

3. Antoy problema na samay too ed ilustrasyon tan antoy solusyon to?

³ Nia imay ilustrasyon: “Say panarian na katawenan et niyaliling ed sakey a toon angisibwag na maong a bini diad uma to. Legan a nanaugip iray totoo, sinmabi so kabusol to tan angitanem met na saray sisanyas diad angitaneman na saray trigo, insan tinmaynan. Sanen tinmubo tan binmuyag la iray trigo, tinmubo met iray sisanyas. Kanian sinmabi iray aripen na akan-abung tan inkuan da ed sikato, ‘Katawan, agta maong a bini so intanem mo ed umam? Akin balet et walaray tinmutubon sisanyas?’ Inkuan to ed sikara, ‘Say nanggawa ed saya et sakey a toon kabusol.’ Inkuan da ed sikato, ‘No ontan, labay mon laen mi iratan a bagoten?’ Inkuan to, ‘Aleg, ta ompan napibagot yo met iray trigo sano babagoten yo iray sisanyas. Paulyan yo iratan a manbansag ya ontubo anggad panag-ani, tan sano panaon lay panag-ani et ibagak ed saray manag-ani, ‘Bagot yo nin unona iray sisanyas tan berber yo iratan tan poolan yo ra, insan yo la tiponen iray trigo diad kamalir ko.’”​—Mat. 13:24-30.

4. (a) Siopa imay too ed ilustrasyon? (b) Kapigan tan panon ya inggapo nen Jesus so impangisibwag ed bini?

⁴ Siopa imay toon angisibwag na maong a bini diad uma to? Inter lanlamang nen Jesus  so ebat ed saray disipulo to: “Say tomatanem na maong a bini et say Anak na too.” (Mat. 13:37) Si Jesus, say “Anak na too,” so angiparaan ed uma legan na talora tan kapalduan taon na impanministeryo to. (Mat. 8:20; 25:31; 26:64) Insan, manlapu la nen Pentecostes 33 C.E., inggapo ton insibwag so maong a bini, salanti, saray “ananak na panarian.” Mapatnag ya agawa iya sanen si Jesus, say representanti nen Jehova, et ginapoan ton inkalbo so masanton espiritu ed saray disipulo, sirin et nilanaan to ra bilang ananak na Dios. * (Gawa 2:33) Say maong a bini et tinmubo tan kalabas na panaon et tinmakken a trigo. Kanian, say gagala na panagsibwag ed maong a bini et pian nakompleto so bilang na saramay tomatawir na Panarian tan manuley a kaiba nen Jesus.

5. Diad samay ilustrasyon, siopa imay kabusol tan siopa iramay sisanyas?

⁵ Siopa imay kabusol, tan siopa iramay sisanyas? Imbaga nen Jesus a say kabusol et “say Diablo.” Saramay sisanyas et deneskribe ya “ananak na samay mauges.” (Mat. 13:25, 38, 39) Say sisanyas a tinukoy nen Jesus et sakey a klase na makasamal a dika a no agni tinmakken et kaparpara na trigo. Talagan dugaruga itan a deskripsion ed saray mankuankuanan a Kristiano! Ibabaga ran ananak ira na Panarian balet ta ag-ira mamapawala na maabig a bunga. Tan ibabaga met na sarayan mansimpisimpitan a Kristiano a papatumbok  ira nen Kristo balet diad tua et kabiangan ira na “ilalak” nen Satanas a Diablo.​—Gen. 3:15.

6. Kapigan intanem iray sisanyas, tan akin a nibagan “nanaugip” iray totoo ed saman a panaon?

⁶ Kapigan intanem iray simbolikon sisanyas? “Legan a nanaugip iray totoo,” kuan nen Jesus. (Mat. 13:25) Kapigan iya agawa? Nabasa tayoy ebat ed imbaga nen apostol Pablo diad saray mamatatken ed Efeso: “Amtak a sano anggapo ak la et onloob ed pegley yo iray masesebeg a lobo tan agda kasian so pulok, tan diad limog yo et walaray lalakin ontalindeg tan mansalita na pikewet iran bengatla pian tangguyoren iray disipulo ya ontumbok ed sikara.” (Gawa 20:29, 30) Insan to pinaseseg iraman a mamatatken a mansiansian aliing ed espiritual. ‘Inamper’ na saray apostol so apostasya, balet sanen naugip la ra’d patey, dakel a Kristiano so akaugip met ed espiritual. (Basaen so 2 Tesalonica 2:3, 6-8. *) Ditan la ginmapo so malaknab ya apostasya.

7. Kasin nagmaliw a sisanyas so arum a trigo? Ipaliwawa.

⁷ Ag-imbaga nen Jesus a saray trigo et magmaliw a sisanyas, noagta imbaga ton saray sisanyas et intanem ed angitaneman na saray trigo. Kanian, aliwan saray tuan Kristiano a sinmian ed katuaan so tutukoyen na sayan ilustrasyon. Imbes, say tutukoyen na saya et say pamapasya nen Satanas a deralen so Kristianon kongregasyon diad impangiloob to ditan na marelmeng a totoo. Sanen masiken la so unor ya apostol a si Juan, linmaknab lan tuloy so apostasya.​—2 Ped. 2:1-3; 1 Juan 2:18.

“Paulyan Yo Iratan a Manbansag ya Ontubo Anggad Panag-Ani”

8, 9. (a) Akin ya atalosan na saray katongtong nen Jesus so instruksion na Katawan ed saray aripen to? (b) Bilang kasumpalan na samay ilustrasyon, panon a nambansag a tinmubo iray trigo tan sisanyas?

⁸ Impaamta na saray aripen na Katawan so problema tan oniay intepet da: “No ontan, labay mon laen mi [iray sisanyas] a bagoten?” (Mat. 13:27, 28) Singa makapabigla so ebat na Katawan ta inkuan ton paulyanan da labat a manbansag ya ontubo iray trigo tan sisanyas anggad panaon na panag-ani. Seguradon atalosan na saray disipulo nen Jesus no akin ya ontan so instruksion. Amta ran mairap a nibiig so trigo ed sisanyas. Amta met na saramay walaan na eksperiensya’d panagdalus a saray lamut na sisanyas et maslak ya ompotipot ed lamut na trigo. * Kampega lan ingganggan na Katawan iray aripen to a manalagar ni ra!

⁹ Mipadpara, diad kalabas na saray siglo, saray nanduruman sekta na Kakristianoan et amawala na dakerakel a sisanyas​—unona et nanlapud Romano Katoliko tan simbaan na Orthodox tan insan diad nanduruman grupo na saray Protestanti. Kaleganan met na saya, walaray pigaran bini na tuan trigo ya insibwag ed interon mundo. Diad samay ilustrasyon, maan-anos ya inalagar na Katawan so mabayag ya itubo tan ibaleg na saray trigo tan sisanyas ya anggad onsabi so antikey a panaon na panag-ani.

Say Abayag lan Tatalaranan a Panaon na Panag-ani

10, 11. (a) Kapigan so panaon na panag-ani? (b) Panon a natitipon ed kamalir nen Jehova iray simbolikon trigo?

¹⁰ Oniay inkuan nen Jesus: “Say panag-ani et say sampot a panaon na sayan sistema na mundo, tan saray manag-ani et saray anghel.” (Mat. 13:39) Diad kaunoran iran agew na sayan mauges a sistema na mundo, walay nagawan panangibiig​—tiponen iray ananak na Panarian tan ibiig ira ed saray simbolikon sisanyas. Nipaakar ed saya et oniay imbaga nen apostol Pedro: “Saya la so aturon panaon pian  onggapo so panangukom diad abung na Dios. No onggapo itan ed sikatayo, antoy pansumpalan na saramay ag-ontutulok ed maong a balita na Dios?”​—1 Ped. 4:17.

¹¹ Kayarin tuloy na inggapo na kaunoran iran agew, odino say “sampot a panaon na sayan sistema na mundo,” ginmapo so panangukom ed saray mangibabaga a tua iran Kristiano​—no talaga kasin sikara et “ananak na panarian” odino “ananak na samay mauges.” Diad gapo na panag-ani, “unona” et nagba so Makapanyarin Babilonia, “insan” tinipon iray ananak na Panarian. (Mat. 13:30) Balet panon a natitipon natan ed kamalir nen Jehova iray simbolikon trigo? Sarayan trigon inani et tinipon ed organisadon Kristianon kongregasyon, a ditan et aabobonan tan sasalimbengan ira na Dios, tan saramay inatey la et naawat da lay tumang da ed tawen.

12. Anggad kapigan so panag-ani?

¹² Kaunongan kabayag so panangukom? Tinukoy iya nen Jesus bilang “panaon” na panag-ani, kanian mantultuloy iya sirin ed sakey a panat na panaon. (Apo. 14:15, 16) Say panangukom ed kada membro na alanaan et kaleganay panaon na anggaan. Mantultuloy iya anggad naawat day unor a tatak da.​—Apo. 7:1-4.

13. Panon a pansesengegan na pakatiroran iray sisanyas, tan panon iran manggagawa na kaugsan?

¹³ Siopa ray ‘ibiig manlapud Panarian,’ tan panon iran pansengegan na pakatiroran tan manggawa na kaugsan? (Mat. 13:41) Diad dakel lan siglo et minilyon lay nibalang na simbolikon sisanyas a klero na Kakristianoan. Ginawa da iya panamegley na bangabangat ya agmamapagalang ed Dios, saray “bengatlan pakatiroran,” a singa say doktrina na andi-anggaan a panamairap ed impierno tan say makapawetwet a doktrina na Trinidad. Makapuy so ipapanengneng ya alimbawa na dakel iran lider na relihyon lapud pikakaaro ra ed mundo tan say kabibilay na arum ed sikara et mabanday tan imoral. (Sant. 4:4) Ontan met, onloloor so panangonsinti ra ed imoral a kagagawa na saray membro ra. (Basaen so Judas 4.) Anggaman ontan, siansia nin mankuankuanan a masanto tan makadios ira. Makapaliket ta saray ananak na Panarian et agmibibiang ed ontan iran kagagawa tan ed palson bangabangat a pakatiroran!

14. Akin a nibagan mannangis tan manngalatenget so ngipen na saray simbolikon sisanyas?

¹⁴ Akin a nibagan mannangis tan manngalatenget so ngipen na saray simbolikon sisanyas? (Mat. 13:42) Saray “ananak na samay mauges” et nagogonigon lapud iwawalwal na “ananak na panarian” so makasamal ya impluensya tan bangat na sarayan simbolikon sisanyas. Nagogonigon met ira lapud agla ra tanton susuportaan tan papanisiaan na saray membro na simbaan da.​—Basaen so Isaias 65:13, 14.

15. Antoy kabaliksan na pambagot tan pamool ed saray sisanyas?

¹⁵ Antoy kabaliksan na pambagot tan pamool ed saray sisanyas? (Mat. 13:40) Ontutukoy iya ed pansumpalan da. Say simbolikon pangibuntok ed sikara diad manliob a hurno  et mangipapabitar ed permanentin kaderal da. (Apo. 20:14; 21:8) Saray mankuankuanan tan impostor a Kristiano et sigpot a naderal ed “baleg a kairapan.”​—Mat. 24:21.

Sikaray “Onsinag a Singa Kaliwawa na Agew”

16, 17. Antoy impropesiya nen Malaquias nipaakar ed espiritual a templo na Dios, tan kapigan so kasumpalan na saya?

¹⁶ Kapigan “onsinag a singa kaliwawa na agew” iray simbolikon trigo? (Mat. 13:43) Oniay impropesiya nen Malaquias nipaakar ed panlinis ed templo na Dios: “Say Katawan ya anapen yo, onsabi naani a bigla ed templo to; et say igaganggan na sipan, a sikato so pilalek yo, nia, onsabi, kuan nen Jehova na saray ehersito. Balet siopa so makayari a mangitepel ed agew ya isabi to? Tan siopa naani so makaalagey sano ompatnag? Ta sikato so singa say apoy na manggogol, tan singa sabon na managpakapal na abel. Et sikato onyurong naani a singa say manlinis tan manggogol na pilak, et gogolan to naani so saray anak nen Levi, et linisan to ra naani a singa say balitok tan say pilak; et sikara manbagat ira naani ed Jehova na saray bagat ed inkatunong.”​—Mal. 3:1-3.

¹⁷ Diad modernon panaon, mapatnag a say kasumpalan na sayan propesiya et ginmapo nen 1918, sanen say espiritual a templo et ininspeksyon nen Jehova, a kaiba to so “igaganggan na sipan” a si Jesu-Kristo. Oniay inkuan nen Malaquias a nagawa sano nakompleto so panlinis: ‘Dia ed ontan et nibiig yo naani so matunong ed marelmeng, say manlilingkor ed Dios tan say agmanlilingkor ed sikato.’ (Mal. 3:18) Say baleg ya inaligwasan na kimey na saray tuan Kristiano et pakapatnagan a ginmapo so panag-ani diad saman a panaon.

18. Antoy impropesiya nen Daniel a nagawa ed panaon tayo?

¹⁸ Oniay impropesiya nen Daniel a nagawa ed panaon tayo: “Saray makabat onsinag ira naani a singa sinag na tawen; et saray mangipawit na dakerakel ed inkatunong singa ra naani saray bitewen ed ando lan ando lawas.” (Dan. 12:3) Siopa irayay onsinag a masmasnag? Anggapoy arum noag saray alanaan a Kristiano, say peteg a trigo a tinukoy nen Jesus ed ilustrasyon to! Say ‘impangibiig’ ed saray simbolikon sisanyas et malinew ya atalosan na baleg ya ulop na saray kinmarnero, a natan et lalon ondarakel ni. Diad panusuporta ra ed saray nakekeraan a kabiangan na espiritual ya Israel, isisindag met na sarayan magmaliw a sakop na Panarian so liwawa ra ed sayan ambilunget a mundo.​—Zac. 8:23; Mat. 5:14-16; Fil. 2:15.

19, 20. Anto so magunaet a tatalaranan na saray “ananak na panarian,” tan antoy aralen tayo ed ontumbok ya artikulo?

¹⁹ Diad sayan panaon, magunaet a tatalaranan na saray “ananak na Panarian” so maglorian tumang da ed tawen. (Roma 8:18, 19; 1 Cor. 15:53; Fil. 1:21-24) Balet, nepeg a mansiansia iran matoor anggad isabi na satan a panaon, a mantultuloy iran onsinag a maliwliwawa, tan paneknekan dan duma ira ed saray “ananak na samay mauges.” (Mat. 13:38; Apo. 2:10) Agaylay liket tayo ta ‘onsisinag a maliwliwawa’ iray “ananak na panarian”!

²⁰ Balet, panon a nibagan saksakey a pulok irayan ananak na Panarian tan say lalon ondarakel a baleg ya ulop, a maniilalon manbilay ed andi-anggaan diad dalin bilang sakop na Panarian? Ebatan itan na ontumbok ya artikulo.

[Saray paimano ed leksab]

Nanonotan Mo Ni?

Diad samay ilustrasyon nen Jesus nipaakar ed trigo tan sisanyas, antoy tutukoyen na saraya?

• Say maong a bini

• Say toon angisibwag ed bini

• Say panagsibwag ed bini

• Say kabusol

• Saray sisanyas

• Say panaon na panag-ani

• Say kamalir

• Say pannangis tan panngalatenget na ngipen

• Say manliob a hurno

[Tepetepet Parad Panagaral]

[Saray litrato ed pahina 20]

Ginmapo so impangisibwag ed maong a bini nen Pentecostes 33 C.E.

[Litrato ed pahina 23]

Say simbolikon trigo et titiponen la natan ed kamalir nen Jehova

[Credit Line]

Pictorial Archive (Near Eastern History) Est.